1. Anni nga iddanama i niyawa ni Jehova ta nittam?

 NIDDAN ittam ni Jehova tu makapabbaw nga iddanama—i mattolay tu mannanayun. Magiddanama i karuan nga mattolay ira tu mannanayun ta langi bilang imortal nga espiritu. (1 Cor. 15:50, 53) Magaru gapa i magiddanama nga mattolay tu mannanayun ta davvun nu sitaw perfekto i gawa-gawayyadda anna magayayya ira. (Nep. 21:3, 4) Ta langi man onu ta davvun i iddanamattam nga pattolayan tu mannanayun, kuruga tagibalorattam i iddanama tam.

2. Ta anni nga nakabase i iddanama tam, anna ngatta makagi tam yatun?

² Ta Biblia, i uvovug nga “iddanama,” kebalinan na i “pagekspekta nga mesimmu i mapia ira nga gannug.” Sierto i iddanama tam para ta mappange megafu ta naggafu yatun kani Jehova. (Roma 15:13) Ammu tam nu anni i nipromesa na anna ammu tam gapa nga kanayun na nga tuppalan i kinagi na. (Num. 23:19) Kumbinsidu ittam nga kakayà ni Jehova anna egga i pakapangngua na nga tuppalan ngamin i kinagi na nga kuan na. Ari gafu tu nebase i iddanama tam ta imahinasion onu ta kayà tam nga mesimmu ta mappange. Nakabase yatun ta ebidensia anna realidad.

3. Anni i gigiammuattam taw nga artikulo? (Salmo 27:14)

³ Iddeddukan ittam na Yama tam ta langi anna ikaya na nga mattalo onu magiddanama ittam ta nisa. (Bibbigan i Salmo 27:14.) Nu masikan i pagiddanama tam kani Jehova, mawayya tam nga attamman i kapurueba ira. Magutu anna magayayya ittam gapa nga arubangan i mappange. Gigiammuattam nu kunnasi ittam nga protektan na iddanama tam. Ngem ammuattam labbi nu ngatta megitta i iddanama tam ta angkla anna ta helmet. Paguruvovugattam gapa nu kunnasi tam pasikannan i iddanama tam.

4. Ngatta negitta ta angkla i iddanama? (Hebreo 6:19)

⁴ Ta tura ni Pablo ta Hebreo ira, nigitta na ta angkla i iddanama tam. (Bibbigan i Hebreo 6:19.) Kanayun nga mabbiahe si Pablo ta bebay. Yari tu ammu na nga meyusa i angkla ira tapenu ari nga mepaddag i barko. Mittan, agga-takay yayya ta tadday nga barko tapus egga i masiki-sikan nga bagiu. Habang mabbagiu, nasingan na nga nitabbo na bugador ira i angkla ta danum tapenu ari nga medompi i barko ta delikadu ira nga dadda. (King. 27:29, 39-41) Gitta na angkla, patuyaggan ittam na iddanama tam tapenu ari ittam nga meyarayyu kani Jehova nu meparubang ittam ta problema ira nga kagitta na masiki-sikan nga bagiu. Makoffun i iddanama tam tapenu kalmadu ittam laman maski egga i problema. Kumbinsidu ittam gare nga mappipia gabbalaman saw i situasion. Daddammattam nga kinagi ngana dati ni Jesus nga mapeppersigi ittam. (Juan 15:20) Yari tu makoffun i pannono tam tu mapia ta promesa ira ni Jehova tapenu tulu-tuloy ittam nga makapasserbi ta nisa.

5. Kunnasi nga nakoffun kani Jesus i iddanama turi ta matay ngana yayya?

⁵ Nakoffun kani Jesus i iddanama tapenu mabbalin lagapa tu matalo maski nu ammu na nga kitattaki saw i ipapatay na. Ta aggaw na Pentecostes 33 C.E., nipakoli ni apostol Pedro i profesiya ta libru na Salmo. Nadeskriba tatun nu kunnasi kakalmadu anna kadakal i pattalo ni Jesus: “Matolay i baggì nga sigga-iddanama, ta ariam-mà pagurayan ta dian na natay ira; anna ariam-mu noka nga ipamavulun tu mavunno yoye i masanto nga aripam-mu. . . . Ay sangaw nu maddian ngà ta arubang mu, pagayaya i em-mu niakan iyaluvu.” (King. 2:25-28; Sal. 16:8-11) Maski ammu ni Jesus nga matay yayya, masikan i pagiddanama na nga paginnolayan yayya na Dios anna magayayya yayya nga makavulu uli i Yama na ta langi.​—Heb. 12:2, 3.

6. Anni i nakagi na tadday nga brother meyannung ta iddanama?

⁶ Aru nga wawwaragi tam i nakapagattam megafu ta iddanama tam. Tadday tatun si Leonard Chinn nga matalo nga brother nga taga-England. Durante ta World War I, nefuku yayya megafu ta nammanaki yayya nga massuddalu. Dua vulan nga nibartolina da yayya. Kabalin natun, finersa da yayya nga mattrabahu tu madaddammo. “I naekspiriensà ira,” nitura na, “i nangipatalatto niakan ta balor na iddanama tapenu mawayya tam i magattam. Ammu tam i ehemplo ni Jesus, na apostol ira, anna na profeta ira, kunnari gapa i nabala-balor nga promesa ira ta Biblia. Mangiyawa danatun tu daka-dakal nga iddanama para ta mappange anna patuyaggan ittam danatun nga magattam.” Nabbalin tu angkla kani Leonard i iddanama anna awayya na gapa nga mabbalin tu angkla tam yatun.

7. Kunnasi nga mapasikan na kapurueba ira i iddanama tam? (Roma 5:3-5; Santiago 1:12)

⁷ Nu attammattam i kapurueba ira anna maekspiriensa tam i panguffun ni Jehova, matageno tam nga apruban na ittam. Mas nga pasikannan natun i iddanama tam. (Bibbigan i Roma 5:3-5; Santiago 1:12.) Yari tu mas masikan ngana sangawe i iddanama tam anne turi ta ollu nga inalawa tam i makasta nga balita. Ikaya ni Satanas nga maffu ittam na kapurueba ira, ngem ta uffun ni Jehova, maattammattam i kada tadday tatun.

8. Ngatta negitta ta tadday nga helmet i iddanama? (1 Tesalonica 5:8)

⁸ Nikumpara gapa na Biblia i iddanama tam ta tadday nga helmet onu panakkag ta ulu. (Bibbigan i 1 Tesalonica 5:8.) Mangusa tu helmet i tadday nga suddalu tapenu protektan  i ulu na ta panganna na kalaban na ira. Ta espiritual nga pakillabattam, kawagattam gapa nga protektan i nono tam kontra ta pangatake ira ni Satanas. Napakaru i usan na tapenu tentan ittam anna parittan i appana-panono tam. Protektan na helmet i ulu na suddalu. Protektan gapa na iddanama tam i appana-panono tam tapenu mattalupaddian ittam nga matalo kani Jehova.

9. Anni i resulta na nu awan tu iddanama na totolay?

⁹ Makapaddesision ittam tu masirib megafu ta iddanama tam nga mattolay tu mannanayun. Ngem nu makkafi i iddanama tam anna ipamavuluttam nga i nepattaggan ira nga appana-panono i mangontrol ta nono tam, awayya na nga makattamattam i iddanama tam nga mattolay tu mannanayun. Ikonsidera tam i nesimmu ta karuan ira nga Cristiano gari nga taga-Corinto. Nawawadda i pangurug da ta importante nga promesa na Dios—i iddanama ta paginnolay. (1 Cor. 15:12) Nitura ni Pablo nga danuri ari nga mangurug ta paginnolay ay mattolay laman ira tapenu pannuan i pakkaraga da. (1 Cor. 15:32) Sangawe, aru i ari nga magiddanama ta promesa ira na Dios. Yari tu kuadda lagapa i ikaya da tapenu mabbalin ira tu magayayya. Ngem neruma ittam megafu ta mattalo ittam ta promesa ira na Dios ta mappange. Megitta i iddanama tam ta helmet nga protektan na i appana-panono tam. Uffunan gapa ittam natun tapenu ari tu baggi tam laman i agga-nono tam megafu ta makadaral yatun ta relasiottam kani Jehova.​—1 Cor. 15:33, 34.

10. Kunnasi ittam maprotektan na iddanama kontra ta falsu ira nga parrasa-rason?

¹⁰ Maprotektan ittam na helmet na iddanama tapenu ari tam nga nonopan nga ari tam vuluvuga mapagayayya si Jehova. Angngarigan na, awayya na tu irason na karuan: ‘Ari ngà mattolay tu mannanayun. Ari ngà mepappangngo tatun. Ariakku vuluvuga makua i ipakua na Dios niakan.’ Daddamman nga kunnatun gabbalaman nga arrasa-rason i inusa na falsu nga kofun ni Job nga si Elifaz. Kinagi ni Elifaz: “Egga kari i mortal nga tolay nga marenu?” Kinagi na paga meyannung ta Dios: “Innammu! Awan tu pattalo na ta anghel na ira, anna maski i langi ay ari tu marenu ta paningan na.” (Job 15:14, 15) Kinaladdug danatun! Daddammammu nga ikaya ni Satanas nga kunnatun i nonopammu. Ammu na nga nu agga-nono mu yatun, sisinu nga mawawammu i iddanamam. Ariammu nakuan gafu kurugan danatun nga kinaladdug anna maffokus ka ta promesa ira ni Jehova. Ariammu vuluvuga paddudan nga ikaya na nga mattolay ka tu mannanayun anna uffunan naka tapenu madde mu yatun.​—1 Tim. 2:3, 4.

11. Ngatta pasensiattam nakuan nga innaggan nga matuppal i iddanama tam?

¹¹ Ari tu kanayun nga mabi nga pattalupaddianan nga masikan i iddanama tam. Baka mofu i pasensia tam nga maginnag ta pangituppal na Dios ta promesa na ira. Ngem mannanayun si Jehova. I abbattattam nga apipiddu nga tiempo ay abababba laman ta nisa. (2 Ped. 3:8, 9) Kapianan noka i pangituppal na ta promesa na ira. Ngem baka ari yayya nga magguyu ta tiempo nga ekspektattam. Anni gafu i makoffun ta nittam tapenu mattalupaddian nga masikan i iddanama tam habang pasensiattam nga innaggan i pangituppal na Dios ta promesa na ira?​—Sant. 5:7, 8.

12. Base ta Hebreo 11:1, 6, anni i efekto na pangurug ta iddanama?

¹² Ari vuluvuga makkafi i iddanama tam nu mattalupaddian ittam nga madukko kani Jehova, megafu ta yayya i mangituppal ta iddanama tam. Kakurugan na, kinagi na Biblia nga tapenu mapeggan ittam tu iddanama, mawag tu kurugattam  nga egga i Dios anna ‘bala-balattan na danuri i magaleg sa.’ (Bibbigan i Hebreo 11:1, 6.) Nu mas nga kuru-kurug ta nittam si Jehova, mas makkomfiansa ittam nga tuppalan na ngamin i nipromesa na. Ikonsidera tam i praktikal ira nga makua tam tapenu mas maddukko i relasiottam kani Jehova anna mapattalupaddiattam nga masikan i iddanama tam.

13. Kunnasi ittam mabbalin tu madukko ta Dios?

¹³ Makimallo kani Jehova anna bibbigan i Uvovug na. Maski paga ari tam nga masingan si Jehova, awayya tam i mabbalin tu madukko ta nisa. Makibbida tam yayya gukaban na pakimallo anna makkomfiansa ittam nga ginnan na ittam. (Jer. 29:11, 12) Maginna tam gapa i Dios nu bibbigattam i Uvovug na anna nonopattam tu mapia yatun. Nu mabibbig tam i pinanguffun ni Jehova ta matalo ira ta nisa tagga, mas massikan i pagiddanama tam. Ngamin nga netura ta Uvovug na Dios ay “netura tapenu matudduan ittam nga magiddanama gafu ta pappasa-pasensia anna kapasikan na nono nga maggafu ta Masanto nga Tura.”​—Roma 15:4.

14. Ngatta pannonopattam tu mapia i kingngua ngana ira ni Jehova para ta tanakuan?

¹⁴ Pannonopan tu mapia nu kunnasi nga sinuppal ni Jehova i promesa na ira. Nonopan i kingngua na Dios para kada Abraham anna Sara. Bako anna lakay ngana ira yayya nga ari ngana ira nga makka-ana. Ngem nipromesa na Dios nga makka-ana ira. (Gen. 18:10) Anni i reaksion ni Abraham? Kagian na Biblia: ‘Nangurug si Abraham nga mabbalin yayya tu yama na aru nga nasa-nasion.’ (Roma 4:18) Maski nu para ta tolay ay gitta na imposible ngana nga makka-ana si Abraham, komfiansa lagapa yayya nga tuppalan ni Jehova i nipromesa na. Nesimmu i iniddanaman natun nga matalo nga lalaki. (Roma 4:19-21) Magigiammu tam ta kuddanatun nga istoria ta Biblia nga kanayun ittam nga makapattalo nga tuppalan  ni Jehova i promesa na ira, maski nu gitta na imposible yatun para ta nittam.

15. Ngatta pannonopattam tu mapia i kingngua ira na Dios para ta nittam?

¹⁵ Nonopan tu mapia i kingngua ira ni Jehova para ta nikaw. Nonopan nu anni ngana yari ira i nammakapiammu megafu ta sinuppal na Dios i promesa na ira ta Uvovug na. Angngarigan na, nipromesa ni Jesus nga iyawa nikaw na Yama na i pakawagammu ira. (Mat. 6:32, 33) Nipasiguradu gapa ni Jesus ta nikaw nga iddan naka ni Jehova tu masanto nga espiritu na nu kiddawammu yatun. (Luc. 11:13) Kanayun nga tuttuppalan ni Jehova danatun nga promesa na. Baka egga paga ira i tanakuan nga manono mu nga promesa nga tuttuppalan na para ta nikaw. Angngarigan na, ipromesa na nga pakoman naka, banna-bannayan naka, anna pakanan naka ta espiritual. (Mat. 6:14; 24:45; 2 Cor. 1:3) Nu pannonopammu gafu nu anni ngana ira i nakua na Dios para ta nikaw, mas massikan i pagiddanamam ta kuan na ira para ta nikaw ta mappange.

16. Ngatta nabala-balor nga regalu i iddanama?

¹⁶ Nabala-balor nga regalu maggafu ta Dios i iddanama tam nga mattolay tu mannanayun. Kakayà tam ngana nga mesimmu yatun nga makakkasta nga mappange anna siguradu ittam nga talaga mesimmu yatun. I iddanama tam ay masserbi bilang angkla tam. Patuyaggan ittam natun tapenu maattammattam i kapurueba ira, i panara-darum, anna maski i patay. Masserbi gapa yatun bilang helmet tam. Protektan natun i appana-panono tam tapenu malillitattam i marake anna makua tam i mapia. Megafu gapa ta iddanama tam nga nebase ta Biblia, mas maddukko ittam ta Dios anna matageno tam nga talaga iddeddu na ittam. Dakal gafu i pammakapianattam nu pattalupaddianattam nga masikan i iddanama tam.

17. Ngatta mamagayayya ta nittam i iddanama tam?

¹⁷ Kunnaw i nipagaram ni apostol Pablo ta tura na ta taga-Roma ira: “Mappalupagia kamu megafu ta pagiddanama nu.” (Roma 12:12) Magayayya si Pablo megafu ta siguradu yayya nga nu mattalupaddian yayya nga matalo, mattolay noka yayya tu mannanayun ta langi. Magayayya ittam gapa ta iddanama tam megafu ta siguradu ittam nga tuppalan noka ni Jehova i promesa na ira. Nitura na salmista: “Mapalag [“magayayya,” NW ] i tolay nga . . . i pagiddanaman na ay i YAFU nga Dios na . . . I netabba na ay kanayun na nga parulattan.”​—Sal. 146:5, 6.