1. Anni i ‘espiritual nga kawagattam,’ anna anni i koneksion natun ta pagayayya tam?

 I KURUG nga pagayayya ay ari laman tu basta paggala-galo tapus mawawan balaman. Posible nga mabbayag yatun ta interu nga pattolay. Anni gafu i kuammu tapenu mabbalin tu kurug nga magayayya? Kinagi ni Jesus ta Sermon na ta Vukig: “Magayayya danuri sigga-nono ta espiritual nga kawagadda.” (Mat. 5:3, NW ) Ammu na nga naparatu i totolay nga kakayà da nga makilala anna dayawan i Namaratu ta nira—si Jehova nga Dios. Yatun i ‘espiritual nga kawagattam.’ Gafu ta si Jehova ay “magayayya nga Dios,” puede gapa nga mabbalin tu magayayya danuri maddayaw ta nisa.​—1 Tim. 1:11, NW.

2-3. (a) Base kani Jesus, sinni paga ira i puede nga mabbalin tu magayayya? (b) Anni i gigiammuattam taw nga artikulo, anna ngatta kawagan yatun?

² Mabbalin kari laman ittam tu magayayya nu makasta i situasiottam? Ari. Ta sermon ni Jesus, egga i kinagi na nga kakkadda-kaddag. Anni yatun? Puede lagapa mabbalin tu magayayya “danuri maraddam.” Ngatta maraddam ira? Makokkonsensia gare ira ta nakaliwatadda onu madammo i problema da. Kinagi na gapa nga puede nga mabbalin tu magayayya maski “danuri i madarum gafu ta pangngua da ta ikaya na Dios” onu danuri ‘mepasiranan’ ta pabbalidda tu disipulo ni Cristo. (Mat. 5:4, 10, 11) Ngem posible kari nga mabbalin tu kurug nga magayayya ta kunnatun ira nga situasion?

³ Ituttuddu ni Jesus nga ari tu nakadepende ta situasiottam i pagayayya tam. Kinagi na nga mawag tu mala tam i ngamin nga espiritual nga kawagattam anna umaranni ittam ta Dios. (Sant. 4:8) Kunnasi tam nga makua yatun? Taw nga artikulo, gigiammuattam i tallu nga dakkua tapenu mabbalin tu kurug nga magayayya.

4. Anni i ollu nga dakkua tapenu mabbalin tu kurug nga magayayya? (Salmo 1:1-3)

⁴ OLLU NGA DAKKUA: Tapenu mabbalin tu kurug nga magayayya, mawag tam i kuman ta espiritual. Mawag na totolay anna ayam ira nga kuman tu literal nga makan tapenu mattolay. Ngem totolay laman i makawayya nga kuman ta espiritual. Kawagattam yatun, yari tu kinagi ni Jesus: “Ari laman tu pan i pakkatolay na tolay, ngem mawag na ngamin i uvovug nga maggafu ta Dios” nga Jehova. (Mat. 4:4) Ari tam nakuan pappasan i tangaggaw nga ari ittam nakakan tu espiritual nga makan maggafu ta nabalor nga Uvovug na Dios, i Biblia. Kinagi na salmista: ‘Magayayya i tolay nga mamarulo ta Dob na YAFU; aggaw-gabi patalattappan na yaw ta napafutu.’—Bibbigan i Salmo 1:1-3.

5-6. (a) Anni ira i magigiammu tam ta Biblia? (b) Kunnasi ittam maduffunan na pabbibbig tu Biblia?

⁵ Megafu ta aya nittam ni Jehova, nipasingan na ta Biblia i mawag nga kuattam tapenu magayayya i pattoletam. Magigiammu tam tatun i gakkag na para ta pattoletam anna i kuattam tapenu maddukko ta nisa anna pakoman na i liwi-liwa tam. Magigiammu tam gapa tatun i makapabbaw ira nga iddanama nga nipromesa na para ta mappange. (Jer. 29:11) Kuruga makapagayayya ta nittam yaw ira nga kinakurug nga nagigiammu tam ta Biblia!

⁶ Ammu tam nga napannuan i Biblia tu makoffun ira nga tabarang para ta kada aggaw nga pattolay. Nu tuttulattam yatun ira nga tabarang, mabbalin ittam tu magayayya. Nu makkafi i nono mu megafu ta problema ira, iddammu tu mas aru nga tiempo i pabbibbig ta Uvovug ni Jehova anna i pannono tu mapia  tatun. Kinagi ni Jesus: “Magayayya danuri maggigginna ta uvovug na Dios anna mattuttuppal tatun!”—Luc. 11:28, NW.

7. Anni i kuammu tapenu mabenefisiowakka tu mapia ta pabbibbig tu Uvovug na Dios?

⁷ Ari ka magapa-apura nu bibbigammu i Uvovug na Dios tapenu ma-enjoy mu yatun. Nonopammu yaw: Nilutuan naka na tadday nga tolay tu faboritom nga iyekan. Ngem megafu ta magapa-apura ka onu egga tanakuan nga nononopammu, basta sinillummu i kanammu maski nu ari mu paga kuruga tinamtaman tu mapia yatun. Kabalimmu kiminan, nanono mu nu ngatta pinaspasammu yatun. Mas makasta nu sinisinu mu nakuan i kiminan tapenu na-enjoy mu i kada sampal. Kunnatun gapa nu bibbigammu i Biblia. Nu karuan, baka magapa-apura ka nga mabbibbig yayya nga ari mu ngana ma-enjoy i mensahe natun. Ari mu nakuan gafu nga paspasan nga bibbigan i Uvovug na Dios; imajinammu i bibbibbigammu nga gitta na magigginnam i ngaral da tapus pannonopammu yatun. Nu kuammu yatun, mabbalikka tu mas magayayya.

8. Kunnasi nga tuttuppalan na “mekatalo anna nannono nga doroban” i annungadda? (Innan gapa i footnote.)

⁸ Sinunno ni Jesus i “mekatalo anna nannono nga doroban” tapenu mangiyawa tu espiritual nga makan ta fustu nga tiempo yayya nga nababbattug ittam ta espiritual. b (Mat. 24:45) I Biblia i pinakarekadu na ngamin nga makan nga iyayawa na mekatalo nga doroban. (1 Tes. 2:13) Makoffun nittam yatun nga espiritual nga makan tapenu makannammuan i appana-panono ni Jehova nga nipakannammu na ta Biblia. Yaw i rason nu ngatta bibbigattam i magazina ira nga Passifusifutan anna Malukag! anna i artikulo ira ta jw.org. Mapprepara ittam gapa para ta midweek anna weekend nga study tam ira. Girawattam gapa i vinulan nga programa na JW Broadcasting^® kada available ngana yatun. Nu kuman ittam tu mapia tu espiritual nga makan, maduffunan ittam natun tapenu makua i mekadua nga dakkua nga mamabbalin nittam tu kurug nga magayayya.

9. Anni i mekadua nga dakkua nga mamabbalin ta nittam tu kurug nga magayayya?

⁹ MEKADUA NGA DAKKUA: Tapenu mabbalin tu kurug nga magayayya, mawag tu tuttulattam i estandarte ira ni Jehova. Nitura na salmista: “Mapalag [“magayayya,” NW ] danuri totolay ira nga i YAFU i pammakakuad-da; danuri i mattolay nga mekunnay ta ikaya na.” (Sal. 128:1) Nu egga i anassing tam kani Jehova, kebalinan natun nga ikakua tam yayya anna ari tam nga kuan i maski anni nga ikalussona. (Prov. 16:6) Yari tu ikagumattam nga tuttulan i estandarte ira na Dios ta mapia anna marake base ta nipakanawag na ta Biblia. (2 Cor. 7:1) Magayayya ittam nu kuattam i kayà ira ni Jehova anna lisian i ikalussona ira.​—Sal. 37:27; 97:10; Roma 12:9.

10. Fuera paga ta pakannammu tam ta estandarte ira na Dios, anni paga i mawag tu kuattam? (Roma 12:2)

¹⁰ Bibbigan i Roma 12:2. Awayya na tu ammu na tadday nga tolay nga egga i kepangngattan ni Jehova nga maddesision nu anni i mapia anna nu anni i marake. Ngem mawag tu tuttulan na mismu i estandarte ira na Dios. Angngarigan na, ammu na tadday nga egga i kepangngattan na gobiernu nga mangikagi tu speed limit ira ta highway. Ngem baka ari na kayà nga tuttulan yatun ira nga limit, yatutta kitappaspas yayya nga mad-drive. Masingan gafu ta kukukuattam nu talaga kurugattam nga i pattuttul ta estandarte ira ni Jehova i kapianan nga pattolay. (Prov. 12:28) Kunnatun i  natageno ni David. Kinagi na meyannung kani Jehova: “Sikaw i mangipasingan niakan ta dalan nga mattuppal ta inango; i keggam i mamannu niakan ta pagayaya anna mangiyawa ta awan tu panuppalan na nga palupagia.”​—Sal. 16:11.

11-12. (a) Nu problemadu ittam onu nakkafi i nono tam, anni nakuan i pagimmugurattam? (b) Kunnasi nga makoffun i Filipos 4:8 ta pappili tam tu dibersion?

¹¹ Nu problemadu ittam onu nakkafi i nono tam, baka matageno tam nga mawag tu egga i kuattam tapenu makattamattam i problema tam ira. Normal laman yatun, ngem mawag tu magimmugug ittam tapenu ari ittam nga makangngua tu gannug ira nga ikalussaw ni Jehova.​—Efe. 5:10-12, 15-17.

¹² Ta tura ni Pablo ta taga-Filipos ira, pinagaram na i Cristiano ira nga ibala-balayudda nga pannuan i ginnonopadda tu gannug ira nga ‘mapia, matunung, marenu, anna makemmemmi.’ (Bibbigan i Filipos 4:8.) Maski ari nga direkta nga tinukoy ni Pablo i meyannung ta dibersion, puede tam gapa nga iyaplika i prinsipio na kinagi na ta tiempo nga marrelaks ittam. Purueban yaw: Talian i uvovug nga “gannug ira” onu “ganna-gannug ira” ta Filipos 4:8 tu “kansion ira,” “pelikula ira,” “libru ira,” onu “video game ira.” Nu kuammu yatun, maduffunan naka nga pannonopan nu anni ira i ikaya na Dios anna nu anni ira i manaki na. Kayà tam nga matuttul i atannang nga estandarte ira ni Jehova. (Sal. 119:1-3) Nu marenu i konsensia tam, awayya tam ngana nga kuan i tumunug nga dakkua tapenu mabbalin tu kurug nga magayayya.​—King. 23:1.

13. Anni i mekatallu nga dakkua nga mamabbalin ta nittam tu kurug nga magayayya? (Juan 4:23, 24)

¹³ MEKATALLU NGA DAKKUA: Siguraduan nga i passerbim kani Jehova i ipoppollum ta pattolem. Si Jehova i Namaratu ta nittam yari tu mawag gafu nga dayawattam yayya. (Nep. 4:11; 14:6, 7) Yari tu i passerbi kani Jehova ‘ta espiritu anna kakurug’ i pinaka-importante nga gannug ta pattoletam. (Bibbigan i Juan 4:23, 24.) Kayà tam tu i masanto nga espiritu na Dios i mangigiya ta paddayaw tam tapenu mekunnay yatun ta kinakurug ira nga malegan ta Uvovug na. Ipoppollu tam i paddayaw tam ta nisa maski paga maddian ittam ta lugar ira nga egga i restriksion na onu mebawal i trabahu tam. Sangawe, maturu tu 100 nga wawwaragi tam i nakafuku megafu laman ta Saksi ira ni Jehova. c Maski kunnatun, magayayya ira nga kuan i adde na mawayya da tapenu makimallo, maggigiammu, anna ilayyagayya i meyannung ta Dios anna ta Pappatulan na. Nu mauyu-uyaw onu madara-darum ittam, magayayya ittam lagapa megafu ta ammu tam nga duffunan ittam ni Jehova tapenu makapagattam anna bala-balakkan na ittam.​—Sant. 1:12; 1 Ped. 4:14.

14. Anni i nesimmu ta mabbing nga brother nga taga-Tajikistan, anna ngatta?

¹⁴ Kitazziga i situasion na karuan nga wawwaragi tam. Ngem nabbalin lagapa ira tu kurug nga magayayya megafu ta kingngua da i tallu nga dakkua nga nagigiammu tam. Ikonsidera i nesimmu ta 19-anios nga si Jovidon Bobojonov nga taga-Tajikistan. Nammanaki yayya nga massuddalu. Yayya nga ta Oktubre 4, 2019, zinammo da yayya ta baleda anna nifuku da yayya ta piga vulan. Trinatu da yayya nga kunna tadday nga kriminal. Nebalita ta aru nga nasion yaw nga kawan na hustisia. Nebalita gapa nga binubbubbug da yayya tapenu pilitadda nga ivuyà na i military oath of  allegiance anna iyusa na i uniforme na suddalu. Kabalin natun, nasentensian yayya anna nefuku adde ta niddan yayya na presidente na nasiodda tu pardon tapenu mapakarianan i sentensia na anna nidog na i kelawan ni Jovidon. Maski kunnatun i nesissimmu, matalo lagapa si Jovidon anna magayayya yayya. Ngatta? Megafu ta sigga-nono yayya ta espiritual ira nga kawagan na.

15. Kunnasi nga nakakan si Jovidon tu espiritual nga makan ta affukutan?

¹⁵ Ta affukutan, kiminan lagapa si Jovidon tu espiritual nga makan, maski paga awan tu Biblia na onu publikasiottam ira. Kunnasi nga nabbalin tu posible yatun? Nangiyangay tu literal nga makan i wawwaragi ira ta nisa anna nitura da i daily text ta grocery bag ira. Megafu tatun, nawayya na nga bibbigan i Biblia anna pannonopan tu mapia yatun ta kada aggaw. Turi ta napalawan ngana yayya ta affukutan, kunnaw i tabarang na ta ari paga nga neparubang ta mariga nga kapurueba: “Habang egga paga i chansa nu, usan nu yatun tu mapia tapenu mas umaru i pakannammu nu meyannung kani Jehova. Mabbibbig kamu tu Uvovug na anna publikasiottam ira.”

16. Sitaw nga nifokus ni Jovidon i appana-panono na?

¹⁶ Nattolay segun ta estandarte ira ni Jehova yatun nga brother tam. Ari na nga agga-nono i marake ira nga pakkaraga anna ari yayya nagangngua  tu marake. Naffokus lallagu yayya kani Jehova anna ta estandarte na ira. Naappresia ni Jovidon i kasta na pinaratu ira na Dios. Kada umma, masikkag yayya ta guni ira na mammanu. Nu gabi gapa, inni-innan na i vulan anna i bitun ira. Kinagi na: “Nagayayya anna napagaram ngà tatun ira nga regalu ni Jehova.” Nu minappabalo ittam ta pisikal anna espiritual nga probision nga iyayawa ni Jehova, magayayya ittam lagapa. Yatun i makoffun ta nittam nga makapagattam.

17. Kunnasi nga makoffun i 1 Pedro 1:6, 7 ta tolay nga egga i napparehassan na situasion na kani Jovidon?

¹⁷ Nipoppollu gapa ni Jovidon i passerbi na kani Jehova. Ammu na i importansia na pattalupaddian nga matalo ta kurug nga Dios. Kinagi ni Jesus: “Daya-rayawam-mu i Yafu nga Dios mu, anna yaya laman i passerbiam-mu!” (Luc. 4:8) Kayà na komander anna suddalu ira na militar nga pallikuran ni Jovidon i relihion na. Ngem aggaw-gabi nga fermi nga nakimallo yayya. Kikkiddawan na kani Jehova nga uffunan na yayya tapenu ari nga makkafi anna ari na nga mekompromiso i pangurug na. Maski paga namaltratu si Jovidon, nattalupaddian yayya nga matalo. Fermi ngana i pagayayya na sangawe. Ngatta? Nige da gare yayya zinammo, binubbug, anna nifuku, ari tu kunnari kaladda i pangurug na. Ngem turi ta napurueban yayya, mas nassikan i pangurug na.​—Bibbigan i 1 Pedro 1:6, 7.

18. Anni i kuattam tapenu magayayya ittam lagapa?

¹⁸ Ammu ni Jehova i kawagattam tapenu mabbalin tu kurug nga magayayya. Nu tuttulammu i tallu nga dakkua nga ginigiammu tam, magayayya ka lagapa maski ta mariga ira nga situasion. Makagim gapa saw i kunnaw: “Magayayya i totolay nga i Dios da ay si Jehova!”—Sal. 144:15, NW.