1-2. Ngatta anna kunnasi nga vinukatan ni Jehova i tiansa para nittam nga mabbalin tu parte na familiana?

INIMBITAN ittam ni Jehova nga mabbalin tu parte na familiana nga maddayaw nisa. Fugurammu yatun nga kappabbaw nga imbitasion! I miembro naw nga familia ay totolay nga nededikada i baggida ta Dios anna mangurug ta sakrifisio nga tavvu na Anana. I familia tam ay magayayya. Ta maddaggun, magayayya ittam ta pattolay nga egga kebalinanna anna iddanamattam nga mattolay tu mannanayun ta langi onu ta Paraiso ta davvun.

² Gukaban na aya anna dakal nga passakrifisio ni Jehova, napeggan ittam tu tiansa nga mabbalin tu parte na familiana. (Juan 3:16) ‘Nagatang ittam ta mangina.’ (1 Cor. 6:20) Gukaban na tavvu, pinapposible ni Jehova nga maddukko ittam nisa. Egga i pribilehio tam nga agalan tu Ama i katannangan nga Persona ta uniberso. Gitta na nagigiammu tam ta nappasa nga artikulo, si Jehova i kapianan nga Yama.

3. Anni ira nga pakkiavu i iyavu tam? (Innan gapa i kahon nga “ Interesadu Kari Niakan si Jehova?”)

³ Kagitta na tadday nga nattura ta Biblia, baka iyavu tam: “Anni i awayyà nga pabbala-balo ta YAFU ta ngamin nga allo na nga inalawa ku?” (Sal. 116:12) I tabbag ay ariattam vuluvuga mabalakkan onu mapagan i nelangitan nga Yama tam. Maski paga nu kunnatun, mapaguyu tam lagapa nga iddukan yayya. Nitura ni apostol Juan: “Mangaya ittam ta yayya i ollu nga nangaya nittam.” (1 Juan 4:19, NW) Kunnasi tam mepasingan ta nelangitan nga Yama tam nga iddukattam yayya?

4. Segun ta Santiago 4:8, ngatta mawag nga mappursigi ittam nga maddukko kani Jehova?

⁴ Ikaya ni Jehova nga maddukko ittam nisa anna makikomunika nisa. (Bibbigan i Santiago 4:8.) Pagarammanna ittam nga  ‘maddasal ta maski anni nga tiempo’ anna kanayun yayya nga magginna nittam. (Roma 12:12) Ari yayya kuruga okupadu, onu mabannag nga magginna nittam. Ginnattam yayya gukaban na pabbibbig ta Uvovugna, i Biblia, nelagum i publikasion ira nga manguffun nittam nga malippawa yatun. Ginnattam gapa yayya gukaban na pagginna tu mapia ta study ira. Nu kunnasi nga makoffun ta abbarabbing i regular nga komunikasion tapenu mattalupaddian ira nga madukko ta maganada, makoffun gapa nittam i regular nga pakikomunika kani Jehova tapenu mattalupaddian nga madukko nisa.

5. Kunnasi tam mapakasta i kalidad na pakimallo tam ira?

⁵ Nonopan i kalidad na komunikasiommu ta Dios. Ikaya ni Jehova nga ivuvvu tam i futu tam nisa ta pakimallo. (Sal. 62:8) Mawag nga iyavu tam ta baggi tam yaw: ‘I pakimallo ku kari ira ay ari nga sinsero anna gittana nakopia laman nga mensahe, onu danatun ay gittana tura nga napafutuan i mensahena anna manu-mano i niketurana?’ Awan tu duda nga kuruga iddukammu si Jehova, anna ikaya mu nga pattalupaddianan nga maladda i relasiommu nisa. Tapenu makuam yatun, mawag nga regular ka nga makikomunika nisa. Ikagim nisa i personal ira nga mataga-tageno mu nga ariammu mekagi ta tanakuan. Ikagim gapa nisa nu anni i mamagayayya anna mamarraddam nikaw. Makasiguradu ka nga awayyam mappoffun nisa.

6. Anni i mawag nga kuattam tapenu mattalupaddian nga madukko ta nelangitan nga Yama tam?

⁶ Tapenu mattalupaddian nga madukko ta nelangitan nga Yama tam, mawag nga minappabalo ittam kanayun. Umanugu ittam ta salmista nga nangitura: “Napakaru, O YAFU nga Dios ku, i kingnguam tu makapabbaw ira nga em-mi pammakapianan; i planom ira para nikami ay makapabbaw, awan vuluvuga nga makapakoli nikaw! Maski nu kagumanak-ku ira nga palappatan, ariak-ku makua ngamin nga uvovugan!” (Sal. 40:5) Ariattam laman matageno i pappabalo; ipasingattam i appresasiottam kani Jehova gukaban na kakkagian anna kukukuattam. Yatun i mamabbalin nittam nga neruma ta karuan ta kaggawattam. Mattolay ittam ta mundo nu sitaw ari nga minappabalo i totolay ta ngamin nga kukukuan na Dios para nira. Kakuruganna, tadday nga ebidensia nga mattoletam ngana “ta pangurianan ira nga aggaw” ay ari nga minappabalo i totolay. (2 Tim. 3:1, 2) Ariattam nakuan vuluvuga mabbalin tu kunnatun!

7. Anni i kayà ni Jehova nga kuattam, anna ngatta?

⁷ Manaki na magana ira nga maddarama i ánada, nu ari, kayàda nga makkorofun ira. Kunnatun gapa, kayà ni Jehova nga makkorofun i ngamin nga ánana. Kakuruganna, i aya tam ta kataggi-tadday i mamakurug nga sittam ay kurug nga Cristiano. (Juan 13:35) Umanugu ittam ta salmista nga nangitura: “Kuruga makapabbaw, kuruga makasta nu i totolay na Dios ay mattaradday ira!” (Sal. 133:1) Nu iddukattam i wawwaragi tam, mapakurug tam kani Jehova nga iddukattam yayya. (1 Juan 4:20) Makapagayayya nga mabbalin tu parte na familia na wawwaragi nga ‘makka-alla-allo anna makka-iddu-iddu’!​—Efe. 4:32.

8. Segun ta 1 Juan 5:3, anni i primeru nga rason nu ngatta tuttulattam si Jehova?

⁸ Ekspektan ni Jehova nga tuttulan na ána i maganada yatutta ekspektanna gapa nga tuttulattam yayya. (Efe. 6:1) Mepangngo nga tuttulattam yayya megafu ta yayya i Namaratu nittam, i Manustini ta inango tam, anna i pinakamasirib ta ngamin nga magana. Ngem i primeru nga rason nu ngatta tuttulattam si Jehova ay megafu ta iddukattam yayya.  (Bibbigan i 1 Juan 5:3.) Maski aru i rasottam nu ngatta mawag nga tuttulattam si Jehova, arianna ittam fuersan nga kuan yatun. Niregalu nittam ni Jehova i lallaguray yatutta magayayya yayya nu piliattam nga tuttulan yayya megafu ta iddukattam yayya.

9-10. Ngatta importante nga ammuattam i bili-bilin na Dios anna iyaplika danatun?

⁹ Ikaya na magana ira nga arayyu ta peligro i ánada. Yari tu mangiyawa ira tu bili-bilin nga mapprotekta ta ánada. Nu tuttulan na ána danatun nga bilin, ipasingadda i pattalo anna pangirespetoda ta maganada. Mas ngana gafu nga importante nga ammu tam i bili-bilin na nelangitan nga Yama tam anna iyaplika danatun. Nu kuattam yatun, ipasingattam kani Jehova nga iddukan anna irespeto tam yayya anna sittam mismu i mabbenefisio tatun. (Isa. 48:17, 18) Ngem danuri pammanakitadda si Jehova anna i estandartena ira ay takitadda lagapa i baggida.​—Gal. 6:7, 8.

¹⁰ Nu mattolay ittam segun ta ikaya ni Jehova, maprotektan ittam ta pisikal, emosional, anna espiritual. Ammu ni Jehova i kapianan para nittam. Kinagi ni Aurora nga taga-United States, “Ammù tu kanayun nga marresulta ta pinakamakasta nga pattolay i panuttul kani Jehova.” Kurug yatun para nittam ngamin. Kunnasi ka nabbenefisio ta panuttul ta meddu nga direksion ni Jehova?

11. Kunnasi ittam uffunan na pakimallo?

¹¹ Duffunan ittam na pakimallo tapenu mabbalin tu minattuppal maski nu mariga nga kuan yatun. Nu mittan, marigatan ittam nga  tuttulan si Jehova ngem mawag nga kanayuttam nga labanan i tendensia nga makaliwa. Nakimemallo i salmista ta Dios: “Kari tu iddam-mà ta matulù nga futu.” (Sal. 51:12) Kinagi ni Denise nga tadday nga regular payunir, “Nu marigatan ngà nga tuttulan i tadday ta bili-bilin ni Jehova, makkiddaw ngà nisa tu sikan tapenu makuà i fustu.” Makasiguradu ittam nga kanayun nga tabbagan ni Jehova i kunnatun nga pakimallo.​—Luc. 11:9-13.

12. Segun ta Efeso 5:1, anni i mawag nga kuattam?

¹² Bibbigan i Efeso 5:1. Bilang “meddu nga ána” ni Jehova, kuattam i adde na mawayya tam tapenu parigan yayya. Maparigattam i kualidadna ira nu minaggiddu, masippo, anna minammakoma ittam ta tanakuan. Nu masingan danuri ari makannammu ta Dios i makasta nga kondukta tam, puede nga mapaguyu ira nga mas ammuan i meyannung nisa. (1 Ped. 2:12) Egga i makasta nga rason na Cristiano ira nga magana tapenu parigan si Jehova ta pattratuda ta ánada. Nu kuadda yatun, posible nga karagatan na ánada i makikkofun ta minaggiddu nga Yama tam.

13. Ta anni ittam mawag nga maffokus?

¹³ Iparayag na tadday nga abbing i yamana anna magayayya yayya nga iyistoria i meyannung ta yamana. Iparayag tam gapa i nelangitan nga Yama tam nga si Jehova anna kayà tam nga makilala yayya na tanakuan. Ta futu tam, matageno tam ngamin i natageno ni Patul David nga nangitura: “Iparayag  ku si Jehova.” (Sal. 34:2, NW) Kunnasi nu minappasiran ittam? Kunnasi ittam mabbalin tu magutu? Maggutu ittam nu maffokus ittam nu kunnasi mapagayayya si Jehova anna nu kunnasi nga mabbenefisio i tanakuan ta pakannammu meyannung nisa. Iddan ittam ni Jehova tu gutu nga kawagattam. Zinuffunanna i ollu-siglo nga Cristiano tapenu maggutu, anna uffunanna gapa ittam.​—1 Tes. 2:2.

14. Anni i karuan ta rason nu ngatta importante nga mangngua ittam tu disipulos?

¹⁴ Ari nga mangireruma si Jehova anna magayayya yayya nu masinganna nga iddukattam i tanakuan maski nu sitaw i naggafuadda. (King. 10:34, 35) Tadday ta pinakamakasta nga makua tam tapenu mepasingan i aya tam ta tanakuan ay gukaban na pallayyagayya ta nira. (Mat. 28:19, 20) Anni i metuppal natun nga trabahu? Danuri magginna nittam ay awayyada nga pakastan i pattoleda ta maddaggun anna mapeggan tu iddanama nga mattolay tu mannanayun ta mappange.​—1 Tim. 4:16.

15-16. Anni ira i rasottam nga magayayya?

¹⁵ Minaggiddu nga Yama si Jehova yatutta kayàna nga magayayya i familiana. (Isa. 65:14) Aru i rason nu ngatta magayayya ittam ta maddaggun maski nu egga ira problema nga ara-arubangattam. Angngariganna, makkomfiansa ittam nga kuruga iddukan ittam na nelangitan nga Yama tam. Egga i fustu nga pakannammu tam ta Uvovug na Dios, i Biblia. (Jer. 15:16) Anna parte ittam na espesial nga familia na totolay nga mangiddu kani Jehova, mangiddu ta atannang nga estandartena ira ta moral, anna mangiddu ta kataggi-tadday.​—Sal. 106:4, 5.

¹⁶ Kanayun ittam nga magayayya megafu ta siguradu i iddanama tam nga makkasta i pattolay ta mappange. Ammu tam nga alsan noka ni Jehova i ngamin nga marake anna gukaban na direksion na Pappatulanna, mabbalin uli tu Paraiso i davvun. Egga gapa i kappabbaw nga iddanama tam nga danuri natay ay mapaginnolay anna makavuluda uli i iddeddukadda ira. (Juan 5:28, 29) Makapagayayya noka yatun! Pinaka-importante, siguradu ittam nga aranni ngana nga ngamin nga pinaratu ta langi anna ta davvun ay mangiyawa tu pangikakua, dayaw, anna debosion nga mepangngo ta minaggiddu nga Yama tam.