Ammum Kari?
Kunnasi nga pakurugan na arkeolohia nga nattolay si Belsazar anna nappatul yayya ta Babilonia?
TA ARU nga dagun, kakkagian na aru nga kritiko na Biblia nga ari vuluvuga nattolay si Patul Belsazar nga nakagi ta libru na Daniel. (Dan. 5:1) Kurugadda yatun megafu ta awan tu malegan na arkeologo ira nga ebidensia nga mamakurug nga nattolay yayya. Ngem ta 1854, nanguli yatun. Ngatta?
Tatun nga dagun, ginigiammu na Britano nga konsul nga si J. G. Taylor i dabba na siudad gari na Ur nga ta maddaggun ay i zita nga parte na Iraq. Nadiskubrena ta dakal nga torre tatun nga lugar i clay cylinder ira. Ne-ukit i cuneiform nga tura tatun ira nga cylinder nga ma-appa pulgada (10 sentimetro) i kapadduna. Netura ta tadday ta cylinder i pakimallo para ta apaddu nga pattolay na Patul na Babilonia nga si Nabonido anna na kaka nga anana nga si Belsazar. Yatutta maski i kritiko ira ay magga umanugu taw: Pakurugan natun nga nadiskubre nga nattolay si Belsazar.
Ngem kagian na Biblia nga ari laman nattolay si Belsazar, nu ari, nabbalin gapa yayya nga patul. Ngem madduda mangana i kritiko ira. Angngariganna, ta 1875, nitura na English scientist nga si William Talbot nga kagian na karuan nga “kagiddan ni Bel-sar-ussur [Belsazar] nga mammaguray si Nabonido nga yamana. Ngem awan tu maski anni nga ebidensia nga mamakurug tatun.”
Ngem nasolba yatun nga isyu turi ta pakurugan na tura ira ta tanakuan nga clay cylinder nga egga i tiempo nga nabayag nga awan ta Babilonia i yama ni Belsazar nga si Patul Nabonido. Sinni i nammaguray ta nasion ta kawanna? “Ta kegga ni Nabonido ta tanakuan nga nasion,” kinagi na Encyclopaedia Britannica, “nitalona kani Belsazar i trono anna i aru ta armadana.” Makagi gafu nga nasserbi si Belsazar bilang katali nga mammaguray ta Babilonia tatun nga tiempo. Yatutta kinagi na arkeologo anna language scholar nga si Alan Millard nga mepangngo laman nga “agalan na Libru na Daniel si Belsazar bilang ‘patul.’”
Siempre, para ta aripan ira na Dios, i primeru nga ebidensia nga mapattalakkan anna ininspiran na Dios i libru na Daniel ay parte yatun na Biblia anna aru nga libru ta Biblia i tumukoy kani profeta Daniel.—2 Tim. 3:16.
