1. Ta anni ira nga situasion nga makalawa ittam tu tabarang, anna ngatta mawag tam ngamin yatun?

MAWAG tam ngamin i matabarangngan. Nu karuan, sittam i makitabarang ta tanakuan. Ngem puede gapa nga tabarangngan ittam na tadday nga wagi nige tam nga “mataga ta pattagaruli.” (Gal. 6:1) Matabarangngan ittam gapa nu itunudda ittam kabalittam nga makaliwa tu madammo. Maski anni paga i rason nu ngatta matabarangngan ittam, mawag tu ginnattam yatun. Nu kunnatun i kuattam, mammakapia ittam anna mepaliag i inango tam!—Prov. 6:23.

2. Segun ta Proverbio 12:15, ngatta mawag tu magginna ittam ta tabarang?

² Pagaramman ittam na tema nga teksto tam nga ‘magginna ta uvovug ira na masirib.’ (Prov. 22:17) Awan tu tolay nga ammu na i ngamin. Magga egga i tanakuan nga tolay nga mas aru i ammu na onu mas ekspiriensadu anne ta nittam. (Bibbigan i Proverbio 12:15.) Nu magginna ittam gafu ta tabarang, ipasingan natun nga mapakalinno ittam. Ipasingan paga natun nga ammu tam i limitasiottam ira anna mawag tam i uffun na tanakuan tapenu madde tam i goal tam ira. Nipetura ni Jehova ta masirib nga patul nga si Solomon: “Egga i metuppal gukaban na aru nga gumattabarang.”​—Prov. 15:22.

3. Anni ira i klase na tabarang nga awayya tam nga malawa?

³ Awayya na nga direkta onu ari nga direkta i tabarang nga malawa tam. Posible nga egga i mabibbig tam ta Biblia onu ta publikasiottam ira nga mamappanono ta nittam anna mamaguyu ta nittam tapenu ulian i appana-panono onu i kukukuattam. (Heb. 4:12) Yatun i ari nga direkta nga tabarang. Kunnasi gapa nu egga i elder onu tanakuan nga kualipikadu nga wagi nga mangikagi ta nittam ta mawag tu uliattam? Yatun i direkta nga tabarang. Nu egga i manabarang ta nittam nga nebase  ta Biblia megafu ta aya da ta nittam, mepasingattam nga appresiattam yatun nu magginna ittam ta nira anna nu kuattam i nitabaradda.

4. Segun ta Eclesiastes 7:9, anni i ari nga makasta nga reaksion nu matabarangngan ittam?

⁴ Posible nga marigatan ittam nga alawatan i direkta nga tabarang. Baka matakitan paga lagu ittam. Ngatta? Maski gare nu aminattam mabba nga imperfekto ittam, baka marigatan ittam nga alawatan i tabarang nu tanakuan i makkagi ta nakkamaliattam. (Bibbigan i Eclesiastes 7:9.) Baka irasonattam i baggi tam. Awayya na tu kuestionattam i motibo na nanabarang onu mattaki i nono tam ta pinattabarang na ta nittam. Baka kritikattam paga lagu i nanabarang tapus nonopattam: ‘Ngatta gapa ta tabarangngan ná? E parefu kami la’ mabba nga makkamali!’ Nu manaki tam gapa i tabarang, baka ari tam nga pansinan yatun onu mappatabarang ittam ta tanakuan nga mangikagi ta kayà tam nga maginna.

5. Anni i gigiammuattam taw nga artikulo?

⁵ Taw nga artikulo, gigiammuattam i angngarigan ira ta Biblia danuri na nammanaki ta tabarang anna danuri na nangalawa tatun. Ikonsidera tam gapa nu anni i makoffun ta nittam tapenu alawatan i tabarang anna mammakapia tatun.

6. Anni i magigiammu tam ta pinangalawa ni Patul Rehoboam ta tabarang ta nisa?

⁶ Ikonsidera i angngarigan ni Rehoboam. Turi ta nabbalin yayya tu patul na Israel, egga i nikiddaw na immagurayan na ira ta nisa. Nikiddaw da nga palappawan na nakuan i madammo ira nga nikiddaw na yama na nga si Solomon ta nira. Makasta gapa ta nakkiavu si Rehoboam ta mannakam ira nga lallaki ta Israel tapenu makannammuan na nu anni i itabbag na ta totolay ira nga immagurayan na. Nitabarang na mannakam ira nga lallaki ta nisa nga nu kuan na i ikiddaw na totolay, magga suportadda yayya kanayun. (1 Pat. 12:3-7) Ari nga nakayatan ni Rehoboam i nitabaradda yari tu nakkiavu yayya ta lallaki ira nga kasiddagunan na. Posible nga magedad ngana tu 40 onu maturu paga danatun nga lallaki, yatutta mediu ekspiriensadu ngana gapa ira. (2 Cro. 12:13) Ngem marake i nitabaradda kani Rehoboam. Kinagi da ta nisa nga mas bali tu padammakkan na paga i ikikkiddona ta totolay ira. (1 Pat. 12:8-11) Megafu ta madduma i nalawa ni Rehoboam nga tabarang, nappoffun nakuan yayya kani Jehova nu anni i tabarang nga tuttulan na. Ngem inalawa na lallagu i tabarang nga nagustuan na anna kiningngua na i kinagi na mas mabbing ira nga lallaki. Marake i narresultan natun para kani Rehoboam anna ta totolay na Israel. Posible gapa nga ariattam kanayun nga magustuan i tabarang nga malawa tam. Ngem nu nebase yatun ta Uvovug na Dios, mawag tu alawatattam lagapa yatun.

7. Anni i magigiammu tam ta nesimmu kani Patul Uzias?

⁷ Pinammanakitan ni Patul Uzias i tabarang. Simillung yayya ta parte na templo ni Jehova nu sitaw papari laman nakuan i awayya na nga tullung anna pinurueban na paga i manuggi tu insensu. Kinagi na papari ni Jehova ta nisa: “Uzias, ari tu mepangngo nga sikaw i manuggi tu insensu para kani Jehova! Danuri laman papari i mepangngo nga manuggi tu insensu.” Anni i reaksion ni Uzias? Nu mapakalinno na nakuan nga inalawa i tabarang anna nanaw insigida ta templo, posible nga pinakoma paga yayya ni Jehova. Ngem “napporay si Uzias.” Ngatta pinammanakitan na i tabarang? Nanono na nga megafu ta yayya i patul, makua na i maski anni nga kayà na nga kuan. Ngem ari tu kunnatun i pagimamma ni Jehova. Megafu ta kingngua ni Uzias i gannug nga awan tu  kepangngattan na nga kuan, nalleproso yayya anna ‘nattalupaddian yayya nga leproso adde ta patena.’ (2 Cro. 26:16-21) Magigiammu tam gafu ta nesimmu kani Uzias nga maski nu sinni paga ittam, nu pammanakitattam i nebase-Biblia ira nga tabarang, mawawattam i fabor ni Jehova.

8. Anni i reaksion ni Job ta tabarang?

⁸ Mabibbig gapa ta Biblia i makasta ira nga angngarigan danuri na nabendisionan megafu ta inalawa da i tabarang. Ikonsidera si Job. Egga i paganassing na ta Dios ngem ari yayya nga perfekto. Megafu ta napakaru i problema na, nakekagi yayya tu gannug ira nga ari mepangngo. Megafu tatun, direkta yayya nga sinabarangngan ni Elihu anna ni Jehova. Anni i reaksion ni Job? Mapakalinno nga inalawa na i tabarang. Kinagi na: “Nabbida ngà ngem kakku mabba nalippawa . . . Babawyakku i kinagì, anna mabbabawi ngà ta gavù anna ta avu.” Megafu ta kinapakalinno ni Job, binendisionan yayya ni Jehova.​—Job 42:3-6, 12-17.

9. Anni i reaksion ni Moises turi ta natabarangngan yayya, anna ngatta mapia yayya nga ehemplo?

⁹ Mapia nga ehemplo si Moises megafu ta nappetunung yayya kabalin na nga nakaliwa tu madammo. Mittan, nappatu i ulu na yatutta ari na nga nedayaw si Jehova. Megafu tatun, nawawan ni Moises i pribilehio na nga tullung ta Nepromesa nga Davvun. (Num. 20:1-13) Turi ta nakimemallo si Moises kani Jehova nga ulian na nakuan i desision na, kinagi ni Jehova ta nisa: “Kammà ngana nga kibbidan meyannung tatun.” (Deut. 3:23-27) Ari nga nattaki i nono ni Moises. Inaksepta na i desision ni Jehova yari tu neyusa lagapa yayya tapenu irolluan i Israel. (Deut. 4:1) Parefu nga inalawa da Job anni Moises i tabarang. Makasta nu parigattam ira. Inuli ni Job i pagimamma na anna arian na nga nirasonan i baggi na. Pinakurug gapa ni Moises nga inalawa na i tabarang ni Jehova gukaban na pattalupaddian na nga matalo maski nu nawawan na i pribilehio nga tagibaloran na.

10. (a) Segun ta Proverbio 4:10-13, anni ira i pammakapianattam nu alawatattam i tabarang? (b) Mangiyawa tu ehemplo danuri na nangalawa tu tabarang.

¹⁰ Mammakapia ittam nu parigattam i ehemplo na matalo ira nga lalaki gitta da Job anna Moises. (Bibbigan i Proverbio 4:10-13.) Aru ngana nga wawwaragi tam i nagangngua tatun. Kunnaw i kinagi ni Brother Emmanuel nga taga-Congo meyannung ta nikatabaranna: “Nasingan na mannakam ira ta espiritual nga brother ta kongregasiommi nga mappapange ngana nga madaral i relasiokku kani Jehova yari tu inuffunaddà. Niyaplikà i tabaradda yatutta nalisiakku i napakaru nga problema.” * Kunnaw gapa i kinagi ni Megan nga payunir ta Canada meyannung ta nalawa na nga tabarang: “Ariakku magustuan nu mittan i tabarang nga maginnà ngem yatun i kawagakku.” Kunnaw gapa i kinagi ni Brother Marko nga taga-Croatia: “Nawawan i pribilehiò, ngem megafu ta nesimmu, na-realize ku nga nakoffun i nikatabarakku tapenu mapakappian i relasiokku kani Jehova.”

11. Anni i niyistoria ni Brother Karl Klein meyannung ta pangalawa tu tabarang?

¹¹ Tadday paga nga ehemplo na nammakapia ta tabarang ay si Brother Karl Klein nga nasserbi bilang miembro na Manangngal nga Baggi. Kinagi ni Brother Klein ta istoria na pattolena nga prangka yayya nga sinabarangngan na madukko nga kofun na nga si Joseph F. Rutherford. Inamin ni Brother Klein nga natakitan yayya ta gafu. Inistoria na: “Ta pakasingan [ni Brother Rutherford] uli nio, nakangizzi nga kinagi na, ‘Hello Karl!’ Ngem maggi  ari ngà simibbag ta mataki paga i nono ku. Kinagi na nio, ‘Magimmugug ka Karl! Ari ka nga mappasilu ta Diablo!’ Nappasirang ngà yatutta kinagì, ‘Awan tu taki na nono ku niko Brother Rutherford.’ Ngem ammu na i kurug yayya nga kinagi na uli, ‘Sige, ngem magimmugug ka. Ari ka nga mappasilu ta Diablo.’ Fustu talaga i kinagi na! Nu mangipappan ittam tu taki na nono ta tadday nga wagi, mas ngana nu egga i kinagi na nga egga mabba nakuan i kepangngattan na nga ikagi . . . , mabi ittam laman nga masiluan na Diablo.” * (Efe. 4:25-27) Inalawa ni Brother Klein i tabarang ni Brother Rutherford yari tu nattalupaddian i madukko nga pakkofudda.

12. Kunnasi makoffun i kinapakalinno tapenu alawatattam i tabarang? (Salmo 141:5)

¹² Anni i makoffun ta nittam tapenu alawatattam i tabarang? Mawag tu mappakalinno ittam anna daddammattam nga imperfekto ittam anna nu mittan, makakua ittam tu gannug ira nga ari mepangngo. Gitta na nagigiammu tam ngana, nakekagi si Job tu gannug ira nga ari mepangngo. Ngem minappakalinno si Job, yayya nga inuli na i appana-panono na. Megafu tatun, binendisionan yayya ni Jehova. Masingan i kinapakalinno na ta pangalawa na ta tabarang ni Elihu maski nu mas abbing si Elihu. (Job 32:6, 7) Moffunan ittam gapa na kinapakalinno nga iyaplika i tabarang maski nu matageno tam nga ari mepangngo nittam yatun onu mas abbing i nanabarang ta nittam. Kunnaw i kinagi na elder nga taga-Canada, “Egga i mapansin na tanakuan ta nittam nga ari tam masingan ta baggi tam. Yayya nga nu awan tu manabarang nittam, kunnasi gafu ittam mapprogreso?” Mawag tam gafu ngamin i tabarang tapenu mas mepasingattam i vunga na masanto nga espiritu anna mapakasta i pallayyagayya anna panuddu tam.​—Bibbigan i Salmo 141:5.

13. Anni nakuan i nonopattam nu matabarangngan ittam?

¹³Imammatan i tabarang bilang pangipasingan na Dios ta aya na. Kayà ni Jehova i kapianan para ta nittam. (Prov. 4:20-22) Ipasa-pasingan na i pangaya na nu tabarangngan na ittam gukaban na Uvovug na, nebase-Biblia ira nga publikasion, onu na kapangngurug tam ira nga manakam ta espiritual. Kinagi na Hebreo 12:9, 10: ‘Disiplinan na ittam tu pammakapianattam lagapa.’

14. Sitaw ittam maffokus nu matabarangngan ittam?

¹⁴Maffokus ta tabarang, ari tu ta pinattabarang da nikaw. Nu mittan, baka matageno tam nga ari tu makasta i pinattabaradda ta nittam. Siempre, ikaguman na maski sinni nga manabarang nga mabbalin tu mataktika tapenu  mabi laman nga alawatan yatun na tabarangngan na. * (Gal. 6:1) Ngem kunnasi nu sittam i natabarangngan? Makasta nu maffokus ittam ta tabarang maski nu matageno tam tu egga nakuan i mas makasta nga pinangikagi da tatun. Awayya tam nga iyavu ta baggi tam: ‘Maski nu manaki ku i pinattabarang da ta nio, egga kari i madammo ku tatun nga pammakapianakku? Mapalampas ku kari i pakkafian na nanabarang ta nio anna maffokus ngà ‘na laman ta tabarang na?’ Maski gafu nu anni i nitabarang da ta nittam anna nu kunnasi ittam nga natabarangngan, mepasingattam nga masirib ittam nu ikagumattam nga innan nu anni i pammakapianattam tatun.​—Prov. 15:31.

15. Ngatta mappatabarang ittam nakuan?

¹⁵ Pagaramman ittam na Biblia nga makitabarang. Kinagi na Proverbio 13:10: “Danuri masirib ay mappatabarang.” Kuru-kurug yatun! Mas mapprogreso ta espiritual danuri mappatabarang anne tari ira ta ari vuluvuga nga makitabarang. Sikaw nakuan gafu i umaranni ta tanakuan tapenu makitabarang.

16. Anni ira nga situasion nga puede ittam nga makitabarang?

¹⁶ Anni ira nga situasion nga puede ittam nga makitabarang? Ikonsidera i tumunug ira. (1) Nivulu na tadday nga sister i ekspiriensadu nga publisher ta pab-Bible study na tapus kabalin na, nakitabarang yayya nu kunnasi na paga mas mapakasta i panuddu na. (2) Kayà na tadday nga single sister i gumatang tu pantalong yatutta kiniddona i opinion na manakam nga sister ta napili na. (3) First time nga map-public talk i tadday nga brother. Yari tu kiniddona ta tadday nga ekspiriensadu nga mappalappa tu ginnan na yayya tu mapia tapus ikagi na nisa nu anni paga i puede na nga pakastan. Ngem kunnasi gapa nu piga ragun ngana nga mappalappa i tadday nga brother? Makasta nu makkiddaw lagapa yayya tu suhestion ta ekspiriensadu ira nga mappalappa tapus iyaplika na i nitabaradda ta nisa.

17. Anni ira i kuammu tapenu mammakapia ka ta tabarang?

¹⁷ Magga egga saw i tiempo nga makalawa ittam tu tabarang, direkta man onu ari nga direkta. Nu mesimmu yatun, daddammammu i nagigiammum taw. Mappakalinno ka. Maffokus ka ta tabarang, ari tu ta pinattabarang da nikaw. Iyaplikam i nalawa mu nga tabarang. Awan tu neyana ta nittam nga dati ngana nga masirib. Ngem nu “magginna ka ta tabarang anna alawatammu i disiplina,” ipasiguradu na Uvovug na Dios nga ‘mabbalikka tu masirib.’—Prov. 19:20.