1. Anni ira i mangipasingan nga sigga-paran nga massakrifisio i totolay ni Jehova?

NABAYAG ngana nga neprofesiya ta Biblia nga “sigga-paran” nga masserbi i totolay ni Jehova ta nisa ta pangirollu ni Jesus. (Sal. 110:3) Matuttuppal ngana yatun nga profesiya sangawe. Kada dagun, minillion nga oras i usu-usan na matalikarag ira nga aripan ni Jehova ta pallayyagayya. Sigga-paran nga kuadda yatun maski nu awan tu paga da. Uuffunadda gapa i kapangngurug da ta pisikal, emosional, anna espiritual nga pakawagadda. Aru gapa nga oras i usan na elder anna ministerial ira nga aripan ta papprepara para ta parte da ira ta study anna pash-shepherding ta wawwaragi. Ngatta kukukuadda ngamin yatun? Megafu ta ayatadda si Jehova anna i kasittoleda.​—Mat. 22:37-39.

2. Segun ta Roma 15:1-3, anni nga ehemplo i nipasingan ni Jesus?

² Si Jesus i kakastan nga ehemplo na pamagollu ta pammakapianan na tanakuan. Ikakkagumattam nga parigan yatun. (Bibbigan i Roma 15:1-3.) Mammakapia ittam nu kuattam yatun. Kinagi ni Jesus: “Mas dakal i pagayaya ta pangiyawa anne ta pangalawa.”​—King. 20:35.

3. Anni i gigiammuattam taw nga artikulo?

³ Ammuattam taw nga artikulo i karuan nga sakrifisio nga kingngua ni Jesus tapenu passerbian i tanakuan tapus innattam nu kunnasi tam yayya nga maparigan. Gigiammuattam gapa nu anni paga i makua tam tapenu mas karagatattam nga passerbian i tanakuan.

4. Kunnasi nga pinagollu ni Jesus i pakawagan na tanakuan?

⁴Inuffunan ni Jesus i tanakuan maski nu nababbannag yayya. Nonopammu i reaksion ni Jesus turi ta nasingan na i aru nga totolay nga minay nisa ta vukig aranni ta Capernaum. Tanga-gabi nga nakimallo si Jesus. Siguradu nga nababbannag yayya. Ngem ta pakasingan na ta aru nga totolay, ziminatu i allo na para ta pobre anna mataki. Yari tu pinammapia na ira. Ngem ari laman tu yatun i kingngua na. Kinagi na gapa tatun nga tiempo i tadday ta pinakamakapasikan nga palappa—i Sermon ta Vukig.​—Luc. 6:12-20.

5. Kagitta ni Jesus, kunnasi nga massassakrifisio i ulu ira na familia?

⁵Paparigan na ulu ira na familia si Jesus. Imajinammu yaw nga situasion: Tangaggaw nga nattrabahu i tadday nga ulu na familia tapus ta pallabbe na, fermi i bannag na. Kayà na nakuan nga ari ngana labbi nga maf-family worship ngem nikiddaw na kani Jehova nga pasikannan na nakuan yayya tapenu mekondukta na lagapa i paggigiammu da. Sinabbag ni Jehova i pakimallo na anna nakapaf-family worship ira. Yaw i importante nga nagigiammu na ána na tatun nga gabi: I espiritual ira nga gannug i pinaka-importante para ta magana da.

6. Istorian nu kunnasi nga nisakrifisio ni Jesus i oras na tapenu moffunan i tanakuan.

⁶Nisakrifisio ni Jesus i oras na para ta tanakuan. Maimajimmu kari i natageno ni Jesus turi ta nadumug na nga napatay i kofun na nga si Juan Bautista? Magga narraddam si Jesus. Kagian na Biblia: “Ta pakaginna ni Jesus ta dumug nga meyannung kani Juan, nattakay ta barangay anna magitta-tadday nga minay ta lugar nga awan tu totolay na.” (Mat. 14:10-13) Mantindiattam si Jesus nu ngatta kayà na i magitadday. Kunnatun i aru ta nittam nu matayan. Kayà tam i magitadday nga maddaddam. Ngem ari nga nakua ni Jesus yatun. Dati gare ngana nga nappollu i aru nga totolay tari ta lugar nga angngayan na. Anni i reaksion ni Jesus tatun? Ninono na i pakawagan danatun nga totolay yari tu “ziminatu i allo na nira.” Masingi-singan na nga kawagadda i uffun anna banna-bannay  maggafu ta Dios yari tu insigida na ira nga inuffunan. Kakurugan na, “pinegafuanan na ira nga sinudduan tu aru nga ganna-gannug.”​—Mar. 6:31-34; Luc. 9:10, 11.

7-8. Kunnasi nga paparigan na minaggiddu ira nga elder si Jesus?

⁷Paparigan na minaggiddu ira nga elder si Jesus. Kuruga appresiattam i kukukuan na minassakrifisio ira nga elder para ta nittam! Ari nga masingan na wawwaragi ta kongregasion i aru tatun nga kukukuadda. Angngarigan na, nu egga i emergency, insigida nga manguffun i miembro ira na Hospital Liaison Committee ta kapangngurug da. Maruddu paga mabba nga mesimmu i emergency ira ta tangnga na gabi! Ngem megafu ta ikallo da i wagi da nga problemadu, pagolluan naw ira nga elder anna na giffamiliadda i pammakapianan na wagi da anne ta baggi da.

⁸ Mangungnguffun gapa i elder ira ta disaster relief anna ta pappataddag tu Kingdom Hall anna karuan paga ira nga fasilidad. Aru gapa nga tiempo i usu-usadda tapenu tudduan, pagaramman, anna suportan ittam. Mepangngo ta komendasion yaw ira nga brother anna i familia da. Bendisionan nakuan ni Jehova i passakrifisio da! Ngem mawag gapa nga balanse i elder ira. Ariadda nakuan nga ufutan i tiempo da ta teokratiko ira nga aktibidad tapus awan ngana tu tiempo da para ta familia da.

9. Segun ta Filipos 2:4, 5, kunnasi nakuan i appana-panono na ngamin nga Cristiano?

⁹ Bibbigan i Filipos 2:4, 5. Sittam ngamin, ari laman tu i elder ira i makagigiammu ta pinassakrifisio ni Jesus. Kagian na Biblia nga  ‘nabbalin yayya tu aripan.’ (Fil. 2:7) Anni i magigiammu tam tatun? Agga-nono na tadday nga aripan onu doroban nu kunnasi na paga nga mas mapagayayya i yafu na. Megafu ta aripan ittam ni Jehova anna passerbiattam gapa i wawwaragi tam, magga kayà tam nga mas aru paga i makua tam para kani Jehova anna ta wawwaragi tam. Makoffun i tumunug ira nga suhestion.

10. Anni ira i awayya na nga iyavu tam ta baggi tam?

¹⁰Innammu i pagimamma mu ta passakrifisio. Iyavu mu yaw ta baggim: ‘Kakayà ku kari nga isakrifisio i tiempo anna sikakku tapenu uffunan i tanakuan? Angngarigan na, anni tamma i kuakku nu ikiddaw da niakan nga bisitakku i lakay nga brother ta nursing home onu ikiddaw da nga dagatakku i bako nga sister tapenu makangay yayya ta study? Insigida ngà kari nga mabboluntariu nu kawagan i uffukku ta pappakarenu ta pakkombensionan onu ta pammentena ta Kingdom Hall?’ Turi ta naddedika ittam kani Jehova, nipromesa tam nga usattam i ngamin nga egga nittam tapenu passerbian yayya. Kayà ni Jehova nga usattam i tiempo, sikan, anna pakkukua tam tapenu uffunan i tanakuan. Nu massakrifisio ittam gafu, magayayya si Jehova. Ngem nu masingattam nga egga i pakkurangattam tatun, anni i puede tam nga kuan?

11. Kunnasi ittam moffunan na pakimallo tapenu mabbalin ittam tu minassakrifisio?

¹¹Napafutuan nga makimallo kani Jehova. Nu masingammu nga mawag mu paga i mabbalin tu minassakrifisio ngem gitta na ari ka mapaguyu nga kuan yatun, makimallo ka kani Jehova. Ikagim nisa i ngamin. Ikagim nu anni i mataga-tageno mu tapus ikiddom nisa nga iddan naka tu ‘pakkaraga anna pakawayya nga mamarulo ta uray na.’—Fil. 2:13.

12. Kunnasi nga makoffun ta kongregasion i kabataan ira nga brother nga bawtisadu?

¹² Nu kabataan ka nga brother anna bawtisadu ka ngana, ikiddom kani Jehova nga uffunan naka tapenu karagatammu nga mas mappeyusa para ta kongregasion. Ta karuan nga nasion, mas aru i elder ira anne ta ministerial nga aripan. Aru gapa tatun ira nga ministerial i ari ngana mabbing onu lakay ngana. Megafu ta dumaka-dakal i organisasiottam, mawag i mas aru nga mabbing nga brother tapenu manguffun ta panangngal ta totolay ni Jehova. Nu kakayà mu nga mappeyusa ta maski anni nga puede nga meyuffummu, mabbalikka nga magayayya. Ngatta? Megafu ta mapagayayya mu si Jehova, masingan na wawwaragi nga kakayà mu nga uffunan i tanakuan, anna matageno mu nga egga i makuam para ta nira.

13-14. Anni ira i meyuffuttam ta wawwaragi tam? (Innan i letratu ta vungun.)

¹³Sigga-sifu ka nakuan ta pakawagan na tanakuan. Nitabarang ni apostol Pablo ta Hebreo ira: “Arian nu nga kattaman i mangngua ta mapia anna mangibillay ta anni laman nga egga nikamu, ta i kuddanaw ira nga sakrifisio i makapagayaya ta Dios.” (Heb. 13:16) Praktikal yatun nga tabarang! Ari gare nabbayag kabalin nga nalawa na Cristiano ira ta Judea yatun nga tura, mawag nga panawadda i gibbalayadda, i negosio da, anna i ari tu Cristiano nga paparientes da. Tapus ‘mawag tu makkarela ira ta kavukiran.’ (Mat. 24:16) Tatun nga tiempo, magga mawag tu makka-uffu-uffun ira. Nu dati da ngana nakuan nga iyap-aplika i tabarang ni Pablo nga ibillay ta tanakuan i maski anni nga egga ta nira, mas mabi nakuan ira nga naka-adjust ta nanguli nga pattoleda.

¹⁴ Baka ari tu kanayun nga ikagi na wawwaragi nu anni i mawag da. Angngarigan na, nu natayan tu atawa i tadday nga brother, baka  mawag na i manguffun nisa nga mallutu para ta kanan na. Baka mawag na gapa i pattakayan onu manguffun ta tanakuan paga ira nga trabahu ta balena. Awayya na nga mappasiran yayya nga ikagi yatun ta baka maistorbo ittam. Ngem magga appresian na nu uffunattam yayya maski nu ari na nga ikiddaw yatun. Ariattam nakuan nonopan nga egga mabba saw i tanakuan nga manguffun nisa onu magga ikagi na mabba nu egga i mawag na. Iyavu mu gafu ta baggim, ‘Nu sakan i egga ta situasion na, anni tamma ira i mawag ku nga uffun?’

15. Anni i mawag tu kuattam nu kayà tam nga uffunan i tanakuan?

¹⁵Mabi ka laman nakuan nga marannian. Siguradu nga egga i kakongregasiommu nga kanayun nga sigga-paran nga manguffun ta tanakuan. Ariadda vuluvuga ipatageno ta nittam nga maistorbo tam ira. Ammu tam gapa nga nu egga i luttuag nga problema tam, uffunadda ittam. Kakayà tam nga parigan i kunnatun ira nga kakongregasiottam! Maturu tu 40 ngana i dagun na elder nga si Alan anna kayà na nga mabi nakuan yayya nga marannian. Pinannonopan na i ehemplo ni Jesus yari tu nakagi na: “Kuruga okupadu si Jesus ngem ari nga mappasiran nga umaranni nisa i totolay nga nadduruma i edad da tapenu mappoffun nisa. Talaga kakayà da yayya. Ammu da gare nga talaga ikavurungan na ira. Kayà ku nga parigan si Jesus. Kayà ku nga matageno na tanakuan nga mabi ngà nga marannian, minaggiddu, anna minangngikavurung ngà.”

16. Kunnasi makoffun i Salmo 119:59, 60 tapenu matuttul tam tu mapia si Jesus?

¹⁶ Ari nakuan nga makkafi i nono tam nu ari tam nga perfekto nga maparigan si Jesus. (Sant. 3:2) Ari nga perfekto nga maparigan na tadday nga estudiante i mestru na.  Ngem sisinu yayya nga mabbalin tu malalaki nu makagigiammu yayya ta nakkamalian na ira anna nu ikaguman na nga parigan tu mapia i ehemplo na mestru na. Maparigattam gapa tu mapia i ehemplo ni Jesus nu iyaplika tam i magiggigiammu tam ta pappersonal study tam anna nu ikagumattam nga itunung i nakkamaliattam ira.​—Bibbigan i Salmo 119:59, 60.

17-18. Anni i pammakapianattam nu mabbalin ittam tu minassakrifisio kagitta ni Jesus?

¹⁷ Nu minassakrifisio ittam, mapaguyu i tanakuan nga mabbalin gapa tu kunnatun. Kinagi na elder nga si Tim: “Egga ira i kabataan ta diammi nga napprogreso tapus nabbalin tu ministerial nga aripan maski nu abbabbing paga i karuan ta nira. Megafu yatun ta pamarig da ta nasingadda nga passakrifisio na tanakuan. Aru i meyuffun danatun nga kabataan nga brother ta kongregasiommi anna dakal gapa i meyuffudda ta elder ira.”

¹⁸ Makasarili i magaru ta totolay taw nga mundo. Ngem ari nga kunnatun i totolay ni Jehova. Kuruga appresiattam gare i pabbalin tu minassakrifisio ni Jesus yari tu determinadu ittam nga tuttulan i ehemplo na. Ari tam nga perfekto nga matuttul i ehemplo na ngem mawayya tam nga ‘tuttulan tu mapia i dakkua na ira.’ (1 Ped. 2:21, NW ) Nu kuattam gafu i ngamin nga mawayya tam tapenu mabbalin tu minassakrifisio kagitta ni Jesus, mabbalin ittam tu magayayya megafu ta mapagayayya tam si Jehova.