1-2. (a) Ngatta aru i marigatan nga mattalo ta egga i autoridad na? (b) Anni i gigiammuattam taw nga artikulo?

ARU i marigatan nga mattalo ta egga autoridad na. Masingadda gare nga maruddu nga faboran na dorob anna na gobiernu ira i mariku anna mainfluwensia nga totolay ngem ariadda uffunan i mariga ira. Kagian na Biblia: “Immagurayan na tolay i kasittolena ta pakaperwisiuwan na.” (Ecl. 8:9) Magaggangngua gapa tu marake i karuan nga lider na relihion yatutta ari ngana nga mattalo i totolay ta Dios. Yari tu nu egga i makipaggigiammu tu Biblia nittam, mawag nga uffunattam ira nga mattalo kani Jehova anna ta sinunno na ira nga mangirollu.

² Siempre, ari laman tu i Bible study ira i mawag nga mattalo kani Jehova anna ta organisasion na. Maski sittam nga nabayag ngana ta kinakurug, mawag nga mattalo ittam nga kanayun nga fustu i kukukuan ni Jehova. Nu karuan, egga ira i mesimmu nga posible nga mamurueba ta pattalo tam kani Jehova. Taw nga artikulo, gigiammuattam i tallu nga posible nga mamurueba ta pangurug tam: (1) nu mabbibbig ittam tu Biblia, (2) nu makalawa ittam tu instruksion ta organisasion ni Jehova, anna (3) nu meparubang ittam ta mariga ira nga situasion ta mappange.

3. Kunnasi nga mapurueban i pattalo tam kani Jehova nu mabbibbig ittam tu Biblia?

 ³ Ta pabbibbig tam tu Biblia, awayya na nga egga ira i pakkiavu tam meyannung ta pattratu ni Jehova ta karuan nga totolay  anna ta desision na ira. Angngarigan na, mabibbig tam ta libru na Numeros nga sinentensian ni Jehova tu patay i tadday nga Israelita megafu ta nagikkayu ta aggaw na Sabbath. Ngem mabibbig tam ta mekadua nga libru na Samuel nga ta pappasa na piga nga siglo, pinakoma ni Jehova si Patul David ta liwa na nga pamabay anna pamatay. (Num. 15:32, 35; 2 Sam. 12:9, 13) Baka manono tam, ‘Ngatta pinakoma ni Jehova i madammo ira nga liwa ni David ngem sinentensian na nga matay i lalaki nga gitta na baddi laman mabba i nakaliwatan na?’ Tapenu matabbag yatun, ikonsidera tam i tallu nga gannug nga mawag nga daddammattam nu mabbibbig ittam tu Biblia.

4. Kunnasi nga makoffun i Genesis 18:20, 21 anna Deuteronomio 10:17 tapenu mas mattalo ittam ta desision ira ni Jehova?

⁴Ari tu kanayun nga ikagi na Biblia i ngamin nga detalye. Angngarigan na, kurug tu ikagi na Biblia nga napafutuan nga nabbabawi si David. (Sal. 51:2-4) Ngem kunnasi gapa i kata-katolay nari na lalaki nga nagikkayu ta aggaw na Sabbath? Nabbabawi kari gapa yayya ta nakua na? Egga kari ngana i arian na nga sinuttul nga dob ni Jehova? Namippiga kari ngana yayya nga natabarangngan ta pagikkayu na ta aggaw na Sabbath ngem arian na nga ginigginna? Awan ta Biblia danatun nga detalye. Ngem makasiguradu ittam nga “ari vuluvuga mabbalin tu killu” si Jehova. (Deut. 32:4) Ibase na ngamin nga desision na ta fustu nga informasion, ari nga ta istoria laman, opinion na totolay, onu ta maski anni nga manginfluwensia ta desision na totolay. (Bibbigan i Genesis 18:20, 21; Deuteronomio 10:17.) Nu mas aru i magigiammu tam meyannung kani Jehova anna ta estandarte na ira, mas mattalo ittam ta desision na ira. Maski nu egga i pakkiavu tam nu mabbibbig ittam tu Biblia nga ari tam ammu i tabbag na sangawe, ammu tam nga makalanno ngana i pakannammu tam ta Dios, yari tu masiguradu tam nga ‘matunung yayya ta ngamin nga kuan na.’—Sal. 145:17.

5. Kunnasi nga mafektan na kina-imperfekto i paningattam ta ganna-gannug? (Innan gapa i kahon nga “ Afektan na Kina-imperfekto i Paningattam.”)

⁵Afektadu i paningattam ta ganna-gannug megafu ta imperfekto ittam. Pinaratu ittam na  Dios nga egga abilidad tam nga ipasingan i kualidad na ira yatutta kayà tam nga patas nakuan i katratu na totolay. (Gen. 1:26) Ngem megafu ta imperfekto ittam, awayya na nga mali i pagabbo tam maski nu gitta na ammu tam ngana i ngamin nga informasion. Angngarigan na, sobra i nikadismaya ni Jonas ta desision ni Jehova nga ikallo i taga-Nineve ira. (Jon. 3:10–4:1) Ngem anni kari i narresultan natun nga desision ni Jehova? Napaliag i maturu tu 120,000 nga Ninevita nga nabbabawi! Si Jonas gafu, ari tu si Jehova, i mawag nga metunung.

6. Obligadu kari si Jehova nga ipakanawag nittam i desision na ira?

⁶Ari nga obligadu si Jehova nga ipakanawag ta totolay i desision na ira. Pinamavulunan ni Jehova i aripan na ira ta nappasa nga ikagi nisa i mataga-tageno da meyannung ta nakua na onu kuan na nga desision. (Gen. 18:25; Jon. 4:2, 3) Nu karuan, ipakanawag na i rason ta tadday nga desision na. (Jon. 4:10, 11) Ngem ari tu obligadu si Jehova nga ipakanawag nittam i desision na ira. Bilang Namaratu, arian na kawagan nga makkonsulta nittam nige onu kabalin na nga maddesision.​—Isa. 40:13, 14; 55:9.

7. Ngatta awayya na nga marigatan ittam nga mattalo ta totolay nga sinunno ni Jehova nga mangirollu?

⁷ Siguradu nga ariattam paddudan nga kanayun nga kuan ni Jehova i fustu. Ngem awayya na nga marigatan ittam nga mattalo ta totolay nga sinunno na. Baka manono tam gare nu danuri egga autoridad na ta organisasion ay talaga tuttuttuladda i instruksion ni Jehova onu i kayà da lagapa. Awayya na nga kunnatun gapa i ninono na karuan ta tiempo na Biblia. Ikonsidera tam i angngarigan ira nga nakagi ta  parapo 3. Posible nga nanono na kaparientes na lalaki nga nagikkayu ta aggaw na Sabbath nu talaga kari nga nakkonsulta si Moises kani Jehova nige na nga sinentensian tu patay i lalaki. Kunnasi gapa i panadday ni David ta atawa ni Urias nga Hiteo? Baka nanono na kofun ira ni Urias nga inusa ni David i posision na bilang patul tapenu ari yayya masentensian tu patay. Daddamman yaw: Mattalo si Jehova ta sinunno na ira nga mangirollu ta organisasion anna ta kongregasion. Nu ariattam gafu mattalo taw ira nga lallaki, makagi tam kari nga mattalo ittam kani Jehova?

8. Base ta Kingngua 16:4, 5, anni i napparehuan na ollu-siglo nga kongregasion anna na kongregasion ira sangawe?

⁸ Igiggiya ni Jehova sangawe i organisasion na taw ta davvun gukaban na “mekatalo anna nannono nga doroban.” (Mat. 24:45) Kagitta na manangngal nga baggi ta ollu siglo, irolluan naw nga doroban i totolay na Dios ta interu mundo anna mangiyawa ira tu instruksion ta elder ira ta kongregasion. (Bibbigan i Kingngua 16:4, 5.) I elder gapa ira i mangipatuppal tatun ira nga instruksion ta kongregasion. Mepasingattam nga mattalo ittam ta desision ni Jehova nu tuttulattam i instruksion ira nga malawa tam ta organisasion anna ta elder ira.

9. Ta anni nga situasion nga awayya na nga marigatan ittam nga tumuttul ta desision na elder ira, anna ngatta?

⁹ Marigatan ittam nu karuan nga tumuttul ta desision na elder ira. Angngarigan na, ta nappasa ira nga dagun, egga ira i nakua nga panguloli. Egga ira i kongregasion nga neyali ta tanakuan nga sirkito. Nikiddaw gapa na elder ira ta karuan nga wawwaragi nga magali ta tanakuan nga kongregasion tapenu ma-maximize i seating capacity na Kingdom Hall tam ira. Nu tadday ittam ta napili nga magali tu  kongregasion, baka marigatan ittam nga panawan i kokkofun anna familia tam. Nakalawa kari i elder ira tu instruksion nga maggafu mismu ta Dios nu sitaw me-asayn i kada publisher? Ari. Yatun i awayya na nga mamarriga ta panuttul tam ta instruksion nga malawa tam. Ngem mattalo si Jehova ta elder ira. Mawag gafu nga mattalo ittam gapa nira. *

10. Segun ta Hebreo 13:17, ngatta mawag nga tumuttul ittam ta elder ira?

¹⁰ Ngatta mawag nga tumuttul ittam ta elder ira anna suportattam i desisiodda ira maski nu tanakuan i kayà tam? Nu kuattam gare yatun, mapattalupaddian i pattaradday ta kongregasion. (Efe. 4:2, 3) Mapprogreso gapa i kongregasion nu mapakalinno nga makimoray i ngamin ta desision ira nga nakka-anugutan na elder ira. (Bibbigan i Hebreo 13:17.) I pinaka-importante, mepasingattam nga mattalo ittam kani Jehova nu tuttulattam danuri pattalakkan na nga manangngal nittam.​—King. 20:28.

11. Anni i makoffun tapenu mas mattalo ittam ta instruksion na elder ira?

¹¹ Mas mattalo ittam ta instruksion na elder ira nu daddammattam nga kikkiddawadda i uffun na masanto nga espiritu nu egga i desisionadda nga makafekto ta kongregasion. Ikonsidera da gapa tu mapia i prinsipio ira na Biblia anna instruksion ira nga naggafu ta organisasion ni Jehova. Kakayà da nga mapagayayya si Jehova anna matangngallan tu mapia i totolena. Matalo ira nga lallaki anna ammu da nga egga i tattabbagadda ta Dios nu ariadda ituppal i responsibilidad da. (1 Ped. 5:2, 3) Nonopan yaw: Nassirina i totolay taw ta mundo megafu ta lahi, relihion, anna pulitika. Ngem egga i pattaradday na totolay ni Jehova nga maddayaw nisa. Posible laman yatun megafu ta pamendision ni Jehova ta organisasion na!

12. Anni ira i mawag nga ikonsidera na elder ira tapenu mammuan nu mabbabawi i nakaliwa?

¹² Nitalo ni Jehova ta elder ira i madammo nga responsibilidad nga pattalupaddianan nga marenu i kongregasion. Nu nakaliwa tu madammo i tadday nga Cristiano, ekspektan ni Jehova nga ammuan na elder ira nu mepangngo paga nga mattalupaddian yayya ta kongregasion. Importante nga ammuadda nu kurug nga mabbabawi i nakaliwa. Posible gare nga kagian na nakaliwa nga mabbabawi yayya. Ngem kurug kari nga ikalussona i kingngua na? Determinadu kari yayya nga ari ngana kuan uli i nakaliwatan na? Nu i marake nga kakavvulu i tadday nga rason ta pakaliwa na, sigga-paran kari yayya nga iyemmang i pakikavulu nira? Sigga-pakimallo nga ikonsidera na elder ira i informasion anna i prinsipio ira ta Biblia, kunne na gapa i panageno na nakaliwa ta kingngua na. Kabalin na, desisionadda nu mattalupaddian ta kongregasion i nakaliwa. Nu karuan, mawag nga madisfellowship yayya.​—1 Cor. 5:11-13.

13. Anni i posible nga pakavurungattam nu kofun onu kaparientes tam i nadisfellow?

¹³ Kunnasi nga mapurueban i pattalo tam ta elder ira? Nu ari tam nga madukko nga kofun onu kaparientes i nadisfellow, awayya na nga mabi tam laman nga akseptan i desision na elder ira. Ngem kunnasi nu madukko nittam i nadisfellow? Baka mavurung ittam nga ari nikonsidera na elder ira i ngamin nga informasion onu nonopattam nga i desisiodda ay ari tu i kayà ni Jehova nga mesimmu. Anni i makoffun nittam tapenu mattalo lagapa tatun nga desision?

14. Anni i makoffun nittam nga mattalo ta desision na elder ira nga i-disfellowship i kofun onu kaparientes tam?

 ¹⁴ Daddammattam nga unnug ni Jehova i paddisfellowship anna pammakapianan yatun na kongregasion anna na nakaliwa. Nu ari nga madisfellowship i ari mabbabawi nga nakaliwa, baka mainfluwensian na i karuan ta kongregasion nga makaliwa gapa. (Gal. 5:9) Arian na gapa nga matageno i dammo na liwa na anna ari yayya nga magguyu nga ulian i appana-panono anna i kukukuan na tapenu metoli i makasta nga relasion na kani Jehova. (Ecl. 8:11) Makasiguradu ittam nga seriosowan na elder ira i annungadda nga maddesision nu mawag nga madisfellow i tadday. Ammu da nga kagitta na hues ira ta Israel gari, ‘ari ira nga manentensia para ta tolay nu ari para kani Jehova.’—2 Cro. 19:6, 7.

15. Ngatta mawag nga mas mattalo ittam sangawe ta instruksion ira ni Jehova?

¹⁵ Araranni ngana i panuppalan na marake nga mundo yatutta mas kawagan nga mattalo ittam ta desision ira ni Jehova sangawe. Ngatta? Sonu dakal nga ziga, awayya na nga makalawa ittam tu instruksion ira nga gitta na mariga nga malippawa, ari tu praktikal, onu mariga tuttulan. Siempre, ari tu direkta nga makiyuvovug nittam si Jehova. Ngem siguradu nga iyawa na i instruksion ira ta sinunno na ira nga mangirollu. Tatun nga tiempo, ariattam nakuan nga paddudan i instruksion onu nonopattam, ‘Talaga kari nga naggafu i instruksion kani Jehova, onu baka uray lagapa yatun na brother ira nga mangirollu?’ Mattalo ka kari kani Jehova anna ta organisasion na tatun nga kritikal nga tiempo? Nakadepende yatun ta pagimamma mu ta teokratiko ira nga direksion sangawe. Nu mattalo ka ta instruksion ira nga malawa tam sangawe anna sigga-parakka nga tumuttul tatun ira, siguradu nga kunnatun gapa i kuammu sonu dakal nga ziga.​—Luc. 16:10.

16. Kunnasi nga mapurueban i pattalo tam ta desision ira ni Jehova ta mappange?

¹⁶ Ikonsidera tam gapa nu anni noka i mabbalin tu reaksiottam ta desision ira ni Jehova sonu manuppal ngana i marake nga mundo. Sangawe, magiddanama ittam nga mas aru paga nakuan nga totolay i masserbi kani Jehova, kasali ngana i ari tu Saksi nga kaparientes tam. Ngem sonu Armagedon, desisionan ni Jehova, gukaban ni Jesus, nu anni i pattuppaladda. (Mat. 25:31-33; 2 Tes. 1:7-9) Ari tu sittam i maddesision nu sinni noka i mepangngo nga makalawa tu allo ni Jehova. (Mat. 25:34, 41, 46) Mattalo ittam kari noka ta desision ira ni Jehova, onu baka mesiddukal ittam tatun? Sanayattam ngana nakuan  gafu nga mattalo kani Jehova sangawe tapenu siguradu nga buu i pattalo tam nisa ta mappange.

17. Kunnasi ittam nga mabenefisiowan ta desision ira ni Jehova sonu manuppal i marake nga mundo?

¹⁷ Nonopan i pattolay ta napabagu nga mundo sonu masingattam i resulta ira na desision ni Jehova. Awan ngana noka i falsu nga relihion anna i kakkam ira nga negosiante anna gobiernu nga namarriga ta totolay. Awan ngana gapa tu mattaki, mallakay onu mabbako, anna matay. Mefuku ta marivu nga dagun si Satanas anna i demonio na ira. Mawawan ngana gapa i efekto ira na parrebelde da. (Nep. 20:2, 3) Siguradu nga magayayya ittam noka ta nattalo ittam ta desision ira ni Jehova!

18. Anni i magigiammu tam ta Israelita ira nga mabibbig ta Numeros 11:4-6 anna 21:5?

¹⁸ Ta pattolay ta napabagu nga mundo, posible kari nga mapurueban i pattalo tam ta desision ira ni Jehova? Ikonsidera tam i nesimmu kabalin nga napalubbangan i Israelita ira ta nika-aripadda ta Ehipto. Egga ira i narreklamo megafu ta agga-nono da i masingngo ira nga makan ta Ehipto anna nolang ngana ira ta probision ni Jehova nga manna. (Bibbigan i Numeros 11:4-6; 21:5.) Posible kari nga kunnatun gapa noka i appana-panono tam sonu mangultimu ngana i dakal nga ziga? Ariattam ammu nu kunnasi noka i karu na mawag nga matrabahu tapenu mapakarenuan i davvun anna sisinu nga mapabbalin tu paraiso yatun. Magga aru i matrabahu tatun nga tiempo anna posible nga marigatan ittam ta gafu. Marreklamo ittam kari noka ta probision ira ni Jehova tatun nga tiempo? Yaw i siguradu: Nu mas appresiattam i probision ira ni Jehova sangawe, siguradu nga mas appresiattam gapa i probision na ira tatun nga tiempo.

19. Anni ira i nagigiammum taw nga artikulo?

¹⁹ Kanayun nga fustu i desision ira ni Jehova. Mawag nga kumbinsidu ittam tatun. Mawag gapa nga mattalo ittam ta pattalakkan ira ni Jehova nga mangipatuppal ta instruksion na ira. Ariammu kattaman i kinagi ni Jehova kani profeta Isaias: “Massikakkamu nu mattalupaddiakkamu nga kalmadu anna nu mattalo kamu.”​—Isa. 30:15.