SEGUN ta Dob, parefu nga puede nga metavvung kani Jehova i guru anna i paloma. Kanayun nga makkavulu nga makagi yaw nga dua nga mammanu ta dob ira meyannung ta pangitavvung anna puede nga mapattali yaw nga dua nga mammanu bilang tavvung. (Lev. 1:14; 12:8; 14:30) Dakal i bentaha natun megafu ta ari tu kanayun nga mabi nga malegan i guru. Ngatta?

Magala-ali gare tu paddianan i guru ira. Nu summer, maddian ira ta Israel. Nu Oktubre gapa, mappa-zita ira mappange ta nasion ira nga mas mapatu tapus manoli ngana laman ira ta Israel sonu spring ngana. (Sol. 2:11, 12; Jer. 8:7) Ta Israel gafu gari, nu tiempo ngana na winter, awan tu malegan na Israelita ira nga guru nga awayya da nga itavvung.

Maruddu nga ari gapa nga magala-ali tu paddianan i paloma ira. Yari tu ta interu nga dagun, mabi laman nga malegan ta Israel i kunnatun ira nga mammanu. Fuera tatun, puede ira nga maalagaan ta balay. (Ikumpara i Juan 2:14, 16.) Segun ta libru nga Bible Plants and Animals, “magalaga tu paloma i ngamin nga babario anna ili ta Palestina. Ta kada balay, egga i balay na mammanu, onu batta ta libag nga awayya nga paddianan na mammanu.”​—Ikumpara i Isaias 60:8.

Ipasingan gafu ni Jehova nga minaggiddu anna rasonable yayya megafu ta alawatan na bilang tavvung i mammanu ira nga mabi nga malegan na Israelita ira ta interu nga dagun.