1, 2. Anni ira i kapurueba nga mawag tu labanan na aripan ira ni Jehova?

MAMEGAFU ta ollu nga matalo nga tolay nga si Abel adde ta kaggawattam, makikkillaban i matalo ira nga maddayarayaw. Nitura ni apostol Pablo ta Cristiano ira nga Hebreo nga ‘kuruga aru i inattammadda nga ziga-riga,’ tapenu malàda i fabor anna bendision ni Jehova. (Heb. 10:32-34) Nikumpara ni Pablo i pakillaban na Cristiano ira ta pappursigi na atleta ira nga makikkillaban ta pagayang na Griego kagitta na pareha, gavvu, anna boksing. (Heb. 12:1, 4) Ta maddaggun, makippareha ittam para ta inango, anna meparubang ittam ta kalaban nga kayàna alsan i fokus tam, siddukallan, mansuan, anna arian i pagayaya pati i mappange ira nga bendision.

² Ollu, egga i paki-arubang onu pakillabattam kontra kani Satanas anna ta marakay nga mundona. (Efe. 6:12) Importante nga ariattam mappa-afekto ta “maladda ira nga pataddag” na mundo. Kasali tatun ira i doktrina, pilosopiya, anna makadaral ira nga annangngua, kagitta na pagangngua tu immoralidad, pattabaku, anna pangabuso ta binarayang anna droga. Ariattam nakuan immangan i pakillaban ta nepattaggan ira nga pakkafian  anna pakkadismaya.​—2 Cor. 10:3-6; Col. 3:5-9.

3. Kunnasi ittam sanayan na Dios ta pakillaban?

³ Posible kari nga affutan yatun nga makapangngua ira nga kalaban? Wan, ngem mariga. Negitta ni Pablo i baggina ta boksingero gari, ta pakkagina: “Ari tu kagittà i manultu ta paddag.” (1 Cor. 9:26) Nu kunnasi nga labanan na boksingero i kalabanna, labanattam gapa nakuan i kalabattam. Sanayan anna uffunan ittam ni Jehova. Nangiyawa yaya tu makepaliag-inango nga instruksion ta Biblia. Uffunanna gapa ittam gukaban na nebase-Biblia ira nga publikasion, study, asembli, anna kombension ira. Iyaplikam kari i nagigiammum ira? Nu ari, kagittam i “manultu ta paddag,” nga ariammu talaga kokkontran i kalabammu.

4. Kunnasi nga ariattam mappaffu ta marakay?

⁴ Awayyana nga umatake i kalabattam ta tiempo nga ariattam ekspektan anna nu makafi ittam, yari tu magalerto tam nakuan kanayun. Nitabarang na Biblia: “Ari kamu nga makiyaffu ta marakay. Affutan nu lallagu i marakay ta pangngua nu ta mapia.” (Roma 12:21) I pamagaram nga “ari kamu nga makiyaffu ta marakay,” ipasinganna nga mawayya tam nga affutan i marake. Makua tam yatun nu ariattam immangan nga labanan yatun. Ngem maffu ittam ni Satanas, kunne na gapa na marake nga mundona anna na kina-imperfekto tam nu ariattam magimmugug anna iyemmattam i makillaban. Ariammu vuluvuga ipamavulun nga tantalawannaka ni Satanas tapenu pakkafian i limam anna maffu!​—1 Ped. 5:9.

5. (a) Anni i makoffun nittam tapenu ari magimmang ta pakillaban tapenu malà i bendision na Dios? (b) Sinni ira i ikonsidera tam nga ehemplo ta Biblia?

⁵ Tapenu mangaffu ta pakillaban, ari nakuan kattamman i rason nu ngatta makillaban. Malà i fabor anna bendision na Dios nu maffokus ta pamasiguradu nga mabibbig ta Hebreo 11:6: “Ta i sinni laman nga umaranni ta Dios ay mawag tu kurugan na tu egga i Dios ay tu bala-balattan na Dios danuri i magaleg sa.” I orihinal nga Griego nga termino nga netransleyt tu “magaleg,” kebalinanna nga mawag tu mappursigi ittam. (King. 15:17) Iniddan ittam na Katurakan tu mapia ira nga ehemplo na lallaki anna babbay nga malallappo nga nappursigi para ta bendision ni Jehova. Neparubang da Jacob, Rachel, Jose, anna Pablo ta sirkumstansia ira nga kuruga mamakkafi ta emosional anna pisikal, ngem napakurugda nga mattuppal ta aru nga bendision i pappasa-pasensia. Kunnasi tam maparigan yaw ira nga appa nga malalaki nga nakillaban?

6. Anni i nakoffun kani Jacob tapenu mappasa-pasensia, anna anni i nalawàna nga bala-balo? (Innan i letratu ta gafu na artikulo.)

⁶ Nakiggavvu anna nappasa-pasensia si Jacob megafu ta pangayana kani Jehova, pangappresia ta espiritual ira nga gannug, anna interu futu nga pattalo ta promesana nga bendisionan i gakana. (Gen. 28:3, 4) Yatun i rason nga maski ma-100 anios ngana si Jacob ay kingnguana i ngamin nga mawayyana tapenu malawà i bendision ni Jehova; nakiggavvu yaya maski ta anghel nga nabbaggi tu tolay. (Bibbigan i Genesis 32:24-28.) Makalanno kari i sikan anna pagattattam ni Jacob tapenu labanan i makapangngua nga anghel? Siempre ari! Ngem determinadu yaya nga makiggavvu, anna pinakurugna nga arianna magimmang ta pakillaban! Talaga nabendisionan yaya ta pappasa-pasensiana. Yari tu nagalan yaya tu Israel, (kebalinanna “Tadday nga Makikkiggavvu [Mappasa-pasensia] ta Dios” onu “Makikkiggavvu i Dios”). Nalawà ni Jacob i  bala-balo nga ala-alegattam gapa​—i fabor anna bendision ni Jehova.

7. (a) Anni nga mariga nga situasion i neparubang kani Rachel? (b) Kunnasi yaya nakiggavvu, anna anni i bendisionna?

⁷ Kakayà gapa ni Rachel nga masingan nu kunnasi tuppalan ni Jehova i nipromesana ta atawana nga si Jacob. Ngem egga i problema nga gittana awan tu solusionna. Awan tu ana ni Rachel. Ta kaggawanna, kuruga mataka-taki yatun. Kunnasi nalegan ni Rachel i emosional anna pisikal nga sikan tapenu ari magimmang ta pakillaban tatun nga makadismaya nga sirkumstansia nga arianna kontroladu? Ari napawan i iddanamana. Nakiggavvu lallagu yaya gukaban na mas paga nga pakimemallo. Sinabbag ni Jehova i napafutuan nga pakimemallona anna nabendisionan gabbalaman tu ána. Yari tu nakagina: “Gukaban na determinadu nga pakiggavvu ay nakiggavvu ngà . . . Sakan gapa i nangaffu!”​—Gen. 30:8, 20-24.

8. Anni i naekspiriensa ni Jose nga mabayag anna mariga nga kapurueba, anna ngatta makasta nga ehemplo nittam i kingnguana?

⁸ Dakal i influwensia na matalo nga ehemplo da Jacob anna Rachel ta anada nga si Jose ta pangarubanna ta kapurueba ira ta pangurugna. Turi ta 17 anios si Jose, dakal i nangulian na pattolena. Megafu ta passil, nilaku yaya na wawwaragina ta pakka-aripan. Tapus inattammanna i aru nga dagun nga ari patas nga nikefukuna ta Ehipto. (Gen. 37:23-28; 39:7-9, 20-21) Ari nga nakkafi i nono ni Jose anna arianna ginakkag nga mangibalo megafu ta taki na nono. Nifokusna lallagu i nono anna futuna ta makasta nga relasionna kani Jehova. (Lev. 19:18; Roma 12:17-21) Makoffun nakuan nittam i ehemplo ni Jose. Angngariganna, maski ari makasta i nesimmu ta kabbittam onu gittana awan tu iddanama na maddaggun nga situasiottam, mawag nga ariattam magimmang makiggavvu anna mappasa-pasensia. Nu kuattam yatun, makapattalo ittam ta bendision ni Jehova.​—Bibbigan i Genesis 39:21-23.

9. Ta pamarig kada Jacob, Rachel, anna Jose, anni nakuan i kuattam tapenu malawà i bendision ira ni Jehova?

⁹ Nonopammu i situasion nga awayyana nga kapurueba nikaw. Kagitta na kawan na hustisia, diskriminasion, onu panguyaw. Onu awayyana nga inakusaddaka megafu ta passil. Imbes nga makkafi i limam anna mappaffu, daddamman nu kunnasi nga tulu-tuloy nga sigga-pagayaya nga nasserbi da Jacob, Rachel, anna Jose kani Jehova. Pinasikan anna binendisionan ira na Dios megafu ta kanayun nga pangappresiada ta espiritual nga ganna-gannug. Tulu-tuloy ira nga nakiggavvu anna nagguyu mekunnay ta pakimalloda. Mattolay ittam ngana ta pangurianan na marake nga sistema na ganna-gannug; yatutta egga i maladda nga rasottam nga maginnag ta mappange nga iddanama! Sigga-parakka kari nga mappursigi tapenu malawà i fabor ni Jehova nga gittana makiggavvu ka?

10, 11. (a) Kunnasi ittam makiggavvu para ta bendision ni Jehova? (b) Anni i makoffun nittam tapenu makapaddesision tu fustu anna ari madismaya anna mawanan tu fokus?

¹⁰ Anni ira nga situasion nga kawagattam i makiggavvu para ta bendision ni Jehova? Aru i makikkillaban kontra ta nepattaggan nga pakkafian. Kawagan na tanakuan i determinadu nga pappursigi tapenu mapattalupaddian i positibo nga pagimamma ta ministerio. Onu ta situasiommu, awayyana tu attattammammu i makafi nga gawa-gawayyan onu i pagitetadday. Ariattam gapa tagibadditan i appursigi na karuan nga pakoman i nakapataki onu nakaliwa nira. Maski  nabayag tam ngana nga massesserbi kani Jehova, kawagattam ngamin nga labanan i ganna-gannug nga makefugag ta passerbi tam ta Dios, nga mamendision ta matalo.

¹¹ Mariga i maddesision tu fustu anna i panuttul ta Cristiano nga pattolay. Mas ngana nu guggunan ittam na minangngilloko nga futu tam ta tanakuan nga direksion. (Jer. 17:9) Nu natagenomu nga nafektan ka, ipakimallomu i masanto nga espiritu. Mapasikakka na pakimallo anna na masanto nga espiritu tapenu mattulu-tuloy ka ta fustu nga dalan anna bendisionannaka ni Jehova. Magguyu mekunnay ta pakimallomu. Purueban nga mabbibbig tu Biblia kada aggaw, anna mangiskediul tu personal study anna regular nga Paddayarayaw na Familia.​—Bibbigan i Salmo 119:32.

12, 13. Kunnasi noffunan i dua nga Cristiano tapenu malabanan i marake ira nga pakkaraga?

¹² Aru i ehemplo nu kunnasi noffunan na Uvovug na Dios, na masanto nga espiritu, anna na publikasiottam i Cristiano ira tapenu malabanan i marake ira nga pakkaraga. Nabibbig na tadday nga tinedyer i artikulo nga “Paano Mo Mapaglalabanan ang Maling mga Pagnanasa?” ta Disiembre 8, 2003 nga Gumising! Anni i reaksionna? “Makikkillabannà kontra ta ari mepangngo nga appana-panono. Turi ta nabibbigku nga ‘para ta aru, kuruga mariga i paki-arubang ta marake ira nga pakkaraga,’ natagenoku nga parte ngà talaga na pawwaragi. Ariakku magitetadday.” Nabenefisiowan gapa i tinedyer ta artikulo nga “Mga Alternatibong Istilo ng Pamumuhay—Sinasang-ayunan ba Ito  ng Diyos?” ta Oktubre 8, 2003 nga isyu. Nabibbigna nga egga i laba-labanan na karuan nga “madammo nga taki.” (2 Cor. 12:7) Maski nu makikkillaban ira tapenu mapattalupaddian i matunung nga kondukta, positibo i paningadda ta mappange. “Megafu tatun,” kunna, “kada aggaw nga mappasa, mawayyà nga mammakatalo. Dakal i pappabaloku kani Jehova ta pangusana ta organisasionna tapenu moffunan ittam nga makapattalo kada aggaw taw nga marake nga sistema na ganna-gannug.”

¹³ Innattam gapa i naekspiriensa na sister nga taga-United States. Niturana: “Mappabalo ngà nikamu ta kanayun nga pangiyawa ta eksakto nga kawagammi ta mepangngo nga tiempo. Kanayun nga matagenoku nga netura yaw ira nga artikulo para niakan. Aru nga dagun nga laba-labanakku i masikan nga pakkaraga ta gannug nga kalussaw ni Jehova. Nu karuan, gittana makkafi ngana i nonoku anna magimmang ngana ta laban. Ammù nga minangngikallo anna minammakoma si Jehova. Ngem megafu ta marake nga pakkaraga nga ariakku talaga mekalussaw ta kononaggakku, matagenoku nga gittana ari ngà mepangngo nga mangalawà ta uffunna. Nafektanna yaw nga pakillaban i kada aspeto na pattolè. . . . Kabalikku nga nabibbig i artikulo nga ‘Mayroon Ka Bang “Isang Puso Upang Makilala” si Jehova?’ ta Marso 15, 2013 nga Ang Bantayan, talaga natagenoku nga kayànà nga uffunan ni Jehova.”

14. (a) Anni i natageno ni Pablo ta pakillabanna? (b) Kunnasi tam malabanan i pakkafiattam ira?

¹⁴ Bibbigan i Roma 7:21-25. Naekspiriensa ni Pablo i ziga na pakillaban ta pakkaraga anna pakkafian ira na imperfekto nga baggi. Ngem dakal i komfiansana nga mangaffu yaya laban ta pakkaraga na baggina gukaban na pattalo anna pakimallo kani Jehova anna pangurug ta sakrifisio nga tavvu ni Jesus. Kunnasi ittam gapa? Awayya tam mangaffu ta pakillaban ta mismu nga pakkafiattam ira. Kunnasi? Gukaban na pamarig kani Pablo, interu futu nga pattalo kani Jehova imbes nga ta sarili tam nga sikan, anna pangurug ta tavvu.

15. Ngatta makoffun i pakimallo tapenu mattalupaddian ittam nga matalo anna maattamman i kapurueba ira?

¹⁵ Egga i tiempo nga ipamavulun na Dios nga ipasingattam i konag na pangikavurung ta tadday nga gannug. Angngariganna, kunnasi nu egga grabe nga taki tam (onu na kafamilia tam) onu neparubang ittam ta kawan tu hustisia? Mepasingattam nga buu i pattalo tam kani Jehova nu makimemallo sa tu sikan tapenu mattalupaddian nga matalo anna ari mari i pagayaya tam anna kinabalanse ta espiritual. (Fil. 4:13) Pakurugan na ekspiriensa na aru ta kaggawattam anna ta tiempo ni Pablo nga makoffun i pakimallo tapenu mapasikan anna makkomfiansa tam tapenu tulu-tuloy nga magattam.

16, 17. Anni i determinasiommu bilang makiggavvu?

¹⁶ Kakayà na Diablo nga masingan nga makkafi i nono anna i limam megafu ta naffu ka. Determinadu ka nakuan nga ‘tuttulan i mapia.’ (1 Tes. 5:21) Makasiguradu ka nga mangaffu ka ta pakillaban kontra kani Satanas, ta marake nga sistemana, anna ta maski anni nga marake nga pakkaraga. Makuam yatun gukaban na pattalo ta abilidad na Dios nga mamasikan nikaw.​—2 Cor. 4:7-9; Gal. 6:9.

¹⁷ Ari magimmang nga makillaban, mappursigi, makiggavvu, anna mappasa-pasensia. Interu futu nga mattalo kani Jehova nga “ivuvvuna nikamu i bendision adde ta awan ngana tu pakkurangan.”​—Mal. 3:10.