Kinagi ni apostol Pablo meyannung kani Jehova *: “I Dios i paggafuan na ngamin nga uffun! Banna-bannayan nà ta ngamin nga ziga-riga ku.” (2 Corinto 1:3, 4) Yatutta ipasiguradu na Biblia nga kanayun nga manguffun i Dios anna awan tu sobra i kadakalna nga trahedia nga ari ittam mawayya nga banna-bannayan na nelangitan nga Yama tam.

Siempre, mawag nga egga kuattam nu kayà tam nga banna-bannayan ittam na Dios. Kunnasi ittam moffunan na doktor nu ariattam nappa-iskediul sa? Niyavu ni profeta Amos: “Makkavulu kari nga lumakag i dua tu tolay nu ariadda nassingan segun ta napaguruvovugan?” (Amos 3:3, footnote) Yatutta ipagaram na Katurakan: “Umaranni kamu ta Dios, ay umaranni yaya nikamu.”​—Santiago 4:8.

 Ngatta makasiguradu tam nga umaranni nittam i Dios? Ollu, megafu ta namippigana nga kinagi nga kayàna ittam uffunan. (Innan i  kahon.) Mekadua, megafu ta egga i totolay nga mamakurug nga binanna-bannayan ira na Dios​—totolay gari anna ta kaggawattam.

Kagitta na aru nittam nga magaleg tu uffun na Dios, naka-ekspiriensa gapa tu trahedia si Patul David. Nakimemallo yaya kani Jehova: “Kari tu ginnam-mà ta pakkiddò ta uffum-mu.” Simibbag kari i Dios? Wan. Kunna paga ni David: “Magayaya ngà megafu ta panguffun na.”​—Salmo 28:2, 7.

Ginakkag na Dios nga egga importante nga annungan ni Jesus ta pamanna-bannay. Tadday ta annungan nga niyawa na Dios kani Jesus ay “pammapian i nabigaran nga futu” anna “banna-bannayan ngamin i marraddam.” (Isaias 61:1, 2) Kagitta na neprofesiya, interesadu si Jesus ta totolay nga “nabanna-bannag anna agga-kattu ta madammo.”​—Mateo 11:28-30.

Binanna-bannayan ni Jesus i totolay gukaban na masirib nga tabarang, masippo nga pattratu, anna ta karuan nga situasion, pinammapiana i taka-takida. Mittan, nakimemallo kani Jesus i egga leprosona: “Awayya mà nga pammapian nu yatun i urem.” Megafu ta allona, kinagi ni Jesus: “Yatun i urè; mammapia ka ngana.” (Marcos 1:40, 41) Nammapia i leprosona.

Awan ta davvun i Ana na Dios tapenu personal nga banna-bannayan ittam. Ngem si Jehova nga Yamana, “i Dios nga paggafuan na ngamin nga uffun,” tulu-tuloy nga banna-bannayanna i magawag ira tu pammanna-bannay. (2 Corinto 1:3) Ikonsidera i appa nga usu-usan na Dios tapenu banna-bannayan i totolay.

• Biblia. “Ngamin i egga ta Masanto nga Tura ay netura tapenu matudduan ittam nga magiddanama gafu ta pappasa-pasensia anna kapasikan na nono nga maggafu ta Masanto nga Tura.”​—Roma 15:4.

• Masanto nga Espiritu na Dios. Ari nabbayag kabalin na patay ni Jesus, memammo i interu nga kongregasion Cristiano. Ngatta? “Ay gafu ta panguffun na Espiritu Santo onu masanto nga espiritu, nassikan anna minaru i bilang da.” (Kingngua 9:31) Makapangngua i masanto nga espiritu, i aktibo nga fuersa na Dios. Awayya nga usan yaw na Dios ta pamanna-bannay ta maski sinni onu ta maski anni nga situasion.

• Pakimallo. Nitabarang na Biblia: “Arian nu nga kavurungan i anni laman nga gannug.” Kinagina lallagu, “kiddawan nu ta Dios i mawag nu. Ay iyawa na Dios nikamu i imammo na nga ari malippawa na tolay. Yaw i manangngal ta nono anna giffutuan nu.”—Filipos 4:6, 7.

• I kapangngurug ira ay kurug nga kokkofun nga mamanna-bannay ta mariga nga situasion. Kinagi ni apostol Pablo nga i kakavvuluna ay “kuruga dakal i meyuffud-da” gukaban na pamanna-bannay ta tiempo na “pavvuru-vurung anna pagatta-attam.”​—Colosas 4:11; 1 Tesalonica 3:7.

Ngem baka manonomu nu kunnasi nga mesimmu yaw. Gigiammuattam i ekspiriensa na totolay nga nakagi ta gafu nga nepa-arubang ta problema ira. Kagittada, mammuammu nga tuttuppalan lagapa na Dios yaw nga napafutuan nga promesana: “Kagitta na Yena nga mamanna-bannay ta anana, kanayun noka nga banna-bannayattaka.”​—Isaias 66:13.