1, 2. Anni nga pamipilit i maekspiriensa na kabataan? Anni ira i makuada tapenu maarubadda yatun?

“BRIGHT ka mabba ngem ngatta mangurug ka ta Dios?” kunna klasmeyt na kabataan nga sister ta Britain. Kinagi na brother nga taga-Germany: “Mangurug i mestrumi ira nga appappe laman i istoria na Biblia nga pamaratu. Awan tu paki-alamda nu mangurug i estudiante ira ta ebolusion.” Kunna mabbing nga sister nga taga-France: “Makaddag i mestru ira ta eskuelami nu mammuadda nga egga ira i estudiante nga mangurug paga laman ta Biblia.”

² Nu kabataan ka nga Saksi onu bible study paga laman, mapilitakka kari nga umanugu ta popular ira nga kurugan na totolay gittana ebolusion imbes nga mangurug ta tadday nga Namaratu? Nu kunnatun, egga ira i makuam tapenu mapasikan i pangurugmu anna mapattalupaddian nga maladda yatun. Tadday tatun i pangusam ta neyawa nikaw na Dios nga abilidad nga mannono, nga yatun i “manangngal nikaw.” Protektannaka yatun ta pilosopia ira nga makadaral ta pangurugmu.​—Bibbigan i Proverbio 2:10-12.

3. Anni i paguruvovugattam taw nga artikulo?

³ Nebase ta fustu nga pakannammu meyannung ta Dios i napafutuan  nga pangurug. (1 Tim. 2:4) Durante nga gigiammuammu i Biblia anna publikasiottam ira, ariammu nga basta padalanan laman yatun. Usammu i abilidadmu nga mannono tapenu ‘malippawamu’ i bibbibbigammu. (Mat. 13:23) Innattam nu kunnasi makoffun yatun tapenu mapasikan i pangurug tam ta Biblia anna ta Dios bilang Namaratu—topiko ira nga awan tu “pabbabbang” tam megafu ta aru i makakumbinsi nga ebidensia.​—Heb. 11:1.

4. Ngatta makagi nga parehu i pangurug ta ebolusion anna ta pamaratu? Anni nakuan i kuattam?

⁴ Awayyana tu egga makkagi nikaw, “Mangurug ngà ta ebolusion megafu ta kurug yatun kunna sientista ira. Ngatta mangurug kamu ta Dios maski nu awan paga tu nakasingan sa?” Kunnatun i pagimamma na aru. Kurug tu awan paga nittam tu nakasingan ta Dios onu nakemamma ta kaparatu na tadday nga gannug. (Juan 1:18) Kunnasi gapa danuri mangurug ta ebolusion? Mangurug gapa ira ta ariadda masingan. Awan gapa tu tolay​—sientista onu ari, i nakaobserba nga nabbalin tu tanakuan nga klase i tadday nga gannug. Angngariganna, awan vuluvuga tu nakasingan tu iraw nga nabbalin tu kitu. (Job 38:1, 4) Mawag gafu nga usitakkattam i ebidensia anna mannono tapenu madde tam i fustu nga konklusion. Nitura ni apostol Pablo meyannung ta pamaratu: “Namegafu paga gari ta nipamaro na Dios ta mundo, nannammuan ngana i mannanayun nga pakapangngua na anna ka-Dios na. Danaw ay ari nga masingan ngem manawag i kasingad-da ta ganna-gannug ira nga pinaro na. Yatun tu awan tu awayya na totolay nga papponnakigan.”​—Roma 1:20.

5. Anni ira nga rimienta i neyawa nittam tapenu “malippawa” i pamaratu?

⁵ Mawag tu “malippawa” i tadday nga gannug nga ari insigida masingan onu tamanta. (Heb. 11:3) Usan gafu na minangngalippawa nga totolay i nonoda, ari laman tu mata onu talingada. Nangiyawa i organisasion ni Jehova tu aru ira nga na-usito nga rimienta tapenu moffunan ittam. Megafu tatun, ‘masingattam’ i Namaratu nittam gukaban na mata na pangurug. (Heb. 11:27) Nelagum taw i video nga The Wonders of Creation  Reveal God’s Glory, brosiur ira nga Saan Nagmula ang Buhay? anna The Origin of Life—Five Questions Worth Asking, anna i libru nga Is There a Creator Who Cares About You? Nakalawà tam paga tu makapagaram nga informasion ta magazinas tam. Maruddu nga mabibbig ta Gumising! i interviu ta sientista ira anna ta tanakuan nga nangiyesplika nu ngatta mangurug ngana ira ta Dios. Ipasingan na serye ira na artikulo nga “May Nagdisenyo ba Nito?” i makapabbaw ira nga disenio na naparatu ira ta pallevu. Paparigan na sientista ira yatun nga makakkasta nga disenio.

6. Anni ira i benefisio na pangusa ta rimienta ira, anna kunnasi ka nabenefisiowan?

⁶ Meyannung ta dua nga brosiur, kinagi na 19 anios nga brother nga taga-United States: “Kuruga nabalor niakan yaw ira. Aru beses ngana nga ginigiammù ira yatun.” Kunna sister nga taga-France: “I artikulo ira nga ‘May Nagdisenyo ba Nito?’ i talaga nakapabbaw niakan! Ipasinganna nga maparigan na malalaki ira nga inhiniero i disenio na naparatu ira ngem ariadda mapantayan i komplikadu nga diseniona.” Kinagi na magana na 15 anios nga taga-South Africa: “Pagolluan nga bibbigan na anaku nga babay i artikulo na Gumising! nga ‘Interbyu.’” Kumusta gapa nikaw? Aprobetsammu kari tu mapia yaw ira nga probision? Makoffun yatun tapenu mabbalin i pangurugmu tu kagitta na fun nga aralam i nikegamuna. Nu kunnatun, ari makkafi i pangurugmu maski masikan i influwensia na falso nga tuttuddu.​—Jer. 17:5-8.

7. Ngatta kayà na Dios tu usammu i pakawayyam nga marrason?

⁷ Marake kari nga makkiavu tu napafutuan meyannung ta Biblia? Ari gapa! Kayà ni Jehova nga usammu i pakawayyam marrason tapenu mapakurug i kinakurug ta baggim. Arianna kayà nga basta mangurug ka megafu ta mangurug i tanakuan. Yatutta usammu i abilidadmu nga mannono tapenu mapeggakka tu fustu nga pakannammu. Mabbalin yatun nga pakannammu tu maladda nga fundasion na napafutuan nga pangurug. (Bibbigan i Roma 12:1, 2; 1 Timoteo 2:4.) Mapeggakka tu kunnatun nga pakannammu gukaban na pinilim nga proyekto ira ta paggigiammu.

8, 9. (a) Anni nga proyekto ta paggigiammu i kakayà na karuan? (b) Kunnasi ira nabenefisiowan ta monag nga pannonono ta nagigiammuda?

⁸ Pinili na karuan nga gigiammuan i profesiya ira ta Biblia onu i fustu nga rekordna ta historia, arkeolohia, anna siensia. Tadday i Genesis 3:15 ta makapa-interes nga profesiya. Nakagi tatun nga bersikulo i primero nga tema na Biblia—i pamakurug ta kepangngattan na Dios nga mammaguray anna i pamakasanto ta ngaganna gukaban na Pappatulan. Simboliko yatun nga bersikulo. Nekagi tatun i kuan na Dios tapenu masolba i ngamin nga ziga-riga nga naekspiriensa na totolay namegafu paga ta Eden. Kunnasim gigiammuan i Genesis 3:15? Awayyam itura i patturunug na tiempo. Ilistam i importante ira nga teksto nga mangipasingan nu kunnasi sesenu nga pinannawag na Dios nu sinni ira i kasali anna i unnug nga nakagi taw nga mamakurug nga matuppal yaw nga profesiya. Durante nga masingammu i koneksion na teksto ira, siguradu nga makagim nga egga ta pakawayya na masanto nga espiritu i profeta anna nattura ira ta Biblia.​—2 Ped. 1:21.

⁹ Nitura na brother nga taga-Germany: “I tema na Pappatulan ay masingan ta interu Biblia nga kagitta na vulawan nga inallo. Ma-40 nga lallaki i nangitura tatun. Aru nira i nattolay ta nadduruma nga tiempo anna ariadda personal nga ammammu i kataggi-tadday.” Napagaram i sister nga taga-Australia  ta artikulo ta paggigiammu na Bantayan Disiembre 15, 2013 nga nangivuru-vura ta kebalinan na Paskua. Konektadu yatun ta Genesis 3:15 anna ta paddattal na Mesias. “Mas nalippawa ku nu kunnasi kappabbaw si Jehova megafu tatun,” kunna. “Talaga magustuakku i ideya nga egga tadday nga nangiyunnug taw ira nga mesimmu para ta Israelita anna ta ketuppalna kani Jesus. Niyetubangngan anna pinanonoku nga talaga kappabbaw yatun nga neprofesiya nga pamugag ta Paskua!” Ngatta kunnatun i natageno na sister? Ninonona tu mapia i nabibbigna anna talaga ‘nalippawana’ yatun. Nakoffun yatun tapenu mapaladda i pangurugna anna mas naddukko yaya kani Jehova.​—Mat. 13:23.

10. Kunnasi mapasikan na kinamatalo na nattura ira ta Biblia i pangurug tam?

¹⁰ Tadday ta makapasikan ta pangurug nga ikonsidera tam i gutu anna kinamatalo na lallaki nga nattura ta Biblia. Aru nga nattura gari i nangipara-parayag ta lider anna ta pappatuladda. Ngem kanayun nga makkagi tu kurug i profeta ira na Dios. Kagiadda maski i mismu nga liwa na totoleda, anna na patulda ira. (2 Cro. 16:9, 10; 24:18-22) Niturada maski i mismu nga nattagaruliadda anna na tanakuan paga nga aripan na Dios. (2 Sam. 12:1-14; Mar. 14:50) “Pilippiga ngana laman i kunnatun nga matalo,” kunna brother nga taga-Britain. “Makoffun yatun tapenu mas mammakatalo ittam nga talaga naggafu kani Jehova i Biblia.”

11. Kunnasi nga mas matagibalor na mabbing ira i prinsipio na Biblia?

¹¹ Megafu ta prinsipio ira na Biblia nga mangiyawa tu giya, kumbinsidu i aru nga naggafu ta Dios i Biblia. (Bibbigan i Salmo 19:7-11.) Nitura na mabbing nga sister nga taga-Japan: “Nu iyaplika na familiami i tuddu ira na Biblia, talaga magayaya kami. Egga nikami i imammo, pattaradday anna aya.” Protektan ittam na Biblia kontra ta falso nga paddayaw anna ta ana-anito nga nangaripan ta aru. (Sal. 115:3-8) Mafektan kari i totolay na kunnatun ira nga pilosopia nga makkagi nga awan tu Dios? Palawanan na tuddu nga kagitta na ebolusion, nga dios ira i egga ta pallevu tam, nga neyawa nira i pakapangngua nga mepangngo laman kani Jehova. Danuri makkagi nga awan tu Dios, kagiadda nga nakadepende nittam i pappangetattam. Ngem, awan tu siguradu nga iddanama nga iyawada para ta mappange.​—Sal. 146:3, 4.

12, 13. Kunnasi i efektibo nga pakiyuvovug meyannung ta pamaratu onu ta Biblia ta kaklase, memestru anna ta tanakuan?

¹² Kunnasi ka nga mabbalin tu efektibo nu pakurugammu i meyannung ta pamaratu anna ta Biblia? Ariammu insigida nonopan nga ammum i kurugan na tanakuan. Kagian na karuan nga mangurug ira ta ebolusion, ngem mangurug gapa ira ta Dios. Nonopadda nga inusa na Dios i ebolusion ta pamaratu ta nadduruma nga klase na pinaratu. Aru i mangurug ta ebolusion megafu ta nu ari kurug yatun, ari nakuan metuddu ta eskuela kudda. Nagimmang gapa i karuan nga mangurug ta Dios megafu ta dismayadu ira ta relihion. Yatutta nu ipakiyuvovug i pinaggafuan na inango ta tanakuan, kinasirib nu makkiavu ka labbi sa. Ammuan nu anni i kuru-kuruganna. Nu rasonable anna sigga-parakka nga magginna, mas magginna yaya nikaw.​—Tito 3:2.

¹³ Nu egga i mangontra ta pangurugmu ta pamaratu, mataktika nga iyavu nu anni i kuruganna. Ipayesplikam sa nu kunnasi mamegafu i inango nu awan tu Namaratu. Tapenu mattulu-tuloy i ollu nga pinaratu nga egga i inangona, kawagan nga umaru tapenu magangngua tu kagitta na klasena. Kinagi  na tadday nga profesor na chemistry nga kawagan i (1) membrane nga mapprotekta, (2) abilidad nga makala anna mapproseso tu enerhiya, (3) informasion ta genes (DNA), anna (4) abilidad nga kopian ira yatun nga informasion. Kunna paga: “Makaddag ka ta kakomplikadu na maski na pinaka-simple nga gannug nga egga i inangona.”

14. Anni i awayyam kuan nu ari ka nga preparadu makiyuvovug meyannung ta ebolusion onu ta pamaratu?

¹⁴ Nu ari ka nga preparadu nga makiyuvovug meyannung ta ebolusion onu ta pamaratu, awayyam usan i simple nga parrason nga inusa ni Pablo. Niturana: “Kurug tu tolay i namataddag ta kada balay, ngem i Dios i nangngua ta ngamin nga ganna-gannug.” (Heb. 3:4) Rasonable anna efektibo yatun nga parrason! Wan, produkto na malalaki nga pannono i komplikadu ira nga disenio. Awayyam gapa usan i mepangngo ira nga publikasion. Inusa na sister i dua nga brosiur nga nakagi ta gafu ta mabbing nga lalaki nga nakkagi nga arianna mangurug nga egga i Dios anna kuruganna i ebolusion. Kabalin na tanga-ligguan, kinagi na mabbing nga lalaki: “Mangurug ngà ngana ta Dios.” Napegafuanan i bible study taw nga lalaki tapus nabbalin tu kapangngurug tam.

15, 16. Kunnasim ibagay i pakiyuvovugmu ta Biblia, anna anni nakuan i gakkagmu?

¹⁵ Awayyam usan i parehu ira nga prinsipio nu makiyuvovug ta tadday nga duda ta Biblia. Ammuammu i talaga nga kuruganna anna i topiko nga paginteresanna. (Prov. 18:13) Nu interesadu yaya ta siensia, makkagi ka tu angngarigan ira ta Biblia nga umanugu i siensia. Mapagaram gapa i karuan gukaban na pangipasingan tu angngarigan ta Biblia na natuppal ira nga profesiya anna fustu nga historia. Palawanan gapa i makoffun ira nga prinsipio na Biblia, gittana mabibbig ta Sermon ta Bakulug.

¹⁶ Daddammammu nga gakkagmu nga madde i futu, ari nga mangaffu ta argumento. Magginna ka tu mapia. Makkiavu, anna malumamo anna marespeto nga kagian i egga ta nonomu, netallugaring nu mas kaka nikaw. Mas irespetoda i pagimammamu nu kunnatun. Masingadda paga nga talaga pinanonomu i kuru-kurugammu. Yatun i tadday nga gannug nga ari kuan na aru ta mabbing ira. Siempre, makasta gapa nga nonopan nga ari ka obligadu nga tabbagan danuri ari rasonable onu kayàda laman uyawan i pangurugmu.​—Prov. 26:4.

17, 18. (a) Anni i makoffun nikaw tapenu mepafutum i kinakurug? (b) Anni nga pakkiavu i ikonsidera tam ta tumunug nga artikulo?

¹⁷ Tapenu mabbalin tu maladda i pangurugmu, ari nga makalanno i pamegafuanan laman ira nga tuddu. Yari tu kokkoban i Uvovug na Dios, gittana pakkokkog ta nakatagu ira nga minas. (Prov. 2:3-6) Usan tu mapia i rimienta ira nga egga ta lengguahem, kagitta na Watchtower Library ta DVD, Watchtower ONLINE LIBRARY, pati ngana i Watch Tower Publications Index onu i Tulong sa Pag-aaral ng mga Saksi ni Jehova. Pappursigiammu nga bibbigan i interu nga Biblia. Awayyam purueban yatun ta unag na tanga-ragun. Malladda i pangurug tam nu bibbibbigan i Uvovug na Dios. Kinagi na manangngal ta sirkito meyannung ta kabbinna: “Nakoffun niakan tapenu maappresià nga Uvovug na Dios i Biblia turi ta nabalikku nga bibbigan yatun. Nalippawaku ngana i istoria ira ta Biblia nga nagigiammù ta kabbikku. Yatun i gafu na papprogesò ta espiritual.”

¹⁸ Magana ira​—dakal i papelnu ta papprogreso na ánanu ta espiritual. Kunnasinu ira uffunan nga mapeggan tu maladda nga pangurug? Yatun i gigiamuattam ta tumunug nga artikulo.