Naekspiriensam kari ngana i neduki turi ta kabbimmu? Awayyana nga nabigaran i limam onu i tug onu atugmu. Meraddammammu kari nu kunnasi naka binanna-bannayan na yenam? Pinakarenuanna i bigagmu tapus pinayyanna tu benda. Siminangi ka, ngem nabanna-bannayakka ta sinopanna i bigagmu anna ginakkappannaka. Tatun nga tiempo, alistu laman nga makaleg tu banna-bannay.

Ngem mas komplikadu i pattolay durante nga mammanakam ittam. Dumakal i problema ira, anna mas mariga i makaleg tu banna-bannay. Kaddaraddam ta ari masolba i problema ira gukaban laman na benda onu na gakko na yena. Ikonsidera tam i piga nga angngarigan.

• Na-trauma ka kari ngana megafu ta nalsa ka ta trabahum? Kinagi ni Julian nga turi ta nalsa yaya ta trabahu, navurungan yaya. ‘Kunnasì tamma meyawa i mawag na familià?’ kunna. ‘Kabalikku nattrabahu tu piga ragun, ngatta gittana awan tu kuentà ta kompania?’

• Awayyana nga narraddam ka megafu ta paggungaynu na atawam. “Turi ta pinanawannà na atawà, 18 vulan ngana i nappasa, narraddam ngà. Gittana nagaddua i futù,” kunni Raquel. “Pisikal anna emosional i taki. Navurungannà.”

• Awayyana nga grabe i takimu anna baddi laman i tiansam nga mammapia. Egga ira i tiempo nga matagenomu i natageno ni Job, nga nangikagi: “Kala-kalussò i inangoku; ariakku ngana kayà i mattolay.” (Job 7:16) Baka parehu i mataga-tagenomu ta maturu tu 80 anios nga si Luis, nga nangikagi, “Nu mittan, matagenoku nga maginnag ngà ngana laman ta patè.”

• Posible nga magawag ka tu banna-bannay megafu ta patay na tadday nga meddu nikaw. “Turi natay i anaku ta aksidente ta eroplano, ariakku mangurug tu nesimmu yatun ta ollu,” kunni Robert. “Tapus maddaddam ngà ngana, yuri kagian na Biblia nga kunna maduddug tu punnial i futum megafu ta daddammu.”​—Lucas 2:35.

Nakaleg tu banna-bannay da Robert, Raquel, anna Julian maski tatun nga kaddaraddam ira nga situasion. Nalegadda i kapianan nga Persona nga paggafuanna yatun—i Dios nga Makapangngua-ta-ngamin. Kunnasi yaya mangiyawa tu banna-bannay? Iyawana gapa kari i banna-bannay nga kawagammu?