1, 2. (a) Anni nga mariga nga situasion i meparubang ta magana ira, anna kunnasida arubangan yatun? (b) Anni i appa ira nga punto nga gigiammuattam?

“MANGURUG tam kani Jehova, ngem arianna kebalinan nga mangurug gapa i ána tam,” kinagi na magatawa nga taga-France. Kudda paga: “Ari nga marensia i pangurug. Sesenu nga mapeggan tu kunnatun i ána tam.” Nitura na brother nga taga-Australia: “Tadday ta pinakamariga nga kuan ay i panguffun ta ána tam nga mapeggan tu napafutuan nga pangurug. Approbetsammu i ngamin nga material nga makoffun. Baka pagabbomu nga natabbagmu ngana tu mapia i pakkiavu na anamu ngem sonu kua, iyavuna mangana i parehu nga pakkiavu! I tabbagmu taw nga aggaw ay awayyana tu ari ngana makalanno kinommananna. Ipakanawagmu mangana i topiko ira.”

² Nu magana ka, marigatakka kari nu mittan nga tudduan anna padakallan i ánamu nga egga i pangurugda? Kakuruganna, ariattam mawayya yatun nu ta sirib tam laman! (Jer. 10:23) Ngem posible yatun nu mappegiya ittam ta Dios. Innan i appa nga makoffun nikaw tapenu mapeggan tu pangurug i ánamu: (1) Ammuan  ira tu mapia. (2) Napafutuan nga tudduan ira. (3) Mangiyusa tu efektibo ira nga ilustrasion. (4) Mappasensia anna makimallo.

3. Kunnasi parigan na magana i ehemplo ni Jesus ta panuddu?

³ Kanayun nga iyavu ni Jesus ta apostolesna i kurugadda. (Mat. 16:13-15) Parigan i ehemplona. Durante nga maggiristoria kamu na ánamu onu egga kukukuannu, iyavumu nu anni i makagida anna nu anni i matagenoda. Nelagum taw maski anni nga gannug nga paddudadda. Nitura na 15 anios nga brother nga taga-Australia: “Kanayun nga ipakiyuvovug na yamà i meyannung ta pangurugku anna uffunannà nga marrason. Iyava-yavuna: ‘Anni i kagian na Biblia?’ ‘Kurugammu kari yatun?’ ‘Ngatta?’ Kayàna nga sakan lagapa i tubbag anna ari basta ulian i kinagina onu na yenà. Durante nga magadulto ngà, iyesplikà ngana ira i tabbagku.”

4. Ngatta importante nga seriosowan i pakkiavu ira na anamu? Mangiyawa tu angngarigan.

⁴ Nu madduda i anamu ta tadday nga ituttuddu na Biblia, mappasensia ka. Uffunammu nga maleganna i tabbag ira ta pakkiavuna. Kinagi na tadday nga yama: “Seriosowan i pakkiavu ira na anamu. Ariammu ira tagibadditan, anna ariammu lisian i topiko megafu ta ari ka komportable tatun.” Makoffun nu imammatammu i napafutuan nga pakkiavu ira na anamu nga mangipasingan nga kayàna i makalippawa. Serioso ngana ira i pakkiavu ni Jesus maski 12 anios paga laman yaya. (Bibbigan i Lucas 2:46.) “Turi kinagì nga nononopakku nu fustu i relihiommi,” kunna 15 anios nga taga-Denmark, “kalmadu laman i maganaku—maski mavurung ira niakan. Inusada i Biblia tapenu tabbagan ngamin i pakkiavuku.”

5. Maski nu gittana mangurug i ána kani Jehova, anni nakuan i kuan na magana ira?

⁵ Ammuan tu mapia i ánamu​—i appana-panono, mataga-tageno, anna vuru-vurudda. Ariammu nonopan nga mangurug ira megafu ta magata-atende ira ta study anna mevulung nikaw nga mallayyagayya. Ilagum i espiritual nga paguvovug ta inaggaw nga aktibidad. Makimallo kavulu ira anna ipakimallo gapa ira. Ammuan i kepa-arubangan na pangurugda, anna uffunan ira nga arubangan yatun.

6. Kunnasi makoffun ta panuddu na magana ira nu ipafutuda i kinakurug ta Biblia?

⁶ Bilang mestru, nadde ni Jesus i futu megafu ta ideddukanna si Jehova, i Biblia, anna i totolay. (Luc. 24:32; Juan 7:46) Madde gapa na magana i giffutuan na ánada. (Bibbigan i Deuteronomio 6:5-8; Lucas 6:45.) Yatutta gigiammuan nakuan tu mapia na magana ira i Biblia kunne na gapa i rimienta ira ta paggigiammu. Maginteres ta pamaratu anna ta artikulo ira ta publikasiottam nga nangipakanawag tatun nga topiko. (Mat. 6:26, 28) Nu kuammu yatun, umaru i pakannammum, mas maappresiam si Jehova, anna mas matudduammu tu mapia i ánamu.​—Luc. 6:40.

7, 8. Anni i resultana nu napannu tu kinakurug i futu na magana ira? Mangiyawa tu angngarigan.

⁷ Nu napannu tu kinakurug ta Biblia i futum, kakayàmu nga ipakiyuvovug yatun ta familiam. Kuammu yatun ari laman nu mapprepara ka ta study onu ta paddayarayaw na familia, nu ari maski ta anni nga tiempo. Ari nakuan nga mepilit yatun anna natural nakuan laman nga parte na inaggaw nga paguruvovug. Kunnatun i kuan na magatawa nga taga-United States. Ipakiyuvovugda i meyannung kani Jehova nu egga  masingadda nga makasta ta pallevu onu egga i masingngo nga kanadda. “Iperaddammi ta ánami nga ideddukan ittam ni Jehova anna talaga pinana-panonona tu mapia ngamin i niyawana nittam,” kudda. Kakayà na magatawa nga taga-South Africa nga kagian i meyannung ta pamaratu ta ánada nu kavuluda ira nga mag-garden. Kinagida: “Kayàmi uffunan i ánami nga dumakal i pangirespetoda ta inango anna ta kakomplikaduna.”

⁸ Turi ta ma-10 anios i ana na tadday nga yama ta Australia, inapprobetsana i pabbisita ta museo tapenu uffunan i anana nga paladdan i pangurugna ta Dios anna ta pamaratu. “Nasingammi i display na ammonoid anna trilobite ira nga pinaratu nga natolay gari ta bebay,” kunna yama. “Naginteres kami tatun nga makakkasta ira nga pinaratu nga nawawan ngana, komplikadu, anna kumpleto—kagitta gapa na masingan ta kaggawattam. Yatutta nu namegafu ta simple tapus nabbalin tu komplikadu nga klase i pinaratu, ngatta ta komplikadu ngana yatun ira nga pinaratu gari? Nepatalatto niakan yatun anna nituddù gapa ta anaku.”

9. Ngatta efektibo ira i ilustrasion, anna kunnasi nga nidemonstra yaw na tadday nga yena?

⁹ Pannonopannaka na ilustrasion ira nga niyusa ni Jesus, maddena i futu, anna makoffun ta memoria. (Mat. 13:34, 35) Malalaki i imahinasion na abbarabbing. Makasta gafu nu kanayun nga usannu bilang magana i ilustrasion ta panuddunu. Kunnatun i kingngua na tadday nga yena nga taga-Japan. Turi 8 anna 10 anios i anana nga lalaki, nitudduna nira i meyannung ta atmosfera na mundo anna nu kunnasi i pangikavurung ni Jehova ta pinagangnguana tatun. Iniddanna ira tu gatto, asukar, anna kafe tapenu makuana yatun. Tapus kinagina nira tu pattemplada yaya tu aggi-tanga-tasita tu kafe. “Talaga inimmuguradda i pattemplada,” kunna. “Turi ta niyavuku nira nu ngatta, kinagida nga kayàda meyawa i kayàku nga templa. Niyesplikà nga memmugug gapa nga pinakkirivu na Dios i nadduruma nga ayre ta atmosfera—eksakto para nittam.” Mepangngo ta edadda yatun nga ilustrasion, anna natudduan ira. Siguradu nga marigada nga kattamman yatun!

10, 11. (a) Anni ira nga ilustrasion i meyusam tapenu moffunan i anamu nga mapaladda i pangurugda ta Dios? (Innan i letratu ta gafu na artikulo.) (b) Anni nga ilustrasion ira i efektibo nikaw?

¹⁰ Awayyam mangusa tu recipe tapenu dumakal i pangurug na anamu ta Dios. Kunnasi? Kabalimmu mamadday tu deko onu tinapay, iyesplika i papel na recipe. Tapus iddammu tu tadday nga frutas i anamu, awayyana nga mansanas tapus iyavumu: “Ammum kari nga naggafu ta ‘recipe’ yaw nga mansanas?” Kabalinna, gadduammu i  mansanas tapus iyawamu sa i vukal. Ipakanawagmu nga “netura” yatun nga recipe ta vukal, ngem ta lengguahe nga mas komplikadu anne ta uvovug ira ta recipe book. Iyavumu: “Nu egga i nattura ta recipe na deko, sinni i nattura ta mas komplikadu nga recipe na mansanas?” Awayyam iyesplika ta mas adulto nga i recipe para ta mansanas anna ta funna—parte na informasion ta DNA. Awayyanu paga lagu innan i ilustrasion ira ta pahina 10 adde ta 20 na brosiur nga The Origin of Life​—Five Questions Worth Asking.

¹¹ Kakayà na magana ira nga bibbigan ta anada i serye na Gumising! nga “May Nagdisenyo ba Nito?” Awayyada ibase tatun i simple ira nga ideya nu tudduadda i ánada nga abbing paga. Kagitta na magatawa nga taga-Denmark, nikumparada i eroplano ta mammanu ira. “Parehu i itsura na eroplano ta mammanu,” kudda. “Ngem magillug kari i eroplano tapus mappassa onu mappatta tu baraddi nga eroplano? Kawagan kari na mammanu ira i espesial nga peppan onu pagaffungan? Kunnasim ikumpara i guni na eroplano ta makkansion nga mammanu? Sinni i mas malalaki​—i namadday ta eroplano onu i Namaratu ta mammanu ira?” Makoffun i kunnatun nga pangiyesplika anna pakkiavu ta abbing tapenu mapeggan yaya tu “abilidad nga mannono” anna mapaladda i pangurugna ta Dios.​—Prov. 2:10-12.

12. Kunnasi makoffun ta abbarabbing i ilustrasion ira tapenu mapaladda i pangurugda ta Biblia?

¹² Mapaladda gapa na efektibo ira nga ilustrasion i pangurug na abbarabbing ta Biblia. Angngariganna, ikonsidera i Job 26:7. (Bibbigan.) Kunnasim mepasingan nga nainspiran yaw nga teksto? Awayyam mangikagi tu puru informasion laman. Ngem, ngatta ariammu uffunan i anamu nga usan i imahinasionna? Ipunto nga natolay si Job nabayag nga tiempo nige nga egga telescope anna spaceship. Ipasingan na anamu nu kunnasi kariga para ta tanakuan nga kurugan nga i tadday nga talaga dakal nga gannug ay nebesing ta awan, kagitta na mundo. Awayyana nga mangusa tu bola onu batu tapenu meyilustra i punto nga kawagan na maski anni nga gannug i pappotungan. Mepatalatto na kunnatun ta anamu nga nirekord ni Jehova yatun nga kinakurug ta Biblia nige paga nga napakurug na totolay.​—Neh. 9:6.

13, 14. Kunnasi nga mepatalatto na magana ira i importansia na prinsipio ira na Biblia ta ánada?

¹³ Kuruga importante nga ipatalatto i importansia na prinsipio ira na Biblia ta ánamu. (Bibbigan i Salmo 1:1-3.) Aru i awayyam kuan tapenu makua yatun. Angngariganna, ipanonomu nga mattolay ira ta nesissinna nga isla tapus piliadda nu sinni i makavuluda nga maddian tatun. Tapus iyavumu, “Anni ira nga kualidad i mawag nga egga ta kada tadday tapenu ngamin ay memammo anna mattaradday?” Awayyam gapa ipakiyuvovug nira i meyannung ta kualidad ira nga mabibbig ta Galacia 5:19-23.

¹⁴ Dua nga importante nga leksion i malàda tatun nga passanay. Ollu, mangiyawa tu kurug nga imammo anna pattaradday i estandarte ira na Dios. Mekadua, tuttudduan ngana ittam ni Jehova nga mattolay ta paraiso. (Isa. 54:13; Juan 17:3) Awayyam palawanan yaw ira nga punto gukaban na pappili tu ekspiriensa ira ta publikasion, kagitta na serye nga “Pakastan na Biblia i Pattolay” ta Passifusifutan. Nu egga kakongregasiommu nga dakal i inulina ta pattolena tapenu  mapagayaya si Jehova, awayyam imbitan tapenu iyistoria i ekspiriensana. Mas matotolay i prinsipio ira na Biblia megafu tatun nga aktual ira nga ekspiriensa!​—Heb. 4:12.

15. Anni nakuan i gakkagmu ta panuddu ta ánamu?

¹⁵ I punto: Ari ka makontento ta basta pattuddu ngana laman ta ánamu. Usammu i imahinasiommu. Uffunammu ira nga mannono, ngem ikonsidera gapa i edadda. Kuammu tu makapagayaya anna makapasikan ta pangurug i paggigiammuda. “Ari ka nakuan magimmang nga mappurueba tu bagu nga metodo ta ketuddu na dana nga topiko,” kunna tadday nga yama.

16. Nu mattuddu tu abbing, ngatta importante i pasensia? Mangiyawa tu angngarigan.

¹⁶ Kawagan i espiritu na Dios tapenu malladda i pangurug. (Gal. 5:22, 23) Kagitta na literal nga frutas, kawagan i tiempo tapenu dumakal i pangurug. Yatutta mappasa-pasensia anna ari ka molang nga tudduan i ánamu. “Aru nga atension i iyawami ta ánami,” kunna yama nga taga-Japan nga dua i anana. “Namegafu ta kabbidda, 15 minuto kada aggaw nga tudduakku ira fuera nu tiempo na study. Alistu laman i 15 minuto para nikami.” Nitura na tadday nga manangngal ta sirkito: “Turi ta tinedyer ngà, aru i pakkiavu ku onu dudà anne ta mawayyà nga makagi. Ta pappasa na tiempo, aru tatun i nepakanawag ta study, onu ta personal onu paggigiammu na familia. Yari tu importante para ta magana ira nga ariadda magimmang mattuddu.”

17. Ngatta importante i mapia nga ehemplom, anna kunnasi yaw niyaplika na magatawa nga taga-Bermuda?

¹⁷ Siempre, importante i mapia nga ehemplom ta pangurug. Masingi-singan na ánamu i kukukuammu, anna siguradu nga egga makasta nga efektona yatun nira. Yatutta itulu-tuloymu nga paladdan i pangurugmu. Masingan nakuan na ánamu nga kurug nikaw si Jehova. Kinagi na tadday nga magatawa nga taga-Bermuda nga nu egga problemada, makimallo ira kavulu i ánada nga igiya nakuan ira ni Jehova, anna ipagaramda ta ánada nga makimallo gapa tu personal. “Kagiammi gapa ta anami nga babay, ‘Buu nakuan i pattalomu kani Jehova, okupadu ka kanayun ta pallayyagayya, anna ariammu kuruga mavurung.’ Nu masinganna i resultana, mammuanna nga uffunannakami ni Jehova. Talaga dakal i neyuffunna yaw ta pangurugna ta Dios anna ta Biblia.”

18. Anni nakuan i daddamman na magana ira?

¹⁸ Daddamman nakuan na magana ira nga ariadda mepilit i pangurugda ta ánada. Awayyam mammula anna mabbaya onu mabbisibi. Ngem Dios laman i makawayya nga mamadakal tatun. (1 Cor. 3:6) Yatutta ipakimallo i espirituna, anna mappursigi ka ta pattuddum ta meddu ira nga ánamu tapenu aru i rason ni Jehova nga bendisionannaka.​—Efe. 6:4.