“Naggiddan kami na atawà nga nawanan tu trabahu,” kunni Seth. * “Ta unag na dua ragun, nattole kami ta uffun na kafamiliami anna ta temporario ira nga trabahu. Megafu tatun, nadepres i atawà nga si Priscilla, anna gittana awan ngana tu kuentà.

“Kunnasimi inarubang yatun? Kanayun nga daddamman ni Priscilla i uvovug ni Jesus ta Mateo 6:34. Kinagina nga ariattam kavurungan i tumunug nga aggaw, ta egga lagapa i mekavurung ta kagaggaw. Megafu ta napafutuan nga pakimallona, napeggan yaya tu sikan nga mattulu-tuloy. Binanna-bannayannà gapa na Salmo 55:22. Kagitta na salmista, nitalòku kani Jehova i vuru-vurukku anna inuffunannà. Maski egga ngana trabahù, kanayummi nga kuan tu simple laman i pattolemi tapenu matuttul i tabarang ni Jesus ta Mateo 6:20-22. I pinaka-importante, mas naddukko kami ta Dios anna ta kataggi-tadday.”

“Naganassing ngà ta pappangetammi turi nalugi i negosio na familiami,” kunni Jonathan. “Megafu ta krisis ta ekonomia, awan tu nabbala-balinan na 20 dagun nga pinattrabahumi. Maddama kami ngana na atawà megafu ta kuartu. Ariammi paga meyusa i credit card ta baka ari mapruban i transaksiommi.

“Ngem inuffunan nakami na Uvovug na Dios anna na espirituna tapenu makapaddesision tu mapia. Inakseptà maski anni nga trabahu, anna ariammi maggastu nu ari kawagan. Bilang Saksi ni Jehova, sinuportan nakami gapa na kapangngurugmi ira. Pinasikadda i nonomi anna inuffunadda kami ta mariga ira nga tiempo.”

“Turi ta gavva nga pinanawannà na atawà, natakitannà anna nakaporay,” kunni Raquel. “Grabe i pinarraddamku. Ngem minaranni ngà ta Dios, anna binanna-bannayannà. Pinrotektan na imammo na Dios i futù nu umaranni nga sa kagaggaw gukaban na pakimallo. Kagitta na pinammapiana i nabigaran nga futù.

“Megafu ta Biblia, nalabanakku i poray anna lussaw. Nipafutù i kinagi ni Pablo ta Roma 12:21: ‘Ari kamu nga makiyaffu ta marakay. Affutan nu lallagu i marakay ta pangngua nu ta mapia.’

“Inuffunannà na kofukku nga malippawa nga mawag nga kattammakku yatun. Nipabibbigna niakan i Eclesiastes 3:6 anna masippo nga kinagina nga egga i tiempo nga ‘pagurayan ngana i nawawan.’ Mariga i tabaranna ngem yatun i kawagakku. Egga ngana ira bagu nga planò ta pattolay.”

“Nu naggungay kamu na atawam, kawagammu i suporta,” kunni Elizabeth. “Egga kofukku nga nassuporta niakan ta kada aggaw. Nakipattangi, binanna-bannayannà, anna nipatagenona niakan i aya imbes nga panawannà. Kumbinsidu ngà nga inusa yaya ni Jehova tapenu moru i emosional ira nga bigagku.”

Egga i grabe nga taki ta futu ni Luis nga nakagi ta gafu nga artikulo, anna namiddua ngana nga maggi natay. Kawagan nga naka-oxygen yaya tu 16 oras kada aggaw. “Kanayunnà makimallo kani Jehova,” kunna. “Kabalikku makimallo, matagenoku nga pasikannannà na espirituna. Iddannà na pakimallo tu  sikan na nono nga mattulu-tuloy megafu ta egga i pangurugku sa anna ammù nga ikavurungannà.”

“Aru i kayàku kuan ngem ariakku makaya,” kunni Petra nga maturu tu 80 anios. “Mariga nonopan nga makkakafi ngà ngana. Nababbannag anna nakadepende ngà ta medisina. Kanayukku nonopan i pangikiddaw ni Jesus ta Yamana nga pappasan i tadday nga pakarigatan nu posible yatun. Gittana inaggaw nga therapy niakan i pakimallo. Mas makkasta i gawa-gawayakku kabalikku makiyuvovug ta Dios.”​—Mateo 26:39.

Kunnatun i natageno ni Julian nga 30 dagun ngana nga egga multiple sclerosis-na. “Natalianan tu wheelchair i dati nga pang-boss nga itubakku,” kunna. “Ngem egga gakkag na pattolè megafu ta nesentro yatun ta passerbi ta tanakuan. Makapabannay i pangiyawa, anna tuppalan ni Jehova i promesana nga pasikannan ittam ta tiempo na ziga. Kagitta ni apostol Pablo, makagì gapa: ‘Awayyà nga arubangan ngamin nga paddia-paddian gafu ta pakapangngua nga neyawa niakan.’”​—Filipos 4:13.

“Turi natay ta aksidente ta dalan i yamà, ariakku matanggap ta gafuna,” kunni Antonio. “Gittana unfair yatun—lumalakag gamma laman yaya. Ngem awan tu makuà. Na-comatose yaya tu lima aggaw nigena natay. Ariakku tumangi ta arubang na yenà, ngem tumatangi ngà nu tattaddè. ‘Ngatta? Ngatta?’ Kukku ta baggì.

“Ta kaddaraddam nga tiempo, kanayun nga ikiddò kani Jehova nga makontrolku i emosiokku anna iddannà tu imammo. Sesenu nga nakkalma ngà. Neraddammakku i kinagi na Biblia nga i ‘ari-menanaman nga mesimmu ay duttal’ ta maski sinni. Megafu ta ari malladdug i Dios, kumbinsidu ngà nga masingakku uli i yamà ta paginnolay.”—Eclesiastes 9:11; Juan 11:25; Tito 1:2.

Kunnatun gapa i pagimamma ni Robert nga nakagi ta gafu nga artikulo. Kunna: “Naekspiriensami na atawà i memammo nga nono nga nakagi ta Filipos 4:6, 7. Gukaban yatun na pappakimallomi kani Jehova. Nakoffun yatun ta pinakiyuvovugmi ta reporter ira meyannung ta iddanamami ta paginnolay. Maski nu natay ta plane crash i anami, aru lagapa i makapagayaya nga tiempo nga navvurulu kami. Tatun kami maffokus.

“Turi ta kinagi na kapangngurugmi ira nga nagiroda ta TV i malumamo nga pangiyesplikami ta pangurugmi, kinagimi nira nga megafu yatun ta napakaru i nakimallo para nikami. Talaga mangurug ngà nga sussuportan ittam ni Jehova gukaban na napakaru nga makapabannay nga mensaheda.”

Kagitta na ipasingan ira na angngarigan, banna-bannayan na Dios i totolay nga meparubang ta nadduruma nga problema anna kapurueba. Kunnasi ka gapa? Maski anni nga problema i meparubang nikaw, egga i malegan nga banna-bannay nga makoffun nikaw ta mariga ira nga tiempo. * Ngatta ari ka umaranni kani Jehova para ta banna-bannay? Yaya i “Dios nga paggafuan na ngamin nga uffun!”​—2 Corinto 1:3.