1, 2. Ngatta kanayun nga atannang i estandarte na Saksi ira ni Jehova ta assissinnun? (Innan i letratu ta gafu na artikulo.)

“ARU i masingammu nga ari tu formal nga sinnun nu napatu i tiempo,” nireport na tadday nga diario ta Netherlands meyannung ta paggarammammung na lider ira na relihion. “Ngem ari tu kunnatun ta kombension na Saksi ira ni Jehova. . . . Mangiyusa i lallaki tu longsleeve anna kurbata, palda gapa ta babbay nga ari tu ababba . . . makasta, anna moderno gapa.” Yatutta, maruddu nga makomendan i Saksi ira ni Jehova megafu ta assissinnudda nga “mepangngo anna umangay laman. . . . mekunnay ta [totolay] nga makkagi tu nespirituan i attolay da.” (1 Tim. 2:9, 10) Kinagi yatun ni Pablo ta babbay, ngem meyaplika gapa yatun nga prinsipio ta lallaki.

² Importante nittam nga totolay ni Jehova i mepangngo nga assinnun, anna importante gapa ta Dios nga dayawattam. (Gen. 3:21) Manawag nga segun ta Biblia, egga i estandarte na Soberano ta interu uniberso ta assissinnun na masserbi ira sa. Yatutta ari nakuan nga nebase laman nu anni i makasta para nittam i piliattam nga sinnun anna itsura. Ikonsidera tam nakuan gapa nu anni i makasta ta Soberano nga Dios nga si Jehova.

3. Anni i magigiammu tam meyannung ta assinnun ta Dob na Dios ta Israelita ira?

 ³ Angngariganna, ta Dob na Dios ta Israelita, egga ira bilin nga mapprotekta nira kontra ta immoral nga pattolay na nasa-nasion ta pallevuda. Ipasingan na Dob nga kalussaw ni Jehova i assissinnun nga ariammu mapadduma i lalaki ta babay—i makagi nga unisex fashion. (Bibbigan i Deuteronomio 22:5.) Tatun nga estandarte na Dios, manawag nga ari yaya magayaya ta istilo na assinnun nga mamabbalin ta lallaki nga allale babbay, onu ta babbay nga allale lallaki, onu assinnun nga ariammu ngana ammu nu sinni i babbay ta lallaki.

4. Anni i makoffun ta Cristiano ira tapenu makapaddesision tu mapia meyannung ta assinnun?

⁴ Makoffun ta Cristiano ira i prinsipio ta Biblia tapenu ammuda i mepangngo nga passinnudda, maski anni i nasiodda, kultura, onu klima. Ariattam kawagan i lista na mepangngo onu kuestionable ira nga istilo na assinnun. Igiya ittam na prinsipio na Biblia tapenu ammu tam nu anni i piliattam. Innattam i karuan ira nga prinsipio nga makoffun nga mammuan “nu anni i mapia, i makapagayaya sa, anna i awan tu pakkurangan na” nu mappili tu assinnun.​—Roma 12:1, 2, NW.

5, 6. Anni nakuan i efekto na assissinnuttam ta tanakuan?

⁵ Nainspiran si apostol Pablo nga ipasingan i importansia na prinsipio ta 2 Corinto 6:4. (Bibbigan.) Aru i makagi nittam na tanakuan depende ta itsura tam. Nakadepende ta “masingan na mata” i impresion anna opinion na totolay nittam. (1 Sam. 16:7) Yatutta bilang doroban onu ministro na Dios, malippawa tam nga i passinnun ay ari laman nga basta pangiyusa tu komportable nga kayà tam. Mapaguyu tam na nalà tam nga prinsipio ta Biblia nga ibita i massinnun tu atatazzi, abababba, onu makatenta. Ariattam gafu mangusa tu sinnun nga masingan onu mafforma i pribado ira nga parte na baggi tam. Awan nakuan tu mappasiran onu mallipay ta tanakuan nu masingadda i assinnuttam.

⁶ Nu maayus, marenu, disente i assinnun, anna makasta i itsura tam, mas irespeto ittam na totolay bilang ministro na Soberano nga Dios nga si Jehova. Awayyana gapa nga dayawadda i Dios tam. Makasta gapa i efektona yatun ta organisasion nga irepresenta tam. Posible nga mas magginna i tanakuan ta makepaliag-inango nga mensahe tam.

7, 8. Anni ira i tiempo nga kawagan tu mepangngo i assinnuttam?

⁷ Megafu ta masanto nga Dios tam, ta kapangngurug tam, kunne na gapa ta totolay ta teritoria, mepangngo laman nga massinnun tu makeyawa tu dignidad ta mensahe tam anna makedayaw kani Jehova. (Roma 13:8-10) Netallugaring yatun nu makiparte ittam ta aktibidad tam ira nga Cristiano, kagitta na study onu pallayyagayya. Massinnun tam nakuan nga “mekunnay ta [totolay] nga makkagi tu nespirituan i attolay da.” (1 Tim. 2:10) Siempre, egga ira i sinnun nga mepangngo ta tadday nga lugar nga ari mepangngo ta tanakuan. Yari tu, ikonsidera gapa na totolay ni Jehova i lokal nga kostumbre tapenu ari makataki.

⁸ Bibbigan i 1 Corinto 10:31. Nu umay tam ta asembli anna kombension, kawagan nga mepangngo anna disente i sinnuttam imbes nga sumosobra nga istilo nga  normal ngana laman ta mundo. Maski nu maddian ittam ta hotel, onu mappasiar nige anna kabalin na kombension, ibita tam i massinnun tu gittana pambalay onu ari disente. Nu kunnatun, ariattam mappasiran nga ikagi nga Saksi ni Jehova ittam. Makapallayyagayya tam paga nu egga i oportunidad.

9, 10. Ngatta makafekto nakuan i Filipos 2:4 ta assissinnuttam?

⁹ Bibbigan i Filipos 2:4. Ngatta mawag nga nonopan na Cristiano ira i efekto na assinnudda ta kapangngurugda? Megafu ta mappuppursigi i totolay na Dios nga iyaplika i tabarang na Biblia: “Mawag gafu tu pallikuran nu ngamin i neravvunan ira nga pakkaraga: kagitta na paggannug, marakay nga appana-panono, nepattaggan nga pakkaraga na baggi.” (Col. 3:2, 5) Manaki tam nga marigatan i kapangngurug tam nga manuttul tatun. Awayyana nga makikkillaban paga i wawwaragi nga nangiyemmang ngana ta immoral nga pattolay ta marake nga pakkaragada. (1 Cor. 6:9, 10) Siempre, ariattam kayà nga marigatan ira ta pakillabadda!

¹⁰ Nu kavulu tam i kapangngurug tam ira, ipasingan nakuan na assissinnuttam nga marenu ta moral i kongregasion. Kunnatun gapa nu makkaravulu ittam ta study onu maski ta tanakuan nga lugar. Egga lallaguretam nga mappili tu iyusa tam. Ngem responsibilidad tam ngamin nga massinnun nga ari mamarriga ta tanakuan nga mabbalin tu marenu ta moral anna matuttulda i estandarte ni Jehova ta kinasanto  ta appana-panono, paguvovug, anna kondukta. (1 Ped. 1:15, 16) Kagian na 1 Corinto 13:4, 5 nga i kurug nga aya ay “ari tu pamabbastus” anna “ari tu pakkaraga ta pammakapian laggapa na baggi.”

11, 12. Anni i ikonsidera tam nu mappili tam tu sinnun?

¹¹ Nu maddesision meyannung ta passinnun, ikonsidera na aripan ira na Dios nga “egga i tiempo para ta kada aktibidad anna ta kada pagguyu.” (Ecl. 3:1, 17) Kurug nga nakadepende ta klima anna ta nadduruma nga tiempo i iyusa tam. Nadduruma gapa i sirkumstansia anna paddia-paddian ta kada lugar. Ngem ari manguli i estandarte ni Jehova maski anni i klima.​—Mal. 3:6.

¹² Ta napatu ira nga lugar, mariga nga siguraduan nu anni nga istilo na sinnun i respetadu, mepangngo, anna makepasingan tu balanse nga pagimamma. Ngem appresian na wawwaragi tam nu ibita tam i mangusa tu sinnun ira nga atatazzi onu alalawa nga masingan ira i ari mepangngo. (Job 31:1) Disente nakuan i assissinnuttam maski nu egga tam ta bebay onu ta swimming pool. (Prov. 11:2, 20) Maski aru i massinnun tu ari disente nu egga ira tatun, siguraduattam nakuan nga makedayaw ta masanto nga Dios tam nga si Jehova i piliattam nga sinnun.

13. Ngatta maka-influwensia ta pappili tam tu sinnun i tabarang ta 1 Corinto 10:32, 33?

¹³ Egga paga i importante nga prinsipio nga makoffun nittam ta pappili tu mepangngo nga sinnun. Yatun i pangikonsidera ta konsensia na tanakuan—kapangngurug onu ari. (Bibbigan i 1 Corinto 10:32, 33.) Seriosowattam nakuan i responsibilidad tam nga ibita i sinnun ira nga makesiddukal ta tanakuan. Kinagi ni Pablo: ‘Nonopat-tam i pammakapian na ngamin nga kagitta tam nga mangurug tapenu mapasikan i angngurug da.’ Nirasonna paga: “Ta si Cristo ay arian na nga inaleg i pammakapian na laggapa.” (Roma 15:1-3) Wan, nipoppollu ni Jesus i panguffun ta tanakuan anne ta pammakapiananna​—importante i panguffunna nira tapenu makuana i uray na Dios. Yatutta ibita i ganna-gannug onu istilo na sinnun nga kayà tam ngem mangifugag ta totolay nga mangalawa ta ilayyagayya tam.

14. Kunnasi sanayan na magana i ánada nga makedayaw kani Jehova i assissinnudda?

¹⁴ Responsibilidad na magana ira nga Cristiano nga sanayan i familiada nga iyaplika i prinsipio ira na Biblia. Siguraduadda nakuan pati na ánada nga disente i istilo na sinnun anna itsurada tapenu mapagayaya i futu na Dios. (Prov. 22:6; 27:11) Mepatalatto na magana ta ánada i pangirespeto ta masanto nga Dios gukaban na makasta nga ehemploda anna pangiyawa tu meddu anna praktikal nga instruksion. Anni mabba kastana nu tudduan na magana i ánada nu sitaw anna nu kunnasi makaleg tu mepangngo ira nga sinnun! Kebalinanna nga ari laman nga i kayàda i mekonsidera, nu ari, nu anni i mamaguyu nira tapenu kuan i pribilehioda nga irepresenta si Jehova.

15. Anni i mangigiya ta pappili tam tu sinnun?

¹⁵ Mangiyawa i Biblia tu praktikal nga giya nga makoffun nittam nga maddesision tu masirib anna makedayaw ta Dios. Ngem awayya tam lagapa mappili tu kayà tam iyusa. Nadduruma i kayà tam, maski i  finansial nga kapasidad tam. Ngem kanayun nakuan nga maayus, marenu, disente, mepangngo ta okasion, anna ta lugar tam i assissinnuttam.

16. Ngatta sulit i pappursigi tam nga mappili tu sinnun nga mepangngo?

¹⁶ Aminattam nga ari tu kanayun nga mabi i maddesision nga mangipasingan tu pagimamma nga balanse, mepangngo, anna mekonsidera i ngamin. Aru i mallalaku tu uso ira nga istilo na sinnun, yari tu mawag i aru nga tiempo anna pappursigi tapenu makaleg tu disente nga palda, bistida, anna blouse, onu ari tu atatazzi nga longsleeve anna pantalong. Masingan anna maappresia na kapangngurug tam ira i resulta na pappursigi tam nga makaleg tu makasta anna mepangngo nga sinnun. Magayaya ittam megafu ta maski mariga i mappili nu anni i iyusa tam, makedayaw yatun ta meddu nga nelangitan nga Yama tam.

17. Anni ira i ikonsidera danuri mabbarbas?

¹⁷ Kunnasi gapa danuri egga barbasda? Nikiddaw na Mosaiko nga Dob nga egga i barbas na lallaki. Ngem awan ngana ta Mosaiko nga Dob i Cristiano ira anna ari ngana ira obligadu nga tuttulan yatun. (Lev. 19:27; 21:5; Gal. 3:24, 25) Ta karuan nga kultura, ari mabba makefugag ta totolay nga ginnan i mensahe tam nu maayus anna marenu i barbas na brother ira. Ta kakuruganna, egga barbas na karuan nga natunno nga brother. Ngem, egga lagapa i karuan nga mammanaki tatun. (1 Cor. 8:9, 13; 10:32) Ta karuan nga kultura onu lugar, awan ta kulturada i egga barbasna anna ari mepangngo yatun ta ministro ira nga Cristiano. Ta kakuruganna, nu egga i kapaliwatanna ta assissinnun anna itsurana, mepasirananna i Dios.​—Roma 15:1-3; 1 Tim. 3:2, 7.

18, 19. Kunnasi makoffun i Mikias 6:8 durante nga siguraduattam nga makedayaw ta Dios i assinnuttam?

¹⁸ Magayaya tam ta ari nangiyawa si Jehova tu detalyadu nga lista na bilin ira meyannung ta sinnun anna itsura tam. Kayàna nga usattam i lallaguretam anna maddesision tu mepangngo base ta prinsipio ira na Biblia. Yatutta makepasingattam tu mapia nga appana-panono maski ta assissinnun anna itsura tam durante nga lumakag ittam kavulu i Dios.​—Mik. 6:8.

¹⁹ Nu mapia i appana-panono tam, kebalinanna nga mapakalinno nga usitakkattam i baggi tam kumpara ta kinarenu anna kinasanto ni Jehova, megafu ta nakadepende ittam sa ta kapianan nga giya. Kebalinanna gapa yatun i pangirespeto ta panageno anna opinion ira na tanakuan. Makapattoletam gafu mekunnay ta atannang ira nga estandarte na Dios anna merespeto tam i panageno na tanakuan nu mapia i appana-panono tam.

20. Anni nakuan i efekto na assissinnun anna itsura tam ta tanakuan?

²⁰ Masingan nakuan na totolay ta assissinnuttam nga Saksi ittam ni Jehova. Masingan gapa nakuan na wawwaragi anna na totolay nga mepangngo ittam nga mangirepresenta ta matunung nga Dios tam. Atannang i estandartena, ngem magayaya ittam nga gawatan yatun. Makomendan i wawwaragi nga megafu ta itsura anna makasta nga konduktada, magustuan na mapia i giffutuadda nga totolay i makepaliag-inango nga mensahe na Biblia. Makedayaw anna makapagayaya yatun kani Jehova. Nu masirib i desisiottam meyannung ta assissinnun, siguradu nga medayaw si Jehova nga ‘kekakua anna gloria i pabbaruasina.’​—Sal. 104:1, 2.