1. Ngatta siguradu ittam nga makapangngua i Uvovug na Dios? (Innan i letratu ta gafu na artikulo.)

BILANG aripan ni Jehova, ariattam paddudan nga “matotolay anna makapangngua” i mensahe na uvovug na Dios ta totolay. (Heb. 4:12) Aru nittam i mamakurug nga egga i pakapangngua na Biblia nga ulian i kata-katoletam. Dati nga minakkoko, adikto ta droga, onu imoral i karuan ta wawwaragi tam. Makasta i pattolay na karuan taw nga sistema na ganna-gannug ngem matagenoda nga gittana egga i kurang. (Ecl. 2:3-11) Aru ta dati nga awan tu iddanamana i napeggan ngana tu direksion anna iddanama megafu ta pakapangngua na Biblia nga manguli. Baka nakabibbig anna nagayaya ka ta aru nga ekspiriensa nga nepublisa ta serye na Passifusifutan nga “Pakastan na Biblia i Pattolay.” Nasifutammu gapa nga maski nu naakseptada ngana i kinakurug, tulu-tuloy lagapa i approgreso ta espiritual na Cristiano ira megafu ta uffun na Katurakan.

2. Kunnasi nafektan na Uvovug na Dios i totolay turi ollu-siglo?

² Masurpresa kari ittam nga aru ta moderno nga tiempo i daka-dakal i nanguliadda megafu ta paggigiammu ta Uvovug na Dios? Ari vuluvuga! Iperaddam na kunnatun ira nga ekspiriensa i wawwaragi tam gari ta ollu-siglo, danuri nelangitan  i iddanamada. (Bibbigan i 1 Corinto 6:9-11.) Kabalin nga kinagi ni Pablo i klase na totolay nga ari mangirensia ta Pappatulan na Dios, kunna paga: “Kunnatun gapa i karuan nikamu gari.” Ngem nanguli ira megafu ta uffun na Katurakan anna masanto nga espiritu na Dios. Maski kabalidda nga inaksepta i kinakurug, mawag nga labanan lagapa na karuan i serioso ira nga espiritual nga problema. Kinagi na Biblia i tadday nga nazelugan nga Cristiano turi ollu-siglo nga nadisfellowship; ngem, netoli gabbalaman. (1 Cor. 5:1-5; 2 Cor. 2:5-8) Ari kari tu mapagaram ittam nu ikonsidera tam nu kunnasi inarubang anna nalampasan na wawwaragi i nadduruma nga problemada gukaban na Uvovug na Dios?

3. Anni i ikonsidera tam taw nga artikulo?

³ I Uvovug na Dios ay talaga makapangngua anna niyawa yatun ni Jehova nittam, yatutta kayà tam nga usan tu mapia yatun. (2 Tim. 2:15) Taw nga artikulo, ikonsidera tam gafu nu kunnasi magafekto i pakapangngua na Uvovug na Dios ta (1) mismu nga pattoletam, (2) ministerio tam, (3) panuddu tam ta plataporma. Makoffun yaw ira nga tabarang tapenu mepasingattam i aya anna pappabalo ta meddu nga nelangitan nga Yama tam, nga manuttuddu nittam para ta pammakapiattam.​—Isa. 48:17.

4. (a) Anni i mawag nga kuattam tapenu magafekto i Uvovug na Dios nittam? (b) Kunnasi tam mapeggan tu oras ta pabbibbig tu Biblia?

⁴ Tapenu magafekto nittam i Uvovug na Dios, mawag tu regular nga bibbigattam yatun​—inaggaw nu posible. (Jos. 1:8) Siempre, okupadu tam ta inaggaw nga pattolay. Ngem, ariattam nakuan pagurayan i maski anni​—kasali i responsibilidad tam ira—​nga daralan i rutina tam ta pabbibbig tu Biblia. (Bibbigan i Efeso 5:15, 16.) Aru nga aripan ni Jehova i nakaleg tu madduma-ruma nga tiempo tapenu inaggaw nga mabibbig i Biblia, awayyana nga ta umma onu ta gabi onu ta maski anni nga oras. Umanugu ira ta kinagi na salmista: “Kuruga ayatak-ku i dorob mu! Kaggaggaw ay ira laman i agga-nono ku.”​—Sal. 119:97.

5, 6. (a) Ngatta importante i pannono tu mapia ta nabibbig tam ta Biblia? (b) Kunnasi tam mabbalin tu efektibo tatun? (c) Kunnasi ka nammakapia ta pabbibbig ta Uvovug na Dios anna ta pannono tu mapia tatun?

⁵ Ari laman nga bibbigan i Biblia, importante gapa nga pannonopattam tu mapia i nabibbig ira. (Sal. 1:1-3) Meyaplika tam ta pattoletam i ari manguloli nga sirib natun nu kunnatun i kuattam. Maski nu neyimprenta onu elektroniko nga format i bibbigattam nga Uvovug na Dios, gakkag tam nga ulian anna paguyuan ittam natun.

⁶ Kunnasi tam pannonopan tu mapia yatun? Nakoffun ta aru nga kabalidda  bibbigan i tadday kapitulo onu bersikulo na Katurakan, magimmang ira manganannuang tapus ikonsiderada i tumunug ira nga pakkiavu: ‘Anni i itudduna yaw niakan meyannung kani Jehova? Kunnasì ngana nga iyap-aplika ta pattolè i prinsipio nga nelagum taw nga parte na Uvovug na Dios? Anni paga ira i papprogresowakku?’ Durante nga sigga-pakimallo nga nonopattam i Uvovug na Dios, mapaguyu ittam nga mas paga iyaplika i tabaranna. Nu kunnatun, lalu tam nga maekspiriensa i pakapangngua natun ta mismu nga pattoletam.​—2 Cor. 10:4, 5.

7. Kunnasi tam meyusa tu mapia i Uvovug na Dios ta ministerio tam?

⁷ Anni i makoffun nittam tapenu meyusa tam tu mapia i Uvovug na Dios ta ministerio? I ollu nga dakkua ay kanayun nga pangusa tatun nu mallayyagayya onu manuddu ittam. Kunnaw i kinagi na tadday nga brother meyannung tatun, “Nu mallayyagayya ka nga kavulu mu mismu si Jehova, sikaw laman kari i makiyuvovug onu iddammu gapa yaya tu tiansa?” I puntona: Nu direkta nga bibbigattam i Biblia ta ministerio tam, pamavulunattam nga si Jehova i makiyuvovug ta makabbalay. Mas makapangngua i napili tu mapia nga teksto anne ta anni laman nga makagi tam. (1 Tes. 2:13) Iyavumu ta baggim: ‘Kanayukku kari nga approbetsan i oportunidad nga ibibbig i Biblia turi ira ta layyagayyakku?’

8. Ngatta mawag nga ari laman tu basta bibbigattam i teksto ira nu mallayyagayya ittam?

⁸ Siempre, ari laman tu basta mangibibbig tu teksto ta Biblia i mawag nu makiyuvovug tam. Ngatta? Megafu ta aru i baddi laman i ammuda onu ariadda malippawa i Biblia. Kurug yatun turi ollu-siglo, anna kurug gapa yatun ta maddaggun. (Roma 10:2) Ariattam gafu nonopan nga malà ngana na tadday nga tolay i punto na bersikulo nga basta binibbig tam laman. Mawag tam  nga manga tu parte ira natun nga bersikulo​—nga ibibbig uli i punto—​anna ipakanawag yatun. Dakal i meyuffun natun tapenu madde na Uvovug na Dios i nono anna futu na maggigginna ira nittam.​—Bibbigan i Lucas 24:32.

9. Kunnasi tam mepagaram ta totolay nga bibbigan i Biblia? Mangiyawa tu angngarigan.

⁹ Nige tam gapa bibbigan i tadday nga teksto, makkagi tam tu introduksion nga mamagaram ta pangirespeto ta Biblia. Angngariganna, awayya tam kagian, “Bibbigattam nu anni i kagian na Namaratu nittam taw nga topiko.” Nu ari tu Cristiano i kiyuvovug tam, kagiattam gapa, “Innammu nu anni i kagian na Masanto nga Katurakan nittam.” Nu layyagayyattam gapa danuri ari interesadu ta relihion, iyavu tam, “Naginnam ngana kari yaw nga dana nga akkagianan?” Wan, ikonsidera tam i kada tolay bilang indibidual tapus ibagay tam i presentasiottam.​—1 Cor. 9:22, 23.

10. (a) Iyistoria i ekspiriensa na tadday nga brother. (b) Kunnasim naekspiriensa i pakapangngua na Uvovug na Dios ta ministeriom?

¹⁰ Aru i mamakurug nga nu usadda i Uvovug na Dios ta ministerio, daka-dakal i efekto natun ta layyagayyadda. Ikonsidera i tadday nga angngarigan. Sinoli uli na tadday nga brother i tadday nga lakay nga piga ragun ngana nga mabbibbibbig tu magazinas tam. Imbes nga basta ipalima laman i bagu nga isyu na Passifusifutan, naddesision i brother nga bibbigan i teksto tatun nga isyu. Binibbigna i 2 Corinto 1:3, 4: ‘I minaggallallo nga Yama anna Dios nga paggafuan na ngamin nga uffun! Banna-bannayanna ittam ta ngamin nga ziga-riga tam.’ Kuruga natukkal i futu na makabbalay tatun nga teksto, yatutta nikiddona nga ibibbig na brother uli sa yatun. Kinagi natun nga lakay nga talaga kawagadda na atawana i banna-bannay, yatutta naginteres ngana yaya ta mensahe na Biblia. Ari kamu kari umanugu nga talaga makapangngua i Uvovug na Dios ta ministerio tam?​—King. 19:20.

11. Anni i responsibilidad na brother ira nga manuddu ta plataporma?

¹¹ Talaga magayaya ittam nga magatende ta study tam ira kunne na gapa ta asembli anna kombension ira. Magatende ittam tapenu medayaw si Jehova. Daka-dakal gapa i benefisio tam ta espiritual nga instruksion nga malawà tam. Makasta nga pribilehio i egga turi ira ta brother nga manuddu ta plataporma. Ngem agga-nonoda gapa nga dakal i tattabbagadda. (Sant. 3:1) Kanayun nga siguraduadda nakuan nga nebase ta Uvovug na Dios i ngamin nga ituttudduda. Nu neyasayn ka nga manuddu ta plataporma, kunnasim iyusa i pakapangngua na Biblia ta palappa mu ira?

12. Kunnasi masiguradu na ispiker nga nebase ta Katurakan i palappana?

¹² Siguraduan nga i Katurakan i pinaka-importante nga parte na palappa mu. (Juan 7:16) Anni i nelagum tatun? Angngariganna, magimmugug nakuan nga ari kallabban onu iyarayyu na maski anni​—ekspiriensa ira, ilustrasion, onu istilo na pangipalappa—​i atension ta teksto na Biblia nga usammu. Daddamman gapa nga ari tu panuddu tu Biblia i basta laman nga pabbibbig tu teksto ira. Ta kakuruganna, nu napakaru nga teksto i mebibbig, awan tu maski tadday tatun i mebattang ta nono na maggigginna ira. Yatutta pilian tu mapia i teksto ira, anna bibbigan, iyesplika, iyilustra, anna iyaplika yatun. (Neh. 8:8) Nu mangipalappa tu outline nga naggafu ta organisasion, gigiammuan yatun anna i teksto ira nga neyusa. Alippawatan i koneksion na punto  ira ta outline anna i teksto ira nga nakebaseyanna. Tapus usan i napili ira nga teksto tapenu palawanan i punto ira ta outline. (Makaleg tu praktikal ira nga suhestion ta leksion 21 adde ta 23 na Makinabang sa Edukasyon Mula sa Paaralang Teokratiko Ukol sa Ministeryo.) Pinaka-importante, sigga-pakimallo nga mappoffun kani Jehova nga mepalippawa i nabalor ira nga uvovugna ta Biblia.​—Bibbigan i Ezra 7:10; Proverbio 3:13, 14.

13. (a) Anni i efekto na pangusa tu teksto ira ta study ta tadday nga sister? (b) Anni i efekto nikaw na pangusa tu teksto ira ta study?

¹³ Daka-dakal i efekto na pangusa tu teksto ira ta study ta tadday nga sister. Maski marake i nesimmu ta kabbinna, inalawana i mensahe na Biblia anna nidedikana i pattolena kani Jehova. Maski kunnatun, narigatan yaya nga kurugan nga iddukan yaya ni Jehova. Ngem, nakumbinsi gabbalaman yaya. Anni i nakoffun sa? Nanguli yatun turi ta pinannonopanna tu mapia i tadday nga teksto nga nebibbig ta study tam tapus nikonektana yatun ta tanakuan paga nga teksto na Biblia. * Nakatageno ka ngana kari gapa tu kunnatun megafu ta pangusa tu Uvovug na Dios ta study ira, asembli, anna kombension?​—Neh. 8:12.

14. Kunnasi tam mepasingan i appresasiottam ta Uvovug ni Jehova?

¹⁴ Ariattam kari mappabalo kani Jehova megafu ta netura nga Uvovugna, i Biblia? Ari laman nga meddu nga niyawana yatun para ta totolay, nu ari, sinuppalna gapa i promesana nga mattalupaddian yatun. (1 Ped. 1:24, 25) Siguradu nga kayà tam regular nga bibbigan i Uvovug na Dios, iyaplika yatun ta pattoletam, anna usan yatun tapenu uffunan i tanakuan. Ipasingattam nakuan i pangaya anna appresasiottam ari laman taw nga minas nga naggafu ta Dios, ngem mas ngana ta Autorna, si Jehova.