TA TANGNGA na dekada 1930, nagali si yamà anni yenà​—da James anni Jessie Sinclair—​ta Bronx, lugar ta New York City. Tadday ta ollu nga nakilalada si Willie Sneddon, nga naggafu gapa ta Scotland gittada. Insigida nga naggiristoriadda i familiada. Nesimmu yatun piga dagun nige ku neyana.

Niyistoria na yenà kani Willie nga nige na World War I, nalaggabbang si yamana anna i manungna turi ta nadalangan na barangayda i tadday nga bomba ta North Sea. Kunni Willie, “Egga ta infiernu i yamam!” Saksi ni Jehova si Willie, anna yatun i kakkaddakaddag nga pamegafu na yenà nga ammuan i kinakurug ta Biblia.

Napporay si yenà ta kinagi ni Willie megafu ta ammuna nga masippo i yamana. Ngem kunna paga ni Willie, “Makkasta kari panageno mu nu kagiakku nga minay gapa ta infiernu si Jesus?” Neraddamman ni yenà i doktrina na iglesia, nga ta orihinal nga niketurana ay minay ta infiernu si Jesus tapus napaginnolay ta mekatallu nga aggaw. Ninonona, ‘Nu umafa-afi nga lugar i infiernu nu sitaw maziga-riga i marake ira, ngatta minay tatun si Jesus?’ Yatun i nanikkag ta interes ni yenà ta kinakurug. Namegafu yaya magatende tu study ira ta Bronx Congregation tapus nabawtisowan turi 1940.

Tatun nga tiempo, ari mepagaram ta magana ira nga ivuluda i ánada ta paggigiammu tu Biblia. Ta kabbikku, si yamà i manangngaw niakan, durante nga makistudy si yenà anna mallayyagayya nu weekend. Kabalin na piga dagun, mevulu kami ngana gapa na yamà nga makistudy kani yenà. Talaga aktibo yaya ta pallayyagayya ta mapia nga dumug anna aru i ikonduktana tu Bible study ta interesadu ira. Ta kakuruganna, egga i tiempo nga mangikondukta yaya tu grupo nga paggigiammu megafu ta makkarruba i Bible study-na ira. Vulunakku yaya ta ministerio kada bakasion ta eskuela. Megafu tatun, aru i nagigiammù ta Biblia anna nu kunnasi ituddu ta tanakuan yatun.

Mappasirang ngà kagian nga turi kabbikku, ari ngà kuruga interesadu ta kinakurug.  Binalewala ku yatun. Ngem, turi ma-12 anios ngà, namegafu ngà ngana mallayyagayya anna regular nga makipartisipa ta ministerio. Ta edad nga 16, nidedikà ngana i baggì kani Jehova anna nabawtisowan turi Hulio 24, 1954, ta tadday nga kombension ta Toronto, Canada.

Karuan ta wawwaragi ta kongregasiommi ay dati onu maddaggun nga Bethelite. Dakal i influwensiada niakan. Kakayà ku i pappalappa anna pangiyesplikada ta kinakurug ta Biblia. Maski kayà na mestrù ira nga makkolehio ngà, goal ku i ma-Bethelite. Yatutta, nangipasa ngà tu aplikasion ta Bethel tatun nga kombension ta Toronto. Nangipasa ngà uli turi 1955 ta kombension ta Yankee Stadium, New York City. Ari nabbayag, turi ta 17 anios ngà, nembita ngà nga masserbi ta Brooklyn Bethel turi ta Setiembre 19, 1955. Ta mekadua nga aggò ta Bethel, namegafu ngà mattrabahu ta Bindery ta 117 Adams Street. Tapus neyasayn ngà ta tadday nga makina, nga mangiplasta tu 32-pahina nga seksion na libru ira tapenu meprepara yatun ta makina nga maddage.

Kabalin na mattanga-vulan ta Bindery, neyali ngà ta Magazine Department megafu ta ammù i mammakinilya. Tatun nga tiempo, itura na wawwaragi gukaban na stencil ira i adres para ta bagu ira nga nagorder tu The Watchtower anna Awake! Kabalin na piga vulan, ta Shipping Department ngà mabbi mattrabahu. Niyavu ni Klaus Jensen, nga manangngal ta departamento, nu kayà ku vulunan i drayber nga mangiyangay tu karton ira na literatura gukaban na trak ta pier para mepatulug ta interu mundo. Egga gapa i nesaku ira nga magazina nga meyangay ta post office tapenu mepatulug ta kongregasion ira ta interu  United States. Kinagi ni Brother Jensen nga makoffun niakan i pisikal nga trabahu. Ma-57 laman i kilò anna gittana palansing i kakabbal ku. Nakoffun yatun ira nga pabbiahe ta pier anna ta post office tapenu mas massikang ngà. Talaga ammu ni Brother Jensen i makasta para niakan!

Napannu gapa i Magazine Department tu order ira na kongregasion. Yatutta nammuakku nu anni ira nga lengguahe i neyimprentan na magazinas tam ta Brooklyn anna mepatulug ta karuan nga nasion. Ariakku ammu i aru tatun nga lengguahe ngem magayaya ngà nga rinivu tatun ira nga magazina i mepatulug ta ararayyu ira nga lugar. Maski ariakku ammu yatun tatun nga tiempo, neddannà tu pribilehio nga bisitan i aru tatun nga lugar ta tumunug ira nga dagun.

Turi 1961, neyasayn ngà ta Treasurer’s Office ta panangngal ni Grant Suiter. Kabalin na piga dagun, nagali ngà mabbi ta ofisina ni Nathan Knorr, nga mangiyorollu ta interu mundo nga trabahu tam tatun nga tiempo. Kinagina nga magatende tu Kingdom Ministry School tu tanga-vulan i tadday ta brother nga mattrabahu ta ofisinana, tapus mattrabahu ngana sangaw ta Service Department. Sakan i netali tatun nga brother anna makipattrabahu kani Don Adams. Nekanna nga si Don i brother nga nangaksepta ta aplikasiokku ta Bethel turi 1955 nga kombension. Da Robert Wallen anni Charles Molohan i dua nga brother nga mattrabahu gapa tatun nga departamento. Nakkaravulu kami nga mattrabahu ta maturu nga 50 dagun. Talaga makapagayaya nga masserbi kavulu i matalo anna espiritual nga lallaki!​—Sal. 133:1.

Namegafu turi 1970, neyasayn ngà nga mabbiahe kada tadday onu dua ragun tu piga ligguan tapenu bisitan i panga ira nga  ofisina na Watch Tower Society, nga magalan dati nga zone visit ira. Nelagum taw i pabbisità ta Bethelite ira anna misionero ira ta interu mundo, mamagaram ta espiritual, anna pa-check ta rekord ira na panga nga ofisina. Anni mabba i ayayana nu makasimmu ka tu naggradua ira ta ollu ira nga klase na Gilead School tapus matalo lagapa ira nga masserbi ta tanakuan nga nasion! Dakal nga pribilehio anna pagayaya nga mabbisita ta maturu 90 nga nasion meyannung tatun nga trabahu.

Neyasayn ngamin i miembro na familia na Bethel ta Brooklyn ta kongregasion ira ta New York City. Neyasayn ngà ta Bronx. Ziminakal anna nagaddua i ollu nga kongregasion tatun nga lugar. Nabbalin tu Upper Bronx Congregation i orihinal nga kongregasion, tatun ngà magatende.

Ta tangnga na dekada 1960, egga tadday nga familia na Saksi nga Latvian nga nammuadda i kinakurug ta south Bronx i nagali ta teritoria natun nga kongregasion. Nappayunir insigida kabalin ma-hayskul na kakada nga si Livija. Kabalin na piga vulan, nagali yaya ta Massachusetts tapenu masserbi nu sitaw dakal i pakawagan para ta mangilayyagayya ta Pappatulan. Nigafù mattura sa meyannung ta mesissimmu ta kongregasion, tapus mattura gapa yaya meyannung ta kappagayaya ira nga ekspiriensana ta ministerio.

Ta pappasa na piga ragun, natunno nga espesial payunir si Livija. Kayàna nga masserbi kani Jehova adde ta mawayyana, yatutta nagaplay yaya ta Bethel tapus nembita turi 1971. Gittana indikasion yaw nga naggafu kani Jehova! Turi ta Oktubre 27, 1973, nakkasal kami anna pribilehiomi nga si Brother Knorr i nangikasal nikami. Kunna Proverbio 18:22: “I tadday nga nakaleg tu mapia nga atawa ay nakaleg tu gannug nga makasta, anna nakalawa ta fabor ni Jehova.” Nabendisionakkami ni Livija nga masserbi tu maturu 40 dagun ta Bethel. Massussuporta kami lagapa ta tadday nga kongregasion ta Bronx.

Talaga makapagayaya i pakipattrabahu kani Brother Knorr. Ari mababbannag nga mattrabahu para ta kinakurug anna daka-dakal i pangappresiana ta misionero ira ta interu mundo. Aru nira i ollollu nga Saksi ta nasion nga asaymentda. Kaddaddam memammatan nga nattaki tu cancer si Brother Knorr turi 1976. Mittan, turi ta arianna makalakka, nikiddona nga bibbigakku i karuan nga material nga meyimprenta. Zinognà nga agalan si Frederick Franz tapenu umay yaya anna magginna gapa ta pabbibbig ku. Tapus nammuakku nga megafu ta makafi ngana i paningan ni Brother Franz, kanayun nga ibibbig sa ni Brother Knorr i kunnatun ira nga material.

Natay si Brother Knorr turi 1977, ngem danuri makakkilala sa anna mangiddu sa  ay nabanna-bannayan megafu ta matalo nga nebalinna i pattolena ta davvun. (Nep. 2:10) Tapus si Brother Franz ngana i nangiyorollu ta trabahu tam.

Tatun nga tiempo, sekretarionà ngana ni Milton Henschel, nga aru dekada nga nakipattrabahu kani Brother Knorr. Kinagi ni Brother Henschel niakan nga i primeru ngana nga trabahù ta Bethel ay uffunan si Brother Franz ta maski anni nga gannug. Kanayukku ibibbig sa i material ira nga meyimprenta. Malalaki i memoria ni Brother Franz anna kappabbaw i abilidadna nga maffokus ta mebibbig ira. Talaga kappagayaya nga uffunan yaya ta kunnatun adde ta nabalinna i neravvunan nga pattolena turi Disiembre 1992!

Alistu i pinappasa na 61 dagun nga pinasserbì ta Bethel. Natay ngana i magana ku, ngem iddanamakku nga masingan uli ira ta mas makasta ngana nga mundo. (Juan 5:28, 29) Awan tu kuenta na maski anni nga iyawa naw nga dana nga sistema kumpara ta makakkasta nga pribilehiò nga makipattrabahu ta matalo nga lallaki anna babbay para ta aripan ira na Dios ta interu mundo. Talaga makagimi ni Livija durante na passerbimi ta ngamin-tiempo, ‘i pagayaya kani Jehova i [nabbalin tu] padermi.’—Neh. 8:10.

Ari nakadepende ta tadday nga tolay i organisasion ni Jehova, anna mattulu-tuloy lagapa i pallayyagayya ta Pappatulan. Makapagayaya anna pribilehiò i makipattrabahu ta matuyag anna matalo ira nga brother anna sister ta daga-ragun. Aru ta nazelugan ira nga nakatrabahù ay awan ngana taw ta davvun. Ngem mappabalo ngà nga nakavulu ku danatun nga matalo anna espiritual nga totolay ta passerbì kani Jehova.