Parigan i Pangikabbi ni Jehova
“Si Jehova, si Jehova, Dios nga minangngikallo anna minangngikabbi.”—EX. 34:6.
KANSION: 142, 12
1. Kunnasi niyammammu ni Jehova i baggina kani Moises, anna ngatta importante yatun?
MITTAN, niyammammu na Dios i baggina kani Moises gukaban na pangikagi ta mismu nga ngagan anna kualidadna ira. Ollu nga kinagina i allo anna pangikabbi. (Bibbigan i Exodo 34:5-7.) Puede nakuan nga i pakapangngua anna kinasirib ni Jehova i nipamammana. Megafu ta kayà ni Moises nga ammuan nu suportan yaya na Dios, kinagi ni Jehova i kualidadna ira tapenu ipasingan nga talaga kayàna uffunan i aripanna ira. (Ex. 33:13) Matukkal kari gapa i futum ta pakkagi labbi na Dios taw ira nga makasta nga kualidadna nige na tanakuan paga? Maffokus yaw nga artikulo ta kualidad nga pangikabbi, i pakisimpatia ta pazziga onu problema na tanakuan nga karagatan nga uffunan ira.
2, 3. (a) Ngatta gagangay ta totolay i mangikabbi? (b) Ngatta maginteres ka ta kagian na Biblia meyannung ta pangikabbi?
2 Naparo i totolay ta imahe na Dios. Megafu ta minangngikabbi si Jehova, natural laman nga interesadu gapa i totolay ta pammakapianan na tanakuan. Mangikabbi gapa maski danuri ari masserbi ta Dios. (Gen. 1:27) Aru i mabibbig tam ta Biblia nu sitaw nangipasingan tu pangikabbi i totolay. Daddamman i rekord meyannung ta dua nga minakkigannug nga maddama ta arubang ni Solomon nu sinni ta nira i kurug nga yena na abbing. Turi ta pinurueban ira ni Solomon gukaban na paggaddua ta abbing, ziminatu i pangikabbi na kurug nga yena. Yatutta nakimemallo ngana laman yaya nga iyawa yatun nga abbing ta tanakuan nga babay. (1 Pat. 3:23-27) Daddamman gapa i ana nga babay ni Faraon nga nangurag ta inango na abbing nga si Moises. Maski ammuna nga ana na Hebreo si Moises anna mapatay nakuan, “nikabbina yaya” anna naddisidi nga padakallan i abbing bilang anana.—Ex. 2:5, 6.
3 Ngatta maginteres ka nakuan taw nga topiko? Megafu ta ipagaram na Biblia nga parigattam si Jehova. (Efe. 5:1) Maski nu naparatu i totolay nga makepasingan tu pangikabbi, egga tendensia na gaka ira ni Adan nga mabbalin tu makasarili. Nu mittan, marigatan ittam nga maddesision nu uffunan i tanakuan onu maffokus ta baggi tam. Maski gapa i tanakuan marigatan nga kuan yatun. Anni i makoffun nikaw tapenu mapeggan anna mapattalupaddian i interes mu ta tanakuan? Ollu, gigiammuan nu kunnasi nangipasingan si Jehova tu pangikabbi anna kunnasi gapa nangipasingan i tanakuan. Mekadua, innammu nu kunnasim maparigan i ehemplo na Dios anna nu kunnasi ka talaga mabenefisiowan ta pangngua tatun.
SI JEHOVA—KAPIANAN NGA EHEMPLO NA PANGIKABBI
4. (a) Ngatta nangidog si Jehova tu anghel ira ta Sodoma? (b) Anni i ituddu nittam na nesimmu kada Lot anna ánana?
4 Aru i malegattam nga situasion nu sitaw nangipasingan si Jehova tu pangikabbi. Nonopan i kingngua na Dios kani Lot. “Kuruga maraddam” yatun nga matunung nga lalaki megafu ta mangipepasirang nga kondukta na taga-Sodoma anna Gomora. Talaga determinadu i Dios nga patayan danatun nga imoral nga totolay. (2 Ped. 2:7, 8) Naddog i Dios tu anghel ira tapenu kuragan si Lot. Sinabarangngadda yaya anna i familiana nga panawan i madaral nga siudad. “Kustu mabbaya-bayag paga yaya, megafu ta allo ni Jehova sa, gavva nga sinammi na lallaki i limana anna i lima na atawana kunne na gapa i dua nga anana nga babay, tapus nilawadda yaya anna niyangay ta lawan na siudad.” (Gen. 19:16) Ari kari nga ipasingan natun nga nesimmu nga ammu ni Jehova i mariga ira nga situasion nga meparubang ta matalo ira nga aripanna?—Isa. 63:7-9; Sant. 5:11; 2 Ped. 2:9.
5. Kunnasi nga makoffun nittam nga mangikabbi i Uvovug na Dios, gittana 1 Juan 3:17?
5 Ari laman nga nangipasingan si Jehova tu pangikabbi, nitudduna paga ta aripanna ira i pakawagan nga ipasingan yatun. Ikonsidera i dob nga niyawana ta Israel meyannung ta pangà ta sinnun na tadday nga tolay tapenu mabbalin tu garantiya ta gatu. (Bibbigan i Exodo 22:26, 27.) Awayyana nga matenta i nappagatu nga pataggatan i futuna nga apan i sinnun na nakagatu, yatutta awan tu pakkallagna nga makkatrug. Ngem sinudduan ni Jehova i aripanna ira nga ibita i kunnatun nga nabbatu nga futu. Minangngikallo nakuan ira. Ariattam kari mapaguyu na prinsipio natun nga dob nga mangikabbi gapa? Kayà tam kari nga pagurayan i wawwaragi tam nu egga mabba i makua tam tapenu moffunan ira ta zigada?—Col. 3:12; Sant. 2:15, 16; bibbigan i 1 Juan 3:17.
6. Anni i magigiammu tam ta pangikabbi ni Jehova ta minattagaruli ira nga Israelita?
6 Nikabbi ni Jehova i totolena turi ta nattagaruli ira. Mabibbig tam: “Si Jehova nga Dios na ginafuadda ira ay tulu-tuloy nga niddanna ira tu pamappalan 2 Cro. 36:15) Ariattam kari gapa nga ikabbi i totolay nga awayyada paga i mabbabawi ta liwi-liwada ira anna mala i fabor na Dios? Manaki na Dios nga madaral i maski sinni ta mappange nga pangukum. (2 Ped. 3:9) Durante nga innaggattam nga daralan na Dios i kinamarake, itulu-tuloy tam nakuan nga ilammuyag i minangngikabbi nga mensahe na pamappalan.
gukaban na mensaheruna ira, pakatotoli nga sinabarangnganna ira, megafu ta pangikabbina ta totolena anna ta paddiananna.” (7, 8. Ngatta kumbinsidu i tadday nga familia nga nikabbi ira ni Jehova?
7 Aru i ekspiriensa ira nga meyusa tapenu mepasingan i pinangikabbi na Dios. Ikonsidera i nesimmu ta familia na 12 anios nga lalaki nga mangngagan tu Milan. Nesimmu yatun turi ta etniko nga parralaban ta gafu na dekada 1990. Si Milan, kavulu i wagina nga lalaki, i maganana, anna karuan paga nga Saksi ay nabbiahe tu bus ta Bosnia mappange ta Serbia. Umay ira ta kombension nu sitaw mabawtisowan i magana ni Milan. Ngem ta border, pinakazza na suddalu ira ta bus i familiada megafu ta etnikoda; ngem, pinagurayadda i tanakuan nga wawwaragi. Kabalidda nefuku tu dua aggaw, narradyo i suddalu ta ofisialna tapenu iyavu nu anni i kuanna nira. Agga-taddag i suddalu ta arubang na familia, yari tu naginnada i tabbagna, “Ilawannu ira tapus palattugannu!”
8 Durante nga kiyuvovug na suddalu i totolena, minaranni i dua nga lalaki ta familia anna sikreto nga kinagida nga Saksi ira. Nammuadda ta tanakuan i problema ta bus. Kinagi na dua kada Milan anna ta wagina nga makitakay ira nira adde ta border, megafu ta ari mabba nga me-check i papeles na abbing ira. Tapus kinagi gapa na dua ta magana nga mallevu ira ta trangka na border anna massimmu ira ta abbagan na border. Ari ammu ni Milan nu gumalo yaya onu tumangi tatun nga suhestion. “Abbo mu kari nga pamavulunadda kami nga basta ngana laman manaw taw?” kunna maganana. Ngem durante nga manaw ira, gittana ari ira napansin na suddalu ira. Nassirimmu gabbalaman i magana anna i ána ta abbagan na border. Minay ira ta siudad na kombension nga kumbinsidu nga sinabbag ni Jehova i pakimemalloda para ta uffun. Makabibbig tam ta Biblia tu egga ira i tiempo nga ari direkta nga naki-alam si Jehova tapenu protektan i aripanna ira. (King. 7:58-60) Ngem, kinagi ni Milan i nataga-tagenona. Kunna, “Kagitta na vinulag na angheles i suddalu ira anna nipaliag kami ni Jehova.”—Sal. 97:10.
9. Anni i reaksion ni Jesus ta situasion na magaru nga tumuttuttul sa? (Innan i letratu ta gafu na artikulo.)
9 Makagigiammu ittam ta ehemplo ni Jesus. “Ziminatu i allo na [ta magaru nga totolay] megafu ta mavuru-vurung ira anna awan tu awa-awayya da. Kagitta da i karneru ira nga napagurayan.” Anni i reaksionna ta kakkabbi nga situasiodda? “Pinegafuanan na ira nga sinudduan tu aru nga ganna-gannug.” (Mat. 9:36; bibbigan i Marcos 6:34.) Daka-dakal i nerumanna ta ugali na Fariseo ira nga awan tu pakkaragada nga uffunan i ordinario nga totolay. (Mat. 12:9-14; 23:4; Juan 7:49) Ariammu kari gapa karagatan nga pakanan danuri mabisin ta espiritual kagitta na kingngua ni Jesus?
10, 11. Mepangngo kari nga mangikabbi tam ta kada situasion? Iyesplika.
10 Ari kebalinan naw nga mangipasingan ittam tu pangikabbi ta kada situasion. Ta ehemplo ira ta Biblia nga nakagi ta gafu, mepangngo laman i pangikabbi na Dios. Ngem, matagga i ulu ni Patul Saul turi ta abbona nga minangngikabbi yaya. Arianna nga pinatay si Agag, kalaban na ili na Dios, anna akkanna gapa pinatay i kapianan na aya-ayam. Yatutta, tinuria ni Jehova i kinapatul 1 Sam. 15:3, 9, 15, ftn.) Siempre, matunung nga Ukum si Jehova. Mabibbigna i futu na totolay anna ammuna nu mepangngo i pangikabbi. (Sila. 2:17; Eze. 5:11) Aranni ngana i tiempo nga kastiguanna i ngamin nga mammanaki nga tumuttul sa. (2 Tes. 1:6-10) Akkan ngana tu yatun i tiempo tapenu ikabbi danuri inukumna nga talaga marake. Ngem i pakkastigu nira ay mepangngo laman nga pangipasingan tu pangikabbi na Dios ta matunung ira nga ipaliagna.
ni Saul ta Israel. (11 Manawag nga ari tu para nittam nga ukuman i tolay nu makastigo onu mapaliag. Kuattam lagu i ngamin nga mawayya tam tapenu uffunan i totolay. Anni ira i praktikal nga kuattam tapenu mepasingan i mepangngo nga pangikabbi ta kasittoletam? Innattam i piga ira nga suhestion.
MAPEGGAN ANNA MANGIPASINGAN TU MEPANGNGO NGA PANGIKABBI
12. Kunnasi ka mabbalin tu minangngikabbi ta pakilallammu ta tanakuan?
12 Mabbalin tu minangnguffun. Mekiddaw turi ta maya nga parigan si Jesus nga mangipasingan tu pangikabbi ta karruba anna ta kasi-Cristiano ira. (Juan 13:34, 35; 1 Ped. 3:8) Tadday nga kebalinan na pangikabbi ay “makipazziga.” Mapaguyu i tadday nga mangikabbi nga palubbangan i tanakuan ta pazzigada, awayyana nga uffunan ira ta problemada ira. Magaleg tu tiansa nga kuan yatun! Angngariganna, makoffun ka kari gukaban na pabboluntariu nga kuan i tadday nga trabahu ta balay, awayyana tu sikaw i madog tapenu kuan yatun para sa?—Mat. 7:12.
Manguffun ta praktikal tapenu mepasingan i pangikabbi (Innan i parapo 12)
13. Anni nga kualidad na totolay na Dios i mananawag nga masingan kabalin na kalamidad?
13 Mabboluntariu ta relief work. Nu makasingan ittam tu mazziga-riga megafu ta kalamidad ira, kayà tam mangipasingan tu pangikabbi. Kilala i Saksi ira nga minangnguffun ta kunnatun ira nga tiempo. (1 Ped. 2:17) Egga i tadday nga Japanese sister nga maddian ta lugar nga fermi i nikadaralna ta lunig anna tsunami turi ta 2011. Kinagina nga “napagaram anna nabanna-bannayan” yaya megafu ta appursigi na boluntariu ira ta maski sitaw ta Japan anna ta tanakuan nga nasion tapenu ayusan i nadaral ira nga babalay. Niturana: “Megafu taw nga ekspiriensa, natageno ku i pangaya ni Jehova. Ikavurungan gapa na wawwaragi i kataggi-tadday. Aru ta wawwaragi ta interu mundo i maddaddasal para nittam.”
14. Kunnasim moffunan i mataki anna i babbako anna lallakay?
14 Uffunan i mataki anna babbako anna lallakay. Nu masingattam i tanakuan nga marigatan megafu ta efekto na Adamiko nga liwa, mepangngo laman nga mapaguyu ittam nga mangikabbi. Karagatattam nga mangultimo noka i taka-taki, pallakay anna pabbako. Yatutta ipakimallo tam nga duttal ngana i Pappatulan na Dios. Ngem ta maddaggun, kuattam i adde na mawayya tam tapenu uffunan danuri magawag. Ikonsidera i nitura na autor meyannung ta bako nga yenana, nga egga Alzheimer’s disease-na. Tadday nga aggaw, nakawekanna i sinnunna. Durante nga babbalanna i sinnunna, egga i nattotto. Saksi yatun ira nga regular nga umay tatun nga bako. Niyavu na sister ira nu egga i meyuffudda. “Kappasirang ngem wan egga,” kunna bako. Inuffunan yaya na Saksi ira nga babbalan i sinnunna. Tapus pinattemplada yaya tu tsa anna naggiristoria ira. Fermi i pappabalo na ana nga lalaki. “Saludo ngà taw ira nga Saksi,” niturana. “Kukukuadda i ilayyagayyada.” Mapaguyu ka kari na pangikabbi mu ta mataki ira anna ta babbako anna lallakay nga kuammu ngamin i mawayyam tapenu palubbangan ira ta pazzigada?—Fil. 2:3, 4.
15. Kunnasi makoffun i pallayyagayya ta tanakuan?
15 Manguffun ta espiritual. Megafu ta problema anna pakavurungan na totolay, mapaguyu ittam nga uffunan ira ta espiritual. Kapianan nga makua tam yaw gukaban na panuddu nira meyannung ta Dios anna nu anni i kuan na Pappatulan para ta totolay. Tadday paga ay i panguffun nira nga malippawa i kinasirib na pattolay segun ta estandarte ira na Dios. (Isa. 48:17, 18) Awayyam kari paga nga mas mattalikarag ta ministerio, trabahu nga talaga makedayaw kani Jehova anna makepasingan tu pangikabbi ta tanakuan?—1 Tim. 2:3, 4.
PAMMAKAPIAMMU GAPA I PANGIKABBI!
16. Anni i pammakapianan danuri minangngikabbi?
16 Kinagi na eksperto ira ta mental nga gawa-gawayyan nga i pangikabbi ay makoffun ta gawa-gawayyammu, kata-katolem, anna pakikavulu. Nu palubbangammu i ziga-riga na tanakuan, mas magayaya ka, mas positibo, ari kuruga maraddam, anna ari kuruga mannono tu negatibo. Wan, mammakapia ka ta pangipasingan tu pangikabbi. (Efe. 4:31, 32) Mapeggan tu marenu nga konsensia danuri Cristiano nga meddu nga manguffun ta tanakuan, megafu ta ammuda nga mekunnay yatun ta prinsipio ira na Dios. Marresulta i kunnatun nga disposision ta mas minangngikavurung nga magana, mas meddu nga atawa, anna mas mapia nga kofun. Maruddu nga mas makalawa tu uffun anna suporta danuri alistu nga mangipasingan tu pangikabbi nu kawagadda yatun.—Bibbigan i Mateo 5:7; Lucas 6:38.
17. Ngatta kayà mu nga mapeggan anna mangipasingan tu pangikabbi?
17 I pakannammum nga pammakapianammu i pangikabbi ay ari nakuan tu primeru nga rason nu ngatta ipasingammu yatun. I primeru nakuan nga rason ay megafu ta pakkaraga mu nga parigan anna dayawan i Naggafuan na aya anna pangikabbi, si Jehova nga Dios. (Prov. 14:31) Nangipasingan yaya tu kapianan nga ehemplo para nittam. Kuattam nakuan ngamin i adde na mawayya tam nga parigan yaya—nga ipagaram i mapatu nga pangiddeddu ta wawwaragi anna pakikavulu ta kasittoletam gukaban na pangipasingan tu pangikabbi.—Gal. 6:10; 1 Juan 4:16.