1. Kanni nga mas mariga nga masserbi kani Jehova?

PARA nikaw, kanni nga mas mariga nga masserbi kani Jehova? Nu egga i problemam ira, onu nu awan tu problemam? Nu aru i problema tam, mas mabi laman nga mattalo ittam kani Jehova. Ngem kunnasi gapa nu awan tu problema tam? Nu mittan kari, mattamattam nu kunnasi kaimportante i masserbi ta Dios? Inabisowan ni Jehova i Israelita ira nga posible nga mesimmu yatun.​—Deut. 6:10-12.

2. Ngatta makasta nga ammarigan si Patul Asa?

² Buu i pattalo ni Patul Asa kani Jehova yatutta makasta yayya nga ammarigan na tolay nga masirib. Nasserbi yayya kani Jehova ari laman tu ta marake ira nga tiempo, nu ari, maski ta tiempo ira na imammo. Abbing paga laman si Asa, ‘buu ngana i futuna para kani Jehova.’ (1 Pat. 15:14) Pinakurug ni Asa nga buu i futuna kani Jehova gukaban na pamagultimuna ta falsu nga paddayaw ta Juda. Kagian na Biblia nga “inalsana i altar na tanakuan ira nga dios anna i atannang ira nga lugar, zinabba-dabbana i sagradu ira nga arigi, anna ginappa-gappona i sagradu ira nga poste.” (2 Cro. 14:3, 5) Inalsana paga lagu i kakona nga si Maaca ta prominente nga posisionna ta pappatulan. Ngatta? Megafu ta nipoppolluna i paddayaw ta tadday nga falsu nga dios.​—1 Pat. 15:11-13.

3. Anni i gigiammuattam taw nga artikulo?

³ Ari laman nga inalsa ni Asa i falsu nga paddayaw ta Juda. Nipagaramna gapa i marenu nga paddayaw gukaban na panguffun ta totolay nga masserbi uli kani Jehova.  Binendisionan ni Jehova si Asa anna i taga-Juda ira tu tiempo na imammo. * Ta mafulu nga dagun nga pammaguray ni Asa, “memammo ta davvun.” (2 Cro. 14:1, 4, 6) Taw nga artikulo, gigiammuattam nu kunnasi nga inusa ni Asa yatun nga tiempo na imammo. Tapus, gigiammuattam gapa i ehemplo na ollu-siglo ira nga Cristiano nga nangapprobetsa ta tiempo na imammo kagitta ni Asa. Tabbagattam gapa yaw: Nu maddiakka ta lugar nu sitaw egga i lallaguray na Saksi ira ni Jehova nga maddayaw, kunnasim approbetsan yatun nga tiempo na imammo?

4. Segun ta 2 Cronicas 14:2, 6, 7, kunnasi nga inapprobetsa ni Asa i tiempo na imammo?

⁴ Bibbigan i 2 Cronicas 14:2, 6, 7. Kinagi ni Asa ta totolay nga si Jehova i ‘nangiyawa tannira tu malanna-lanno nga imammo.’ Ari nga ninono ni Asa nga marrelaks ta tiempo na imammo. Pinegafuananna lallagu i mamataddag tu siudad ira, pader, torre, anna trangka ira. Kinagina ta taga-Juda ira: “Kukua tam lagapa i davvun.” Anni i kayà kagian ni Asa? Kayàna kagian nga awan paga tu kalaban ira ta davvudda nga mamagimmang nira ta pagala-ali anna pamataddag. Pinagaramna gafu i totolay nga approbetsan yaw nga tiempo na imammo.

5. Ngatta pinasikan ni Asa i armadana?

⁵ Inapprobetsa gapa ni Asa i tiempo na imammo tapenu pasikannan i armadana. (2 Cro. 14:8) Kayà kari kagian natun nga awan tu pattalo ni Asa kani Jehova? Ari. Ammu gare ni Asa nga annunganna bilang patul nga iprepara i totolay para ta problema ira nga awayyada nga keparubangan ta mappange. Ammu gapa ni Asa nga posible nga duttal i tiempo nga ari tu memammo ta Juda. Kurug tu nesimmu yatun.

6. Kunnasi nga inapprobetsa na ollu-siglo ira nga Cristiano i tiempo na imammo?

⁶ Maski nu maruddu nga mapeppersigi i ollu-siglo ira nga Cristiano, egga ira i tiempo na imammo. Kunnasida nga inusa yatun ira nga tiempo? Ari nga nagimmang nga nallayyagayya danatun nga matalo nga lallaki anna babbay. Mabibbig ta libru na Kingngua nga “nattolay ira nga nammakakua ta Yafu.” Nitulu-tuloyda nga ilayyagayya i mapia nga dumug yayya nga “minaru i bilang da.” Manawag nga binendisionan ni Jehova i matalikarag nga pallayyagayyada ta tiempo na imammo.​—King. 9:26-31.

7-8. Anni i inapprobetsa da Pablo anna karuan nga Cristiano? Iyesplika.

⁷ Inapprobetsa na ollu-siglo ira nga disipulos i kada oportunidad nga mallayyagayya. Angngariganna, turi ta nasingan ni apostol Pablo nga aru i puedena nga layyagayyan ta Efeso, naddian labbi yayya tatun nga siudad tapenu mallayyagayya.​—1 Cor. 16:8, 9.

⁸ Egga mangana i oportunidad da Pablo anna karuan nga Cristiano nga layyagayyan i aru nga totolay tagga ta nadesisionan i isyu na pakkugi ta 49 C.E. (King. 15:23-29) Kabalin nga nepakannammu i desision ta kongregasion ira, nappursigi i disipulos ira nga ‘ilayyagayya i uvovug na Yafu.’ (King. 15:30-35) Anni i resulta natun? Kagian na Biblia nga i kongregasion ira ay ‘nassikan i angngurugda anna nammungan i biladda ta kagaggaw.’​—King. 16:4, 5.

9. Kumusta i pallayyagayya ta aru nga nasion ta maddaggun, anna anni i iyavu tam ta baggi tam?

⁹ Ta aru nga nasion ta maddaggun, awan tu mangontra ta pallayyagayya tam. Kunnatun kari gapa ta nasionnu? Nu kunnatun, iyavu mu ta baggim, ‘Kunnasì nga approbetsan yaw nga lallaguray?’ Taw nga kappabbaw nga pangurianan ira nga aggaw, nirolluan na organisasion ni Jehova i kadakallan nga trabahu na pallayyagayya anna panuddu ta interu mundo. (Mar. 13:10) Aru i puede nga meyuffuttam taw nga trabahu!

10. Anni i ipagaram na 2 Timoteo 4:2 nga kuattam?

¹⁰ Kunnasim nga approbetsan i tiempo na imammo? (Bibbigan i 2 Timoteo 4:2.) Ngatta ariammu pannonopan nu posible ta situasiommu onu ta kafamiliam nga ammungan i oras ta pallayyagayya, onu mappayunir? Ari ngana tu yaw i tiempo nga magunnug ittam tu aru nga kuartu anna material nga ganna-gannug megafu ta ariattam kawagan danatun sonu dakal nga ziga.​—Prov. 11:4; Mat. 6:31-33; 1 Juan 2:15-17.

11. Anni i kingngua na karuan tapenu mas aru i malayyagayyadda?

¹¹ Aru nga publisher i naggigiammu tu bagu nga lengguahe tapenu meyusada yatun ta pallayyagayya anna panuddu. Nangiyawa i organisasion na Dios tu aru nga material tapenu uffunan ittam nga mallayyagayya ta umara-aru nga lengguahe. Angngariganna, turi ta 2010, available ngana i literatura tam ta ma-500 nga lengguahe. Ta maddaggun, magadde ngana yatun ta maturu tu 1,000 nga lengguahe!

12. Kunnasi nga mabenefisiowan i totolay nu maginnada i mensahe ta sarilida nga lengguahe? Mangistoria tu ekspiriensa.

¹² Anni i efektona ta totolay nu maginnada i kinakurug ta sarilida nga lengguahe? Masingan yatun ta ekspiriensa na tadday nga sister nga nabbenefisio ta rehional nga kombension ta Memphis, Tennessee, U.S.A., nu sitaw nepresenta i programa ta lengguahe nga Kinyarwanda. Yatun i primeru nga meyusu-usa ta Rwanda, Congo (Kinshasa), anna ta  Uganda. Kabalin na kombension, kinagi natun nga sister: “Yaw pagalaman i kombension nga nakomprendì tu mapia i interu nga programa namegafu turi ta nagali ngà ta Amerika 17 nga dagun ngana i nappasa.” Manawag tu nadde i futu natun nga sister turi ta naginnana i programa ta sarilina nga paguvovug. Nu ipamavulun gafu na sirkumstansiam, awayyam kari i maggigiammu tu tanakuan nga lengguahe tapenu moffunan i karuan ta teritoria na kongregasionnu? Mas kari nga maginteres ira ta mensahe megafu ta yatun i maruddu nga usu-usadda nga lengguahe? Siguradu nga sulit i appursigim nu kuammu yatun.

13. Kunnasi nga inapprobetsa na wawwaragi tam ta Russia i tiempo na imammo?

¹³ Ta karuan nga nasion, awan tu lallaguray na wawwaragi tam nga mallayyagayya megafu ta restriksion ira na gobiernu. Kunnatun i nesimmu ta wawwaragi tam ta Russia. Aru nga dagun nga napeppersigi ira ngem turi ta Marso 1991, niddan ira na gobiernu tu lallaguray nga maddayaw. Tatun nga tiempo, egga i ma-16,000 nga publisher ta Russia. Kabalin na 20 nga dagun, minaru yatun nga bilang tu maturu tu 160,000 nga publisher! Manawag tu inapprobetsa na wawwaragi tam i tiempo nu kanni nga egga i lallagureda nga mallayyagayya. Ngem ari tu nabbayag yatun nga tiempo na imammo. Kurug tu nanguli i paddia-paddiadda ngem matalikarag lagapa ira nga masserbi kani Jehova. Kukukuadda lagapa i adde na mawayyada tapenu passerbian yayya.

14-15. Kunnasi nga inusa ni Jehova i pakapangnguana tapenu uffunan si Asa?

¹⁴ Ta kaggawan ni Asa, nangultimu gabbalaman i tiempo na imammo. Maggafu ta Etiopia, umatake si Komander Zera kavulu i maturu tu tanga-million nga suddalu. Komfiansa ira nga maffuda i Juda. Ngem nattalo si Patul  Asa ta Diosna nga si Jehova. Nipakimallona: “Uffunan nakami, O Jehova nga Diosmi, megafu ta mattalo kami nikaw, anna makillabakkami taw nga dakal nga armada ta ngagammu.”​—2 Cro. 14:11.

¹⁵ Doble i karu na bilang na suddalu na Etiopia kumpara ta bilang na suddalu ni Asa. Ngem ammu ni Asa nga makapangngua si Jehova anna moffunanna i totolena. Kurug gapa nga ari yayya nga dinismaya ni Jehova. Naffu i armada na Etiopia.​—2 Cro. 14:8-13.

16. Ngatta makagi tam nga temporario laman i tiempo na imammo?

¹⁶ Maski nu ariattam ammu nu anni i eksakto nga mesimmu nittam ta mappange, ammu tam nga temporario laman i tiempo na imammo nga maekspiriensa tam sangawe bilang totolay na Dios. Niprofesiya ni Jesus nga ta pangurianan ira nga aggaw, ‘ikalussaw noka ngamin na sinolay’ i disipulosna. (Mat. 24:9) Kinagi gapa ni apostol Pablo nga “madara-darum ngamin i maya nga mattolay mekunnay ta makadios nga debosion bilang disipulos ni Cristo Jesus.” (2 Tim. 3:12, NW ) “Nepallo i batù” ni Satanas yatutta illokuattam laman i baggi tam nu nonopattam nga malillitattam i porena.​—Nep. 12:12.

17. Kunnasi nga mapurueban i pangurug tam?

¹⁷ Araranni ngana nga mapurueban i pangurug na kada tadday nittam. Kagian na Mateo 24:21 nga “mas nga kanninipang noka i ziga-riga tatun nga tiempo anne paga ta nesissimmu gari namegafu ta nekaparo na mundo adde sangoye.” Durante tatun nga tiempo, posible nga mabbalin noka tu kontra tam mismu i kafamilia tam anna megamma i trabahu tam. (Mat. 10:35, 36) Parigan kari noka na kada tadday nittam si Asa nga mattalo kani Jehova para ta uffun anna proteksion?

18. Segun ta Hebreo 10:38, 39, anni i makoffun nittam nga mapprepara sonu mangultimu ngana i imammo?

¹⁸ Sangawe pagalaman, iprepara ittam ngana ni Jehova tapenu masikan noka i pangurug tam. Usu-usanna i “matalo anna masirib nga aripan” tapenu mangiyawa tu “makan ta mepangngo nga tiempo.” Yatun i mamattalupaddian nga masikan ta espiritualidad tam. (Mat. 24:45, NW ) Ngem kuattam nakuan i parte tam tapenu pasikannan i pangurug tam kani Jehova.​—Bibbigan i Hebreo 10:38, 39.

19-20. Segun ta 1 Cronicas 28:9, anni nakuan i iyavu tam ta baggi tam, anna ngatta?

 ¹⁹ Kagitta ni Patul Asa mawag tu ‘alegattam si Jehova.’ (2 Cro. 14:4; 15:1, 2) Pegafuanattam yatun nga pagaleg gukaban na paggigiammu meyannung kani Jehova anna pappabawtiso. Approbetsattam i kada oportunidad tapenu paladdan i pangaya tam kani Jehova. Tapenu mosito tam i baggi tam, iyavu tam: ‘Regular ngà kari nga makistudy?’ Kada makistudy ittam, makalawa ittam tu espiritual nga pamanna-bannay kunne na gapa ta makapagaram ira nga pakkaravulu. (Mat. 11:28) Iyavu tam gapa ta baggi tam: ‘Kanayukku kari nga gigiammuan i Biblia?’ Nu makikabbalay ka ta familiam, egga kari i iskediulnu ta paddayaw tu familia ta kada ligguan? Onu nu magitetadday ka, egga kari lagapa i iskediul mu para tatun? Kukukuammu kari i adde na mawayyam tapenu layyagayyan anna tudduan i tanakuan?

²⁰ Ngatta iyavu tam nakuan danatun? Kagian na Biblia nittam nga usitakkan ni Jehova i ginnonopan anna giffutuattam yatutta kunnatun gapa nakuan i kuattam. (Bibbigan i 1 Cronicas 28:9.) Nu mammuattam nga egga ira i karuan nga mawag tu uliattam ta addetan onu appana-panono tam, mappoffun nakuan ittam kani Jehova tapenu moli danatun. Sangawe ngana i tiempo tapenu iprepara i baggi tam ta duttal ira nga kapurueba. Ariattam nakuan ipamavulun i maski anni nga mamagimmang nittam ta pangapprobetsa ta tiempo na imammo!