1-2. Anni i koneksion na Eclesiastes 11:6 ta pallayyagayya tu mapia nga dumug na Pappatulan?

TA KARUAN nga nasion, maggigginna i totolay ta mapia nga dumug. Talaga kakayàda yatun! Ngem ta karuan gapa nga lugar, baddi laman i interes na tolay ta Dios onu ta Biblia. Kumusta gapa i totolay ta diannu? Maski anni paga i reaksiodda, ekspektan ni Jehova nga itulu-tuloy tam i mallayyagayya adde sonu kagianna nga nabalin ngana yatun nga trabahu.

² Dati ngana nga sinunno ni Jehova nu kanni nga mabalin i trabahu nga pallayyagayya, tapus “duttal ngana i panuppalan.” (Mat. 24:14, 36) Ngem nige nga mesimmu yatun, kunnasi tam nga ‘ari pagibannagan i lima tam’? *​—Bibbigan i Eclesiastes 11:6.

3. Anni i gigiammuattam taw nga artikulo?

³ Ta nappasa nga artikulo, nammuattam i appa nga gannug nga kuattam tapenu mabbalin ittam tu malalaki ta “pangà tu totolay.” (Mat. 4:19) Ammuattam gapa taw nga artikulo i tallu nga makua tam tapenu mas nga pursigidu ittam nga mallayyagayya maski nu anni i situasiottam. Gigiammuattam nu ngatta importante nga (1) mattalupaddian nga nakafokus, (2) mabbalin tu minappasensia, anna (3) mattalupaddian nga masikan i pangurug tam.

4. Ngatta mawag tu mattalupaddian ittam nga nakafokus ta trabahu nga ipakua nittam ni Jehova?

⁴ Niprofesiya ni Jesus nu anni i mesimmu ta pangurianan ira nga aggaw. Kinagina nga makalsa danatun ta fokus na  disipulosna ta pallayyagayya. Yayya nga sinabarangnganna ira nga ‘mappara-paran’ ira. (Mat. 24:42) Meparubang ittam gapa ta kunnatun ira nga gannug nga nakalsa ta fokus na totolay ta mensahe ni Noe. (Mat. 24:37-39; 2 Ped. 2:5) Mawag gafu tu mattalupaddian ittam nga nakafokus ta trabahu nga ipakua nittam ni Jehova.

5. Segun ta Kingngua 1:6-8, kunnasi kalawa i addetan na pallayyagayya?

⁵ Mawag tu nakafokus ittam ta pangilayyagayya ta mapia nga dumug na Pappatulan ta maddaggun. Niprofesiya ni Jesus nga kabalin na patena, tulu-tuloy nga mallayyagayya i taga-tuttulna ira anna mas alawa i sakupan natun nga trabahu. (Juan 14:12) Turi ta natay yayya, nanoli i karuan ta disipulosna ta pagimmanango. Ta paginnolena, nammilagro yayya yatutta aru nga manango i nagafu na karuan ta disipulosna. Kingnguana yatun tapenu ipasigo tannira nga mas importante i pallayyagayya anna pangngua ta disipulos anne ta maski anni nga trabahu. (Juan 21:15-17) Nige yayya nga nappalangi, kinagi ni Jesus ta disipulosna nga ari laman tu ta Israel i pagaddetan na pallayyagayya nga pinegafuananna. (Bibbigan i Kingngua 1:6-8.) Piga dagun i nappasa, nipasingan ni Jesus kani apostol Juan gukaban na sirmata i mesimmu ta “Aggaw na Yafu.” * Kunnaw i nasirmata ni Juan: Megafu ta pangigiya na anghel, melayyagayya i “mannanayun nga evanghelio” ta “totolay na madduma-ruma i rasa, tribu, paguvovug, anna nasion.” (Nep. 1:10; 14:6) Mananawag gafu nga uray ni Jehova ta maddaggun nga makiparte ittam ta interu mundo nga pallayyagayya adde sonu mabalin ngana yatun nga trabahu.

6. Kunnasi ittam nga makapaffokus ta pallayyagayya?

⁶ Makapaffokus ittam ta pallayyagayya nu nonopattam i ngamin nga uffun ni Jehova  nittam. Angngariganna, abundansia i espiritual nga makattam gukaban na neyimprenta anna elektroniko ira nga publikasion, audio anna video nga recording, anna programa ira ta JW Broadcasting. Fugurammu, available ta maturu tu 1,000 nga lengguahe i informasion ira ta ofisial nga website tam! (Mat. 24:45-47) Nassirina i totolay ta mundo megafu ta pulitika anna relihion, tapus egga danuri mariku ngem egga gapa pobre. Maski kunnatun, maturu tu walu nga million nga aripan na Dios ta interu mundo i kurug nga mattaradday bilang mawwaragi. Angngariganna, turi ta Biernes, Abril 19, 2019, nattaradday i Saksi ira ta interu mundo tapenu girawan i video meyannung ta teksto tatun nga aggaw. Ta gabi natun, naggarammammung i 20,919,041 tapenu iselebra i Memorial na patay ni Jesus. Nu pannonopattam i pribilehio tam nga masingan anna makiparte tatun nga milagro ta kaggawattam, makapaffokus ittam ta pallayyagayya.

7. Kunnasi nga makoffun nittam i ehemplo ni Jesus tapenu kanayun ittam nga nakafokus?

⁷ Makapaffokus ittam paga ta pallayyagayya nu tuttulattam i ehemplo ni Jesus. Arianna nipamavulun i maski anni nga makalsa ta fokusna ta pallayyagayyana. (Juan 18:37) Ari yayya nga nappatenta turi ta niyofer nisa ni Satanas “ngamin i pappatulan ta utun na davvun tuange ta ngamin nga makapabbaw nga egga nira,” ni tu nipamavulunna nga pabbalinan yayya na totolay tu patul. (Mat. 4:8, 9; Juan 6:15) Arianna gapa kinaragatan i material ira nga kinariku, ni tu nappefugag yayya gafu ta grabe nga pangokkontra. (Luc. 9:58; Juan 8:59) Nu mapurueban i pangurug tam, makapaffokus ittam nu daddammattam i tabarang ni apostol Pablo. Pinagaramna i Cristiano ira nga tuttulan i ehemplo ni Jesus tapenu ‘ari nga makkafi i nonoda anna maraddam i futuda’!​—Heb. 12:3.

8. Anni i pappasensia, anna ngatta kuruga kawagan yatun sangawe?

⁸ I pappasensia ay i kalmadu nga paginnag ta panguli na situasion. Kawagan yatun ta nadduruma nga situasion. Baka kayà tam ngana nga mangultimu i tadday nga marake nga situasion onu nabayag ngana gapa nga iinnaggattam i makasta nga gannug. Angngariganna, ininnaggan ni profeta Habakuk nga mangultimu i marake nga paddia-paddian ta Juda. (Hab. 1:2) Iniddanaman gapa na disipulos ni Jesus nga ‘mamegafu ngana’ i Pappatulan anna ipaliag ira natun ta pammaguray na Romano ira. (Luc. 19:11) Iddanamattam gapa sonu pawanan ngana na Pappatulan na Dios i ngamin nga kinarake anna irattal natun i mundo nga napannu tu matunung nga totolay. (2 Ped. 3:13) Ngem mawag nga pasensiattam nga innaggan i tiempo sonu magguyu si Jehova. Ammuattam nu kunnasi ittam nga tuttudduan ni Jehova nga mappasensia.

9. Anni ira nga angngarigan i mangipasingan ta pappasensia ni Jehova?

⁹ Si Jehova i perfekto nga ehemplo na pappasensia. Niddanna si Noe tu makalanno nga tiempo tapenu paddayan i arka anna tapenu masserbi nga “minangngilayyagayya tu kinatunung.” (2 Ped. 2:5, NW; 1 Ped. 3:20) Gininna gapa ni Jehova si Abraham maski nu pakatotoli nga kinuestionna i desision ni Jehova nga daralan i marake ira nga totolay nga taga-Sodoma anna Gomora. (Gen. 18:20-33) Piga siglo gapa nga pinasa-pasensian ni Jehova i ari matalo nga nasion na Israel. (Neh. 9:30, 31) Masingan gapa i pappasensia ni Jehova ta kaggawattam megafu ta apaddu nga tiempo nga niyawana tapenu “pallikuran na ngamin nga totolay i katagaruliad-da” anna mabbalin tu kokkofunna. (2 Ped. 3:9; Juan 6:44; 1 Tim. 2:3, 4) I ehemplo ni Jehova  i mamaguyu nittam nga mappasensia durante nga tulu-tuloy nga mallayyagayya anna manuddu. Tudduanna gapa ittam nga mappasensia gukaban na ilustrasionna ta Uvovugna.

10. Anni i ituddu nittam na ehemplo na kusetcheru ta Santiago 5:7, 8?

¹⁰ Bibbigan i Santiago 5:7, 8. Tudduan ittam nga mappasensia na angngarigan na kusetcheru nga mammula. Alistu nga dumakal i karuan nga mula. Ngem magaru ta mulu-mula nerulay danuri mavvunga i mawagda i apaddu nga tiempo nige nga mafusi. Annam nga vulan i mappasa nige nga mafusi i mulu-mula ta Israel. Imula na kusetcheru i vullung ta ollu nga uran nga maddanna ta tangnga na Oktubre tapus apitanna yatun kabalin na urian nga uran ta tangnga na Abril. (Mar. 4:28) Masirib ittam nu parigattam i pappasensia na kusetcheru. Ngem ari tu mabi yatun.

11. Kunnasi nga makoffun i pappasensia ta ministerio tam?

¹¹ Negagangay ta imperfekto nga totolay nga insigida nga kayàda nga masingan i resulta na trabahuda. Ngem nu kayà tam nga mattalovu anna mavvunga i mula tam, mawag tu aru nga tiempo i usattam para tatun​—makkokkog ittam, mammula, magikaddo, anna mabbaya. Kunnatun gapa nga pallallappo i kawagan ta pangngua tu disipulos. Mawag i tiempo tapenu moffunan i Bible study tam nga mabbalin tu minaggiddu anna ari mangireruma. Kawagan gapa i pappasensia tapenu ari nga makkafi i nono tam nu ari nga magginna i totolay nittam. Ngem nu makasta gapa i pangalawada, mawag lagapa tu mapasensia ittam. Ariattam nga mafuersa i Bible study tam nga mangurug. Maski paga lagu i disipulos ni Jesus, egga ira tiempo nga ariadda insigida nalippawa i nitudduna. (Juan 14:9) Daddammattam nga sittam i mangimula anna mabbaya, ngem i Dios i mamadakal ta mula.​—1 Cor.3:6.

12. Kunnasi tam nga mepasingan i pappasensia nu layyagayyattam i kafamilia anna paparientes tam?

¹² Baka marigatan ittam nga mappasensia  nu layyagayyattam i kafamilia onu paparientes tam. Makoffun nittam i prinsipio ta Eclesiastes 3:1, 7. Kunna: “Egga i . . . tiempo na ari pattannug, anna tiempo na paguvovug.” Makoffun gapa i makasta nga kondukta tam tapenu magginna ira nittam ngem mawag tu kanayun nga alerto ittam ta oportunidad tapenu ikagi nira i kinakurug. (1 Ped. 3:1, 2) Matalikarag ittam nga mallayyagayya anna manuddu ngem mawag tu pasensiattam i ngamin, nelagum tatun i kafamilia tam.

13-14. Anni i karuan ta ehemplo na pappasensia nga awayya tam parigan?

¹³ Makagigiammu ittam ta pappasensia danuri na ehemplo ira ta Biblia kunne na gapa i ehemplo ira ta kaggawattam. Maski nu kakayà ni Habakuk nga mangultimu i kinamarake, mapasensia nga kinagina: “Mattalupaddian ngà nga agga-taddag ta pagguardiakku.” (Hab. 2:1) Kinagi gapa ni apostol Pablo nga kakayàna ngana nga ‘balinan’ i ministeriona. Ngem mapasensia lagapa nga ‘nilammuyagna i mapia nga dumug.’​—King. 20:24.

¹⁴ Kunnaw i ekspiriensa na magatawa nga naggradua ta Gilead. Neyasayn ira ta nasion nu sitaw baddi laman i Saksi anna ari nga Cristiano i magaru ta totolay. Baddi laman i mayà nga makipaggigiammu tu Biblia nira. Ngem istorian na kaklaseda ta Gilead nga massesserbi gapa ta tanakuan nga nasion nga aru i progresibo nga Bible study-da. Ngem mapasensia lagapa nga nallayyagayya i magatawa maski nu magaru ta teritoriada i ari nga magginna. Kabalin na walu ragun nga pallayyagayyada ta matagga nga teritoria, magayayya ira megafu ta nabawtisowan i tadday ta Bible study-da. Anni i napparehuan danaw nga ehemplo ta Biblia anna ta kaggawattam? Kanayun nga matalikarag danaw nga matalo anna ariadda nga pinagibannag i limada yatutta binala-balakkan ni Jehova i pappasensiada. Yatutta ‘parigattam danuri i maninaga noka ta nitabba na Dios, megafu ta angngurug anna pasensiada.’​—Heb. 6:10-12.

15. Kunnasi nga pasikannan na pangurug i pappursigi tam nga mallayyagayya?

¹⁵ Kurugattam i mensahe nga ilayyagayya tam yatutta kakayà tam nga ikagi yatun ta aru nga totolay adde ta posible. Mattalo ittam ta promesa ira nga mabibbig tam ta Biblia. (Sal. 119:42; Isa. 40:8) Memammatattam gapa nga matuttuppal i profesiya ira ta Biblia ta kaggawattam. Masingattam gapa nu kunnasi nga makkasta i pattolay na totolay nu iyaplikada i tabarang na Biblia. Yatun i mamakurug nga mawag nga maginna na ngamin i mapia nga dumug na Pappatulan.

16. Segun ta Salmo 46:1-3, anni i efekto na pangurug tam kani Jehova anna kani Jesus ta pappursigi tam nga mallayyagayya?

¹⁶ Kurugattam gapa si Jehova, i Paggafuan na mensahe nga ilayyagayya tam anna kurugattam gapa si Jesus, i Patul na Pappatulan. (Juan 14:1) Maski nu anni i meparubang nittam, kanayun nga si Jehova i mangiyegu anna mamasikan nittam. (Bibbigan i Salmo 46:1-3.) Fuera paga tatun, mattalo ittam nga maski egga si Jesus ta langi, igiggiyana lagapa i trabahu nga pallayyagayya. Usu-usanna i pakapangngua anna autoridad nga niyawa ni Jehova nisa.​—Mat. 28:18-20.

17. Mangistoria tu angngarigan nu ngatta mawag nga tulu-tuloy ittam nga mallayyagayya.

¹⁷ Megafu ta pangurug, siguradu ittam nga bendisionan ni Jehova i appursigi tam. Nu mittan, surpresa paga i pangnguana tatun. (Ecl. 11:6) Angngariganna, ta kadaggaw, rinivu nga totolay i mattalebag ta lamesa onu cart ira nu sitaw nakadispley i literatura tam. Efektibo kari yatun nga metodo na pallayyagayya?  Siempre gapa! Napakurug yatun ta ekspiriensa nga mabbibbig ta Nobiembre 2014 nga isyu na Ministerio Tam ta Pappatulan. Meyannung yatun ta kabataan nga estudiante ta unibersidad nga kayàna nga mattura tu essay meyannung ta Saksi ira ni Jehova. Awan tu maleganna nga Kingdom Hall ngem egga i nasinganna tu lamesa nu sitaw nakadispley i literatura tam ta eskuelana. Naleganna tatun i referensia nga kawaganna para ta essay-na. Megafu tatun, nabbalin yayya tu Saksi anna regular payunir ngana yayya sangawe. Paguyuan ittam na kunnatun ira nga ekspiriensa tapenu tulu-tuloy nga mallayyagayya. Ngatta? Ipasingan natun nga egga paga i totolay nga mawagda nga maginna i mensahe na Pappatulan.

18. Ngatta makasiguradu ittam nga mebala-balin i trabahu nga pallayyagayya ta eksakto nga tiempo ni Jehova?

¹⁸ Makasiguradu ittam nga mebala-balin i trabahu nga pallayyagayya ta eksakto nga tiempo. Nonopan i nesimmu ta kaggawan ni Noe. Pinakurug ni Jehova nga kanayunna nga kuan i ganna-gannug ta kapianan nga tiempo. Ma-120 nga dagun nige na Delubio, dinisidi ngana ni Jehova nu kanni nga mamegafu yatun. Aru nga dagun i nappasa, kinagi ni Jehova kani Noe nga mamadday yayya tu arka. Ma-40 adde ta 50 nga dagun nige nga namegafu i Delubio, malallappo lagapa nga nattrabahu si Noe. Maski nu ari yayya nga gigginnan na totolay, nitulu-tuloyna lagapa nga inabisowan ira adde ta zimittal i tiempo nga kinagi ni Jehova nisa nga itallunna ngana i aya-ayam ta arka. Tapus ta eksakto nga tiempo, “niserra ni Jehova i puerta.”​—Gen. 6:3; 7:1, 2, 16.

19. Anni i meddanamattam nu ariattam nga pagibannagan i lima tam?

¹⁹ Araranni ngana i tiempo nga ikagi nittam ni Jehova nga nabalin ngana i trabahu nga pallayyagayya. Tapus daralanna noka i sistema na ganna-gannug ni Satanas anna irattalna i bagu nga mundo nga napannu tu totolay nga minattuppal nisa. Durante nga ari paga nga nesimmu yatun, parigattam nakuan si Noe, si Habakuk, anna i tanakuan paga nga ariadda pinagibannag i limada. Mattalupaddian ittam nga nakafokus, mappasensia, anna pasikannan i pangurug tam kani Jehova anna ta promesana ira.