Kunnaw i mabibbig ta mamappanono nga versikulo: “Nu masingammu nga matazza-tazzian i pobre anna ari nga matuttuttul i hustisia anna kinatunung ta lugarnu, ariammu makaddag tatun. Megafu ta i atannang nga ofisial ay sisifutan na mas atannang nisa, anna egga paga i tanakuan nga mas atannang anne nira.”​—Ecl. 5:8.

Nu ariattam nga ikonsidera i nononopan ni Jehova meyannung tatun, makasta nga pangideskriba danatun nga versikulo ta totolay ira nga mammaguray ta gobiernu. Ngem fuera paga tatun, tukuyanna gapa i kinakurug meyannung kani Jehova nga mamanna-bannay nittam.

Tukuyan na Eclesiastes 5:8 i tadday nga mammaguray nga manazza-tazzi ta pobre anna ari tu patas. Mawag tu daddamman natun nga mammaguray nga posible nga sisifutan yayya na tadday nga mas atannang i posisionna onu na mas makapangngua ta gobiernu anne tannisa. Kakuruganna, baka egga paga lagu i tanakuan nga mas atannang i posisiodda. Ngem kaddaraddam nga ta gobiernu na totolay, baka ngamin nga mammaguray ay marake, yatutta mazziga-riga i totolay.

Maski nu gittana awan ngana tu iddanama nga makkasta i ganna-gannug, mabanna-bannayan ittam ta pakannammu nga ‘sisifutan ni Jehova i atannang ira nga ofisial’ ta gobiernu. Awayya tam i makimemallo ta Dios anna ipammakatalo tannisa i vuru-vuruttam. (Sal. 55:22; Fil. 4:6, 7) Ammu tam nga “i mata ni Jehova ay malliligo ta interu davvun tapenu ipasingan i sikanna para ta buu i futuda nga masserbi sa.”​—2 Cro. 16:9.

Yatutta iperaddam nittam na Eclesiastes 5:8 nga taw ta mundo nga pattolayattam, kanayun nga egga i mas nga makapangngua. Iperaddam gapa nittam natun nga versikulo nga si Jehova i Katannangan nga Autoridad. Mammaguray ngana yayya sangawe gukaban na Anana, si Jesu-Cristo, i Patul na Pappatulan. Sisifutan na Makapangngua-sa-ngamin i ngamin nga gannug anna i ngamin nga tolay. Kanayun yayya nga patas kunne na gapa i Anana.