1. Anni i puede tam nga pagagal kani Jehova?

NELAGUM ta familia na maddayarayaw kani Jehova i “kaka nga Ana na Dios” nga si Jesus anna i napakaru nga anghel. (Col. 1:15; Sal. 103:20) Ta kegga ni Jesus taw ta davvun, kinagi na nga puede nga agalan na matalo nga totolay si Jehova tu Yama da. Tapus turi ta egga i kinagi ni Jesus ta disipulos na, inagalan na si Jehova nga ‘Yamà nga Yama nu gapa.’ (Juan 20:17) Nu idedika tam gapa i baggi tam kani Jehova anna mappabawtiso ittam, mabbalin ittam tu miembro na minaggiddu nga familia na maddayarayaw ta nisa.​—Mar. 10:29, 30.

2. Anni i gigiammuattam taw nga artikulo?

² Marigatan i karuan nga imammatan si Jehova bilang minaggiddu nga Yama. Ari gapa nga ammu na karuan nu kunnasi da nga mepasingan i pangaya da ta wawwaragi da. Gigiammuattam taw nga artikulo i ehemplo ni Jesus tapenu mammuattam nu kunnasi tam nga memammatan si Jehova bilang minaggiddu nga Yama. Magigiammu tam gapa nga awayya tam i makiddukko nisa. Ammuattam gapa nu kunnasi tam nga maparigan i pattratu ni Jehova ta wawwaragi tam.

3. Kunnasi nga makoffun i modelo nga pakimallo tapenu mas maddukko ittam kani Jehova?

³ Minaggiddu nga Yama si Jehova. Para gapa kani Jesus, masippo anna minaggiddu nga magana si Jehova anna mabi nga marannian ta maski anni nga tiempo, ari tu tadday nga maporay anna minaddikta. Kayà ni Jesus nga kunnatun nakuan gapa i pagimamma tam kani Jehova. Masingattam yatun turi ta sinudduan na i disipulos na nu anni i ipakimallo da. Nigafu na i modelo nga pakimallo ta pakkagi na tu “Ama mi.” (Mat. 6:9) Puede nakuan nga ituddu nittam ni Jesus nga agalattam si Jehova tu i “Makapangngua-sa-ngamin,” “i Namaratu,” onu i “Patul  adde noka” ta mepangngo mabba danatun anna neyusa ngana ta Biblia. (Gen. 49:25; Isa. 40:28; 1 Tim. 1:17) Ngem inusa na i “Ama” tapenu mepasingan nga puede ittam nga maddukko kani Jehova.

4. Ngatta makagi tam nga kakayà ni Jehova nga makiddukko ittam nisa?

⁴ Marigatakka kari nga imammatan si Jehova bilang minaggiddu nga Yama? Kunnatun i karuan megafu ta ari nga makasta i pinattratu na yama da ta nira ta kabbidda. Mapia ngana laman ta matindian ni Jehova i mataga-tageno tam! Kayà na nga makiddukko nittam yari tu pagaramman ittam na Biblia: “Umaranni kamu ta Dios, ay umaranni yaya nikamu.” (Sant. 4:8) Iddeddu na ittam anna kakayà na nga yayya i mabbalin tu kapianan nga Yama para ta nittam.

5. Segun ta Lucas 10:22, kunnasi ittam moffunan ni Jesus tapenu mas maddukko ittam kani Jehova?

⁵ Moffunan ittam ni Jesus tapenu mas maddukko ittam kani Jehova. Ammammu na tu mapia si Jehova anna perfekto nga naparigan na i kualidad na ira. Yari tu kinagi na: “I nakasingan niakan ay nasingan na ngana gapa i Yama.” (Juan 14:9) Gitta na manung tam si Jesus. Ituddu na nittam nu kunnasi nga irespeto anna tuttulan i Yama tam anna nu anni i kuattam tapenu mala tam i fabor ni Jehova anna ari tam yayya nga maparaddam. Ngem mas malippawa tam nga masippo anna minaggiddu si Jehova nu ammuattam i kingngua ira ni Jesus taw ta davvun. (Bibbigan i Lucas 10:22.) Innattam nu anni danatun.

6. Ngatta makagi tam nga gigginnan ni Jehova si Jesus?

⁶ Gigginnan ni Jehova i ána na. Kakurugan na, mamippiga nga gininna na i pakimallo ira na kaka nga Ana na nga si Jesus tagga ta egga yayya ta davvun. (Luc. 5:16) Gininna ni Jehova si Jesus turi ta nakimallo yayya meyannung ta importante ira nga desision nga kuan na, kagitta na pappili ta 12 nga apostoles. (Luc. 6:12, 13) Gininna paga yayya ni Jehova turi ta sobra i avvuru-vurung na. Nige yayya nga traydoran ni Judas, nipakimemallo na ta Yama na i meyannung ta pinakamariga nga kapurueba nga meparubang ta nisa. Ari  laman nga gininna ni Jehova yatun nga pakimallo na. Zinog na paga lagu i tadday nga anghel tapenu pasikannan i meddu nga Ana na.​—Luc. 22:41-44.

7. Anni i matageno mu megafu ta gigginnan ni Jehova i pakimallo ira na aripan na?

⁷ Adde sangawe, gigginnan lagapa ni Jehova i pakimallo ira na aripan na. Tabbagan na danatun ta fustu nga tiempo anna kapianan i panabbag na tatun ira. (Sal. 116:1, 2) Naekspiriensa mismu yatun na sister nga taga-India. Sossobra i avvuru-vurung na yari tu nipakimemallo na yatun kani Jehova. Kunnaw i nitura na: “Nakoffun niakan i Mayo 2019 nga JW Broadcasting^® nu anni i kuakku nu sobra i pavvuru-vurukku. Yatun i tabbag ta pakimallo ku ira.”

8. Kunnasi nga nipasingan ni Jehova nga ayatan na si Jesus?

⁸ Ayatan anna ikavurungan ittam ni Jehova kagitta na pangaya anna pangikavurung na kani Jesus tagga ta nattolay yayya taw ta davvun. (Juan 5:20) Niyawa na i ngamin nga pakawagan ni Jesus ta espiritual, emosional, anna pisikal. Kinagi gapa ni Jehova ta Ana na nga ayatan na yayya anna magayayya yayya ta nisa. (Mat. 3:16, 17) Ammu ni Jesus nga kanayun na nga kavulu i nelangitan nga Yama na anna uuffunan na yayya, yari tu ari na vuluvuga natageno nga magitetadday yayya.​—Juan 8:16.

9. Ngatta makagi tam nga ayatan ittam ni Jehova?

⁹ Kagitta ni Jesus, mamikkaru tam ngana gapa nga natageno i pangaya ni Jehova ta nittam. Nonopan yaw: Niyaranni ittam ni Jehova ta nisa tapus pinabbalin na ittam tu miembro na minaggiddu anna nattaradday nga familia na. Megafu tatun, magayayya ittam anna egga i mamagaram nittam nu mamroblema ittam. (Juan 6:44) Ari gapa nga magimmang si Jehova ta pangiyawa na nittam tu suplay na espiritual nga makan nga mamagaram ta nittam. Iyayawa na paga lagu i inaggaw nga pakawagattam. (Mat. 6:31, 32) Nu nonopattam i pangaya ni Jehova ta nittam, mas gapa nga ayatattam yayya.

10. Kunnasi i pattratu ni Jehova ta wawwaragi tam?

¹⁰ Ayatan ni Jehova i wawwaragi tam ngem baka marigatan ittam nga kuan i kunnatun. Nadduruma gare i neyugaliattam onu baka tanakuan i nikapadakal tam. Makkamali tam gapa yari tu baka mallussaw onu massinti ta nittam i tanakuan. Ngem mas nga makka-iddu-iddu ta unag na espiritual nga familia tam nu parigattam i pattratu na Yama tam ta wawwaragi tam. (Efe. 5:1, 2; 1 Juan 4:19) Innattam nu anni i magigiammu tam ta ehemplo ni Jehova.

11. Kunnasi nga naparigan ni Jesus i “minaggallallo anna minaggiddeddu” nga Yama na?

¹¹ “Minaggallallo anna minaggiddeddu” si Jehova. (Luc. 1:78) Makagi tam nga minaggallallo i tadday nga tolay nu ikavurungan na danuri i mazziga-riga. Nonopan na gapa nu kunnasi ira nga moffunan anna mabanna-bannayan. Masingan ta pinattratu ni Jesus ta totolay nga naparigan na i pangikallo na Yama na. (Juan 5:19) “Ta pakasingan na ta magaru nga totolay, ziminatu i allo na nira megafu ta mavuru-vurung ira anna awan tu awa-awayya da. Kagitta da i karneru ira nga napagurayan.” (Mat. 9:36) Ari laman tu basta nakatageno si Jesus tu allo. Egga gapa i kingngua na. Pinammapia na i mataki anna inuffunan na danuri “nabanna-bannag anna agga-kattu ta madammo.”​—Mat. 11:28-30; 14:14.

12. Kunnasi tam nga makepasingan tu allo ta wawwaragi tam?

¹² Makepasingan ittam laman tu allo ta wawwaragi nu ammuattam labbi i problema da ira. Angngarigan na, baka egga i grabe nga taki na  tadday nga sister. Awayya na nga arian na nga kakkagian nga marigatan ngana yayya. Ngem matangngaw na kari paga i trabahu ira ta baleda? Mawag na kari i uffun ta pallutu onu pappakarenu? Magga appresian na nu egga i manguffun nisa. Kunnasi gapa nu nalsa ta trabahu i tadday nga brother? Baka puede tam yayya nga iddan tu kuartu nga makoffun ta nisa adde sonu makaleg mana uli yayya tu trabahu. Puede gapa nga ariattam ngana ikagi nga naggafu nittam yatun.

13-14. Kunnasi tam nga maparigan i kinavuka-palag ni Jehova?

¹³ Vuka-palag si Jehova. (Mat. 5:45) Parigattam nakuan yayya. Nu magawag tu uffun i wawwaragi tam, ariattam nakuan nga innaggan nga mappoffun ira nittam nige tam nga ikallo ira. Sittam nakuan i magollu nga manguffun ta nira. Kunnatun si Jehova. Maski nu ari tam nga ikiddaw nisa, luttuag lagapa i bilag kada umma anna mammakapia i ngamin tatun maski danuri ari nga mappabalo! Ari kari nga masingan ta pangiyawa ni Jehova ta pakawagattam ira nga ayatan na gapa ittam? Talaga iddeddu tam si Jehova megafu ta masippo anna vuka-palag yayya!

¹⁴ Aru gapa nga wawwaragi tam i vuka-palag kagitta ni Jehova. Angngarigan na, turi ta 2013, napakaru i zinaral na Super Typhoon Yolanda ta Pilipinas. Aru nga wawwaragi i nakkadaral i babalay anna pakkukua da. Ngem insigida ira nga inuffunan na espiritual nga familia da ta interu mundo. Aru i naddona anna nanguffun ta pappakapia anna pamataddag uli ta maggi 750 nga babalay ta unag laman na tanga-ragun! Ta COVID-19 pandemic gapa, ikaguman na Saksi ira nga uffunan i wawwaragi da. Nu insigida nga uffunattam i espiritual nga familia tam, ipasa-pasingattam nga iddukattam ira.

15-16. Segun ta Lucas 6:36, kunnasi tam nga maparigan i nelangitan nga Yama tam?

¹⁵ Minaggallallo anna minammakoma si Jehova. (Bibbigan i Lucas 6:36.) Kadaggaw ittam nga ikallo anna pakoman na nelangitan nga Yama tam. (Sal. 103:10-14) Kunnatun gapa si Jesus. Maski nu imperfekto i disipulos na, nikallo anna pinakoma na ira. Nisakrifisio  na paga lagu i inango na tapenu mapakoma i liwi-liwa tam. (1 Juan 2:1, 2) Ari ka kari nga mapaguyu nga makiddukko kani Jehova anna kani Jesus megafu ta minaggallallo anna minammakoma ira?

¹⁶ Nu “makkapaka-pakoma” ittam, mas gapa nga makka-aya-aya ittam. (Efe. 4:32) Nu mittan, mariga talaga nga pakoman i tanakuan ngem mawag tu ikagumattam yatun. Marigatan nga mamakoma i tadday nga sister ngem niyistoria na nga nakoffun nisa i artikulo ta Ang Bantayan nga “Lubusang Patawarin ang Isa’t Isa.” * Nitura na: “Turi ta ginigiammù yaw nga artikulo, nammuakku nga makoffun balo nio nu mamakoma ngà. Nagigiammù tatun nga nu mamakoma ka, ari na kayà kagian nga kunsintiammu onu balewalaammu yari i mataki nga kingngua da nikaw. Kayà na laman kagian natun nga ari ngana nga mataki i nono mu ta kingngua da nikaw tapus memammo ngana i panageno mu.” Nu pakomattam gafu i wawwaragi tam, ipasa-pasingattam nga ayatattam ira anna paparigattam i Yama tam nga si Jehova.

17. Segun ta Mateo 5:16, kunnasi tam nga medayaw i nelangitan nga Yama tam?

¹⁷ Mappappabalo ittam ta miembro ittam na espiritual nga familia ni Jehova ta interu mundo nga makka-aya-aya. Kayà tam nga mas aru paga nakuan i makavulu tam nga maddayaw ta Dios tam. Megafu tatun, ari ittam nakuan magangngua tu maski anni nga manaral ta reputasion ni Jehova onu na totolena ira. Ikagumattam gafu nga pakappian i kondukta tam tapenu maginteres i totolay ta mensahe tam anna passerbiadda gapa si Jehova.​—Bibbigan i Mateo 5:16.

18. Anni i makoffun nittam tapenu ari ittam maganassing nga mallayyagayya?

¹⁸ Nu mittan, tagibadditan onu persigian ittam na totolay megafu ta tuttuttulattam i nelangitan nga Yama tam. Ngem kunnasi nu maganassing ittam nga mallayyagayya? Siguradu nga uffunan ittam ni Jehova anna na Ana na. Nipasiguradu ni Jesus ta disipulos na nga ariadda nakuan kavurungan nu kunnasi i paguvovug da onu nu anni i kagiadda. Ngatta?  Nipakanawag ni Jesus: “Ta dattal na oras, mepakannammu nikamu nu anni i kagian nu. Ta i uvovugan nu ay ari tu maggafu nikamu, ngem maggafu ta Espiritu na Yama nu.”​—Mat. 10:19, 20.

19. Mangistoria tu angngarigan na magutu nga pallayyagayya.

¹⁹ Turi ta bagu pagalaman nga Bible study si Robert anna awan paga kuruga tu pakannammu na ta Biblia, minarubang yayya ta korte megafu ta pammanaki na nga massuddalu. Magutu nga nipakanawag na ta korte ta South Africa nga kayà na nga mattalupaddian tu neutral megafu ta ayatan na i Cristiano nga wawwaragi na. Tinagibalor na i papel na ta espiritual nga familia tam! Turi ta egga yayya ta korte, niyavu na hues nisa, “Sinni i wawwaragim?” Nakaddag si Robert tatun nga niyavu na hues ngem insigida na nga nanono i teksto tatun nga aggaw ta Mateo 12:50: “I sinni laman nga mangngua ta uray na Yamà nga egga ta langi, ay yaya i wagì anna yenà.” Maski paga nu bagu laman nga Bible study si Robert tatun nga tiempo, inuffunan yayya na espiritu ni Jehova tapenu matabbag na i ngamin nga pakkiavu na hues. Siguradu nga proud si Jehova kani Robert! Magga proud gapa si Jehova nittam nu mattalo ittam nisa tapenu magutu ittam nga makapallayyagayya maski ta mariga ira nga situasion.

20. Anni nakuan i ikagumattam nga kuan? (Juan 17:11, 15)

²⁰ Dakal i appabalo tam ta miembro ittam na minaggiddu nga espiritual nga familia ni Jehova. Yayya i kapianan nga Yama tam anna napakaru i minaggiddu nga wawwaragi tam. Kanayuttam nakuan nga tagibaloran yatun. Kayà gare ni Satanas anna na marake ira nga tagatuttul na nga paddudattam i pangaya na nelangitan nga Yama tam anna kayà da gapa nga madaral i pattaradday tam. Ngem nakimemallo si Jesus para nittam nga tangngallan ittam nakuan na Yama tam tapenu mattaradday lagapa i familia tam. (Bibbigan i Juan 17:11, 15.) Tattabbagan ni Jehova yatun nga pakimallo. Kagitta ni Jesus, ariattam nakuan vuluvuga paddudan nga ayatan anna uffunan ittam na nelangitan nga Yama tam. Kanayuttam gafu nga ikaguman nga mas makiddukko ta espiritual nga familia tam.