1. Anni i matageno danuri na kafamilia na nadisfellowship?

EGGA kari i nadisfellowship nga kafamiliam? Mataki-taki talaga yatun! Kunnaw i kagian ni Sister Hilda: “Tagga ta natay i atawà, abbo ku nu yatun ngana i pinakamataki nga nesimmu nio, jebi ta nakkavulu kami tu 41 nga dagun. Ngem tagga ta nadisfellowship i ana ku nga lalaki tapus pinanawan na i atawa na kunne na gapa i dua nga ana na, mas grabe balo i taki natun.” *

2-3. Segun ta Salmo 78:40, 41, anni i matageno ni Jehova nu panawan yayya na aripan na ira?

² Nonopammu ngana laman nu kunnasi kataki para kani Jehova tagga ta nilikuran yayya na karuan nga anghel nga miembro na familia na! (Jud. 6) Fugurammu gapa nu kunnasi kataki para nisa tagga ta namippiga nga narrebelde nisa i iddeddukan na ira nga Israelita. (Bibbigan i Salmo 78:40, 41.) Nu egga i nadisfellowship nga kafamiliam, siguradu gapa nga matakitan i minaggiddu nga nelangitan nga Yama tam. Malippawa na i taki nga mataga-tageno mu anna ikallo naka. Yatutta pagaramman anna uffunan naka.

³ Gigiammuattam taw nga artikulo nu anni ira i kuattam tapenu uffunan ittam ni Jehova nu egga i nadisfellowship nga kafamilia tam. Gigiammuattam paga taw nu kunnasi tam uffunan i kakongregasiottam ira nu nesimmu nira yatun. Ngem paguruvovugattam labbi nu anni ira nga appana-panono i mawag nga lillitattam.

4. Anni i maruddu nga matageno na magana ira nu panawan na ana da si Jehova?

⁴ Nu panawan na tadday nga ana si Jehova, maruddu nga manono na magana nga egga i nakkurangadda. Turi ta nadisfellowship i ana ni Brother Luke, kinagi na: “Paliwatakku i baggì.  Namippiga nga nattatageno ngà tu marake megafu tatun. Mittan, tumatangi ngà anna madaddammo i panageno ku.” Nadisfellowship gapa i ana ni Elizabeth anna nanono na: “Baka mali i pinamadakal ku ta ana ku. Ari ku siguru sinudduan tu mapia i ana ku nga lalaki tapenu iddukan na si Jehova.”

5. Sinni i makalliwa nu panawan na tadday si Jehova?

⁵ Daddammattam nakuan nga niregaluan ni Jehova i kada tadday nittam tu lallaguray nga mappili. Puede tam gafu pilian nu passerbiattam yayya onu ari. Maski ari tu makasta nga ehemplo i magana na karuan nga abbing, pinili da lagapa nga masserbi kani Jehova anna mattalupaddian nga matalo ta nisa. Nikaguman gapa na karuan nga magana nga padakallan i ána da tapenu iddukan si Jehova ngem ta pappasa na tiempo, nilikuran lagapa na ána da i kinakurug. Pilian lagapa gafu na kada tadday nittam nu passerbian na si Jehova. (Jos. 24:15) Nu maraddam ka gafu megafu ta nadisfellowship i ana mu, ariammu nakuan nga nonopan nga liwa mu yatun!

6. Anni i matageno na ana nu panawan na magana na si Jehova?

⁶ Nu mittan gapa, panawan na yama onu yena si Jehova anna panawan na gapa i familia na. (Sal. 27:10) Mataka-taki yatun ta ána megafu ta maruddu nga ikakua da i magana da. Kunnaw i kagian ni Esther nga nadisfellow i yama na: “Makatatangi ngà megafu ta ammù nga ari laman tu basta sisinu nga neyarayyu yayya ta kinakurug. Talaga dinesision na nga manaki na ngana i masserbi kani Jehova. Iddeddu ku gapa i yamà yayya nga turi ta nadisfellow yayya, kanayun ngà nga mavurung nu kunnasi ngana tamma yayya. Nakka-panic attack ngà paga lagu.”

7. Anni i matageno ni Jehova para ta ána nga nadisfellow i yama onu yena da?

⁷ Nu nadisfellow i yamam onu i yenam, matakitakkami gapa ta nesimmu. Makasiguradu ka gapa nga ammu ni Jehova i taki nga mataga-tageno mu. Iddeddukan naka anna magayayya yayya ta ari ka lagapa nga nagimmang nga masserbi nisa. Kunnatun gapa i matageno mi nga wawwaragim ta kongregasion. Daddammammu gapa nga ari tu sikaw i makalliwa ta desision na nadisfellow nga magana mu. Kagitta na nakagi ngana, niddan ni Jehova i kada tadday tu lallaguray nga mappili nu passerbiadda yayya onu ari. I kada dedikadu anna bawtisadu ay ‘mawag tu akkatan na i karga na lagapa.’—Gal. 6:5.

8. Anni i kuan danuri na nadisfellow i kafamilia da durante nga innaggadda i panoli na? (Innan gapa i kahon nga “ Manoli Ka Kani Jehova.”)

⁸ Nu nadisfellow i kafamiliam, normal laman nga iddanamammu nga manoli saw yayya kani Jehova. Anni gafu i kuammu durante nga innaggammu yatun? Ariammu vuluvuga pagurayan i espiritualidad mu. Nu kuammu yatun, mabbalikka tu makasta nga ehemplo ta tanakuan paga nga miembro na familia nu anna maski ta nadisfellowship. Mapasikakka gapa natun tapenu maattammammu i daddam nga mataga-tageno mu. Anni gafu ira i kuammu tapenu ariammu mapagurayan i espiritualidad mu?

9. Anni ira i kuammu tapenu mapasikan naka ni Jehova? (Innan gapa i kahon nga “ Makapabannay ira nga Teksto nu Nadisfellowship i Kafamiliam.”)

⁹ Kanayummu nga paladdan i pangurug mu.  Ikagumammu gapa nga paladdan i pangurug na kafamiliam ira. Kunnasim nga makua yatun? Makasta nakuan lagapa i rutinam ta espiritual. Bibbigammu kadaggaw i Biblia anna pannonopammu tu mapia yatun. Regular ka gapa nga makistudy. Nu kuammu danatun, mapasikan naka ni Jehova. Kunnaw i kagian ni Joanna nga nadisfellow i yama na anna i manang na: “Mabbalin tu memammo i panageno ku kada mabibbig ku i meyannung kada Abigail, Ester, Job, Jose, anna Jesus. Massikan i nono ku megafu ta makasta nga ehemplo da anna positibo i manonono ku. Mabanna-bannayan ngà gapa ta orihinal ira nga kansiottam.”

10. Kunnasi makoffun nikaw i Salmo 32:6-8 nu kuruga maraddam ka?

¹⁰ Ikagim kani Jehova i ngamin nga mamavvurung nikaw. Nu maraddam ka, ariammu immangan i makimallo nisa. Ipakimemallo mu ta minaggiddu nga Dios tam nga maparigammu nakuan i pagimamma na ta situasiommu anna ‘ituddu na nikaw i mepangngo nga lakarammu.’ (Bibbigan i Salmo 32:6-8.) Awayya na tu marigatakka nga ikagi kani Jehova i taki nga mataga-tageno mu ngem malippawa naka. Talaga iddeddu naka yatutta kayà na nga ikagim nisa i ngamin nga vuru-vurummu.​—Ex. 34:6; Sal. 62:7, 8.

11. Segun ta Hebreo 12:11, ngatta mattalo ittam nakuan ta meddu nga panisiplina ni Jehova? (Innan gapa i kahon nga “ Paddisfellowship—Ebidensia na Aya ni Jehova.”)

¹¹ Suportammu i desision na elder ira. Meddu nga unnug ni Jehova i paddisfellowship. Para yatun ta pammakapianan na ngamin, nelagum ngana i nadisfellow. (Bibbigan i Hebreo 12:11.) Egga i karuan ta kongregasion nga kuestionadda i desision na elder ira nga i-disfellow i tadday nga tolay. Ngem daddammammu nga maruddu nga kukukuan yatun na totolay nga manaki da i makkagi tu marake meyannung ta tolay nga nakaliwa. Ari tam ammu  i ngamin nga detalye. Mattalo ittam gafu nga nikaguman na elder ira nga nanammi ta hudisial nga kaso nga tuttulan i prinsipio ira na Biblia anna nanentensia ira “para kani Jehova.”​—2 Cro. 19:6.

12. Anni ira i makasta nga resulta nga naekspiriensa na karuan megafu ta sinuportadda i unnug ni Jehova ta paddisfellow?

¹² Nu suportammu i desision na elder ira nga i-disfellow i kafamiliam, awayya na nga moffunammu yayya nga manoli kani Jehova. Kunnaw i kagian ni Elizabeth nga nakagi ta nappasa ira nga parapo: “Kitazziga para nikami nga ari ngana vuluvuga kibbidan i adulto nga ana mi. Ngem turi ta nakatoli ngana yayya, inamin na nga mepangngo laman i nika-disfellow na. Turi kua, kinagi na gabbalaman nikami nga aru i nagigiammu na ta nesimmu. Kanayun talaga nga fustu i panisiplina ni Jehova.” Niyammung gapa na atawa na nga si Mark: “Kinagi gabbalaman nio na ana mi nga tadday ta rason nu ngatta kayà na i manoli ay megafu ta ariammi yayya talaga vuluvuga kinibbida. Pia ngana laman ta inuffunan nakami ni Jehova nga mattuppal nisa.”

13. Anni i kuammu tapenu maattammammu i taki nga mataga-tageno mu?

¹³ Istoriammu i mataga-tageno mu ta kofummu ira nga makalippawa nikaw. Makikavulu ka ta wawwaragi nga manakam ta espiritual tapenu mapasikadda i nono mu. (Prov. 12:25; 17:17) Kunnaw i kagian ni Joanna nga nakagi ta nappasa ira nga parapo: “Matageno ku nga magitetadday ngà. Ngem dakal nga uffun nio i pakistorià ta kokkofukku nga pattalakkakku.” Ngem kunnasi nu egga i makagi nikaw na wawwaragi nga mas lallagu ammungan na i taki nga mataga-tageno mu?

14. Ngatta “makkapasa-pasensia anna makkapaka-pakoma” ittam nakuan?

¹⁴ Pasensiammu i wawwaragim. Ariammu ekspektan tu kanayun nga mepangngo i mekagi da. (Sant. 3:2) Imperfekto gare ittam ngamin yayya nga ari nga ammu na karuan nu anni i ikagi da anna awayya na gapa tu egga i makagi da nga makataki nikaw ngem ariadda mabba sadya. Nonopammu i tabarang ni apostol Pablo: “Makkapasa-pasensia anna makkapaka-pakoma kamu nu egga i taki na nono nu ta kataggi-tadday nikamu.” (Col. 3:13) Kunnaw i kagian na tadday nga sister nga nadisfellow i ana na: “Egga ira i wawwaragi nga kayà da talaga nakuan i mamagaram, ngem imbes tu kunnari, natakitaddà lallagu. Inuffunan nà ni Jehova nga mapakoma ira.” Anni i meyuffun na kongregasion ta matalo nga wawwaragi nga nadisfellow i kafamilia da?

15. Anni i meyuffuttam ta wawwaragi nga nikanni laman nga nadisfellow i kafamilia da?

¹⁵ Masippo ka nakuan anna kikkofunammu danuri matalo nga miembro na familia. Aminan ni Sister Miriam nga ari yayya nga komfortable nga makistudy kabalin nga nadisfellow i wagi na nga lalaki. “Mavurung ngà ta baka nu anni i makagi na tanakuan ta nesimmu. Ngem aru i mapia nga kokkofukku nga  nakipattageno nio anna ariadda nipasingan nga ikalussoda i nadisfellow nga wagì. Dakal i appabalo ku nira ta matageno ku nga ari laman tu sakan i maraddam.” Kunnaw i kagian na tadday paga nga sister: “Tagga ta nadisfellow i ana mi nga lalaki, binanna-bannayan nakami na minaggiddu ira nga kofummi. Inamin na karuan ta nikami nga ariadda ammu i ikagi da. Egga ira i nakipattangi nio tapus egga gapa ira i nattura nio. Dakal nga uffun i kingngua da ira!”

16. Anni i makua na kongregasion tapenu tulu-tuloy nga masuportadda danuri nadisfellow i kafamilia da?

¹⁶ Ariammu magimmang nga suportan danuri matalo nga miembro na familia. Sangawe i tiempo nga mas kawagadda i pangiddu anna i pamagarammu. (Heb. 10:24, 25) Nu mittan, mapansin na kafamilia na nadisfellowship ira nga ari ngana gapa ira nga kikkibbidan na karuan nga wawwaragi ta kongregasion nga gitta na nadisfellowship gapa ira. Manaki tam nga kunnatun i matageno da! Mas ngana nga kawagan tu komendan anna pagarammattam danuri ána nga nadisfellow i yama onu yena da. Kunnaw i kagian ni Maria nga nadisfellow i atawa na anna pinanawan na ira: “Minay ta balemi i karuan ta kokkofukku tapus nallutu ira para nikami anna nevulu ira ta paf-family worship mi. Nakipattageno ira nio anna nakipattangi gapa. Nidefensa dà nu egga ira i mangistoria meyannung nio tu ari mabba tu kurug. Talaga pinasikadda i nono ku!”—Roma 12:13, 15.

17. Anni i makua na elder ira tapenu banna-bannayan danuri karneru nga maddaraddam?

¹⁷ Para ta elder ira: Kuan nu i adde na mawayya nu tapenu pagaramman danuri matalo nga kafamilia na nadisfellowship. Dakal i responsibilidad nu nga banna-bannayan ira. (1 Tes. 5:14) Ikaguman nu nga kibbidan ira nige anna kabalin na study tapenu pagaramman ira. Pasiaran nu ira ta baleda anna makimallo kamu kavulu da. Mevulu kamu nira ta ministerio anna sinaggi-mittan nga ivulu nu ira ta paf-family worship nu. Kawagan tu tangngallan na elder ira danuri karneru nga maddaraddam. Kawagadda i pangiddu anna pangikallo nu.​—1 Tes. 2:7, 8.

18. Segun ta 2 Pedro 3:9, anni i kayà ni Jehova nga kuan danuri na nadisfellowship?

¹⁸ I Dios nga Jehova ay “arian na nga ikaya tu egga i madaral, ngem ikaya na tu pallikuran na ngamin nga totolay i katagaruliad-da.” (Bibbigan i 2 Pedro 3:9.) Maski nu nakaliwa tu madammo i tadday nga tolay, nabalor lagapa ta Dios i inango na. Daddammammu nga mangina i balor nga nipaga na Dios para nittam—i inango na iddeddu na nga Ana. Megafu ta allo, kayà ni Jehova nga uffunan nga makatoli danuri pinanawadda yayya. Masingan yatun ta istoria ni Jesus meyannung ta ana nga lalaki nga nawawan. (Luc. 15:11-32) Aru ngana i nanoli ta minaggiddu nga Yama da anna kuruga magayayya i wawwaragi nga nangalawa uli nira. Magayayya si Elizabeth tagga ta netoli i ana na. Istorian na: “Talaga mappappabalo ngà ta aru i namagaram nikami nga ariammi mawanan tu iddanama.”

19. Ngatta kanayun nga makapattalo ittam kani Jehova?

¹⁹ Kanayun nga makapattalo ittam kani Jehova. Pammakapianattam i ngamin nga ipakua na. Vuka-palag anna minangngikallo yayya nga Yama. Kuruga iddeddukan na gapa ngamin danuri mangiddu anna maddayaw nisa. Daddamman nu nga ari na kamu vuluvuga pagurayan nu maddaraddam kamu. (Heb. 13:5, 6) Kunnaw i kagian ni Mark: “Ari nakami vuluvuga pinagurayan ni Jehova. Kanayun na ittam nga uffunan nu egga ira i mariga nga problema tam.” Tulu-tuloy nga iyawa nikamu ni Jehova i “ari nga maguku-gukug nga pakapangngua.” (2 Cor. 4:7) Mawayya nu lagapa i mabbalin tu matalo anna ari kamu nakuan vuluvuga mawanan tu iddanama maski nu pinanawan na kafamilia nu si Jehova.