1. Anni i makasta nga kuattam nu mabbako onu mallakay ngana ittam?

NU MABBAKO onu mallakay ngana ittam, baka matageno tam nga awan ngana tu meyuffuttam kumpara tagga ta masikan paga ittam. Maski nu nakkafi ngana ittam, awayya tam lagapa usan i sirib anna ekspiriensa tam tapenu tudduan i mabbing ira nga manguffun ta organisasion ni Jehova anna mangalawa tu bagu ira nga responsibilidad. Kinagi na tadday nga nabayag ngana nga elder: “Limitadu ngana i makuà ta lakay ngà ngana, yari tu mappappabalo ngà megafu ta egga ira i mabbing nga brother nga kualipikadu tapenu manguffun ta organisasion.”

2. Anni i gigiammuattam taw nga artikulo?

² Ginigiammu tam ta nappasa nga artikulo nu anni i mala na mabbing ira nu makikkofun ira ta mannakam. Taw nga artikulo, gigiammuattam nu kunnasi makaduffun ta mannakam i kinapakalinno, pakannammu ta limitasion, pappabalo, anna kinavuka-palag nu makipattrabahu ira ta mabbing ira tapenu mammakapia i interu kongregasion.

3. Segun ta Filipos 2:3, 4, anni i kinapakalinno, anna kunnasi yatun makaduffun ta mannakam?

³ Mawag nga mappakalinno i mannakam nu uffunadda i mabbing ira. Imammatan na mapakalinno nga tolay tu mas atannang i tanakuan anne ta nisa. (Bibbigan i Filipos 2:3, 4.) Ammu na mapakalinno nga mannakam nga ayus laman nu nadduruma i metodo na pangituppal ta tadday nga annungan, basta mekunnay lagapa yatun ta Biblia anna efektibo. Ari da gafu ekspektan nga parigan na tanakuan i pangituppal da ta  annungadda ira gitta na kingngua da ta nappasa. (Ecl. 7:10) Awayya na nga istorian na mannakam ta mabbing ira i ekspiriensa da, ngem daddammadda nakuan nga “i paddia-paddian naw nga mundo ay manguloli.” (1 Cor. 7:31, NW ) Yari tu mawag da nga magadjust ta bagu ira nga metodo ta pagangngua tu ganna-gannug.

4. Kunnasi paparigan na manangngal ira ta sirkito i appana-panono na Levita ira gari?

⁴ Ammu na mapakalinno nga mannakam nga nu mabbako onu mallakay ngana ira, ari da ngana makua i dati nga makua da. Angngarigan na, nonopattam i manangngal ira ta sirkito. Nu magedad ngana ira tu 70, mekiddaw ta nira nga manguli ngana ira tu asayment. Mariga yatun nga kuan megafu ta tagibaloradda i pribilehio nga masserbi ta wawwaragi anna kakayà da nga tulu-tuloy nga kuan yatun nga annungan. Ngem ammu da nga mas makasta nu mabbing ngana laman ira nga brother i magangngua tatun. Ipasa-pasingadda gafu i appana-panono nga gitta na Levita ira ta Israel nga obligadu nga magimmang nga masserbi ta tabernakulo sonu magedad ngana ira tu 50. Ari nga nakadepende i pagayayya natun nga mannakam nga Levita ta pribilehio da. Yayya nga kiningngua da lagapa i ngamin nga mawayya da maski anni nga annungan i neyawa ta nira, anna sigga-paran lagapa ira nga manguffun ta mabbing ira. (Num. 8:25, 26) Kunnatun gapa i manangngal ta sirkito nga magedad tu 70. Maski nu ari ngana ira mabbisita ta aru nga kongregasion, aru  lagapa i meyuffudda ta kongregasion nu sitaw ira nga naka-asayn.

5. Anni i magigiammu tam ta ehemplo ni Dan anni Katie?

⁵ Nonopan i nesimmu kani Dan nga nasserbi bilang manangngal ta sirkito ta unag na 23 nga dagun. Turi ta nagedad ngana yayya tu 70, neyasayn ngana ira na atawa na nga si Katie bilang espesial payunir. Kumusta ngana ira ta bagu nga asayment da? Kinagi ni Dan nga mas busy paga lagu yayya sangawe! Tattangngawan na tu mapia i responsibilidad na ira ta kongregasion, uuffunan na i brother ira tapenu makualipika bilang ministerial nga aripan, anna sanayan na gapa i tanakuan ta pallayyagayya ta siudad anna ta affukutan. Sikamu nga mannakam, maski masserbi kamu ta ngamin nga tiempo onu ari, aru lagapa i moffunan nu. Kunnasi? Magadjust ta bagu nga situasion nu, mannono kamu tu bagu nga goal, anna maffokus kamu ta makua nu, ari tu ta arian nu ngana makua.

6. Anni i efekto na nu ammu na tolay i limitasion na? Iyilustra.

⁶ Ammu na mapakalinno nga tolay i limitasion na ira. (Prov. 11:2) Ammu na nu anni laman i makua na anna ari nga sosobra i ekspektan na ta baggi na. Megafu tatun, magayayya yayya anna kuan na lagapa ngamin i mawayya na. Megitta i tolay nga ammu na i limitasion na ta tadday nga driver. Magadjust yayya nu masingan na ngana nga pa-utung i dalan, yatutta mapprimera yayya onu massegunda. Makafi i karela na ngem maka-abante lagapa yayya anna mattulu-tuloy i biahe na. Kunnatun gapa i tolay nga ammu na i limitasion na. Ammu na nu kanni yayya nga magadjust segun ta situasion na tapenu tulu-tuloy lagapa yayya nga makapasserbi kani Jehova anna makoffun ta tanakuan.​—Fil. 4:5.

7. Kunnasi nga nipasingan ni Barzilai nga ammu na i limitasion na?

⁷ Daddammattam i nesimmu kani Barzilai. Magedad ngana yayya tu 80 turi ta inimbitan yayya ni Patul David nga mevulu anna maddian ta palasio. Megafu ta ammu ni Barzilai nga limitadu ngana laman i makua na gafu ta edad na, ari na nga inalawa i imbitasion na patul anna nirekomenda na lallagu i mas mabbing nga si Chimham. (2 Sam. 19:35-37) Gitta ni Barzilai, magayayya gapa i lakay ira nu iddadda tu chansa i mabbing ira nga brother tapenu makapasserbi.

8. Ngatta makagi tam nga ammu ni Patul David i limitasion na?

⁸ Ammu gapa ni Patul David i limitasion na. Kakayà na nga yayya i mamataddag tu templo. Ngem kinagi ni Jehova nisa nga meyawa yatun nga pribilehio ta mabbing nga si Solomon. Inaksepta na yatun nga desision anna kiningngua na i ngamin nga mawayya na tapenu manguffun ta preparasion para ta pamataddag tu templo. (1 Cro. 17:4; 22:5) Ari na nga ninono nga mas kualipikadu yayya tatun nga pribilehio megafu ta “mabbing anna awan tu ekspiriensa” ni Solomon. (1 Cro. 29:1) Ammu na gare nga mavviktoria i pamataddag tu templo megafu ta bendision ni Jehova, ari tu megafu ta edad onu ekspiriensa danuri na mangirollu. Paparigan gapa sangawe na mannakam si David. Kukukuadda lagapa i adde na mawayya da ta passerbi kani Jehova maski nu nanguli ngana i annungadda. Komfiansa ira nga bendisionan gapa ni Jehova i mabbing ira nga magangngua ta annungan ira nga dati tu ira i magangngua.

9. Kunnasi nga nipasingan na tadday nga miembro na Branch Committee nga ammu na i limitasion na?

⁹ Ta tiempo tam, egga gapa i brother ira nga ammu da i limitasiodda. Tadday tatun si Shigeo. Ta 1976, natunno yayya bilang miembro  na Branch Committee turi ta 30 laman i dagun na. Tapus turi ta 2004, yayya ngana i nabbalin tu coordinator na Branch Committee. Nappasa i piga ragun, matageno na nga nakkafi ngana yayya anna mediu mabayag na ngana nga mabalin i trabahu na kumpara dati. Nanono na nga mas makasta nu mabbing ngana nga brother i magangngua tatun nga annungan yayya nga nipakimallo na yatun. Maski ari ngana tu yayya i coordinator, tulu-tuloy lagapa yayya nga manguffun bilang miembro na Branch Committee. Nagigiammu tam nga minappakalinno da Barzilai, Patul David, anna Brother Shigeo anna ammu da i limitasiodda. Appresian na kuddanatun nga totolay i sikan na mabbing ira nga brother anna ariadda nonopan nga kurang paga i ekspiriensa na mabbing ira. Para ta nira, kaduffun ira ta trabahu, ari tu kakompetensia.​—Prov. 20:29.

10. Anni i matageno na mannakam ta mabbing ira ta kongregasion?

¹⁰ Para ta mannakam, regalu maggafu kani Jehova i mabbing ira. Makkafi ngana gapa ira, yayya nga ipappabalo da i mabbing ira nga kayà da anna mawayya da nga kuan i annungan ira ta kongregasion.

11. Base ta Ruth 4:13-16, ngatta bendision para ta mannakam nu alawatadda i uffun na mabbing ira?

¹¹ Ta Biblia, mabibbig tam i makasta nga ehemplo ni Noemi nga nappabalo ta panguffun nisa na tadday nga mabbing. Turi ta natay ngana i ana na, kinagi na ta manugang na nga si Ruth nga manoli ngana ta familia na. Ngem manaki yayya nga panawan ni Ruth anna vinulu na yayya ta panoli na ta Betlehem. Mappappabalo si Noemi tatun nga panguffun nisa ni Ruth. (Ruth 1:7, 8, 18) Parefu nga nabendisionan yatun nga dua nga  babbay! (Bibbigan i Ruth 4:13-16.) Parigan gafu na mapakalinno nga mannakam yatun nga ehemplo ni Noemi.

12. Anni ira i mangipasingan nga minappabalo si apostol Pablo?

¹² Mappabalo gapa si apostol Pablo ta panguffun nisa na wawwaragi. Angngarigan na, nappabalo yayya ta taga-Filipos ira ta nangituvug ira tu pakawagan na ira. (Fil. 4:16) Nappabalo gapa yayya kani Timoteo ta panguffun na nisa. (Fil. 2:19-22) Nipappabalo gapa ni Pablo ta Dios i wawwaragi nga minay nga namasikan ta nono na turi ta meyangay yayya ta Roma nga mefuku. (King. 28:15) Kurug tu mawayya ni Pablo nga mabbiahe ta ararayyu ira nga lugar tapenu mallayyagayya anna pasikannan i wawwaragi. Ngem mapakalinno lagapa nga inalawa na i panguffun na wawwaragi nisa.

13. Anni ira i makua na mannakam tapenu ipasingan nga mappabalo ira ta mabbing ira?

¹³ Aru i makua nu nga mannakam tapenu ipasingan nga mappabalo kamu ta mabbing ira ta kongregasion. Mappabalo kamu nakuan nira anna alawatan nu i panguffudda nikamu tapenu makangay kamu nu sitaw i kayà nu angngayan, magatang ira i mawag nu, onu karuan paga nga gannug. Danatun i mangipasingan nga iddeddu nakamu ni Jehova. Awayya na paga nga mabbalin tu madukko nga kofun nu danuri mabbing nga manguffun nikamu. Kanayun nga ikaguman nu nga uffunan ira tapenu mapprogreso ta espiritual anna ikagi nu nira nga magayayya kamu ta egga ira i mabbing nga kayà da paga i mas masserbi ta kongregasion. Istorian nu gapa nira i nesimmu ira ta pattolenu. Danatun i makua nu tapenu ipasingan nga ‘mabbala-balo kamu nga kanayun’ kani Jehova megafu ta mabbing ira ta kongregasion.​—Col. 3:15; Juan 6:44; 1 Tes. 5:18.

14. Ngatta makagi tam nga minangngiyawa si Patul David?

¹⁴ Makagigiammu gapa i mannakam ta pabbalin ni Patul David tu minangngiyawa. Daka-dakal i donasion na nga kuartu anna materiales para ta pamataddag tu templo. (1 Cro. 22:11-16; 29:3, 4) Kingngua na lagapa yatun maski nu magalan tu templo ni Solomon i mepataddag. Nu ariattam ngana nga makapabboluntariu ta pamataddag ta proyekto ira na organisasion megafu ta makafi ngana ittam, awayya tam lagapa i maddona segun ta pakawayya tam. Makoffun gapa ta mabbing ira nu ibillay tam nira i nagigiammu tam ira ta konstruksion.

15. Anni ira i nibillay ni Pablo kani Timoteo?

¹⁵ Minangngiyawa gapa si apostol Pablo. Inagalan na si Timoteo nga vulutan na yayya ta pammisionero na anna nibillena nisa i istilo na nga mallayyagayya anna manuddu. (King. 16:1-3) Sinanay ni Pablo si Timoteo tapenu mabbalin tu malalaki nga mallayyagayya anna manuddu. (1 Cor. 4:17) Yatun gapa ira nga istilo ni Pablo i nituddu ni Timoteo ta tanakuan.

16. Ngatta sinanay ni Brother Shigeo i tanakuan?

¹⁶ Ari gapa nga nonopan na mannakam sangawe nga awan ngana saw tu sesserbi da nu sanayadda i mabbing ira nga brother nga kuan i annungan ira ta kongregasion. Kunnatun si Brother Shigeo. Sinanay na i mas mabbing ira nga miembro na Branch Committee tapenu makoffun ta trabahu na Pappatulan ta nasiodda. Megafu tatun, egga i brother nga nasanay tu mapia nga puede nga manali nisa bilang coordinator turi ta makafi ngana yayya. Maturu ngana tu 45 dagun nga massesserbi si Shigeo bilang miembro na Branch Committee. Adde sangawe, ibibbillena lagapa i ekspiriensa na  ira ta mabbing ira nga brother. Talaga bendision ta totolay na Dios danuri kagitta ni Shigeo!

17. Anni ira i awayya na nga iyawa na mannakam ta tanakuan base ta prinsipio ta Lucas 6:38?

¹⁷ Pinakurug nu nga mannakam nga nabayag ngana ta kinakurug nga kakastan i matalo nga passerbi kani Jehova. Masingan ta makasta ira nga ehemplo nu nga pammakapianammi nu ammuan anna iyaplika mi i prinsipio ira na Biblia. Megafu ta naekspiriensa nu ira, nagigiammu nu nu kunnasi nga kuan i ganna-gannug ngem magadjust kamu gapa ta manguloli ira nga sirkumstansia. Maski nu nikanni laman gapa nga nabawtisowan i karuan nikamu, egga lagapa i mebillay nu ta mabbing ira. Puede nu nga istorian nira nu ngatta magayayya kamu maski nu bako onu lakay kamu ngana turi ta nakannammuan nu si Jehova. Magenjoy ira nga magginna ta ekspiriensa nu ira anna ta nagigiammu nu ira tatun. Nu kanayun nga “mangiyawa kamu” gukaban na pangibillay nu ta ekspiriensa nu ira, bendisionan nakamu ni Jehova.​—Bibbigan i Lucas 6:38.

18. Anni i meyuffun na mannakam anna na mabbing ira ta kataggi-tadday?

¹⁸ Nu makikkofukkamu nga mannakam ta mabbing ira, parefu nga mapasikakkamu. (Roma 1:12) Egga i meyuffun nu ta kataggi-tadday. Meyusa na mannakam i sirib anna i ekspiriensa da tapus meyusa gapa na mabbing ira i sikadda. Nu mabbalin tu makkofun i mannakam anna i mabbing ira anna makka-uffun ira, medayoda si Jehova anna mammakapia i interu kongregasion!