1-2. Anni nga payyayyag i niprofesiya ni Hageo nga mesimmu ta kaggawattam?

NALLUNIG tu masiki-sikan ta Nepal turi ta 2015. Kunnaw i kagian na karuan nga naka-ekspiriensa tatun: “Paspas nga nakkaradabba i pallakuan ira anna i dana ira nga building.” “Naggurulu i ngamin nga totolay . . . Dua minuto kanu laman i payyayyag, ngem para ta nio, kebbayag yatun.” Nu egga i kunnatun nga kappaganassing nga mesimmu nikaw, siguradu nga ariammu nga makattaman yatun.

² Sangawe, maka-ekspiriensa ittam gapa tu tanakuan nga klase na payyayyag megafu ta ari laman tu tadday nga siudad onu nasion i mayayyag. Yayyaggan ni Jehova i ngamin nga nasion anna piga ragun ngana nga kukukuan na yatun. Niprofesiya ni profeta Hageo i meyannung tatun. Kinagi na: “Yaw i kagian ni Jehova na armada ira, ‘Ngem mittan paga—ari nga mabbayag—yayyaggakku noka i langi, i davvun, i bebay, anna i mamaga nga davvun.’”—Hag. 2:6.

3. Anni i nadduman na payyayyag nga niprofesiya ni Hageo ta payyayyag megafu ta lunig?

³ Puru kadaral i resulta na payyayyag megafu ta lunig. Ngem egga ira i makasta nga resulta na payyayyag nga niprofesiya ni Hageo. Kunnaw i kagian ni Jehova nittam: “Yayyaggakku noka i ngamin nga nasion, ay tullung i nabalor nga ganna-gannug na ngamin nga nasion. Pannuakku noka tu dayaw yaw nga balay.” (Hag. 2:7) Anni i efekto natun nga profesiya turi ira ta nattolay ta tiempo ni Hageo? Anni gapa i efekto natun ta nittam? Tabbagattam danatun anna ammuattam nu kunnasi ittam nga makipartisipa ta payyayyag ta nasa-nasion sangawe.

4. Ngatta zinog ni Jehova si profeta Hageo?

⁴ Turi ta 537 B.C.E., nanoli ta Jerusalem i Judio ira nga naaripan ta Babilonia. Awayya na nga tadday tatun si Hageo. Paddattal natun ira nga matalo nga maddayarayaw kani Jehova ta Jerusalem, pinegafuanadda nga ipataddag i balay ni Jehova onu i templo. (Ezra 3:8, 10) Ngem ari nabbayag, egga i marake nga nesimmu. Megafu ta pameppersigi, nakkafi i nono da anna niyemmadda i pamataddag. (Ezra 4:4; Hag. 1:1, 2) Yayya nga turi ta 520 B.C.E., zinog ni Jehova si Hageo tapenu pasikannan i nono na Judio ira anna pagaramman ira nga balinan i templo. *—Ezra 6:14, 15.

5. Ngatta makapagaram i mensahe ni Hageo ta Judio ira?

⁵ Gakkag na mensahe ni Hageo nga pasikannan i pangurug na Judio ira kani Jehova. Kunnaw i magutu nga kinagi na profeta ta Judio ira nga nakkafi i nono da: “‘Pasikannan nu i nono nu, sikamu ngamin nga totolay na davvun,’ kinagi ni Jehova, ‘anna mattrabahu kamu. Ta kavulu nù,’ kunni Jehova na armada ira.” (Hag. 2:4) Siguradu nga makapasikan i uvovug nga “Jehova na armada ira.” Kayà kagian natun nga egga i autoridad ni Jehova ta daka-dakal nga armada na anghel ira yari tu mawag nga mattalo i Judio ira nisa tapenu mavviktoria i pamataddag da.

6. Anni i efekto na payyayyag nga niprofesiya ni profeta Hageo?

⁶ Nadog si Hageo nga ikagi ta Judio ira nga yayyaggan ni Jehova i ngamin nga nasion. Siniguradu natun nga profesiya ta Judio ira nga nakkafi i nono da nga yayyaggan ni Jehova i Persia, i pinakamakapangngua nga nasion tatun nga tiempo. Anni i efekto natun nga payyayyag? Ollu, mabalin na totolay na Dios i pamataddag uli ta templo. Tapus makavulu da gapa danuri ari nga Judio ta paddayaw kani Jehova tatun nga templo. Kuruga makapagaram yatun nga mensahe para ta totolay na Dios!—Zac. 8:9.

7. Anni nga trabahu nga payyayyag i kukukuattam sangawe? Ipakanawag.

⁷ Anni gapa i efekto nittam na profesiya ni Hageo? Ta tiempo tam, yayyayyaggan mangana ni Jehova i ngamin nga nasion anna egga i parte tam tatun nga payyayyag. Nonopan yaw: Tagga ta 1914, sinunno ni Jehova si Jesu-Cristo bilang Patul na Pappatulan ta langi. (Sal. 2:6) Marake nga dumug ta lider ira na nasa-nasion i kepataddag natun nga Pappatulan. Kayà gare kagian natun nga nabalin ngana i “natunno nga tiempo na nasa-nasion” onu i tiempo nga awan tu natunno nga mammaguray nga mangirepresenta kani Jehova. (Luc. 21:24, NW ) Megafu tatun, namegafu ta 1919, mas ngana nga nilayyagayya na totolay na Dios nga i Pappatulan laman i solusion ta problema na totolay. Niyayyag natun nga pangilayyagayya ta ‘mapia nga dumug na Pammaguray na Dios’ i interu mundo.​—Mat. 24:14.

8. Segun ta Salmo 2:1-3, anni i efekto na mapia nga dumug ta magaru nga nasion?

⁸ Anni i efekto na mapia nga dumug ta totolay? Aru i mammanaki tatun. (Bibbigan i Salmo 2:1-3.) Marrebelde i nasiodda ira anna pammanakitadda i pinili ni Jehova tu Patul. Ari da imammatan tu ‘mapia nga dumug’ i mensahe na Pappatulan nga ilayyagayya tam. Nigamma paga lagu na karuan nga nasion i  pallayyagayya! Kakkagian na aru nga mammaguray tatun ira nga nasion nga massesserbi ira ta Dios, ngem manaki da mabba nga mappasakup ta pammagurena. Yari tu kokkontradda i Sinullo ni Jehova gukaban na pangatake da ta matalo ira nga aripan na, gitta na kiningngua na mammaguray ira ta kaggawan ni Jesus.​—King. 4:25-28.

9. Anni i kuan ni Jehova megafu ta marake nga kukukuan na nasion ira?

⁹ Anni i kuan ni Jehova megafu ta marake nga kukukuan na nasion ira? Kagian na Salmo 2:10-12: “Sikamu nga patul, magginna kamu anna mappalak-kamu; sikamu nga mammaguray, gigiammuan nu yaw nga tuddu: Masserbi kamu nga sigga-assing ta YAFU; mammakakua kamu sa anna mamippig kamu, ta nu ari, mabi nga mabatù yaya ay gavva laman nga matay kamu ngana. Mapalag danuri i umay nga makiyegu sa.” Megafu ta masippo si Jehova, iddan na tu chansa i kumokkontra ira tapenu manguli anna suportan i Pappatulan na. Ngem baddi ngana laman i nabattang tu tiempo anna mattolay ittam ngana ta “pangurianan ira nga aggaw” naw nga mundo. (2 Tim. 3:1; Isa. 61:2) Yaw ngana gafu i kapianan nga tiempo tapenu mammuan na totolay i kinakurug anna passerbian si Jehova.

10. Segun ta Hageo 2:7-9, anni i makasta nga efekto na payyayyag?

¹⁰ Makasta i efekto na payyayyag nga niprofesiya ni Hageo ta karuan nga totolay. Kinagi na nittam nga megafu tatun, dayawan na “nabalor nga ganna-gannug [totolay nga mapia i giffutuadda] na ngamin nga nasion” si Jehova. * (Bibbigan i Hageo 2:7-9.) Niprofesiya gapa ni Isaias anni Mikias nga kunnatun i mesimmu ta “pangurianan nga aggaggaw.”​—Isa. 2:2-4, ftn.; Mik. 4:1, 2, ftn.

11. Anni i efekto na mensahe na Pappatulan ta tadday nga brother turi ta ollu nga naginna na yatun?

¹¹ Innattam i efekto natun nga payyayyag ta brother nga si Ken nga massesserbi ngana sangawe ta world headquarters. Ma-40 dagun  ngana i nappasa turi ta ollu nga naginna na i mensahe na Pappatulan. Kunnaw i niyistoria na: “Ta ollu nga naginnà i kinakurug nga naggafu ta Biblia, magayayya ngà megafu ta nakannammuakku nga mattolay ngana ittam ta pangurianan nga aggaggaw na mundo. Nalippawa ku nga tapenu mala ku i fabor na Dios anna mattolay ngà tu mannanayun, mawag nga siguraduakku nga ari ngà nga parte naw nga mundo anna suportakku si Jehova. Yari tu nakimallo ngà kani Jehova tapus niyemmakku i passuporta ta mundo anna nakiyegu ngà insigida ta Pappatulan na Dios nga ari vuluvuga mayayyag.”

12. Kunnasi nga napannu tu dayaw i espiritual nga templo ni Jehova ta pangurianan ira nga aggaw?

¹² Masingattam nga bebbendisionan ni Jehova i totolena. Ta pangurianan nga aggaggaw, umara-aru i massesserbi ta nisa. Rinivu ittam laman turi ta 1914. Ngem sangawe, maturu ngana tu walu nga million i aktibo nga maddayarayaw ta Dios, anna minillion paga i makikavulu nittam kada ragun ta passelebra ta Memorial. Anni i efekto natun ta espiritual nga templo ni Jehova onu i unnug na para ta marenu nga paddayaw? Napannu i neravvunan nga parte natun nga templo tu “nabalor nga ganna-gannug na ngamin nga nasion.” Medayaw gapa i ngagan ni Jehova megafu ta inuli da i kata-katoleda.​—Efe. 4:22-24.

13. Anni paga ira nga profesiya i netuppal megafu ta minaru i “nabalor nga ganna-gannug”? (Innan i letratu ta vungun.)

¹³ Megafu ta minaru i “nabalor nga ganna-gannug” nga maddayaw kani Jehova, natuppal gapa i tanakuan paga ira nga profesiya, gitta na nakagi ta Isaias kapitulo 60. Kunnaw i mabibbig ta versikulo 22: “I baddi ay mabbalin tu tanga-rivu anna i pilippiga ay mabbalin tu makapangngua nga nasion. Sakan mismu, si Jehova, i mamalistu tatun ta mismu nga tiempo na.” Nadduruma i abilidad danatun nga “nabalor nga ganna-gannug” anna sigga-paran ira nga ilayyagayya i ‘mapia nga dumug na Pammaguray na Dios.’ Megafu tatun, meyusa na totolay ni Jehova danatun nga abilidad nga inagalan ni Isaias nga “gatto na nasa-nasion.” (Isa. 60:5, 16) Megafu ta uffun naw nga nabalor nga lallaki anna babbay, melayyagayya ngana i mapia nga dumug ta 240 nga  nasion anna mepublisa gapa i literatura tam ta maturu tu 1,000 nga lengguahe.

14. Anni nga desision i mawag tu kuan ngana sangawe na totolay?

¹⁴ Megafu ta payyayyag ta nasa-nasion, egga i desision nga mawag tu kuan na ngamin nga totolay. Suportadda kari i Pappatulan na Dios onu i gobiernu na totolay? Tuttuttulan na totolay ni Jehova i dorob na nasion nga paddianadda ngem neutral ira ta pulitika. (Roma 13:1-7) Kumbinsidu ira nga i Pappatulan laman na Dios i solusion ta ngamin nga problema na totolay. Ari tu parte na mundo yatun nga Pappatulan.​—Juan 18:36, 37.

15. Segun ta libru na Nepakannammu, kunnasi nga mapurueban i kinamatalo na totolay na Dios?

¹⁵ Mabibbig tam ta libru na Nepakannammu nga mapurueban i kinamatalo na totolay na Dios ta pangurianan nga aggaw. Megafu tatun, meparubang ittam ta grabe nga kapeppersigi. Fersan na gobiernu ira naw nga mundo nga dayawattam ira anna persigiadda danuri mammanaki nga massuporta nira. (Nep. 13:12, 15) ‘Fersadda noka nga markan ta ziwanan nga lima onu ta frente ngamin nga totolay: alinno onu atannang i kekwentadda, riku onu pobre, aripan onu ari nga aripan.’ (Nep. 13:16) Ta ollu nga tiempo, mamarkan tu permanente i aripan ira tapenu masingan nu sinni i makakkukua nira. Ekspektan gapa na gobiernu ira ta tiempo tam nga simboliko nga mamarkan ta lima onu ta frente i ngamin nga totolay. Kayà da gare nga ipasingan na kada tolay ta appana-panono anna ta kukukuan na nga suportan na i gobiernu na totolay.

16. Ngatta yaw ngana i tiempo nga ipasingattam nga matalo ittam kani Jehova?

¹⁶ Akseptattam kari noka yatun nga simboliko nga marka anna suportattam kari i gobiernu na totolay? Mazziga anna mappeligro yari ira mammanaki ta marka. Niprofesiya na libru na Nepakannammu nga “awan tu tolay nga makapallaku onu makagatang nu awan sa yaw nga marka.” (Nep. 13:17) Ngem ammu na totolay na Dios nu anni i kuan ni Jehova tari ira ta nappamarka. Mabibbig yatun ta Nepakannammu 14:9, 10. Imbes tu mappamarka ira, gitta na itura da lallagu yaw ta lima da: “Kukua nà ni Jehova.” (Isa. 44:5) Yaw ngana gafu i tiempo tapenu siguraduattam nga matalo ittam kani Jehova. Nu kunnatun i kuattam, magayayya gapa si Jehova nga kagian nga kukua na ittam!

17. Anni i mawag nga daddammattam meyannung ta pasensia ni Jehova?

¹⁷ Apapaddu i pasensia ni Jehova mas ngana sangawe ta pangurianan ira nga aggaw. Ari na gare kayà nga egga i madaral. (2 Ped. 3:9) Niddan na i ngamin tu chansa nga mabbabawi anna masserbi ta nisa. Ngem egga lagapa i pagaddetan na pasensia na. Maekspiriensa noka na mammanaki ira tatun nga chansa i nesimmu kani Faraon ta kaggawan ni Moises. Kinagi ni Jehova kani Faraon: “Awayyà nakuan nga usan i pakapangnguà tapenu maddog nikaw anna ta totolem tu kappatay nga taki, anna napawakka ngana nakuan ta davvun. Ngem pinattalupaddiattaka nga matolay taw nga rason: tapenu mepasingakku nikaw i pakapangnguà anna mepakannammù i ngagakku ta interu davvun.” (Ex. 9:15, 16) Makannammuan noka na ngamin nga nasion nga si Jehova laman i kurug nga Dios. (Eze. 38:23) Kunnasi nga mesimmu yatun?

18. (a) Anni nga tanakuan nga klase na payyayyag i tinukoy na Hageo 2:6, 20-22? (b) Ngatta makagi tam nga egga paga i ketuppalan na ta mappange na kinagi ira ni Hageo?

¹⁸ Aru nga dagun kabalin na patay ni Hageo, nitura ni apostol Pablo ta Hebreo ira nga egga  noka i ketuppalan na ta mappange na Hageo 2:6, 20-22. (Bibbigan.) Nitura ni Pablo: “Sangoye, nitabba na, ‘Yayyaggak-ku tu mittan paga, ari laman i davvun nu ari i langi gapa.’ I uvovug nga ‘mittan paga’ ay ipasingan na ta manawag tu mayayyag anna mari danuri i naparo nga ganna-gannug, tapenu mabattang i ganna-gannug nga ari mayayyag.” (Heb. 12:26, 27) Tanakuan yaw nga payyayyag ta payyayyag nga nakagi ta Hageo 2:7. Marresulta gare yaw ta mannanayun nga kadaral danuri na mammanaki nga mangalawa ta kepangngattan ni Jehova nga mammaguray gitta ni Faraon gari.

19. Anni noka i ari nga mayayyag, anna ngatta makagi tam yatun?

¹⁹ Anni i ari nga mayayyag onu mari? Kunnaw i kinagi ni Pablo: “Mabbala-balo ittam gafu, ta alawatat-tam i pappatulan nga ari nga mayayyag. Mabbala-balo ittam ta Dios anna maddaya-rayaw ittam sa ta makemmemmi nga paddaya-rayaw nga vulunan na pammakakua anna assing.” (Heb. 12:28) Kabalin gafu noka na ultimu nga payyayyag, i Pappatulan na Dios ngana laman i mabattang. Ari vuluvuga nga madaral yatun!—Sal. 110:5, 6; Dan. 2:44.

20. Anni nakuan i pilian na totolay, anna kunnasi tam ira nga moffunan nga pilian yatun?

²⁰ Baddi ngana laman nga tiempo i nabattang tapenu makapili i totolay! Nu piliadda nga tulu-tuloy nga suportan yaw nga mundo, madaral ira noka. Nu piliadda gapa nga passerbian si Jehova anna ulian i pattoleda tapenu makua i urena, mattolay noka ira tu mannanayun. (Heb. 12:25) Makoffun i pallayyagayya tam ta totolay tapenu makua da yatun nga importante nga desision. Mas aru paga nakuan nga nabala-balor nga tolay i uffunattam tapenu piliadda nga suportan i Pappatulan na Dios. Daddammattam nakuan gapa yaw nga kinagi na Yafu tam nga si Jesus: “Melayya-gayya noka ta tanga-ravvunan yaw nga Mapia nga Dumug na Pammaguray na Dios tapenu kannammuan na ngamin nga sinolay. Ta kabalin naw, duttal ngana i panuppalan.”​—Mat. 24:14.