Ta gafu na dekada 1940, nappa-Bible study i magana ku ira ta Saksi ira ni Jehova. Nagimmang ira nga nagistudy ngem kanayun lagapa nga makalawa i yenà tu kopia na magazina ira nga Passifusifutan anna Malukag! Tapus turi ta 1950, nagatende kami na familià ta internasional nga kombension ta New York City.

Ari nga nabbayag, nabbisi-bisita ngana si Brother Lawrence Jeffries ta nikami. Talaga kakayà nà nga uffunan. Ngem ta gafu na, kokkontrakku i pabbalin tu neutral na Saksi ira ni Jehova ta pulitika anna i ari da nga passuddalu. Kakkagiakku nga nu manaki na ngamin na tolay ta America i makiggerra, masakup saw i buu nga nasion nu egga i kalaban. Ngem mapasensia si Brother Jeffries. Kinagi na nio: “Nu ngamin nga tolay ta America ay massesserbi kani Jehova nga Dios, anni tamma i kuan na nu egga i kalaban nga mangatake ta nira?” Gafu tatun nga niyavu na anna ta karuan paga nga kinagi na, nanono ku nga mali i parrasa-rasokku. Megafu tatun, mas naginteres ngà ta Biblia.

Binibbibbig ku i dana ira nga isyu na Passifusifutan anna na Malukag! nga nitatagu na yenà ta balemi. Ari ku nataga-tageno nga giggigiammuakku ngana balo i kinakurug. Yatutta nappa-Bible study ngà balaman kani Brother Jeffries. Kanayun ngà ngana gapa nga makistudy. Kakayà ku i magiggigiammù tapus nappa-unbaptized publisher ngà ngana gapa. Nanguli ira i goal ku turi ta nalippawa ku nga “aranni ngana i dakal nga aggaw ni Jehova.” (Zef. 1:14) Imbes tu mak-college ngà, kayà ku ngana nga uffunan i tanakuan tapenu makannammuadda i kinakurug ta Biblia.

Naggradua ngà ta haiskul turi ta Hunio 13, 1956. Tapus tallu aggaw i nappasa, nappa-baptize ngà ta circuit assembly. Ari ku inekspekta nga napakaru nga bendision i malawa ku ta pangusà ta pattolè tapenu  maggigiammu anna manuddu meyannung kani Jehova.

Annam nga vulan kabalin na nikabawtisò, nar-regular pioneer ngà. Tapus ta Disiembre 1956 nga Kingdom Ministry, nabibbig ku i artikulo nga “Can You Serve Where the Need Is Great?” Nanono ku nga puedè nga kuan yatun. Kayà ku nga manuffun ta lugar ira nga baddi laman i mangilayyagayya ta mapia nga dumug.​—Mat. 24:14.

Nagali ngà ta Edgefield, South Carolina. Appa laman i publisher ta kongregasion tari. Bali, sakan i mekalima. Magistudy kami ta sala na balay na tadday nga brother. Kada vulan, mallayyagayya ngà tu 100 nga oras. Busy ngà gafu ta sakan i mangirollu ta field service tapus mappalappa ngà paga ta kongregasion. Napansikku nga turi ta mas aru i kukukuakku ta kongregasion, minaru gapa i nagigiammù meyannung kani Jehova.

Bible studỳ i tadday nga babay. Kukua na i tadday nga funeraria ta bario na Johnston nga piga laman nga kilometro i karayyu na ta Edgefield. Niddan nà natun nga babay tu kakawagakku nga part-time nga trabahu, tapus nipeyusa na paga i tadday nga baddi nga building na tapenu mabbalin tu Kingdom Hall mi.

Maggafu ta Brooklyn, New York, nagali nikami si Brother Jolly Jeffries. Ana yayya nari na brother nga nangistudy niakan. Yayya i partner ku ta pappayunir ku. Naddiakkami ta baddi nga trailer nga nipekkaw na tadday nga brother nikami.

Balabaddi laman i sueldu ta South Carolina. Massueldu kami tu dua onu tallu nga dolyar para ta tangaggaw nga pattrabahu mi. Mittan, nofu ku ngana i nababbattang tu pilippiga nga barya gafu ta naggatang ngà tu makan ta grocery. Ta pallawakku, minaranni niakan i tadday nga lalaki, tapus niyavu na: “Kayà mu i mattrabahu? Pagattaka tu tanga-dolyar kada oras.” Niddan nà natun nga lalaki tu tallu nga aggaw tapenu pakarenuan i tadday nga construction site. Ammù tu uuffunan nà ni Jehova tapenu maddian ngà lagapa ta Edgefield. Ta 1958, maski nu baddi laman i kuartù, naka-atende ngà ta internasional nga kombension ta New York City.

Ta mekadua nga aggaw na kombension, egga i nesimmu nga ari ku vuluvuga makattaman. Nakilalà si Ruby Wadlington. Regular pioneer yayya ta Gallatin, Tennessee. Gafu ta kayà mi parefu i mammisionero, nagatende kami ta miting para ta Gilead tatun nga kombension. Ari nabbayag, nakkatutura kami. Tapus nembitan ngà nga map-public talk ta Gallatin. Inapprobetchà yatun nga chansa tapenu map-propose kani Ruby. Tapus nagali ngà ta kongregasion ni Ruby, anna nakkasal kami turi ta 1959.

Turi ta 23 anios ngà, natunno ngà bilang congregation servant (magalan ngana sangawe tu coordinator na baggi na elder ira) ta Gallatin. I kongregasiommi i ollollu nga binisita na circuit overseer nga si Charles Thompson. Ekspiriensadu yayya nga brother. Ngem niyavu na lapa nio nu anni ira i mawag na wawwaragi anna nu kunnasi nga inasikasu yatun na tanakuan ira nga circuit overseer. Nagigiammù  ta nisa nga mas makasta nu makkiavu labbi tapus ammuan i ngamin nga detalye nige nga magangngua tu desision.

Turi ta Mayo 1964, nembitan ngà nga maggigiammu tu tanga-vulan ta Kingdom Ministry School ta South Lansing, New York. Megafu ta brother ira nga nanuddu nikami tatun nga eskuela, mas kayà ku paga nga mas mammammu si Jehova anna mas mammanakam ta espiritual.

Turi ta Enero 1965, nembitan ngà ta circuit work tapus mabbisita ngà ta kongregasion ira kavulu si Ruby. Daka-dakal i ollu nga sirkito nga neyasayn ta nikami. Mamegafu yatun ta Knoxville, Tennessee tapus maggi magadde yatun ta Richmond, Virginia. Nelagum tatun i kongregasion ira ta North Carolina, Kentucky, anna West Virginia. Binisità laman i kongregasion ira na ngisi nga wawwaragi. Tatun gare nga tiempo, megamma ta southern United States i pavvulu na ngisi anna furaw ta study. Mariga i pattolay na wawwaragi, yatutta kayà mi nga ibillay turi ira ta makawag i egga ta nikami. Kunnaw i importante nga nituddu niakan na tadday nga nabayag ngana nga circuit overseer: “Mabbalikka tu wagi ta nira. Nu mabbisita ka ta kongregasion, kammu ipatageno nga gitta na sikaw i boss da. Moffunammu laman ira nu imammataddaka bilang wagi da.”

Ta pinabbisita mi ta tadday nga baddi nga kongregasion, nakapegafu si Ruby tu Bible study ta kabataan nga babay nga egga i ana na nga babay nga magedad tu tanga-ragun. Turi ta awan tu makapattuloy tatun nga pab-Bible study tari ta kongregasion, nituloy lagapa yatun ni Ruby gukaban na tura. Ta tumunug nga pinabbisita mi, regular ngana nga makistudy yatun nga babay. Tapus turi ta egga i nagali nga dua nga special pioneer tatun nga kongregasion, nituloy da yari i Bible study adde ta nabawtisowan yari i babay. Nappasa i 30 nga dagun turi ta 1995, egga i nappakilala nga sister ta Patterson Bethel kani Ruby. Yayya balo i ana nga babay nari na Bible study ni Ruby. Naggradua ta meka-100 nga klase na Gilead School yatun nga sister anna i atawa na.

Ta central Florida i mekadua nga sirkito nga binisita mi. Tatun nga tiempo, mawag i takay yari tu naggatakkami, yari mappo laman. Ngem ta ollu pagalaman nga ligguan, egga ngana daral na makina na. Awan ngana tu kuartu mi nga pappaayus. Nappoffun ngà ta tadday nga brother nga ammù tu makoffun nikami. Nipaayus natun nga brother i takay mi ta tadday tu trabahador na. Tapus ari yayya mappapaga. Kinagi na laman ta nikami, “Awan, okay ngana yari.” Nangiyawa paga lagu yayya tu kuartu ta nikami! Makakkasta yatun nga pamakurug nga tattangngallan ni Jehova i massesserbi ira nisa. Niperaddam gapa natun ta nikami tu mawag nga vuka-palag kami ta tanakuan.

Nu mabbisita kami ta kongregasion, maddiakkami ta balay na wawwaragi. Megafu tatun, aru i nabbalin tu madukko nga kofummi. Mittan, egga i mawag tu balinakku nga report meyannung ta kongregasion. Ngem nibattakku labbi yatun tari ta typewriter ku. Ta panolì ta gabi na, nasingakku nga nabalin ngana i report ku. Ta balay gare nga naddianammi, egga i abbing nga tallu i dagun na. Kokkomforme i pinippindut na tari ta typewriter ku. Yari tu nabalin yari i report ku. Piga dagun nga inasa-asar ku yayya megafu tatun nga kingngua na.

Turi ta 1971, nakalawa ngà tu tadday nga tura. Nagavvatakkami tatun, gare meyasayn ngà kanu bilang district overseer ta New York City! Turi ta nagali kami ngana tari, 34 pagalaman i dagukku. Maski nu sakan i ollollu nga ngisi nga district overseer da, talaga inalawa nà tu mapia na wawwaragi.

Gafu ta pinabbalikku tu district overseer, na-enjoy ku i panuddu meyannung kani Jehova ta circuit assembly kada weekend. Aru ta circuit overseer ira i mas nga ekspiriensadu kumpara niakan. Tadday paga lagu nira i nappalappa turi ta nappa-baptize ngà. Tapus yari gapa tadday, si Brother Theodore Jaracz ay nabbalin tu miembro na Manangngal nga Baggi. Aru gapa i ekspiriensadu nga brother nga massesserbi ta Brooklyn Bethel. Talaga ipappabalo ku yatun ira nga circuit overseer anna Bethelite ira, megafu ta ari ngà narigatan nga makipattrabahu ta nira. Nasingakku mismu nga mattalo ta Uvovug na Dios yatun ira nga minaggiddu nga pastor anna matalo da nga suportan i organisasion. Gafu gapa ta kinapakalinno da, nabbalin tu mas mabi para niakan nga masserbi bilang district overseer.

Turi ta 1974, nangi-asayn i Manangngal nga Baggi tu tadday paga nga grupo na circuit overseer ira nga masserbi ta district work. Sakan gapa, neyasayn ngà uli bilang circuit overseer, ngem ta South Carolina labbi gapa. Mapia na laman ta tatun nga tiempo, puede ngana nga mavvulu i furaw anna i ngisi. Talaga nagayayya i wawwaragi megafu tatun.

Ta ultimu na 1976, neyasayn ngà ta tadday nga sirkito ta Georgia nga egga ta nattangngan na Atlanta anna Columbus. Meraddammakku paga turi ta nappalappa ngà ta tarag na lima nga ngisi nga abbarabbing nga natay gafu ta egga ira i nanuggi ta baleda. Nehospital i yena da gafu ta na-injure yayya. Napakaru nga Saksi ira ni Jehova nga ngisi anna furaw i minay ta hospital tapenu banna-bannayan yatun nga magana. Nasingakku nga talaga nerumu-ruma i pangaya na wawwaragi. Talaga makoffun i kunnatun nga pangikallo nga nipasingadda ta massesserbi ira ta Dios tapenu maattammadda i pinakamariga ira nga situasion.

Turi ta 1977, nekiddaw nikami nga maddiakkami tu piga nga vulan ta Brooklyn Bethel tapenu manguffun ta tadday tu project. Turi ta aranni ngana nga mabalin yatun, kinibbida nà na dua nga miembro na Manangngal nga Baggi tapus niyavu da nu kayà mi ni Ruby nga permanente ngana nga masserbi ta Bethel. Inalawa mi yatun.

Nattrabahu ngà ta Service Department ta 24 nga dagun. Tatun nga department, manguffun i wawwaragi tapenu matabbag i mariga ira nga pakkiavu. Ta pappasa na daga-ragun, nangiyawa i Manangngal nga Baggi tu giya nga nebase ta prinsipio ira na Biblia. Yatun i meyusu-usa nga basehan ta panabbag tatun ira nga pakkiavu anna yatun gapa i meyusu-usa ta passanay ta circuit overseer ira, elder ira, anna payunir ira. Gafu tatun nga training material, aru i noffunan nga mapprogreso ta espiritual. Yatun gapa i mas nga namalladda ta organisasion ni Jehova.

Namegafu turi 1995 adde ta 2018, nabbisita kami ta nadduruma nga branch office megafu ta tadday ngà nga headquarters representative nga dati nga magalan tu zone overseer. Kibbidakku i Branch Committee ira, Bethelite, anna misionero tapenu pagaramman ira anna uffunan ira ta maski anni nga problema da. Ngem maski sikami ni Ruby kanayukkami nga mapaga-pagaram ta ekspiriensa ira nga istoriadda nikami. Angngarigan na, nabbisita kami ta Rwanda turi ta 2000. Talaga napagaram kami turi ta nakannammuammi i nappasa-pasan na wawwaragi anna na familia na Bethel ta pangufu ta lahi onu genocide turi ta 1994. Aru i natayan tu iddeddukan. Ngem maski kunnatun i nappasa-pasan na wawwaragi, nipasingadda lagapa i pangurug da, nagiddanama lagapa ira, anna nagayayya ira.

Maturu tu 80 ngana i dagummi sangawe. Ta nappasa nga 20 nga dagun, nasserbi ngà bilang miembro na United States Branch Committee. Ari ngà vuluvuga nak-college, ngem nalawa ku i kapianan nga edukasion nga maggafu kani Jehova anna ta organisasion na. Yatun i nanguffun niakan tapenu metuddù ta tanakuan i kinakurug ira ta Biblia nga kanayun nga pammakapianadda. (2 Cor. 3:5; 2 Tim. 2:2) Nasingakku nu kunnasi nga inuffunan na mensahe na Biblia i totolay tapenu makkasta i pattoleda anna tapenu mapeggan ira tu relasion ta Namaratu ta nira. (Sant. 4:8) Kada egga i chansa mi, pagarammammi lagapa ni Ruby i wawwaragi nga appresian i kadakallan nga pribilehio da bilang massesserbi kani Jehova—i pribilehio nga magigiammu i meyannung kani Jehova anna ituddu ta tanakuan i kinakurug ira ta Biblia!