1. Segun ta Malakias 3:16, anni nga libru i itutura ni Jehova, anna anni i netura tatun?

 TA UNAG na rinivu ngana nga dagun, mangitutura si Jehova tu tadday nga espesial nga libru. Netura tatun nga libru i lista na ngaga-ngagan namegafu paga ta ngagan na ollu nga matalo nga saksi nga si Abel. * (Luc. 11:50, 51) Namegafu gari, aru ngana nga ngagan i niyammung ni Jehova tatun nga libru anna sangawe, minillion ngana nga ngagan i netura tatun. Ta Biblia, nagalan yatun nga libru tu “libru nga panaddamman” onu “libru na matolay.” Taw nga artikulo, usattam i “libru na matolay.”​—Bibbigan i Malakias 3:16; Nep. 3:5; 17:8.

2. Makangngagan ta netura ta libru na matolay, anna anni i kuattam tapenu metura i ngagattam tatun nga libru?

² Netura taw nga espesial nga libru i ngaga-ngagan na ngamin nga maddayaw kani Jehova megafu ta anassing anna pangikakua da ta nisa anna danuri i mattagibalor ta ngagan na. Egga i chansa da nga mattolay noka tu mannanayun. Sangawe, puede nga metura i ngagattam tatun nga libru nu madukko anna personal i relasiottam kani Jehova base ta sakrifisio nga tavvu na Ana na nga si Jesu-Cristo. (Juan 3:16, 36) Kayà tam ngamin nga metura nakuan i ngagattam tatun nga libru, iddanamattam man nga mattolay noka ta langi onu taw ta davvun.

3-4. (a) Siguradu kari nga mattolay ittam ngana noka tu mannanayun nu netura ngana sangawe i ngagattam ta libru na matolay? Ipakanawag. (b) Anni ira nga pakkiavu i tabbagattam taw nga artikulo anna ta tumunug paga?

³ Kayà kari kagian naw nga ngamin danuri netura i ngagadda tatun nga libru ay siguradu ngana nga mattolay noka tu mannanayun?  Mammuattam i tabbag nu intindiattam i kinagi ni Jehova kani Moises ta Exodo 32:33. Kinagi ni Jehova: “I sinni laman nga nakaliwa nio, vurrakku yayya ta librù.” Puede gafu nga mavurran onu malsa paga i ngaga-ngagan danuri netura sangawe tatun nga libru. Gitta na lapis pagalaman i pinattura ni Jehova ta ngaga-ngagan ta libru. (Nep. 3:5) Siguraduattam nakuan gafu nga ari nga malsa i ngagattam tatun nga libru adde sonu permanente ngana nga gitta na metura yatun ta bolpen.

⁴ Siempre, egga ira i pakkiavu nga palattuagan natun. Angngarigan na, anni i kagian na Biblia meyannung turi ira ta netura i ngagadda ta libru na matolay kunne na gapa turi ira ta ari nga netura i ngagadda tatun? Sonu anni nga mattolay tu mannanayun danuri netura i ngagadda tatun nga libru? Kunnasi gapa danuri natay nga awan vuluvuga tu chansa da nga makannammuan si Jehova? Posible kari nga metura gapa i ngaga-ngagadda tatun nga libru? Matabbag danatun taw nga artikulo anna ta tumunug paga.

SINNI IRA I NETURA I NGAGADDA TA LIBRU?

5-6. (a) Base ta Filipos 4:3, sinni danuri netura i ngagadda ta libru na matolay? (b) Sonu anni nga metura tu permanente i ngaga-ngagadda ta libru na matolay?

⁵ Sinni ira i netura i ngagadda taw nga simboliko nga libru? Tapenu matabbag yatun, ikonsidera tam i lima nga madduruma nga grupo na totolay. Karuan tatun nga grupo ay netura i ngagadda ta libru na matolay, karuan gapa ay ari.

⁶ I ollu nga grupo ay danuri napili nga makipammaguray noka kani Jesus ta langi. Netura kari ngana sangawe i ngaga-ngagadda ta libru na matolay? Wan. Segun ta kinagi ni apostol Pablo ta “kakavvulu” na ira ta Filipos, netura ngana sangawe ta libru na matolay i ngaga-ngagan danuri na nazelugan nga nembitan nga makipammaguray noka kani Jesus. (Bibbigan  i Filipos 4:3.) Ngem tapenu ari nga malsa i ngaga-ngagadda tatun nga simboliko nga libru, mawag nga mattalupaddian ira nga matalo. Tapus sonu malawa da ngana i ultimu nga kaselyo da, nige da man nga matay onu nige nga mamegafu i dakal nga ziga, metura ngana tu permanente i ngaga-ngagadda tatun nga libru.​—Nep. 7:3.

7. Nu alippawatattam i Nepakannammu 7:16, 17, sonu anni nga permanente nga metura ta libru na matolay i ngaga-ngagan danuri na dakal nga ammung na tanakuan nga karneru?

⁷ I mekadua nga grupo ay danuri dakal nga ammung na tanakuan nga karneru. Netura ngana kari sangawe i ngaga-ngagadda ta libru na matolay? Wan. Agga-tura lagapa kari noka ta libru na matolay i ngaga-ngagadda kabalin nga mepaliag ira sonu Armagedon? Wan. (Nep. 7:14) Kinagi ni Jesus nga “umay ta katolayan nga awan tu adde na” danatun nga megitta ta karneru. (Mat. 25:46) Ngem ari tu insigida nga makalawa tu mannanayun nga inango danuri mepaliag ta Armagedon. Gitta na netura pagalaman gare ta lapis i ngagadda ta libru na matolay. Durante na Tanga-rivu Dagun nga Pammaguray ni Jesus, ‘irolluan na noka ira bilang pastor da ta latua nga mangiyawa ta inango.’ Permanente ngana noka nga metura ta libru na matolay i ngaga-ngagan danuri mattuttul ta pangigiya ni Cristo anna masentensian nga matalo kani Jehova.​—Bibbigan i Nepakannammu 7:16, 17.

8. Sinni ira i ari nga metura ta libru na matolay, anna anni i mesimmu ta nira?

⁸ I mekatallu nga grupo ay danuri kazzing nga madaral sonu Armagedon. Ari nga metura i ngagadda ta libru na matolay. Kinagi ni Jesus nga “mannanayun noka [ira] nga madaral.” (Mat. 25:46, NW ) Base ta nitura ni Pablo nga mabibbig ta Uvovug na Dios, nammuattam nga ‘sentensian noka ira na Yafu anna kastigowan na ira tu mannanayun nga kadaral.’ (2 Tes. 1:9, NW; 2 Ped. 2:9) Kunnatun gapa i mesimmu tari ira ta sinadya da i makaliwa kontra ta masanto nga espiritu. Ari ira nga mattolay tu mannanayun megafu ta madaral ira tu mannanayun. Ari gafu ira nga mapaginnolay noka. (Mat. 12:32; Mar. 3:28, 29; Heb. 6:4-6) Maffokus ittam ngana ta dua nga grupo na totolay nga mapaginnolay noka ta davvun.

DANURI MAPAGINNOLAY

9. Base ta Kingngua 24:15, anni i dua nga grupo na totolay nga mapaginnolay noka ta davvun, anna anni i nadduman natun nga grupo?

⁹ Mabibbig ta Biblia nga egga i dua nga grupo na totolay nga mapaginnolay noka anna egga chansa da nga mattolay tu mannanayun ta davvun—i “matunung” anna i “ari matunung.” (Bibbigan i Kingngua 24:15, NW.) I “matunung” ay danuri matalo nga nasserbi kani Jehova ta katoleda. I “ari matunung” gapa ay danuri ari nga nasserbi kani Jehova nige na pateda. I kurug, magaru ta nira ay ari nga matunung ta pagimamma ni Jehova megafu ta ari ira nattolay segun ta matunung nga estandarte na. Gafu ta parehu nga mapaginnolay yatun nga grupo, kayà kari kagian natun nga netura ngana ta libru na matolay i ngaga-ngagadda? Sinaggi-taddayattam nga ikonsidera i kada grupo tapenu matabbag yatun.

10. Ngatta mapaginnolay noka danuri “matunung,” anna anni nga pribilehio i meyawa ta karuan ta nira? (Innan gapa taw nga isyu i “Pakkiavu na Mabbibbig Ira” meyannung ta paginnolay ta davvun.)

¹⁰ I “matunung” i meka-appa nga grupo. Nige da nga natay, netura i ngagadda ta libru na matolay. Nalsa kari i ngagadda tatun nga libru turi ta natay ira? Ari, megafu ta ‘sigga-matolay’ ira ta memoria ni Jehova. Si Jehova “ay Dios na matolay, ari tu Dios na natay, ta ngamin ay matolay ta pagimamma na Dios.” (Luc. 20:38) Kayà kagian naw nga sonu mapaginnolay ta davvun danuri matunung, nakatura lagapa ta  libru na matolay i ngaga-ngagadda, maski nu gitta na “netura ta lapis” pagalaman yatun. (Luc. 14:14) Karuan tatun ira nga mapaginnolay ay makalawa noka tu pribilehio nga masserbi bilang “mammaguray ta tanga-ravvunan.”​—Sal. 45:16.

11. Anni noka i mawag nga gigiammuan nari ira na “ari matunung” nige nga metura i ngaga-ngagadda ta libru na matolay?

¹¹ I mekalima gapa nga grupo ay danuri “ari matunung.” Ari tu matunung i pinattoleda nige na pateda megafu ta awayya na tu ari da nga nammuan i ikikkiddaw ira ni Jehova. Yayya nga ari nga netura i ngaga-ngagadda ta libru na matolay. Ngem sonu paginnolayan ira na Dios, iddan na noka ira tu chansa nga metura i ngagadda tatun nga libru. Napakaru noka nga uffun i kawagan danatun nga “ari matunung.” Ta katoleda gare, karuan ta nira ay kitaddake ira i kinikkingngua da. Mawag gafu nga matudduan noka ira nu kunnasi i mattolay segun ta matunung ira nga estandarte ni Jehova. Tapenu metuddu ta nira yatun, igiya noka na Pappatulan na Dios i kadakallan nga trabahu na pangituddu nga makua taw ta davvun.

12. (a) Sinni noka i manuddu turi ira ta ari matunung? (b) Anni noka i mesimmu turi ira ta mammanaki nga iyaplika i magigiammu da?

¹² Sinni noka i manuddu turi ira ta ari matunung? Danuri kasali ta dakal nga ammung anna danuri napaginnolay nga matunung. Tapenu metura gafu noka i ngaga-ngagan danuri na ari nga matunung ta libru na matolay, mawag nga mapeggan ira tu relasion kani Jehova anna idedika da i gibbaggiadda ta nisa. Obserban noka tu mapia ni Jesu-Cristo anna na kakavvulu na ira nga nazelugan i papprogreso na ngamin nga ari matunung. (Nep. 20:4) I maski sinni noka nga mammanaki nga mangiyaplika ta magiggigiammu na ay mapawan—maski paga nu 100 ngana i dagun na. (Isa. 65:20) Megafu ta mabibbig ni Jehova anna ni Jesus i mayan na futu, siguraduadda noka nga awan tu maski sinni i mapamavulunan nga mamanggulu ta napabagu nga mundo.​—Isa. 11:9; 60:18; 65:25; Juan 2:25.

 MAGINNOLAY TAPENU MATTOLAY ANNA MAGINNOLAY TAPENU MAKASTIGO

13-14. (a) Ta nappasa, anni i pakalippawa tam ta kinagi ni Jesus ta Juan 5:29? (b) Anni i mawag tu sifutattam tatun ira nga kinagi na?

¹³ Kinagi gapa ni Jesus i meyannung turi ira ta maginnolay tapenu mattolay taw ta davvun. Angngarigan na, kinagi na: “Duttal noka i aggaw nga ngamin i natay ira ay maginna da i ngaral na, anna mallalawan ira ta livud-da. Ngamin i nangngua tu mapia ta katolay da ay maginnolay anna mattolay adde ta ngangangay. Danuri i marakay i kikkingngua da ay maginnolay gapa tapenu makastigo ira.” (Juan 5:28, 29) Anni i kayà kagian ni Jesus?

¹⁴ Ta nappasa, i pakalippawa tam ta kinagi ni Jesus ay tumukoy tari ira ta annangngua na napaginnolay ira nga kuadda pagalaman kabalin na paginnoleda. Abbo tam nga i karuan ta nira ay maginnolay anna mangngua tu mapia nga ganna-gannug tapus i karuan gapa ay maginnolay anna mangngua tu marake nga ganna-gannug. Ngem sifutammu nga ari nga kinagi ni Jesus nga mangngua noka tu mapia nga ganna-gannug onu mangngua noka tu marake nga ganna-gannug danuri kalalawan laman ta livudda. I kinagi na ay danuri “nangngua tu mapia” onu danuri “marakay i kikkingngua da.” Past tense i inusa na. Sakto laman gapa yatun, ari kari? Awan mabba gare tu mapamavulunan noka nga mangngua tu marake nga ganna-gannug ta napabagu nga mundo. Danatun gafu nga marake nga kinikkingngua na ari nga matunung ay nakua da nige na pateda. Kunnasi tam gafu nga alippawatan i kinagi ni Jesus nga ‘maginnolay tapenu mattolay’ anna ‘maginnolay tapenu makastigo’?

15. Sinni noka danuri ‘maginnolay tapenu mattolay,’ anna ngatta?

¹⁵ Danuri matunung nga nangngua tu mapia nga ganna-gannug nige na pateda ay ‘maginnolay tapenu mattolay’ megafu ta dati ngana nga netura i ngaga-ngagadda ta libru na matolay. Kayà kagian naw nga i paginnolay danuri na “nangngua tu mapia ta katolay da” nga mabibbig ta Juan 5:29 ay parehu laman ta paginnolay danuri na “matunung” nga mabibbig ta Kingngua 24:15. Mekunnay yatun nga pakalippawa ta nakagi ta Roma 6:7: “Nu matay i tolay, mapalubbangan yaya ta pakawayya na katagarulian.” Turi ta natay danatun nga matunung, naabsuelto ngana ira ta liwi-liwa da. Ngem ari nga napawan i rekord na kinamatalo da. (Heb. 6:10) Siempre, mawag nga mattalupaddian nga matalo danatun nga napaginnolay nga matunung tapenu ari nga mavurran i ngagadda ta libru na matolay.

16. Anni i kayà kagian na ‘maginnolay tapenu makastigo’?

¹⁶ Kunnasi gapa danuri marakay i kikkingngua da nige da nga natay? Kurug tu naabsuelto ngana i liwi-liwa da ta pateda, ngem ari ira nga nakangngua tu rekord na kinamatalo. Ari nga netura i ngaga-ngagadda ta libru na matolay. Nu kunnuri gafu, i paginnolay “danuri i marakay i kikkingngua da” ay parehu laman ta paginnolay danuri na “ari matunung” nga mabibbig ta Kingngua 24:15. Ira danuri i ‘maginnolay tapenu makastigo.’ * Anni i kayà kagian na makastigo danuri ari nga matunung? Kebalinan natun nga sifutan noka ira tu mapia ni Jesus. (Luc. 22:30) Mapappasa labbi noka i tiempo nige na nga sentensian ira nu mepangngo kari nga metura i ngaga-ngagadda ta libru na matolay. Saka laman saw nga itura ni Jehova i ngaga-ngagan danuri  na ari nga matunung ta libru na matolay nu panakitadda ngana i dati nga marake nga pinattoleda anna idedika da i baggi da ta nisa.

17-18. Anni noka i mawag nga kuan na ngamin nga mapaginnolay ta davvun, anna ta anni nga tumukoy i “kikkingngua” nga mabibbig ta Nepakannammu 20:12, 13?

¹⁷ Mawag tu tuppalan noka na ngamin nga mapaginnolay i dorob nga mabibbig ta bagu ira nga libru nga mavullag noka durante na 1,000 nga dagun, dati man ira nga matunung onu ari nga matunung. Kunnaw i nasirmata ni apostol Juan: “Nasingak-ku paga nga agga-taddag ta arubang na trono ngamin danuri i natay ngana, nga atannang anna alinno i paddia-paddiad-da. Ay navullag i libru ira anna navullag gapa i tadday paga nga libru—i libru na matolay. Nasentensian i natay ira segun ta kikkingngua da nga netura ta libru ira.”​—Nep. 20:12, 13.

¹⁸ Ta anni ira nga “kikkingngua” nga nebase i kasentensia danuri noka na mapaginnolay? Danuri kari kikkingngua da nige da nga natay? Ari! Daddamman nga turi ta natay ira, absuelto ngana ira ta dati nga liwi-liwa da. Ari gafu nga tumukoy danatun nga “kikkingngua da” tari ira ta annangngua da nige da nga natay, nu ari, tari ta kikkingngua da megafu ta pangiyaplika da ta nagigiammu da sonu napabagu nga mundo. Maski lagu danuri matalo nga lallaki kagitta da Noe, Samuel, David, anna Daniel ay mawag nga magigiammu da i meyannung kani Jesu-Cristo anna ipasingadda i pangurug ta sakrifisio na. Yammanno ngana gafu danuri ari nga matunung!

19. Anni noka i mesimmu turi ira ta panakitadda yaw nga makakkasta nga chansa?

¹⁹ Anni noka i mesimmu turi ira ta panakitadda yaw nga makakkasta nga chansa? Kagian ta nittam na Nepakannammu 20:15: “I sinni laman nga ari nga netura i ngagan na ta libru na matolay, ay metabbo ta weg na afi.” Kayà kagian natun nga madaral noka ira tu mannanayun. Siguraduattam nakuan gafu nga netura i ngagattam ta libru na matolay anna ari nakuan vuluvuga nga mavurran yatun!

20. Anni noka i kappagayayya nga trabahu nga makua durante na Tanga-rivu Dagun nga Pammaguray? (Innan i letratu ta vungun.)

²⁰ Fugurammu noka nu kunnasi ka-ayayya i tiempo na Tanga-rivu Dagun nga Pammaguray! Tatun noka nga mesimmu i kadakallan nga trabahu na panuddu taw ta davvun. Yatun gapa noka i tiempo nu kanni nga maobserba tu mapia anna masentensian i kondukta parehu na matunung anna na ari nga matunung. (Isa. 26:9; King. 17:31) Kunnasi noka nga makua yatun nga trabahu nga panuddu? Duffunan ittam na tumunug nga artikulo tapenu malippawa anna maappresia yaw nga kappabbaw nga probision.