ARI KUNNA KARUAN. Nikumpara na tadday nga doktor i pangusa tu Biblia para ta giya ta pangusa tu 1920’s nga libru para ta pattuddu tu chemistry. Baka iyavu paga lagu na tadday nga ari mangurug ta Biblia, “Usammu kari i manual na dana nga computer ta bagu nga computer?” Kayàna kagian, ikonsidera na karuan nga laus ngana i Biblia.

Ngatta usan paga laman na tadday i kunnatun nga dadana nga giya ta moderno anna high-tech nga mundo? Tutal, kitakkaru nga website anna blog ira i tulu-tuloy nga mangiyawa tu bagu ira nga informasion anna giya. Magiraw ta programa ira ta TV i tabarang na eksperto ira nga psychologist, lifestyle guru, anna autor ira. Melaku gapa ta bookstore ira i aru nga libru nga manguffun ta problema ira ta pattolay, tadday nga multibillion-dollar nga negosio.

Megafu ta available ngana i pinakabagu ira nga informasion, ngatta mappegiya paga laman ta Biblia​—libru nga nakumpleto ma-2,000 dagun ngana i nappasa? Ari kari tu fustu danuri ari mangurug ta Biblia ta pakkagi nga i pangusa taw ay gittana pangusa tu dadana nga libru ta chemistry onu computer manual? I kurug, mali i kunnatun nga parrason. Paspas nga manguli i siensia anna teknolohia, ngem nanguli kari i kawagan na totolay? Adde sangawe, ala-alegan lagapa na totolay i gakkag na pattolay kunne na gapa i kapeggan tu pagayayya anna seguridad, memammo nga familia, anna mapia nga kokkofun.

Maski nu dana ngana, malegan ta Biblia danatun nga pakawagan anna aru paga. Kinagina nga naggafu yaw ta Namaratu nittam. Igiyana ittam ta kada aspeto na pattolay anna uffunanna ittam ta problema ira. (2 Timoteo 3:16, 17) Mannanayun paga i tabarangna​—ari vuluvuga nga mappasa! Kagian mismu na Biblia: “I uvovug na Dios ay matotolay.”​—Hebreo 4:12.

Kurug kari danaw nga kinagi na Biblia? Laus ngana kari yaw, onu yaw talaga i pinakapraktikal nga libru​—kakuruganna, matotolay nga libru? Gakkag naw nga edision na Passifusifutan, i ollu ta serye na espesial ira nga isyu, nga matabbag danaw nga pakkiavu.