NONOPAN YAW: Nappasiar ka ta tadday nga museo nga napannu tu dana ira nga monumento. Nabakka-bakka, nadaral, anna nadabba ngana i aru taw. Ari ngana tu buu i karuan. Ngem egga tadday nga buu paga; masingi-singan paga i kasta na ngamin nga diseniona. Niyavu mu ta tour guide, “Mas bagu kari yaw?” “Ari,” kunna, “mas dana yaw anne ta aru taw, anna ari paga vuluvuga napakappian.” “Inimmuguradda kari yaw?” kummu. “Ari,” kunna tour guide, “nappasan naw i pinakamasikan nga paddag anna urang. Aru paga lagu i namurueba nga manaral taw.” Baka manono mu, ‘Kunnasi tamma yaw napadday?’

Negitta i Biblia tatun nga makakkasta nga monumento. Dadana yaw nga libru​—mas dana anne ta aru. Siempre egga gapa tanakuan nga dana ira nga libru. Ngem gittana nadabba ira nga dana nga monumento, aru ta dana ira nga libru i nadaral ngana ta pappasa na tiempo. Angngariganna, i kinagida meyannung ta siensia ay mekontra ngana ta bagu anna nadiskubre ira nga kinakurug. Imbes tu makoffun, peligroso ngana i rekomendasiodda ta medikal. Pirasu ngana laman i nabattang ta aru ta dana ira nga libru; nawawan onu nadaral i karuan nga parte danaw.

Ngem nerumu-ruma i Biblia. Namegafu nga netura yaw maturu 35 nga siglo i nappasa, ngem buu lagapa. Maski pinuruebadda nga daralan yaw ta aru nga siglo​—natuggi, negamma, anna natagibaddi—​nattalupaddian lagapa i naddianna. Ari yaw nallaus maski aru ngana i bagu nga pakannammu, anna aru nga informasion i mas nappollu paga netura ta Biblia.​—Innan i kahon nga “Laus onu Nappollu Paga?”

Baka manono mu, ‘Talaga kari praktikal i tuttuddu na Biblia ta moderno nga tiempo tam?’ Tapenu matabbag, iyavu mu ta baggim: ‘Anni ira i pinakagrabe nga problema na totolay sangawe? Anni ira i pinakakananassing taw?’ Posible nga manono mu i gerra, polusion, krimen, onu korapsion. Ikonsidera tam i karuan nga prinsipio ta Biblia. Kabalinna, iyavu mu ta baggim, ‘Nu iyaplika na totolay danaw, mas makasta kari i paddia-paddian ta mundo?’

PANGAYA TA IMAMMO

“Mapalag danuri mangirattal ta imammo, ta ibilang ira na Dios tu ána na!” (Mateo 5:9) “Kuan nu ngamin i adde na awayya nu nga makillivu-livu ta memammo ta ngamin nga totolay.”​—Roma 12:18.

PANGIKALLO, PAMAKOMA

“Mapalag danuri minaggallallo, ta ikallo gapa ira na Dios!” (Mateo 5:7) “Itulu-tuloynu nga pasensian i kataggi-tadday anna sigga-paran nga pakoman i kataggi-tadday maski nu egga rason na tadday nga marreklamo kontra ta tanakuan. Nu kunnasi nga sigga-paran nga pinakoma nakamu ni Jehova, * kunnari gapa nakuan i kuannu.”​—Colosas 3:13, NW.

PATTARADDAY MASKI NADDURUMA I LAHI

“Tadday laman nga tolay i pinaratu [na Dios] nga naggafuan na ngamin nga rasa na totolay, anna pinaddian na ira ta madduma-ruma nga lugar ta utun na davvun.” (Kingngua 17:26) “I Dios ay arian na nga padduma-ruman i pangikakua na ta totolay. Ta alawatan na i sinni laman nga matunung anna minakkimoray sa, maski nu anni nga rasa i naggafuan na.”​—Kingngua 10:34, 35.

PANANGNGAL TA DAVVUN

“Ina ni Jehova nga Dios i tolay anna nipena yaya ta hardin na Eden tapenu kusetchan anna tangngallanna yatun.” (Genesis 2:15) Irattal noka na Dios i “panaral ta totolay nga namarattal toye ta utun na davvun ta panara-daral!”​—Nepakannammu 11:18.

PANGIKALUSSAW TA PAKKAKKAM ANNA IMORALIDAD

“Magimmugug kamu ta pakkelug [onu pakkakkam] nu ta anni laman nga gannug. Ta ari tu i karu na kukua ira i paggukuran ta kurug nga pattolay.” (Lucas 12:15) “Megafu ta totolay nakamu na Dios, ari nga mepangngo tu egga i ke-uvovugan nu nga marakay meyannung ta paggannug [onu seksual nga imoralidad], maritta nga attolay, onu pakkelug.”​—Efeso 5:3.

KINAMAPAMMAKATALAKKAN, KINALAPPO

“Karagatammi nga mattolay nga mapammakatalakkan ta ngamin nga ganna-gannug.” (Hebreo 13:18, NW) “Yuri i minakkoko ay mawag tu ari ngana nga makkoko. Mattrabahu lallagu.”—Efeso 4:28.

IMPORTANSIA NA PANGUFFUN TA MAKAWAG

“Pasikannan nu i nono na makafi i nono da. Uffunan nu i makafi anna pasa-pasensian nu ira ngamin.” (1 Tesalonica 5:14) ‘Uffunan i ulila tuange ta balu ira nga babbay ta tiempo na pazziga-riga da.’​—Santiago 1:27.

Ari laman basta nakagi ta Biblia danatun nga prinsipio. Ituttudduna paga nu kunnasi tam tagibaloran anna iyaplika danaw ta inaggaw nga pattoletam. Nu aru nga totolay i mangiyaplika ta nakagi ira nga tuttuddu, ari kari tu dakal i meyuffunna ta  pinakagrabe ira nga problema na totolay? Talaga praktikal anna sakto ta tiempo i prinsipio ira na Biblia! Anni gafu i meyuffun nikaw sangawe na tuttuddu na Biblia?

Kinagi na pinakamasirib nga tolay gari: “Mapakurug tu hustu i ka-uto na Dios gafu ta resulta na nga masingan.” (Mateo 11:19) Ari ka kari umanugu? Masingan i ka-uto onu sirib ta resultana ira nu iyaplikam yatun. Awayyam irason: ‘Nu talaga praktikal i Biblia, ari kari tu masingan nakuan i resulta naw ta pattolè? Kunnasi yaw makoffun ta problemà ira sangawe?’ Innan i tadday nga angngarigan.

Okupadu, makakontento, anna magayayya i pattolay ni Delphine. * Ngem gavva nga natturunug i trahedia nga naekspiriensana. Natay i tinedyer nga anana nga babay. Nassina ira na atawana. Namroblema yaya ta kuartu. Kinagina: “Ariakku ngana ammu nu sinni ngà​—awan tu ana ku, awan tu atawà, awan tu balè. Awan tu sesserbì​—ariakku ammu i baggì, awan tu sikakku, awan tu gakkag na pattolè.”

Talaga napakurug ni Delphine danaw nga uvovug: “Pitu-fulu nga dagun i madde mi laman, walu-fulu nu mapia i gawa-gawayyan. Nu kunnuri paga ay ziga anna daddam i parattalad-da; manuppal i attolay  ta mabi laman, ay mapawak-kami ngana.”​—Salmo 90:10.

Dakal i neyuffun na Biblia kani Delphine taw nga mariga nga tiempo. Gittana ipasingan na tallu nga tumunug nga artikulo, aru gapa namakurug nga noffunan ira na Biblia ta pangarubang ta problemada. Nammuadda nga i Biblia ay gitta nari na monumento nga nakagi ta gafu. Ari yaw tu kagitta na aru nga libru nga maddana anna mallaus. Megafu kari ta neruma i nikapadday na Biblia? Talaga kari nga uvovug yaw na Dios​—ari na tolay?​—1 Tesalonica 2:13.

Baka makagim gapa mismu nga ababba i inango anna napannu tu problema i pattolay. Nu kitakkaru i problemam, pakalegammu tu banna-bannay, uffun, anna mapattalakkan nga giya?

Ikonsidera tam i tallu nga gannug nga mapakurug tam nga praktikal i Biblia ta pattoletam. Moffunannaka nga

1. malillitan i problema ira nu posible.

2. maresolba i luttuag ira nga mariga nga situasion.

3. maattamman tu mapia i situasion ira nga ariammu moli.

Ipakanawag na tumunug ira nga artikulo yaw nga tallu nga gannug.