Kunni Rose: “Egga genetic disorder ku nga mamazziga niakan. Nalimitan i makuà.” Nu mittan, marigatan yaya nga makapaffokus ta paggigiammuna tu Biblia anna ta paddayarayona. Tadday yatun ta kavurunganna. Ngem dakal i neyuffun sa na kinagi ni Jesus ta Mateo 19:26: “I Dios ay makua na ngamin.” Nammuan ni Rose nga egga paga makuana tapenu maggigiammu. Marigatan yaya mabbibbig nu karuan megafu ta takina, yari tu nagginna ngana laman yaya tu rekording ira na Biblia anna literatura ta Biblia. * “Nu awan danatun,” kunna, “ariakku ammu nu kunnasì mapattalupaddian i espiritualidad ku.”

Nu maraddam si Rose ta arianna ngana makua i dati ira nga makuana, mabanna-bannayan yaya na nakagi ta 2 Corinto 8:12: “Nu alawa i futu nu nga mangiyawa, alawatan na Dios i regalu nu segun ta egga nga meyawa nu, ari tu yuri i awan nikamu.” Nipanono natun kani Rose nga magayayya i Dios megafu ta kukukuanna i adde na mawayyana.

Manono ni Delphine nga nakagi ta gafu: “Kabalin nga natay i 18 anios nga ana ku, natakitan ngà tu fermi anna gittana ariakku ngana kaya i matolay paga. Ari ngana metoli i dati.” Kuruga nabanna-bannayan yaya ta kinagi na salmista ta Dios ta Salmo  94:19: “Nu aru i kavuru-vurungan na nono ku, i pamanna-bannem i mangiyawa ta pagayaya ku.” Kunna, “Nipakimallo ku kani Jehova nga makaleg ngà tu kuakku ira nga makoffun niakan tapenu mabanna-bannayan ngà.”

Pinabbalinna tu okupadu i baggina ta pavvolunteer. Ta pappasa na tiempo, nikumparana i baggina ta krayola na abbing​—meyusa lagapa maski danuri ari ngana tu buu. Gitta natun, maski nu matagenona nga ari yaya buu onu ari kumpleto, ammuna nga makoffun lagapa yaya ta tanakuan. Manonona: “Natageno ku nga nu mangusa ngà tu prinsipio anna tuttuddu ira na Biblia tapenu bannayan i estudiantè ira ta Biblia, yatun i kukukuan ni Jehova tapenu pagayayyatan anna banna-bannayannà.” Egga listana ta karakter ira ta Biblia nga nakaekspiriensa tu sobra nga daddam megafu ta patay. “Ira ngamin ay minaddasal,” kunna. Nammuanna paga nga “makapagattam ka laman nu mabbibbig tu Biblia.”

Egga paga nammuan ni Delphine ta paggigiammu tu Biblia​—i paffokus ta mappange, ari tu ta nappasa. Nabanna-bannayan yaya ta iddanama ta Kingngua 24:15, NW: “Egga noka i paginnolay parehu na matunung anna ari matunung.” Kunnasi kadakal i pattalona nga paginnolayan ni Jehova i anana? Yaw i tabbag ni Delphine: “Masingakku i ana ku ta mappange. Naka-iskediul ngana i passimmumi, nga gittana nakapay ngana ta kalendario ni Jehova. Ma-imagine ku nga makkavulu kami ta hardinmi, manawag yatun ta nono ku gittana turi ta nasingan anna iniddu ku yaya ta nikeyanana.”