Natageno ni Delphine, nga nakagi ta nappasa nga artikulo, nga kakayàna i magillellaw megafu ta problemana ira. Ari igamma na Biblia i paginum tu binarayang, ngem kagianna: “Ari ka makikavulu turi ira ta sossobra minum tu binarayang.” (Proverbio 23:20) Konektadu i pangabuso ta binarayang ta grabe ira nga problema ta gawa-gawayyan, ari makasta nga relasion ta tanakuan, anna minillion nga ari naekspekta nga patay kada ragun. Malillitan nakuan i aru taw nga problema nu sinuttul na totolay i masirib nga tabarang na Biblia.

Sinuttul yatun ni Delphine. Kinagina: “Nalippawa ku nga ari masolba na binarayang i problemà. Niyaplikà i Filipos 4:6, 7, nga kunna: ‘Arian nu nga kavurungan i anni laman nga gannug. Ngem . . . kiddawan nu ta Dios i mawag nu.’ Kada gabi, nu kokkomforme i manono ku anna mavuru-vurung ngà, makimallo ngà kani Jehova. Kagiakku sa i ngamin nga matageno ku, gittana poray, madammo nga panageno, anna pakkadismaya, tapus mappoffun ngà sa nga mabbalin tu positibo. Kommanganna, siguraduakku nga ariakku ngana nonopan danatun nga negatibo nga panageno. Nakoffun niakan yatun nga maffokus ta egga niakan imbes tu ta awan niakan. Dinisidì nga ari ngana minum tu binarayang. Megafu ta nabala-balor i imammo nga nalegakku, manaki ku nga mawawan yatun.”

Tadday i imoralidad ta primeru nga rason na paddaddam anna pazziga-riga. Ngem makoffun nittam i prinsipio ira na Biblia tapenu malillitan i kunnatun ira nga problema gukaban na passolba ta primeru ira nga makagafu tatun​—angngariganna, i paf-flirt onu pagalembong anna pornograpia. “Mabi laman i maf-flirt,” kunna balabbagitolay nga mangngagan tu Samuel. “Nu mittan, maski ariakku kayà i tadday ngem korsunadanà, magenjoy ngà gapa maki-flirt.” Kanayun maakusan nga flirt si Samuel​—maski arianna intension yatun—​yari tu nituloyna ngana laman i maki-flirt. Ngem nakonsensia yaya. “Makapataki yatun,” kunna ngana, “megafu ta mapeggakka tu makasarili ira nga tendensia.”

Nabbibbig si Samuel tu artikulo para ta kabataan ira nga nepublisa ta website nga jw.org. Pinannonopanna i Proverbio 20:11: “Maski i ana [onu, “abbing,” footnote] ay makilala gukaban na annangnguana ira, nu marenu anna fustu i kukukuanna.” Kunnasi yatun nakoffun? Nalippawa ni Samuel nga ari tu marenu onu fustu i paki-flirtna. Kunna ngana: “Nammuakku paga nga i kabataan nga flirt ay mabbalin tu ari makasta nga atawa. Ninonono ku i matageno na mabbalin tu atawà nu masingannà nga maki-flirt ta tanakuan. Yatun tu nalippawa ku nga ari tu makasta i kukukuakku. Ari tu megafu ta mabi yaw kuan ay fustu ngana.” Nanguli si Samuel. Nakoffun paga sa i ari paki-flirt nga malillitan i imoralidad.

Mas mappeligro nga makangngua tu imoral si Antonio: Naadik yaya ta pornograpia. Maski nu idduna i atawana, pakatotolina lagapa nga kuan yatun nga bisiu. Kinagina nga dakal i neyuffun sa na pannonono ta 1 Pedro 5:8. Kunna: “Tangngallan nu i appana-panono nu anna magalerto kamu! Ta i Demonio nga kontra nu ay mallelevu nga kagitta na mangngana-nganangngar nga leon nga magaleg ta kanan na.” Kunni Antonio: “Napannu i pallevu tam tu pornograpiko ira nga letratu, anna posible nga mabattang ta nono danatun. Talaga nakoffun niakan yatun nga teksto nga nonopan i paggafuan danatun nga tentasion. Insigida nonopakku nga naggafu ta Demonio danatun nga pornograpiko nga letratu. Nammuakku nga si Jehova laman i makoffun niakan nga ‘tangngallan i appana-panono ku anna magalerto’ tapenu malabanakku danatun nga tentasion ta nono ku, futù, anna pagatawà.” Nalawà ni Antonio i kawaganna nga uffun, anna neyemmanna gabbalaman i marake nga bisiuna. Yatun i nakoffun sa nga malillitan i mas grabe ira nga mesimmu.

Manawag nga mangiyawa i Biblia tu praktikal ira nga tabarang tapenu malillitan i madammo ira nga problema. Ngem kunnasi i maddaggun ngana anna pakatotoli ira nga problema? Innattam nu kunnasi makoffun i Uvovug na Dios tapenu maresolba i kuddanatun nga mariga nga situasion.