Kunni Rosie, “Kanayun ngà mavuru-vurung anna mas grabe i manono ku nga mesimmu anne ta aktual nga situasion.” Anni ira nga teksto i nakoffun? Tadday i Mateo 6:34: “Arian nu nga kavurungan i mawag nu nonumma; ta egga laman i mekavurung ta kagaggaw. Arian nu ngana nga lannappan i problema nu tatun nga aggaw.” Kagian ni Rosie nga nakoffun sa yatun nga kinagi ni Jesus tapenu arianna ngana mavurung ta posible nga mesimmu ta tumunug nga aggaw. Kunna paga, “Aru ngana i problemà, ariakku ngana lannappan tu pavvuru-vurung ta situasion ira nga ari nesimmu anna baka ari mesimmu.”

Natageno gapa ni Yasmine nga gittana natavvunan yaya na pavvuru-vurunna. “Piga aggaw ngà tumangi ta tanga-ligguan, anna egga ira gabi nga ari ngà makakatrug. Daralan na negatibo nga appana-panono i pattolè.” Anni nga teksto i nakoffun? Kinagina i 1 Pedro 5:7: “Ipammakatalo nu [ta Dios] ngamin i kavurungan nu ta yaya i manangngal nikamu.” Kunni Yasmine: “Ta pappasa na tiempo, kanayun ngà makimallo kani Jehova, anna sinabbagna i pakimallo ku ira. Nallappaw i panageno ku. Manotoli lagapa i negatibo nga appana-panono ku, ngem ammù ngana nu kunnasi yaw arubangan.”

Kagian na malammaginganay nga si Isabella: “Siguru namanà i pangitala-talattan megafu ta kunnatun gapa si papà. Itala-talattakku i importante ira nga gannug tapenu marrelaks onu maggiraw tu TV. Ari tu makasta yaw nga ugali ta mas ma-stress i tadday anna marake i resulta na trabahuna.” Mabibbig ta 2 Timoteo 2:15 i prinsipio nga nakoffun sa, nga kunna: “Kunna tadday nga mattrabahu nga awan tu mepangngo nga ipasiran na, kuam-mu ngamin i adde na awayyam nga makapagayaya ta Dios.” Kunni Isabella, “Manaki ku nga ipasiran ni Jehova i trabahù ta nitala-talattakku.” Dakal i nangulianna.

Kinagi gapa ni Kelsey: “Kuakku laman i project ku nu aranni ngana i deadline-na. Tumangi ngà, ari makakatrug, anna mavuru-vurung. Ari yaw tu makasta niakan.” Noffunan si Kelsey na Proverbio 13:16: “Magguyu i masirib nga tolay segun ta pakannammu, ngem ipasingan na ulapa i kinaulapana.” Niyesplikana i nituddu sa naw nga teksto: “Masirib i pabbalin tu praktikal anna i papplano. Egga ngana ta lamesà i iskediul na kuakku ira, anna makoffun yaw tapenu ammù i pagolluakku anna ari ngà makkuttu-kuttu.”

“Pinanawannà na atawà anna nibattanna niakan i appa nga abbimmi,” kunni Kirsten. Anni nga teksto i nakoffun sa? Kinagi na Proverbio 17:17: “I kurug nga kofun ay mangipasingan tu aya ta ngamin nga tiempo, anna wagi nga meyana ta tiempo na ziga.” Nappoffun si Kirsten ta kaparehuna ira nga masserbi kani Jehova. Anni neyuffudda sa? “Nadduruma i kingnguada para niakan! Egga nangibattang tu grocery anna lappaw ira ta puertami. Namillu nga zinuffunaddakami nga magali tu paddianan. Egga gapa nanguffun niakan nga makaleg tu trabahu. Ariannà pinagurayan na kokkofukku.”

Naekspiriensa gapa ni Delphine, nga nakagi ta gafu, i parraddam. Nanonona kabalin na nesissimmu sa: “Masingi-singakku nga makkaravvulu i tanakuan, ngem magitetadday ngà anna maraddam.” Nakoffun sa i Salmo 68:6: “I maraddam nga magittatadday ay iddan [na Dios] tu balay nga paddianan.” Niyesplikana: “Ammù nga ari laman tu literal nga balay sangawe i kayà kagian naw nga teksto. Nalippawa ku nga iddan ittam na Dios tu espiritual nga balay, paddianan nga memammo anna mangiyawa tu kurug anna meddu nga relasion ta tanakuan ira nga mangaya kani Jehova. Ngem ammù nga mawag ku labbi maddukko kani Jehova tapenu maddukko ngà ta tanakuan. Nakoffun i Salmo 37:4: ‘Aleram-mu i pagayaya mu ta Y_AFU, ay iyawa na nikaw i karagatam-mu.’”

Kinagina: “Nammuakku nga mawag tu mas maddukko ngà tu mapia kani Jehova. Yaya i kapianan nga kofun. Nangilista ngà tu aktibidad ira nga ma-enjoy ku kavulu i tanakuan tapenu mabbalin tu kofukku i mangaya gapa ira kani Jehova. Nagigiammù nga innan i makasta ira nga kualidad na tanakuan, ari i pakkafiadda.”

Siempre, ari lagapa tu perfekto i makkofun ira nga masserbi ta Dios. Meparubang gapa ta problema i Saksi ira ni Jehova gitta na ngamin. Ngem i passanay na Biblia i mamaguyu ta totolay nga uffunan i tanakuan nu posible. Masirib i makikofun ta kunnatun nga totolay. Ngem makoffun kari i prinsipio ira na Biblia ta problema ira nga awan tu solusionna sangawe, gittana grabe nga taki anna daddam megafu ta patay?