Nu ikaya mu nga mammammu i tadday nga tolay, magga iyavu mu labbi nisa, “Anni i ngagammu?” Nu iyavu mu yatun ta Dios, anni tamma i itabbagna?

“Sakan si Jehova. Yatun i ngagakku.”​—Isaias 42:8.

Importante mismu ta Dios i ngaganna. Awan tu nappangagan ta Dios; yayya lagapa i nappili ta ngaganna. Kinagi ni Jehova: “Yaw i ngagakku ta mannanayun, anna ta kunnaw ngà meraddamman ta ngamin nga henerasion.” (Exodo 3:15) Ta Biblia, mas mamikkaru nga limittuag i ngagan na Dios anne ta titulona ira, kagitta na Makapangngua-ta-ngamin, Yama, Yafu, onu Dios, anna mas mamikkaru anne ta maski anni nga personal nga ngagan, kagitta na Abraham, Moises, David, onu Jesus. Uray gapa ni Jehova nga mepakannammu i ngaganna. Kagian na Biblia: “Mammuan nakuan na totolay nga sikaw, nga mangngagan tu Jehova, sikaw laman i Katannangan ta interu nga davvun.”​—Salmo 83:18, NW.

Importante kani Jesus i ngagan na Dios. Ta dasal nga Amami onu Pakimallo na Yafu, sinudduan ni Jesus i tagatuttulna ira nga ipakimemalloda ta Dios: “Marayaw paray i ngagam-mu.” (Mateo 6:9) Nipakimallo mismu ni Jesus ta Dios: “Ama, ipasingam-mu ngana i dayaw na ngagam-mu!” (Juan 12:28) Prayoridad ni Jesus ta pattolena i pangidayaw ta ngagan na Dios, anna megafu taw, kinagina ta pakimallona: “Nipakannammu taka nira anna ariak-ku nga immangan yaw nga kuan.”​—Juan 17:26.

Importante i ngagan na Dios ta mangurug ira sa. Nalippawa na ili na Dios ta nappasa nga konektadu i proteksion anna kapaliagda ta espesial nga ngagan na Dios. “I ngagan ni Jehova ay matuyag nga torre. Tatun nga makkarela i matunung  anna makalawa tu proteksion.” (Proverbio 18:10) “Kada tadday nga magagal ta ngagan ni Jehova ay mepaliag.” (Joel 2:32) Ipasingan na Biblia nga iyammammu na ngagan na Dios danuri massesserbi nisa. “Ta lumakag noka i ngamin nga totolay, kada tadday ta ngagan na diosna, ngem lumakag ittam ta ngagan ni Jehova nga Dios tam ta mannanayun anna awan tu addena.”​—Mikias 4:5; Kingngua 15:14.

Iyammammu na ngagan i Dios. Segun ta aru nga iskolar, i kebalinan na ngagan nga Jehova ay “Mawayyana nga Pabbalinan.” Nipalippawa ni Jehova nga Dios i kebalinan na ngaganna turi ta kinagina kani Moises: “Mabbalin Ngà ta Piliakku nga Pabbalinan.” (Exodo 3:14) Ipasingan gafu nittam na ngagan na Dios nga ari laman yayya nga basta i Namaratu ta ngamin. Ipasingan na ngaganna i abilidadna nga pabbalinan i baggina anna i pinaratuna ira ta anni laman nga kawagan tapenu matuppal i gakkagna. Masingan ta titulo ira na Dios i posision, autoridad, onu pakapangnguana, ngem i ngaganna laman nga Jehova i mangirepresenta nisa mismu anna ta mawayyana nga pabbalinan.

Ipasingan na ngagan na Dios i interesna nittam. Ipasingan na kebalinan na ngagan na Dios i tulu-tuloy nga pangidduna ta pinaratuna ira, kasali ittam ngana. Nilammuyag na Dios i ngaganna megafu ta kayàna nga mammammu tam yayya. Yayya paga lagu i nangiyammammu ta ngaganna nige tam paga manono nga iyavu yatun. Manawag nga kayà na Dios nga imammatattam yayya nga kurug nga Persona nga maranniattam, ari nga misterioso anna ararayyu.​—Salmo 73:28.

Ipasingan na pangusa ta ngagan na Dios i interes tam nisa. Tapenu meyilustra, awayyam ikiddaw ta tadday nga ikaya mu mabbalin tu kofun nga agalan naka ta ngagammu. Anni matageno mu nu ari naka aga-agalan ta ngagammu? Baka madduda ka nu talaga kayàna nga makiddukko nikaw. Kunnatun gapa ta Dios. Kinagi ni Jehova ta totolay i ngaganna, anna ipagaramna nga usattam yatun. Nu kuattam yatun, mepasingattam kani Jehova nga kayà tam makiddukko nisa. Ammuna paga lagu “danuri monag nga mannonono [onu, “mattagibalor,” footnote] ta ngaganna”!​—Malakias 3:16.

I pangammu ta ngagan na Dios i ollu nga importante nga dakkua tapenu mammammu yayya. Ngem ari laman tu yatun. Mawag tu ammuattam i Persona nga makangngagan tatun. Mawag nga gigiammuattam i kualidadna ira.