Nu ikaya mu nga mammammu tu mapia i tadday nga tolay, makoffun nu ammum i nakuana ira anna i kapurueba ira nga nappasanna. Kunnatun gapa ta Dios, nu ikaya mu nga mammammu yayya tu mapia, ammuammu i nakuana ira. Durante nga kuammu yatun, baka masorpresa ka nga mammuan nga pammakapianattam sangawe anna ta mappange i kingnguana ira.

Si Jehova nga Dios i Kadakallan nga Namaratu, anna i ari masingan nga kualidadna ira ay “manawag i kasingad-da ta ganna-gannug ira nga pinaro na.” (Roma 1:20) “Yayya i Namadday ta davvun gukaban na pakapangnguana, i Tadday nga namataddag ta mavunga nga davvun gukaban na siribna anna i nangisonna ta langa-langi gukaban na pakalippawana.” (Jeremias 10:12) Ipasingan paga na makapabbaw ira nga naparatu i interes na Dios nittam.

Ikonsidera nu kunnasi ittam nga kingngua ni Jehova tu kuruga espesial gukaban na pamaratu nittam ‘ta imahena.’ (Genesis 1:27) Kayàna kagian, pinabbalinna tu posible nga mepasingattam i awan tu kagittana ira nga kualidadna. Pinaratuna ittam nga egga pakawaganna ta espiritual, onu i abilidad nga malippawa i pagimamma anna estandartena ira. Ta pappursigi tam nga iyaplika danaw, mas magayayya anna egga kebalinan na pattoletam. Iniddanna paga ittam tu tiansa nga maddukko nisa.

Pakurugan na pinaratu ira ta davvun i pangikavurung nittam na Dios. Kinagi ni apostol Pablo nga “nipasingan [na Dios] i ka-Dios na gafu ta mapia ira nga kuan na: iddan [na ittam] ta uran, pavvungan na i mula-mula [tam] ta natullo nga tiempo, iddan [na ittam] ta kanan, anna pannuan na i giffutuan [tam] ta pagayaya.” (Kingngua 14:17) Ari laman tu i pakawagattam ira tapenu matolay i niyawa na Dios. Aru paga i niyawana anna nadduruma i klasena tapenu magayayya ittam nga mattolay. Ngem aru paga i kayà na Dios para nittam.

 Pinaratu ni Jehova i davvun tapenu mattolay ittam taw tu mannanayun. Kagian na Biblia: “Niyawa na ta tolay i davvun,” anna “arianna pinaratu yatun nga awan tu sesserbina, ngem finormana yatun tapenu paddianan.” (Salmo 115:16; Isaias 45:18) Sinni i maddian taw anna kunnasi kabayagna? “I matunung ira ay irensiad-da i davvun, anna maddian ira taw tu mannanayun.”​—Salmo 37:29.

Mekunnay tatun, pinaratu ni Jehova i ollu nga lalaki anna babay, da Adan anni Eva, anna pinaddianna ira ta paraiso nga davvun ‘tapenu kusetchan anna tangngalladda yatun.’ (Genesis 2:8, 15) Iniddan ira na Dios tu dua nga makapagayayya nga annungan: “Maggaka kamu anna umaru kamu, pannuannu i davvun anna imagurayannu.” (Genesis 1:28) Egga gafu nakuan iddanama da Adan anni Eva nga mattolay tu mannanayun ta davvun. Kaddaraddam, pinilida nga ari mattuppal ta Dios. Megafu tatun, nawawadda i iddanama nga melagum ta “matunung ira” nga ‘mangirensia ta davvun.’ Ngem ari nga nanguli i gakkag ni Jehova para nittam onu ta davvun megafu ta kingnguada. Ikonsidera tam labbi i kingngua paga na Dios.

Uvovug na Dios i Biblia. Ngatta niyawa nittam ni Jehova i Biblia? I primeru nga rason ay tapenu magigiammu tam i meyannung nisa. (Proverbio 2:1-5) Ari nga tabbagan na Biblia i kada pakkiavu tam meyannung ta Dios​—awan mabba tu kunnatun nga libru. (Eclesiastes 3:11) Ngem makoffun i ngamin nga egga ta Biblia tapenu mammammu tam i Dios. Mammammu tam yayya ta pattratuna ta totolay. Masingattam i klase na totolay nga ayatan anna ikalussona. (Salmo 15:1-5) Magigiammu tam i estandartena ta paddayaw, moralidad, anna ta material nga ganna-gannug. Mabibbig paga ta Biblia i manawag nga deskripsion ta personalidad ni Jehova gukaban na uvovug anna kingngua ira na Anana, si Jesu-Cristo.​—Juan 14:9.

I tadday paga nga rason nga niyawa ni Jehova i Biblia ay tapenu mammuattam nu kunnasi mattolay nga magayayya anna egga kebalinanna. Gukaban na Biblia, ikakkagi nittam ni Jehova nu kunnasi mabbalin tu magayayya i familia, nu kunnasi mabbalin tu kontentu, anna nu kunnasi marubang i pakavurungan. Kagitta na meyesplika taw nga magazina, tabbagan na Biblia i importante ira nga pakkiavu ta pattolay, gitta na: Ngatta grabe i pazziga-riga? Anni i mesimmu ta mappange? Ipakanawagna paga i kingngua na Dios tapenu masiguradu nga matuppal i orihinal nga gakkagna.

Aru paga i pamakurug nga talaga espesial nga libru i Biblia nga naggafu ta Dios. Nitura yatun na ma-40 nga lallaki ta unag na maturu 1,600 nga dagun, ngem tattadday laman i temana megafu ta i Dios i kurug nga Autorna. (2 Timoteo 3:16) Ari tu kagitta na libru ira gari, nemmuguran yatun tu mapia ta pappasa na tiempo, kagitta na napakurug na rinivu nga nakkapollu nga manuskrito na Biblia. Nattalupaddian paga i Biblia maski aru i nangifugag nga metransleyt, metaneg, anna mabibbig yatun. Ta maddaggun, yaw i libru nga netaneg ta pinaka-aru nga kopia anna netransleyt ta pinaka-aru nga lengguahe. Kurug nga “i uvovug na Yafu ay mannanayun adde noka” megafu ta nattalupaddian i Biblia.​—1 Pedro 1:24, 25.

I espesial nga probision na Dios tapenu ipasiguradu i gakkagna para nittam i tadday paga nga netuppalna. Nakagi ngana nga gakkag na Dios nga mattolay ittam tu mannanayun ta davvun. Ngem nakaliwa si Adan ta pinilina i ari mattuppal ta Dios. Nawawanna i oportunidad nga mattolay yayya tu mannanayun anna i gaka-gakana. “Megafu ta tadday nga tolay, egga ta utun na davvun i pattagaruli, ay i katagarulian na i nangirattal ta patay. Ay nawwara i patay ta ngamin nga totolay megafu ta nattagaruli ngamin i totolay.” (Roma 5:12) Ta ari pattuppal ni Adan, gittana ari ngana mesimmu i gakkag na Dios. Anni i kingngua ni Jehova?

Masingan ta kingngua ira ni Jehova i kualidadna ira. Matunung nga sinentensianna da Adan anni Eva ta kingnguada, ngem egga i meddu nga kingnguana para ta mabbalin tu gaka-gakada. Megafu ta sirib ni Jehova, ammuna i kuanna ta situasion, anna insigida nga kinagina i solusion.  (Genesis 3:15) Posible i kapalubbang ta liwa anna patay gukaban na Ana na Dios, si Jesu-Cristo. Anni i nelagum tatun?

Tapenu matavvu i totolay ta efekto na rebelyon ni Adan, zinog ni Jehova si Jesus ta davvun tapenu ituddu i dalan ta inango anna tapenu “iyawa na i inango na tapenu matavvu i aru nga totolay.” a (Mateo 20:28; Juan 14:6) Meyawa ni Jesus i tavvu megafu ta perfekto yayya kagitta ni Adan. Ngem ari tu kagitta ni Adan, nattuppal si Jesus adde ta patena. Megafu ta ari mepangngo nga matay si Jesus, pinaginnolay yayya ni Jehova ta langi. Makua ngana ni Jesus i ari nga nakua ni Adan​—iyawa ta matalo nga totolay i iddanama nga mattolay tu mannanayun. “Nu kunnasi i karu na nesipo nga nattagaruli megafu ta ari nga nipakimoray na tadday nga tolay, kunnatun gapa i karu na mapakatunung nga totolay megafu ta pakimoray na tadday gapa nga tolay.” (Roma 5:19) Gukaban na sakrifisio nga tavvu ni Jesus, tuppalan na Dios i promesana nga mattolay tu mannanayun ta davvun i totolay.

Aru magigiammu tam meyannung kani Jehova ta pangarubanna ta problema ira nga resulta na ari pattuppal ni Adan. Nammuattam nga awan tu makefugag kani Jehova nga balinan i nigafuna; “siguradu nga mavviktoria” i kinagina. (Isaias 55:11) Nagigiammu tam gapa i kadakal na aya ni Jehova nittam. “Nipasingan na Dios i pangaya na nittam ta pamaddob na ta tattadday nga Ana na toye ta utun na davvun tapenu mattolay ittam megafu sa. Ay yaw i aya: ari tu megafu ta inaya tam i Dios, nu ari yaya i nangaya nittam ta zinog na i Ana na nga metavvung tu ikapamakoma na katagaruliat-tam.”​—1 Juan 4:9, 10.

“Arian na nga niyetu [na Dios] i mismu nga Ana na, ngem niyawa na yaya nittam ngamin,” yatun tu masiguradu tam “i pangiyawa na nittam ta ngamin paga nga ganna-gannug” nga nipromesana. (Roma 8:32) Anni i nipromesa na Dios nga kuanna para nittam? Ituloy mu i pabbibbig.