Durante nga masingattam i kualidad ira na tadday nga tolay, mas mammammu tam yayya anna mas malladda i pakkofuttam. Kunnatun gapa kani Jehova, durante nga mammuattam i kualidadna ira, mas mammammu tam yayya anna mas malladda i pakkofuttam. Ta ngamin nga makapabbaw nga kualidad na Dios, appa i primeru: i pakapangngua, sirib, hustisia, anna ayana.

“O Soberano nga Yafu Jehova! Sikaw i nangngua ta langa-langi anna ta davvun gukaban na dakal nga pakapangnguam.”​—JEREMIAS 32:17.

Masingan i pakapangngua na Dios ta pinaratuna ira. Angngariganna, nu egga ka ta lawan nga mapapatu i bilag, anni i matageno mu? I patu na bilag ta tabbi mu. Kakuruganna, mataga-tageno mu i resulta na pakapangngua ni Jehova nga mamaratu. Kunnasi kapatu i bilag? I temperatura na tangngana ay ma-27,000,000 digri Fahrenheit (15,000,000°C). Kada segundo, mamalawan i bilag tu enerhiya nga kagitta na kasikan na passabug na minillion nga nuklear nga bomba.

Ngem baddi laman i bilag nu ikumpara ta binillion nga bitun ta uniberso. Ta pattantia na sientista ira, i tadday ta kadakallan nga bitun nga nangaganan tu UY Scuti ay egga diametrona nga mas dakal tu ma-1,700 beses ta bilag. Nu talianan na UY Scuti i bilag, makallabbanna i planeta nga davvun anna maddena i orbit na planeta nga Jupiter. Posible nga nakoffun yatun tapenu malippawa tam tu mapia i kinagi ni Jeremias nga si Jehova nga Dios i nangngua ta langa-langi anna ta davvun​—i uniberso—​gukaban na dakal nga pakapangnguana.

 Kunnasi ittam mabenefisiowan ta pakapangngua na Dios? Mattolay ittam megafu ta pinaratu ira na Dios, kagitta na bilag anna ngamin nga makakkasta nga gannug ta davvun. Usu-usan gapa na Dios i pakapangnguana tapenu mabenefisiowan i kada tadday. Kunnasi? Ta ollu siglo, iniddan na Dios si Jesus tu pakapangngua nga magangngua tu milagro. Mabibbig tam: “Makasingan i vuling ira, makalakag i pilay, mammapia i mallepproso ira, makaginna ngana i bangngag, maginnolay i natay.” (Mateo 11:5) Kunnasi gapa ta kaggawattam? Kagian na Biblia: “Mangiyawa yayya tu sikan ta nabannag,” anna “danuri magiddanama kani Jehova ay metoli i siki-sikadda.” (Isaias 40:29, 31) Mangiyawa i Dios tu “ari nga maguku-gukug nga pakapangngua” tapenu marubang onu maattammattam i ziga-riga anna problema ira. (2 Corinto 4:7) Ari ka kari mapaguyu nga maddukko ta Dios nga meddu nga mangusa ta pakapangnguana para nittam?

“I kingnguam ira, O AFU, ay napakaru! Kingnguam ngamin danaw gafu ta ka-uto mu!”​—SALMO 104:24.

Durante nga mas magigiammu tam i kingngua ira na Dios, mas mappabbaw ittam ta siribna. Kakuruganna, gigiammuan na sientista ira i pinaratu ira ni Jehova anna parigadda i diseniona tapenu mapakasta i imbensiodda. Magalan yatun tu biomimetics, onu biomimicry. Angngariganna, i simple nga pazzikko anna i disenio na eroplano.

I baggi tam i pinakamakapabbaw nga pakasingannan ta sirib na Dios. Ikonsidera nu kunnasi nga mabuu i baby. Mamegafu i proseso ta fertilisadu nga selula nga egga tatun i ngamin nga henetiko nga informasion nga kawagan. Maggadda-gaddua yatun nga selula. Ngem ta fustu nga tiempo, massirina i selula ira ta ginatu nga espesial nga klase na selula, kagitta na selula na daga, selula na kallo, anna selula na tulang. Sonu kua, mabuu anna maffunsina ngana i organ system ira. Ta siam nga vulan laman, mabbalin i orihinal nga selula tu abbing nga nabuu ta binillion nga selula. I sirib nga masingan tatun nga disenio i mamaguyu ta magaru nga umanugu ta kinagi na tadday nga nattura ta Biblia: “Daya-rayawat-taka ta kuruga mekakua ka; ngamin i kuam-mu ay makapabbaw ira.”​—Salmo 139:14.

Kunnasi ittam mabenefisiowan ta sirib na Dios? Ammu na Namaratu i kawagattam tapenu magayayya. Megafu ta alawa i pakannammu anna pakalippawana, makeyawa yayya tu masirib nga tabarang ta Uvovugna, i Biblia. Angngariganna, kagianna: “Makkapaka-pakoma kamu.” (Colosas 3:13) Masirib kari yatun nga tabarang? Wan. Nagigiammu na doktor ira nga nu minammakoma ittam, makkasta i katrug tam anna ari umatannang i blood pressure tam. Malillitattam gapa i madepres anna i karuan paga nga taki. I Dios ay kagitta na masirib anna minangngikavurung nga kofun nga ari vuluvuga magimmang nga mangiyawa tu makoffun nga tabarang nittam. (2 Timoteo 3:16, 17) Ikaya mu kari i kunnatun nga kofun?

“Ayatan ni Jehova i hustisia.”​—SALMO 37:28, NW.

Kanayun nga kuan na Dios i fustu. Kakuruganna, “imposible para ta kurug nga Dios nga magangngua tu kinamarake, para ta Makapangngua-ta-ngamin nga magangngua tu ari fustu!” (Job 34:10) Matunung i panentensia ni Jehova, kagitta na kinagi na salmista: “I panentensiam ta totolay ay matunung.” (Salmo 67:4) Megafu ta “innan ni Jehova i egga ta futu,” ari yayya melloku ta pagappappe anna kanayun nga masinganna i kurug anna fustu i pangukumna. (1 Samuel 16:7) Ammuna paga i kawan tu hustisia anna paddarogas na totolay, anna nipromesana nga “ari nga mabbayag, i marakay ira ay mapawan.”​—Salmo 37:10.

Ngem i Dios ay ari tu ukum nga awan tu allona nga kayàna laman nga sentensian i totolay. Mangikallo yayya nu mepangngo. Kagian na Biblia: “I YAFU ay minaggallallo” maski ta marake ira nga totolay nu napafutuan ira nga mabbabawi. Ari kari tu kurug nga hustisia yatun?​—Salmo 103:8; 2 Pedro 3:9.

Kunnasi ittam mabenefisiowan ta hustisia na Dios? Kinagi ni apostol Pedro: “I Dios ay arian na nga padduma-ruman i pangikakua na ta totolay. Ta alawatan na i sinni laman nga matunung anna minakkimoray sa, maski nu anni nga rasa i naggafuan na.” (Kingngua 10:34, 35) Mabenefisiowattam ta hustisia na Dios megafu ta ari yayya vuluvuga mangireruma onu mangipasingan tu faboritismo. Alawatanna ittam anna awayya tam maddayaw nisa maski anni i rasa, nasionalidad, edukasion, onu estado na pattoletam.

Kayà na Dios nga malippawa anna mabenefisiowattam ta hustisiana, yatun ta iniddanna ittam tu konsensia. Nakagi ta Biblia nga i konsensia ay dob nga ‘netura ta giffutuattam’ nga mamakurug nu mapia onu marake i kukukuattam. (Roma 2:15)  Kunnasi ittam mabenefisiowan? Nu nasanay tu mapia i konsensia tam, paguyuanna ittam nga arayyuan i marake nga annangngua. Nu makaliwa ittam gapa, paguyuanna ittam nga mabbabawi anna itunung i dala-dalattam. Talaga makoffun nittam i pakalippawa ta hustisia na Dios anna mamaguyu nittam yatun nga umaranni sa!

“I Dios ay aya.”​—1 JUAN 4:8.

Ipasingan na Dios i pakapangngua, sirib, anna hustisiana, ngem ari nga kinagi na Biblia nga i Dios ay pakapangngua, sirib, onu hustisia. Kinagina nga yayya ay aya. Ngatta? Makua na Dios i ikayàna megafu ta pakapangnguana anna igiya yayya na hustisia anna siribna ta kukukuanna. Ngem i aya ni Jehova i mamaguyu nisa. Aya i manginfluwensia ta ngamin nga kuanna.

Maski nu awan ngana tu kawagan ni Jehova, i ayana i namaguyu nisa tapenu mamaratu tu intelihente ira nga pinaratu, ta langi anna ta davvun, nga mabenefisiowan anna maka-ekspiriensa ta aya anna panangngalna. Meddu nga nipreparana i davvun tapenu mabbalin tu makakkasta nga paddianan na totolay nga pinaratuna. Ayatanna i ngamin nga totolay ta “mappaparehu nga nawagan na Dios ta bilag na i marakay anna mapia nga totolay. Anna mapparehu gapa nga iddan na Dios tu uran i mangngua ta mapia tuange ta mangngua ta marakay.”​—Mateo 5:45.

“Minaggallallo anna minaggiddeddu” paga si Jehova. (Santiago 5:11) Iddukanna danuri napafutuan nga magangngua tu dakkua tapenu mammammu anna maddukko nisa. Ikavurungan na Dios i kada tadday nira. Kakuruganna, ‘yayya i manangngal nikaw.’​—1 Pedro 5:7.

Kunnasi ittam mabenefisiowan ta aya na Dios? Kakayà tam i makasta nga pallammag na bilag. Magayayya ittam nga ginnan i galo na baby. Tagibalorattam i aya na kafamilia tam ira. Awayyana nga ari kuruga importante yaw ira, ngem mangiyawa danaw tu dakal nga pagayayya nittam.

Mabenefisiowattam gapa ta tadday paga nga pakasingannan ta aya na Dios: i paddasal. Itabarang na Biblia: “Arian nu nga kavurungan i anni laman nga gannug. Ngem ta ngamin nga pakimallo nu nga kanayun nga mavulunan ta pabbala-balo, kiddawan nu ta Dios i mawag nu.” Kagitta na minaggiddu nga yama, kayàna nga mappoffun ittam sa ta pakavurungattam ira. Megafu ta aya ni Jehova, iyawana nittam “i imammo na nga ari malippawa na tolay.”​—Filipos 4:6, 7.

Ari kari nga nakoffun yaw nga ababba nga pakanawag ta primeru ira nga kualidad na Dios​—kagitta na pakapangngua, sirib, hustisia, anna ayana—​tapenu mas mammammum yayya? Tapenu mas maappresiam paga i Dios, gigiammuammu nu anni ira i kingnguana anna i kuanna ira para nikaw.