Nu egga ka ta mariga nga situasion, siguradu nga ekspektammu nga uffunan naka na masippo nga kofun. Megafu tatun, kagian na karuan nga ari nga kofun i Dios megafu ta awan kanu tu kukukuanna tapenu uffunan ira. Kakuruganna, aru ngana i nakua na Dios para nittam anna aru paga i kuanna tapenu masolba i ngamin nga problema anna pazziga-riga tam ta maddaggun. Anni ira i kuan na Dios?

Pangultimuan na Dios i ngamin nga kinamarake gukaban na pangalsana ta kegafuanna. Kinagi na Biblia i kegafuanna: “I mundo ay egga ta pammaguray na Demonio.” (1 Juan 5:19) Yatun nga “Demonio” ay yayya gabbalaman i kinagi ni Jesus nga “mammaguray ta mundo,” si Satanas nga Diablo. (Juan 12:31) I influwensia ni Satanas ta mundo i primeru nga kegafuan na marake nga mesissimmu ta davvun. Anni i kuan na Dios?

Usan noka ni Jehova nga Dios i Anana, si Jesu-Cristo, tapenu “patulukan na i Demonio nga egga i pakawayya na ta patay.” (Hebreo 2:14; 1 Juan 3:8) Kakuruganna, ipasingan na Biblia nga ammu mismu na Demonio nga “pigo ngana laman i nabattang sa nga tiempo” nige na kadaralna. (Nepakannammu 12:12) Daralan gapa na Dios i ngamin nga magaggangngua ta kinamarake.​—Salmo 37:9; Proverbio 2:22.

Sonu awan ngana tu kinamarake ta davvun, kuan na Namaratu nittam i kawagan tapenu matuppal i gakkagna nga mattolay tu mannanayun ta paraiso nga davvun i perfekto nga totolay. Anni ira i iddanamattam?

Mannanayun nga imammo anna seguridad. “I minappakalinno ay irensiad-da i davvun, anna mattolay ira ta imammo nga mannanayun.”​—Salmo 37:11.

Abundansia anna masustansia nga makan. “Aru paray i magatab ta koman ira; matakkabban paray i kavukiran ta mula-mula.”​—Salmo 72:16.

Komfortable nga balay anna makapagayayya nga trabahu. “Mangipataddag ira tu babalay anna maddian tatun, anna mammula ira tu kaubasan anna kanadda i vungana. . . . I trabahu na limi-lima na napilì ira ay pagayayyatadda tu mapia.”​—Isaias 65:21, 22.

Kayà mu kari nga masingan danatun? Aranni ngana i kunnatun nga pattolay.

Mattaki ittam ngamin anna matay, ngem ari ngana mabbayag yatun. Aranni ngana nga iyawa na Dios i benefisio ira na sakrifisio nga tavvu ni Jesus tapenu “ngamin i mangurug sa ay ari nga matay nu ari matolay ira adde ta ngangangay.” (Juan 3:16) Anni noka i resultana ira?

Mapawan ngana i taka-taki. “Awan noka tu maski sinni nga mangikagi: ‘Mataki ngà.’ I totolay nga maddian ta davvun ay mapakoma ta kamalida.”​—Isaias 33:24.

Awan ngana tu patay nga mamazziga ta totolay. “Sillunganna i patay tu mannanayun, anna funatan na Soberano nga Yafu Jehova i lulua ta ngamin nga muka.”​—Isaias 25:8.

Mannanayun i pattolay. “Zinog [na Dios] i tattadday nga Ana na, tapenu ngamin i mangurug sa ay ari nga matay nu ari matolay ira adde ta ngangangay.”​—Juan 3:16.

Mapaginnolay i natay ira. “Ngamin i totolay, mapia [“matunung,” NW ] onu marakay [“ari matunung,” NW ], ay maginnolay noka.” (Kingngua 24:15) Mapaginnolay ira megafu ta tavvu nga regalu na Dios.

Kunnasi nga tuppalan yaw na Dios?

Ituppal na Dios i gakkagna ta totolay anna ta davvun gukaban na nelangitan nga gobiernu nga si Cristo Jesus i natunno nga Mammaguray. (Salmo 110:1, 2) Yatun i pammaguray, onu pappatulan, nga nituddu ni Jesus ta disipulosna nga idasalda: “Ama mi nga egga ta langi, . . . maparattal paray i Pammagurem.”​—Mateo 6:9, 10.

Mammaguray i Pappatulan na Dios ta interu davvun anna alsanna i ngamin nga daddam anna ziga-riga. Yaw nga Pappatulan i kapianan nga gobiernu ta ngamin! Yatun ta nappursigi si Jesus nga ilayyagayya i “Mapia nga Dumug na Pammaguray na Dios” ta ministeriona ta davvun anna kinagina ta disipulosna nga kunnatun gapa i kuadda.​—Mateo 4:23; 24:14.

Megafu ta kadakal na aya ni Jehova nga Dios ta totolay, nipromesana nga kuanna ngamin danaw nga makapabbaw nga ganna-gannug para nira. Ari ka kari mapaguyu natun nga ammuan yayya anna maddukko nisa? Kunnasi ka mabenefisiowan nu kuammu yatun? Ipakanawag na tumunug nga artikulo.