Taw nga serye na artikulo ira, nammuattam i tabbag ta pakkiavu nga, Sinni i Dios? Nagigiammu tam ta Biblia nga Jehova i ngaganna anna aya i primeru nga kualidadna. Nikonsidera tam gapa i kingnguana ira anna i kuanna paga tapenu mabenefisiowan i totolay. Aru paga i magigiammu tam meyannung ta Dios, ngem baka manono mu nu kunnasi ka mabenefisiowan ta paggigiammu tatun.

Nipromesa ni Jehova nga “nu alegammu yayya, ipamavulunna nga malegammu yayya.” (1 Cronicas 28:9) Nonopammu i nabalor nga regalu nga mabbalin tu madukko nga kofun ni Jehova durante nga alegan anna ammuammu yayya! (Salmo 25:14) Anni ira i benefisio natun nga pakikkofun?

Kurug nga pagayayya. Si Jehova ay “magayayya nga Dios.” (1 Timoteo 1:11, NW ) Kurug i pagayayya mu nu makiddukko ka nisa anna nu parigammu yayya. Makasta i resulta natun ta panageno, nono, anna baggim. (Salmo 33:12) Mabbalikka gapa tu magayayya​—gukaban na pallilli ta makadaral nga istilo na pattolay, kapeggan tu makasta ira nga rutina, anna pamattalupaddian ta makasta nga relasion ta tanakuan. Umanugu ka noka ta kinagi na salmista: “Kuruga makapabbaw tu i Dios ay aranniak-ku.”​—Salmo 73:28.

Personal nga pangikavurung anna atension. Nipromesa ni Jehova ta aripanna ira: “Tudduan anna tabarangngat-taka.” (Salmo 32:8) Personal nga ikavurungan ni Jehova i kada tadday nga aripanna anna iyawana ta kataggi-tadday i mismu nga kawaganna. (Salmo 139:1, 2) Nu madukko ka ngana kani Jehova, masiguradum nga kanayun naka uffunan.

Makakkasta nga mappange. Fuera paga ta panguffun nikaw ni Jehova nga Dios nga mabbalin tu magayayya anna kontentu ta maddaggun, pinabbalinna gapa tu posible i makakkasta nga mappange para nikaw. (Isaias 48:17, 18) Kagian na Biblia: “Yaw i inango nga adde ta ngangangay: i pakannammu da tu sikaw i tattadday nga kurug nga Dios, anna i pakannammu da gapa kani Jesu-Cristo nga zinog mu.” (Juan 17:3) Taw ira nga mariga nga tiempo, kagitta na angkla i iddanama nga maggafu ta Dios megafu ta kuanna tu “kurug anna maladda” i pangurug tam.​—Hebreo 6:19.

Danaw laman i karuan ta aru nga importante nga rason tapenu ammuan tu mapia i Dios anna mapeggan tu personal nga relasion nisa. Makiyuvovug ka ta tadday ta Saksi ira ni Jehova onu innammu i jw.org para ta aru paga nga makoffun nga informasion.