Aru i makkagi nga mangurug ira ta Dios. Ngem nu iyavu mu nu sinni i Dios, nadduruma i tabbagda. Para ta karuan, awan tu allo na Dios nga ukum, nga kayàna laman nga sentensian i totolay ta marake nga kukukuadda. Para ta tanakuan, minangngiddu anna minammakoma yayya, maski anni paga i kuadda. Ngem kurugan gapa na karuan nga ararayyu i Dios anna awan tu pakialamna nittam. Megafu tatun nga nadduruma nga opinion, baka matageno na magaru nga imposible nga mammammu i Dios.

Importante kari nga mammammu i Dios? Wan. Makoffun i pangammu ta Dios tapenu mapeggan tu gakkag anna kebalinan i pattolem. (Kingngua 17:26-28) Nu mas maddukko ka ta Dios, mas ayatan anna uffunan naka. (Santiago 4:8) Fuera paga tatun, mattuppal ta mannanayun nga inango i fustu nga pakannammu ta Dios.​—Juan 17:3.

Kunnasim nga mammammu i Dios? Nonopammu i tadday nga madukko nga kofummu. Kunnasi kamu nabbaling tu makkofun? Siguradu nga nammuammu labbi i ngaganna, i personalidadna, i kayà anna manakina, i kingngua anna planona ira, anna aru paga. Yatun i namaddukko nikaw ta nisa​—nammammum yayya.

Mammammu tam gapa i Dios gukaban na pangikonsidera ta tumunug ira:

• ANNI I NGAGAN NA DIOS?

• ANNI IRA I KUALIDADNA?

• ANNI IRA I KINGNGUA NA DIOS?

• ANNI IRA I KUANNA?

• KUNNASI KA MABENEFISIOWAN TA PANGAMMUM TA DIOS?

Nadisenio yaw nga magazina tapenu ipasingan i tabbag na Biblia tatun ira nga pakkiavu. Uffunan naka na artikulo ira tapenu magigiammum nu sinni i Dios anna nu kunnasi ka mabenefisiowan ta kapeggan tu personal nga relasion nisa.