Anni i Ngagan na Dios? Kinagi mismu na Dios: “Sakan si Jehova. Yatun i ngagakku.” (Isaias 42:8) Limittuag tu mami-7,000 ta Biblia i personal nga ngagan na Dios. Ngem ari mepappangngo nga sinalianan na aru nga nattransleyt ta Biblia yaw nga ngagan tu titulo, gitta na “Yafu.” Ikaya na Dios nga mabbalikka tu kofunna, yayya nga ikikkiddona nga ‘magagal ka ta ngaganna.’​—Salmo 105:1, NW.

I Titulo ira ni Jehova. Mabibbig ta Biblia i titulo ira ni Jehova gitta na “Dios,” “Makapangngua-sa-ngamin,” “Namaratu,” “Yama,” “Yafu,” anna “Katannangan.” Ta aru nga pakimallo ta Biblia, nagalan si Jehova gukaban na marespeto ira nga titulo tuange ta personal nga ngaganna nga Jehova.​—Daniel 9:4.

 I Kasissinnan na Dios. Ari nga masingan nga espiritu i Dios. (Juan 4:24) Kagian na Biblia nga “awan vuluvuga tu nakasingan ta Dios” nga tolay. (Juan 1:18) Mabibbig ta Biblia i mataga-tagenona. Maparraddam na totolay i Dios, onu ‘mapagayayyada’ yayya.​—Proverbio 11:20; Salmo 78:40, 41.

I Makapabbaw ira nga Kualidad na Dios. Ari nga mangireruma i Dios maski anni i nasion anna kultura na totolay. (Kingngua 10:34, 35) Yayya gapa ay “minangngikallo anna minangngikabbi, ari insigida nga mapporay anna abundansia ta matalo nga aya anna kinakurug.” (Exodo 34:6, 7) Ngem egga appa nga kualidad na Dios nga kuruga makakkasta.

Pakapangngua. Megafu ta yayya i “Dios nga Makapangngua-sa-ngamin,” awan tu limitasion na pakapangnguana ta pangituppal ta maski anni nga ipromesana.​—Genesis 17:1.

Sirib. Awan tu mas masirib ta Dios. Yaw i kayà kagian na Biblia ta kinagina nga yayya laman i “makannammu ta ngamin” nga gannug.​—Roma 16:27.

Hustisia. Kanayun nga kuan na Dios i fustu. “Perfekto” i kukukuanna ira anna “ari [yayya] vuluvuga mangipasingan tu kawan na hustisia.”​—Deuteronomio 32:4.

Aya. Kagian na Biblia nga “i Dios ay aya.” (1 Juan 4:8) Ari laman nga mangipasingan tu aya i Dios​—yayya mismu i personipikasion na aya. I daka-dakal nga ayana i mamaguyu ta ngamin nga kukukuanna, anna pammakapianattam yatun.

I Pakikkofun na Dios ta Totolay. I Dios i minaggiddu nga nelangitan nga Yama tam. (Mateo 6:9) Nu mangurug ittam nisa, awayya tam mabbalin tu kofunna. (Salmo 25:14) Kakuruganna, imbitan naka na Dios nga umaranni nisa gukaban na pakimallo anna ‘ipammakatalo mu sa ngamin i kavurungammu ta yayya i manangngal nikaw.’​—1 Pedro 5:7; Santiago 4:8.

Si Jesus ay Ana na Dios. Nerumu-ruma si Jesus​—yayya laman i direkta nga pinaratu na Dios. Yatun i rason nga nagalan yayya ta Biblia nga Ana na Dios. (Juan 1:14) Kabalin nga pinaratu ni Jehova si Jesus, inusana yaw nga kaka nga anana bilang “malalaki nga trabahador” tapenu maparatu paga i ngamin.​—Proverbio 8:30, 31; Colosas 1:15, 16.

 Ari vuluvuga kinagi ni Jesu-Cristo nga yayya i Dios. Kinagina lallagu meyannung ta Dios: “Ammù yaya ta yaya i naddog niakan anna yaya i naggafuanak-ku.” (Juan 7:29) Ta pakibbida ni Jesus ta tadday ta disipulona, inagalanna si Jehova nga “Yamà nga Yama da gapa” anna “Dios ku anna Dios da gapa.” (Juan 20:17) Ta patay ni Jesus, pinaginnolay yayya ni Jehova nga mattolay ta langi anna niddanna tu daka-dakal nga pakawayya anna naddian ta ziwananna.​—Mateo 28:18; Kingngua 2:32, 33.

Makaranni Ka ta Dios Gukaban ni Jesu-Cristo

Minay si Jesus ta davvun tapenu tudduan ittam meyannung ta Yamana. Kinagi ni Jehova meyannung kani Jesus: “Yaw i iddeddukak-ku nga Ana ku, ginnan nu yaya!” (Marcos 9:7) Si Jesus laman i makannammu tu mapia ta Dios. Kinagina: “Awan gapa tu makannammu nu sinni i Yama, nu ari laman i Ana tuange ta totolay nga ikaya na Ana nga pangipakannammuan sa.”​—Lucas 10:22.

Perfekto nga nipasingan ni Jesus i kualidad ira na Dios. Naparigan tu mapia ni Jesus i kualidad ira na Yamana yayya nga nakagina: “I nakasingan niakan ay nasingan na ngana gapa i Yama.” (Juan 14:9) Niyaranni ni Jesus i totolay ta Dios ta pangipasinganna ta aya na Yamana gukaban na kinagina anna kingnguana ira. Kunna: “Sakan i dalan, i kurug, anna inango. Awan tu makangay ta Yama nu ari labbi nga umay niakan.” (Juan 14:6) Kunna paga: “I kurug nga maddaya-rayaw ta Yama ay daya-rayawad-da yaya ta Espiritu anna kakurug, ta i kuddanatun i aleran na Yama tu maddaya-rayaw sa.” (Juan 4:23) Fugurammu yatun! Ala-aleran ni Jehova i kagittam nga maya mangammu ta kinakurug meyannung nisa.