Niyesplika ni Jesus nu kunnasi tam mammuan nga “aranni ngana nga duttal i Pammaguray na Dios.” (Lucas 21:31) Niprofesiyana nga egga noka i darakal nga gerra, masikan ira nga lunig, bisin, anna taka-taki​—gannug ira nga mesissimmu ngana.—​Lucas 21:10-17.

Ipasingan paga na Biblia nga marrake i ugu-ugali na totolay ta “pangurianan ira nga aggaw.” Mabibbig mu yatun ta 2 Timoteo 3:1-5. Nu masingi-singammu ngana danaw nga ugu-ugali anna annangngua, magga umanugu ka nga mesissimmu ngana sangawe yaw nga profesiya ta Biblia.

Anni i kebalinan naw? Aranni ngana i tiempo nga pabbalinan na Pappatulan na Dios tu makakkasta i pattolay ta davvun. (Lucas 21:36) Ta Biblia, makakkasta i nipromesa ira na Dios para ta davvun anna ta mattolay ira tatun. Innan i angngarigan ira.

“Neddan [si Jesus] tu pammaguray, dayaw, anna pappatulan, tapenu passerbian yayya na ngamin nga totolay ta nadduruma nga nasion anna lengguahe. Mannanayun i pammagurena nga ari noka mappasa, anna ari noka madaral i pappatulanna.”​—DANIEL 7:14.

I kebalinanna: Makapagayayya i pattolem bilang sakup na kapianan nga gobiernu ta interu mundo nga nipataddag na Dios nga i Anana i Patul.

“Awan noka tu maski sinni nga mangikagi: ‘Mataki ngà.’”​—ISAIAS 33:24.

I kebalinanna: Ariammu vuluvuga mattaki, mabaldadu, onu maski matay.

“Pagimmangan na i gerra ira ta tanga-ravvunan.”​—SALMO 46:9.

I kebalinanna: Awan ngana noka tu mekassing nga gerra anna i pazziga-riga nga efekto natun.

“I marakay ira ay mapawan . . . I minappakalinno ay irensiad-da i davvun.”​—SALMO 37:10, 11.

I kebalinanna: Awan ngana noka tu marake nga totolay; danuri laman mattuppal ira ta Dios i mattolay.

“Mangipataddag ira tu babalay anna maddian ira tatun, anna mammula ira tu ubas anna kanadda i vungana.”​—ISAIAS 65:21, 22.

I kebalinanna: Mabbalin noka tu makakkasta i interu davvun. Tuppalan na Dios i pakimallo tam nga makua i urena “ta davvun.”​—Mateo 6:10.