I Kinakurug Meyannung ta Pappatulan na Dios
Sinudduan ni Jesus i tagatuttulna ira nga ipakimalloda: “Ama mi nga egga ta langi, marayaw paray i ngagam-mu; maparattal paray i Pammagurem. Makua i urem toye ta davvun ta kunne ta langi.” (Mateo 6:9, 10) Anni i Pammaguray onu Pappatulan na Dios? Anni i kuan naw? Ngatta ipakimallo tam nakuan yatun?
Si Jesus i Patul na Pappatulan na Dios.
Lucas 1:31-33: “Ngaganam-mu yaya tu Jesus. Dakal noka i kekwentan na anna mangagan yaya tu Ana na Dios nga Katannangan. I Yafu Dios ay pabbalinan na yaya noka tu patul nga kagitta ni David nga ginafuan na. Mannanayun noka i pammaguray na ta ginaka ira ni Jacob anna awan tu panuppalan na pammagurayan na.”
I Pappatulan i pinakatema na nilayyagayya ni Jesus.
Mateo 9:35: “Inangayan ni Jesus ngamin i ili-ili anna babario. Nattuddu ta sinagoga ira, nilayya-gayya na i Mapia nga Dumug meyannung ta Pammaguray na Dios, anna pinammapia na ngamin i tulagan anna pakkafiyan na baggi na totolay.”
Niddan ni Jesus i disipulosna ira tu seniales tapenu mammuadda nu aranni ngana duttal i Pappatulan.
Mateo 24:7: “Ta maggegerra noka i nasa-nasion, kunne na gapa ta pappatulan ira. Ay mabbisin i totolay, anna mallunig ta madduma-ruma nga lugar.”
Ilayyagayya ta maddaggun na disipulos ira ni Jesus i meyannung ta Pappatulan ta interu mundo.
Mateo 24:14: “Ay melayya-gayya noka ta tanga-ravvunan yaw nga Mapia nga Dumug na Pammaguray na Dios tapenu kannammuan na ngamin nga sinolay. Ta kabalin naw, duttal ngana i panuppalan.”
Baka Kaya Mu Gapa i
ESSENTIAL BIBLE TEACHINGS
Anni i Pappatulan na Dios?
Ta interu ministerio ni Jesus, nitudduna i meyannung ta Pappatulan na Dios anne ta maski anni nga topiko. Ta aru nga siglo, nipakimallo na disipulosna nga duttal nakuan yatun nga Pappatulan.
