I Kagian na Totolay Meyannung ta Pakimallo
“Nu makimallo ngà, gittana kabiko i Dios, tattammina i limà anna igigiyanà nu kakku ngana ammu i kuakku.”—MARÍA.
“Natay si bako ku kabalin na 13 dagun nga pakillabanna ta cancer. Manono ku nga kadaggaw ngà makimallo ta Dios anna ammù nga gigginnanna i daging ku. Memammo nukua i panageno ku.”—RAÚL.
“Makakkasta nga regalu na Dios ta totolay i pakimallo.”—ARNE.
Espesial nga regalu i pakimallo para kani María, Raúl, Arne anna ta aru paga. Para nira, nu makimallo ira, maka-uvovugda i Dios, makapappabalo ira nisa, anna makakiddaw ira tu uffun. Talaga kurugadda i kagian na Biblia meyannung ta pakimallo: “Masikan i pammakatalo tam ta Dios, ta ammu tam tu tangngagan na ittam ta anni laman nga kiddawat-tam sa nga metuttul ta uray na.”—1 Juan 5:14.
Ngem aru gapa nga totolay i ari mangurug taw nga kinagi na Biblia. Kunnaw i natageno ni Steve meyannung ta pakimallo: “Kustu 17 i dagukku, natay i tallu ta kofukku. Natay ta aksidente ta takay i tadday, nalimo gapa i dua ta bebay.” Anni i kiningngua ni Steve? “Niyavu ku
ta Dios nu ngatta nesimmu danatun. Ngem awan tu tabbagna. Yayya nga kukku ta baggì, ‘Ngatta pagalaman makimallo ngà?’” Nonopan na karuan nga ari matattabbag i pakimalloda yayya nga ngatta pagalaman kanu nga makimallo ira.Tanakuan gapa i rason na karuan nu ngatta ariadda pagimportan i pakimallo. Kagiadda nga ari tam ngana mawag nga kagian ta Dios i pakawagattam onu i problema tam ta ammu ngana mabba na Dios i ngamin.
Abbattan gapa na karuan nga ari nga ginnan na Dios i pakimalloda gafu ta liwi-liwada ta nappasa. Kagian ni Jenny: “I problema nio, matageno ku nga awan tu sesserbì. Egga ira i nakuà nga pabbabbabawyakku yayya nga kukku ta baggì nga ari ngà mepangngo nga ginnan na Dios.”
Anni gapa i makagim meyannung ta pakimallo? Nu kunnatun gapa i mataga-tageno mu onu paddudammu gapa i pakimallo, makasiguradu ka nga matabbag na Biblia i pakkiavu mu ira. Makapattalo ittam ta kagian na Biblia meyannung ta pakimallo. * Tabbagan naw i pakkiavu ira gitta na:
-
Talaga kari nga ginnan na Dios i pakimallo tam?
-
Ngatta ari nga matabbag i karuan nga pakimallo?
-
Kunnasi ka nga makimallo ta Dios tapenu tabbagan naka?
-
Anni i meduffun nikaw na pakimallo?
^ par. 9 Mabibbig ta Biblia i pakimallo na aru nga aripan na Dios, nelagum i pakimallo ira ni Jesu-Cristo. Mabibbig i maturu tu 150 nga pakimallo ta Hebreo nga Katurakan nga magalan gapa tu Dana nga Pakkasinabban.