“Anni laman nga kiddawan nu ta Yama ta ngagak-ku ay iyawa na nikamu.”​—Juan 16:23.

Manawag ta kinagi ni Jesus nga ikaya ni Jehova nga makimallo ittam nisa ta ngagan ni Jesu-Cristo, ari tu gukaban na imahen, santu, anghel, onu na natay ira nga ginafuanattam. Nu makimallo ittam ta Dios ta ngagan ni Jesus, ipasa-pasingattam nga malippawa tam i importante nga papel ni Jesus. “Awan tu makangay ta Yama nu ari labbi nga umay niakan,” kunni Jesus.​—Juan 14:6.

“Ngamin i vuru-vurung nu en-nu sa nga kagian.”​—Salmo 62:8.

Nu makimallo ittam kani Jehova, makibbida ittam nakuan nisa kagitta na pakibbida tam ta minaggiddu nga yama. Imbes tu ibibbig tam ta libru onu kagiattam i memoriadu tam nga pakimallo, marespeto anna napafutuan nakuan yatun.

“Tangngagan na ittam ta anni laman nga kiddawat-tam sa nga metuttul ta uray na.”​—1 Juan 5:14.

Kinagi ni Jehova nga Dios ta Biblia i kuanna para nittam anna i ikikkiddona ta nittam. Alawatan na Dios i pakimallo tam nu ipakimallo tam i “metuttul ta uray na.” Mawag gafu nga gigiammuattam i Biblia tapenu mammammu tam yayya tu mapia. Nu kuattam yatun, makapagayayya nisa i pakimallo tam.

Ipakimallo Tam i Kawagattam. Awayya tam ipakimallo ta Dios i inaggaw nga kawagattam—makan, sinnun, anna paddianan. Awayya tam gapa ipakimallo i ka-uto tapenu makapaddesision ittam tu fustu anna i sikan tapenu makapagattam ittam. Awayya tam gapa kiddawan i pangurug, kapakoma, anna i uffun na Dios.​—Lucas 11:3, 4, 13; Santiago 1:5, 17.

Ipakimallo i Tanakuan. Magayayya i magana ira nu makka-iddu-iddu i ánada. Ikaya gapa ni Jehova nga makka-iddu-iddu i ánana taw ta davvun. Mepangngo laman nga ipakimallo tam i atawa tam, i ána tam, i familia tam, anna i kokkofuttam. “Makkapaki-pakimallo kamu,” nitura na disipulo nga si Santiago.​—Santiago 5:16.

Mappabalo. Kinagi na Biblia meyannung ta Namaratu nittam: “Iddan nakamu ta uran, pavvungan na i mula-mula nu ta natullo nga tiempo, iddan nakamu ta kanan, anna pannuan na i giffutuan nu ta pagayaya.” (Kingngua 14:17) Nu nonopattam i ngamin nga kiningngua na Dios para nittam, siguradu nga mappabalo ittam nisa ta pakimallo tam. Mepasingattam paga i pappabalo tam ta Dios nu tuttulattam yayya.​—Colosas 3:15.

Nu mittan, madismaya ittam gafu ta ari insigida matabbag i napafutuan ira nga pakimallo tam. Kayà na kari kagian nga ari ittam ikavurungan na Dios? Ari! Mammuattam ta tumunug ira nga ekspiriensa nga ari ittam nakuan nga magimmang makimallo.

Kinagi ni Steve nga nakagi ta gafu nga artikulo, “Nu ari tu gafu ta pakimallo, awan ngana nakuan tu inanamà ta pattolay.” Ngatta nanguli i pagimammana? Naggigiammu yayya tu Biblia anna nammuanna nga mawag tu ari yayya nga magimmang nga makimallo. “Nappabalo ngà ta Dios ta pakimallo ku gafu ta suporta na meddu nga kokkofukku,” kunni Steve. “Mas magayayya ngà ngana sangawe.”

Kumusta gapa si Jenny nga abbona nga ari yayya mepangngo nga ginnan na Dios? Kinagina, “Turi ta natageno ku nga awan tu sesserbì, nakimemallo ngà ta Dios tapenu matindiakku nu ngatta kunnari i mataga-tageno ku.” Anni i neduffun natun nisa? “Gafu ta pakimallo ku ta Dios, nalippawa ku nga maski paga panunnutannà na futù, ariannà panunnutan na Dios. I pakimallo paga i nakaduffun niakan tapenu ari nga makkafi i nono ku.” Anni i resultana? “Gafu ta pakimallo, nammuakku nga si Jehova ay kurug, minaggiddu, minangngikavurung nga Dios, Yama, anna Kofun nga kana-kanayun nga manguffun basta tuttulakku yayya.”

Kunnaw gapa i ekspiriensa ni Isabel. Kustu nabussi yayya, kinagi na doktorna ira nga egga sangaw i diferensia na iyanana. Nadismaya yayya. Kinagi paga lagu na karuan nga mappalsa ngana laman yayya. “Gittana ipatè i taki nga mataga-tageno ku.” Anni i kiningnguana? “Ari ngà nagimmang nga makimallo ta Dios para ta uffunna,” kunna. Turi ta neyanana ngana si Gerard, egga talaga i diferensiana. Natageno kari ni Isabel nga sinabbag na Dios i pakimallona ira? Wan! Kunnasi? “Nu iinnakku i ana ku nga 14 ngana i dagunna nga magaya-ayayya maski egga diferensiana,” kunni Isabel, “yayya i kapianan nga tabbag ta pakimallo ku ira, i kakastan nga bendision nio ni Jehova nga Dios.”

Ipanono nittam na kinagida ira i kinagi na salmista: “Sikaw, AFU, i magginna ta pakimemallo na totolay nga minappakalinno; sikaw i mangiyawa nira ta sikan na nono.” (Salmo 10:17) Anni mabba kasta natun ira nga rason tapenu ari nga magimmang nga makimallo!

Aru nga pakimallo ni Jesus i nerekord ta Biblia. I kapianan tatun ay i nitudduna ta disipulosna ira. Anni i magigiammu tam tatun?