“Nu makimallo kamu, ariannu nga itotoli i kakkagiannu.”​—Mateo 6:7, NW.

Manaki ni Jehova nga itotoli tam i memoriadu tam ira nga dasal onu bibbigattam yatun ta libru. Kayàna nga napafutuan i pakimallo tam. Fugurammu ngana laman nu pakatotoli na kofummu i kakkagianna nikaw ta kadaggaw. I madukko nga makkofun, kagiadda i ngamin anna napafutuan yatun. Nu i mayan lapa na futu tam i ipakimallo tam ta nelangitan nga Yama tam, ipasingan naw nga ikwenta tam yayya nga kofuttam.

“Nu makkiddaw kamu, arian nu nga malawa gafu ta marakay i egga ta nono nu.”​—Santiago 4:3.

Siguradu nga ari tam ekspektan nga tabbagan na Dios i pakimallo tam nu manakina i ikikkiddaw tam. Angngariganna, nu makkiddaw tu suerte ta Dios i tadday nga minassugal, tabbagan kari yatun ni Jehova? Manawag nga manaki ni Jehova i pakkakkam anna i pangurug ta suerte. (Isaias 65:11; Lucas 12:15) Ari tam gafu ekspektan nga tabbagan ni Jehova i kunnatun nga pakimallo! Tapenu tabbagan na Dios i pakimallo tam, siguraduattam nakuan nga metuttul yatun ta kakkagian na Dios nga egga ta Biblia.

 “I ari nga tumuttul ta dob—mekala-kalussaw maski i pakimallona.”​—Proverbio 28:9.

Ta Biblia, ari nga sinabbag na Dios i pakimallo na ari ira nga tumuttuttul ta matunung nga dorobna. (Isaias 1:15, 16) Ari yayya nga nanguli. (Malakias 3:6) Nu kayà tam nga tabbaganna i pakimallo tam, mawag tu kuattam i adde na mawayya tam nga tumuttul ta dorobna. Kunnasi gafu nu egga ira i marake nga nakua tam ta nappasa? Kayà na kari kagian nga ari ngana vuluvuga magginna nittam si Jehova? Ari gapa. Masippo nga pakoman ittam na Dios nu manguli ittam anna kuattam i ngamin tapenu mapagayayya yayya.​—Kingngua 3:19.