NU KUNNASI NGA MALSA I LUSSAW
4 | Affutammu i Lussaw ta Uffun na Dios
I Kagian na Biblia:
“Danoye i vunga na Espiritu: pangaya, pagayaya, imammo, pappasensia, pia na affutu-futu, pia na pangnga-pangngua ta ikattolay, kapasikkal, pappakasippo, anna pangifugag ta baggi.”—GALACIA 5:22, 23.
I Kayà Na Kagian:
Maffu tam i lussaw ta uffun na Dios. Gukaban na masanto nga espiritu na, mapeggan ittam tu ugali ira nga awan ta nittam. Tapenu maffu tam i lussaw, mattalo ittam nakuan ta uffun na Dios imbes tu ta sarili tam nga sikan. Nu kunna, matageno tam gapa i nitura ni apostol Pablo: “Egga i sikakku nga arubangan i ngamin nga gannug gafu ta mangiyayawa niakan tu pakapangngua.” (Filipos 4:13, NW ) Makagi tam gapa: “I YAFU . . . i mangiyawa niakan ta uffun.”—Salmo 121:2.
I Makuam:
“Inuli nà ni Jehova. Dati ngà nga vayolente ngem malumamo ngà ngana sangawe.”—WALDO
Ipakimallo mu kani Jehova i masanto nga espiritu na. (Lucas 11:13) Ikiddom sa nga mapeggakka tu makasta ira nga ugali. Gigiammuan i ugali ira nga kagian na Biblia nga makaffu ta lussaw gitta na aya, imammo, pappasensia, anna pangifugag ta baggi. Magaleg ka tu chansa nga mepasingammu danatun ira nga ugali. Makikavulu ka gapa ta totolay ira nga mangikakkaguman nga mangipasingan tatun ira nga ugali. Makoffun ira tapenu ‘mepasingammu i aya anna makuam i mapia.’—Hebreo 10:24.
