NU KUNNASI NGA MALSA I LUSSAW

3 | Alsammu i Lussaw ta Nono Mu

I-PLAY

I Kagian na Biblia:

“Ipamavulun nu tu ulian na Dios i affutu-futuan nu gafu ta katalibagu na appana-panono nu. Ay kannammuan nu i uray na Dios—nu anni i mapia, i makapagayaya sa, anna i awan tu pakkurangan na.”—ROMA 12:2.

I Kayà Na Kagian:

Importante ta Dios i nononopattam. (Jeremias 17:10) Mawag tu lillitattam i makkagi onu magangngua tu gannug nga megafu ta lussaw, ngem egga paga i mawag nga kuattam. Mamegafu i lussaw ta nono anna futu tam. Alsattam gafu i anni laman nga lussaw ta nono anna futu tam. Nu kuattam yatun, mauli i affutu-futuattam anna matalibagu i appana-panono tam adde ta maffu tam i lussaw.

I Makuam:

Nonopammu nu anni kari i pagimamma mu ta tanakuan—mas ngana danuri tanakuan i lahi onu nasiodda. Iyavu mu ta baggim: ‘Kunnasì ira nga imammatan? Talaga kari nga ammammù ira? Onu nainfluwensian ngà laman na tanakuan?’ Lillitammu i social media, pelikula, onu tanakuan paga nga massuporta ta pallullussaw anna kinavayolente.

Malsa tam i lussaw ta futu anna nono tam ta uffun na Uvovug na Dios

Ari tu kanayun nga mabi nga usitakkan i nononopan anna mataga-tageno tam. Ngem moffunan ittam na Uvovug na Dios tapenu malippawa tam “i appana-panono anna pakkaraga” tam. (Hebreo 4:12) Kanayummu gafu nga gigiammuan i Biblia. Ikumparam i tuttuddu na ta appana-panono mu. Tapus, ikagumammu nga mannono segun ta tuttuddu na Biblia. Moffunan ittam na Uvovug na Dios nga maffu i lussaw nga negamu ngana ta nono anna futu tam.—2 Corinto 10:4, 5.

Ekspiriensa—STEPHEN

Inuli Na i Appana-panono Na

Ikala-kalussaw bi na totolay nga furaw si Stephen anna i familia na. Megafu tatun, nainfluwensian yayya na pulitikal nga grupo nga makikkillaban para ta katunungan na totolay. Ari nabbayag, nagangngua yayya tu krimen ta totolay nga tanakuan i lahi da. Istorian ni Stephen: “Mittan, naggiraw kami na barkadà tu pelikula meyannung ta ziga nga nappasa-pasan na naaripan ira nga Afrikano ta United States. Ta fermi nga poray mi megafu tatun nga kawan na hustisia, sinussuntu mi i kabataan ira nga furaw ta unag na sine. Tapus, minay kami ta lugar ira na furaw tapenu magaleg paga tu suntukammi.”

Nangulu-uli si Stephen turi ta nakipaggigiammu yayya tu Biblia ta Saksi ira ni Jehova. Kunna: “Ta karu na nasingakku nga pangireruma ta lahi, nasurpresa ngà ta nasingakku ta Saksi ira. Angngarigan na, turi ta minay ta ibang bansa i tadday nga Saksi nga furaw, nipatangngaw na i ána na ta familia nga ngisi. Tadday gapa nga bagitolay nga ngisi i pinaddian na familia nga furaw ta baleda.” Napakurug ni Stephen nga ipasa-pasingan na Saksi ira ni Jehova i pakka-aya-aya nga kinagi ni Jesus nga kuan na kurug ira nga Cristiano.—Juan 13:35.

Anni i nakoffun kani Stephen tapenu meyemmang na i marake nga kukukuan na? I teksto ta Roma 12:2. Kinagi na: “Na-realize ku nga mawag nga uliakku i appana-panono ku. Mawag nga iyemmakku ngana i pabbalin tu vayolente anna mangurug ngà nga i pabbalin tu memammo i kakastan nga pattolay.” Sangawe, magayayya ngana si Stephen ta awan ngana tu lussaw ta futu na ta maturu tu 40 nga dagun.

Baka Kaya Mu Gapa i

PAKASTAN NA BIBLIA I PATTOLAY

“Ari Ngà Ngana nga Vayolente”

Anni i nakoffun kani Sébastien Kayira nga iyemmang i pabbalin na tu vayolente anna abusadu?

PASSIFUSIFUTAN

Nu Kunnasi nga Malsa i Lussaw—Alsammu i Lussaw ta Nono Mu

Ibanag

Nu Kunnasi nga Malsa i Lussaw—Alsammu i Lussaw ta Nono Mu

https://cms-imgp.jw-cdn.org/img/p/2022013/univ/art/2022013_univ_sqr_xl.jpg

wp22 Num. 1 pp. 10-11

I Kagian na Biblia:

I Kayà Na Kagian:

I Makuam:

Baka Kaya Mu Gapa i

OPSION TA PANGI-DOWNLOAD

Pilliammu i Lengguahem

I-share