Interamente nga Mapawan i Lussaw!
Maski paga nalsa tam ngana i lussaw ta futu tam, ari tam nga makontrol i kukukuan anna ugali na tanakuan. Aru lapa nga inosente nga totolay i biktima na lussaw. Sinni gafu i permanente nga makasolba tatun nga problema?
Si Jehova nga Dios laman i interamente anna permanente nga makasolba tatun nga problema. Yatun mismu i nepromesa ta Biblia nga kuan na.—Proverbio 20:22.
ALSAN NA DIOS I MAKAGAFU IRA TA LUSSAW
-
1. SI SATANAS NGA DIABLO. I narrebelde nga anghel nga si Satanas i makalliwa nu ngatta napannu tu lussaw i mundo. Daralan na Dios si Satanas anna i ngamin nga minallussaw nga kagitta na.—Salmo 37:38; Roma 16:20.
-
2. I MARAKE NGA MUNDO NI SATANAS. Alsan na Dios i ngamin nga kegafuan na lussaw taw ta mundo, nelagum ngana i marake ira nga pulitiko anna lider ira na relihion nga manginfluwensia ta totolay nga mallussaw. Alsanan gapa na Dios i negosio ira nga kakkam, darogas, anna manamantala ta totolay.—2 Pedro 3:13.
-
3. KINA-IMPERFEKTO. Niyesplika na Biblia nga namana na ngamin nga totolay i kina-imperfekto. Megafu tatun, egga i tendensia tam nga mannono, makatageno, anna magangngua tu marake. (Roma 5:12) Angngarigan na, egga i tendensia tam nga makatageno anna mangipasingan tu lussaw ta tanakuan. Duffunan ittam na Dios nga malsa danatun nga tendensia tapenu permanente nga mapawan i lussaw.—Isaias 54:13.
NEPROMESA TA BIBLIA I MUNDO NGA AWAN NGANA TU LUSSAW
-
1. AWAN NOKA TU KAWAN NA HUSTISIA. Mammaguray noka ta interu davvun i Pappatulan na Dios. Patas anna mannanayun yatun nga gobiernu nga egga ta langi. (Daniel 2:44) Awan ngana saw tu pangireruma anna pakkorontra. Itunung na Dios i ngamin nga kawan na hustisia nga pappasa-pasattam sangawe.—Lucas 18:7.
-
2. MEMAMMO NOKA I MUNDO. Awan ngana tu mazziga-riga megafu ta kinavayolente onu gerra. (Salmo 46:9) Memammo noka ta davvun ta minangngaya ta imammo i ngamin nga maddian taw.—Salmo 72:7.
-
3. MATTOLAY ITTAM TU MANNANAYUN NGA PERFEKTO I PADDIA-PADDIAN. Makka-aya-aya i ngamin nga totolay ta davvun. (Mateo 22:39) Awan ngana tu mavurung. Ari tam ngana gapa nga manono i marake ira nga nesimmu. (Isaias 65:17) Sonu napawan ngana i lussaw, “mattolay [ittam] ta imammo nga mannanayun.”—Salmo 37:11.
Kayà mu kari nga maddian ta kunnatun nga mundo? Sangawe paga laman, aru ngana i tumuttuttul ta tuttuddu na Biblia tapenu malsa da i lussaw ta futu da. (Salmo 37:8) Kunnatun i kukukuan na minillion nga Saksi ni Jehova ta interu mundo. Maski nu madduruma i kultura anna naggafuanadda, makka-aya-aya anna mattaradday ira.—Isaias 2:2-4.
Kakayà na Saksi ira ni Jehova nga ituddu i nagigiammu da nu kunnasi nga arubangan i kawan na hustisia anna pangireruma. Mammuammu nu kunnasi nga sisinu nga matalianan tu aya i lussaw nga mataga-tageno mu. Magigiammum nu kunnasi nga tratuan tu masippo i totolay maski paga ari ira nga minappabalo onu minallullussaw ira. Magayayya ka nukua anna mas makkasta i relasiommu ta totolay. Pinaka-importante, mammuammu nu anni i kuammu tapenu mabbalikka tu sakup na Pappatulan na Dios. Tatun nga tiempo, awan ngana tu tolay nga mangikalussaw ta kasittolay na.—Salmo 37:29.