Nu ari paga, awayya na nga masingi-singammu nga mesissimmu yatun ta tanakuan. Magigginna tam ta balita nga aru nga totolay i mekala-kalussaw megafu ta nasiodda, lahi da, onu relihiodda. Megafu tatun, aru nga gobiernu i nagangngua tu dob ira kontra ta totolay nga magaggangngua tu krimen megafu ta lussaw.

Marresulta laman ta lussaw i lussaw. Nu mekala-kalussaw i tadday nga tolay, gagangay ngana nga mallussaw gapa yayya adde ta mangibalo yayya.

Awayya na nga naekspiriensam ngana i pangireruma, pangananassing, mahusgan, mauyaw, anna mainsulto. Ngem egga paga i mas vayolente nga resulta na lussaw kagitta na panantalaw, panaral ta pakkukua na tanakuan, pangatake, rape, pamatay, onu pangufu tu lahi.

Tabbagan naw nga magazina i tumunug ira nga pakkiavu:

• Ngatta napannu tu lussaw i mundo?

• Kunnasi nga malsa i lussaw?

• Duttal paga kari i tiempo nga awan ngana tu pallullussaw? Kunnasi?