Mapia Anna Marake: I Biblia—Mapattalakkan nga Giya

I-PLAY

Ariattam siguradu nu anni i resulta na piliattam ira nu maddesision ittam laman segun ta matageno tam onu matageno na tanakuan nga totolay. Ipasingan na Biblia nu ngatta, ngem egga paga i kuan na Biblia. Uffunan na ittam nga mammuan i mapia anna marake—i makoffun tapenu mabbalin ittam tu magayayya.

GIYA NGA KAWAGATTAM

Ipakanawag na Biblia nga kawagan na totolay i uffun ni Jehova a nga Dios anna ariadda vuluvuga nga megiya i baggi da. (Jeremias 10:23) Yari tu nangiyawa yayya tu mapattalakkan ira nga giya ta Biblia. Iddeddu na i totolay ira anna arianna kayà nga matakitan ittam anna marigatan megafu ta marake ira nga desision. (Deuteronomio 5:29; 1 Juan 4:8) Bilang Namaratu nittam, masirib anna aru i pakannammu ni Jehova yari tu meyawa na nittam i kapianan nga tabarang. (Salmo 100:3; 104:24) Ngem, arianna ittam pilitan na Dios nga tuttulan i estandarte na ira.

Niyawa ni Jehova ta ollu nga lalaki anna babay, si Adan anna Eva, i ngamin nga kawagadda tapenu magayayya. (Genesis 1:28, 29; 2:8, 15) Nangiyawa gapa yayya tu simple nga bilin nga ekspektan na nga tuttuladda. Ngem niddan na ira tu lallaguray nga mappili nu tuttuladda i bilin na onu ari. (Genesis 2:9, 16, 17) Makaparaddam, pinili ni Adan anna Eva nga tuttulan i sarili da nga estandarte imbes nga estandarte na Dios. (Genesis 3:6) Anni i resulta na? Mas magayayya kari i totolay nu ira lagapa i maddesision nu anni i mapia anna marake? Ari. Pakurugan na historia nga ari makeyawa tu mannanayun nga imammo anna pagayayya i ari pattuttul ta estandarte na Dios.—Eclesiastes 8:9.

Mangiyawa i Biblia tu giya nga kawagattam tapenu makangngua tu masirib nga desision, maski nu anni paga i naggafuattam. (2 Timoteo 3:16, 17; innan i kahon nga “ Libru nga Para ta Ngamin.”) Innan nu kunnasi ittam nga uffunan na Biblia.

Ammuan i aru paga nu ngatta mepangngo laman nga magalan i Biblia tu “uvovug na Dios.”—1 Tesalonica 2:13. Girawan i video nga Sinni i Autor na Biblia? ta jw.org.

NU NGATTA ARU I ARI MANGURUG TA BIBLIA

Kagian na karuan nga totolay nga ari paggafuan na mapia nga giya i Biblia. Awayya na tu kagiadda i tumunug.

I kagian na totolay: “Makkorontra i tuddu na Biblia.”

I kurug: Awayya na nga gitta na makkorontra i karuan ira nga teksto ta Biblia ngem nu innattam i konteksto, historia, i pagimamma na nattura tatun, anna i tanakuan paga, mapakurug tam nga ari makkorontra danatun.

Tapenu mammuammu i karuan nga angngarigan, bibbigan i artikulo nga “May Pagkakasalungatan ba sa Biblia?” ta jw.org/tl.

I kagian na totolay: “Aru nga totolay nga makkagi nga tuttuladda i Biblia i magangngua mabba tu marake, yari ta ari tu paggafuan na mapia nga giya yatun.”

I kurug: Ari tu i Biblia i makagafu ta marake nga kondukta na totolay ira nga ari mangiyaplika ta tuttuddu natun. Kinagi na nga aru nga totolay—nelavu i lider ira na relihion—nga makkagi nga tuttuladda i Biblia i ari nga tumuttul tatun. Kagian na paga nga megafu tatun, para-paraketadda i tuddu ira na Biblia.—2 Pedro 2:1, 2.

Tapenu masingan i tadday nga angngarigan na ari panuttul na aru ira nga lider na relihion ta tuttuddu na Biblia, bibbigan i artikulo nga “Negosyo Lang Ba ang Relihiyon?” ta jw.org/tl.

I kagian na totolay: “Ari irespeto na totolay nga tumuttul ta Biblia i pagimamma na tanakuan.”

I kurug: Pagaramman na Biblia nga marespeto i pattratu tam ta tanakuan. Arianna suportan i pagimamma na totolay nga. . .

mas atannang ira anne ta tanakuan nga totolay.—Filipos 2:3.
ariadda nga irespeto i totolay nga tanakuan i kuru-kurugadda.—1 Pedro 2:17.
fuersan i tanakuan nga parigan i pagimamma da.—Mateo 10:14.

Ipasingan na Biblia nga kanayun masippo anna ari mangireruma i Dios ta totolay anna kayà na nga kunnatun i kuattam.—Roma 9:14.

Para ta aru paga nga informasion, bibbigan i artikulo nga “Pangirespeto ta Padduruma Tam—Nu Kunnasi Makoffun i Biblia” ta jw.org.

IGIYA ITTAM NA DIOS GUKABAN NA BIBLIA

Mabibbig tam ta Biblia i pakilallang ni Jehova ta totolay ira namegafu paga tagga. Moffunan na ittam nga mammuan i pagimamma na Dios ta mapia anna marake, makabenefisio anna mamappeligro nittam. (Salmo 19:7, 11) Mammuattam tatun i prinsipio ira nga makoffun nittam nga makangngua tu masirib ira nga desision ta kada aggaw.

Angngarigan na, ikonsidera i tabarang ta Proverbio 13:20: “I makikakkavulu ta masirib ay mabbalin tu masirib, ngem i makillivu-livu ta awan tu ammu na ay marake i pattuppalan na.” Makoffun yatun nga prinsipio tagga anna ta kaggawattam. Aru i praktikal anna makoffun ira nga prinsipio ta Biblia.—Innan i kahon nga “ Mannanayun i Sirib na Biblia.”

Awayya na nga manono mu, ‘Makasiguradu ngà kari nga makoffun i giya na Biblia magadde sangawe ta kaggawattam?’ Ikonsidera na tumunug nga artikulo i karuan ira nga ekspiriensa.

a Jehova i personal nga ngagan na Dios.—Salmo 83:18.

MANNANAYUN I SIRIB NA BIBLIA

Maski nu nabalin nga netura i Biblia ma-2,000 dagun ngana i nappasa, makoffun lagapa yatun nittam sangawe. Ari nanguli i ikaya na ngamin nga totolay—kayà da i magayayya anna makasta nga pattolay. (Eclesiastes 1:9) Moffunan ittam na mannanayun nga sirib na Biblia nga makua yatun.

Pakkagi tu kurug

“Karagatammi nga mattolay nga mapammakatalakkan ta ngamin nga gannug.” —Hebreo 13:18 NW.
“Yuri i minakkoko ay mawag tu ari ngana nga makkoko. Mattrabahu lallagu ta anni laman nga matunung nga ikalangan.”—Efeso 4:28.

Relasion ta tanakuan

“Ari tu i pammakapian na baggi nu laman i nonopan nu, nu ari i pammakapian na ikattolay nu.”—1 Corinto 10:24.
“Makkapasa-pasensia anna makkapaka-pakoma kamu.”—Colosas 3:13.

Paddesision

“Kurugan na inosente nga tolay i kada uvovug, ngem pannonopan tu mapia na masirib i kada dakkua na.”—Proverbio 14:15.
“Masingan na ma-uto i peligro anna mattagu yayya,ngem madderechu lagapa i awan tu ekspiriensa na anna mazziga-riga yayya ta resulta na ira.”—Proverbio 22:3.

PASSIFUSIFUTAN