Mapia Anna Marake: I Desision nga Mawag Tam Kuan
Dakal i efekto na ta pattolay tam na piliattam nga moral nga estandarte nga tuttulan. Ammu yatun ni Jehova nga Dios. Yari tu kayà na nga tuttulattam i estandarte na.
Kayà ni Jehova nga memammo anna magayayya i pattolay tam.
“Sakan si Jehova nga Dios mu, I manuttuddu nikaw tapenu mabenefisiowakka, I mangigiggiya nikaw ta dalan nga mawag tu lakarammu. Nu magginna ka laman nakuan ta bili-bilikku! Mabbalin i imammo mu tu kagitta na bannag anna i kinatunung mu tu kagitta na pala-palung na bebay.”—Isaias 48:17, 18.
Megafu ta yayya i Namaratu nittam, ammu ni Jehova i kapianan nga pangusattam ta pattolay tam. Kayà na nga alawatattam i pangigiya na megafu ta pammakapianattam yatun. Nu tuttulattam i bili-bilin na Dios, ariattam ngana mavurung ta resulta na desisiottam. Kanayun nga mapia i resulta natun, anna mabbalin tam tu memammo anna magayayya.
Ari kiddawan ni Jehova nga kuattam i imposible.
“Megafu ta yaw nga bilin nga ibilikku nikaw ay ari nga mariga para nikaw, ari gapa yaw nga arayyu.”—Deuteronomio 30:11.
Nu mattolay ittam segun ta moral nga estandarte na Dios awayya na nga egga i mawag nga uliattam ta nonopan anna kuattam ira. Ngem ari tu sossobra i ikiddaw nittam ni Jehova. Megafu ta yayya i Namaratu, ammu na i mawayya tam nga kuan. Nu mas mammammu tam si Jehova, masingattam nga “i bili-bilin na, ay ari gammabba tu mariga nga tuttulan”—1 Juan 5:3.
Nipromesa ni Jehova nga uffunan na danuri mattolay ta estandarte na.
“Sakan, si Jehova nga Dios mu, agga-tammi ku i ziwanan nga limam, i makkakkagi nikaw, ‘Ari ka maganassing. Uffunattaka.’”—Isaias 41:13.
Makapattolay ittam ta moral nga estandarte na Dios megafu ta uffunan na ittam. Igiya na ittam gukaban na Uvovug na, i Biblia, nga mangiyawa nittam tu pamagaram anna iddanama.
Napakurug na minillion nga totolay ta interu mundo nga nu tuttulattam i estandarte na Biblia pakastan natun i pattolay tam. Yari tu ammuan paga i makasta ira nga tabarang na Biblia. Gigiammuan i nebase Biblia nga brosiur nga Magayayya nga Mattolay tu Mannanayun! awan tu paga natun anna available ta jw.org. Yaw ira i leksion na:
-
Kunnasi Naka Moffunan na Biblia?
-
Makakkasta i Iddanama nga Nipromesa na Biblia
-
Mangurug Ka Kari ta Kagian na Biblia?
Nu gigiammuammu i Uvovug na Dios, i Biblia, masingammu nga makoffun yatun nittam magadde sangawe; mapattalakkattam yatun sangawe adde ta mannanayun. (Salmo 111:8) Mabbalin tu makasta i pattolay tam nu tuttulattam i moral nga estandarte na Biblia. Ngem ari ittam nga fuersan na Dios nga kuan yatun. (Deuteronomio 30:19, 20; Josue 24:15) Desision yatun nga mawag nga kuan na kataggi-tadday nittam.
